Lu̍kū 9
9
Chi̍i̍sū ve᷅m bu̍ɛ̍i̍yāā ndūa̍a̍
(Māa̍ti̍u̍ 10:5-15; Ma̍kī 6:7-13)
1Mi̍ Chi̍i̍sū ve̍e̍lū bu̍ɛ̍i̍yāā ndūāā tɔ̍ a̍ ā ŋīɔ̍ɔ̍ŋnda̍ nāa̍ pi᷅lɛ̍. Mbo̍ kē nda̍ kpāāyāa̍ a̍ di̍o̍o̍ le̍ nyi̍nāā wɔ̄ɔ̍ŋnda̍ tōūwɔ̄ɔ̍, ndu̍yɛ̍ vɛ̄lɛ̄, mā sīŋgi̍ nāāla̍ŋ. 2O̍ ko̍ŋ kɔ̍ɔ̍lī, mbo̍ vīām nda̍ vɛ̄lɛ̄ le̍ mā kɔ̍ di̍mī sūɛ̍i̍ Mɛ̄lɛ̄kɛ̍i̍ a̍ māsāle̍ Mɛ̄lɛ̄ka̍le̍ŋ o̍kɔ̄ɔ̄, ndu̍yɛ̍ le̍ mā sīŋgi̍ wānāā lānāāwa̍. 3O̍ ko̍ŋ kɔ̍ɔ̍lī, mbo̍ dīmūl nda̍ āā, “Lā chu̍ā nyɛ̍ o̍ nyɛ̍ o̍ kɔ̄lā nyāla̍ŋ ni᷄ŋ te̍. Lā chu̍ā tīnda̍ le̍. Lā chu̍ā bɔ̄lɔ̄ le̍. Nyɛ̄ dīāā bɛ̍ɛ̍, lā chu̍ā le̍. Īka̍ni̍ bɛ̍ɛ̍, lā chu̍ā le̍. Lā chu̍ā dōmāla̍ ti̍ɔ̍ɔ̍ŋ te̍. 4Chīɛ̄ī o̍ chīɛ̄ī nda̍ yīya̍ nya̍ pɛ̍, lā lo̍ lo̍ŋ ha̍a̍a̍ mbō lo̍ o̍ ko̍ŋ mī lā fāŋa̍ŋ chi̍e̍e̍ ko̍ŋ ni᷄ŋ. 5Ndu̍yɛ̍, chi̍e̍e̍ o̍ chi̍e̍e̍ nda̍ kɛ̄ɛ̍ nya̍ pɛ̍, tē lā wa̍ fāŋa᷄ŋndo̍ lo̍ŋ pɛ̍, lā ko᷄ŋ chu̍ndo̍o̍ nya̍ o̍ ŋ̄pēlū le̍ nda̍ chɔ̄mndo̍ māā ā tōsa̍ su̍ɛ̍i̍ kɛ̍ndɛ̄ le̍.”
6Mi̍ bu̍ɛ̍īya̍ ha̍ā kūā. Ma̍ bālū o̍ sɔ̄ndɔ̄kɔ̍lta̍ŋ a̍ wāŋnda̍ Yōōŋgū Kɛ̄ndɛ̍ Mɛ̄lɛ̄ka̍a̍ dīmūllo̍ a̍ wāŋnda̍ sīŋgīo̍o̍ bā o̍ bā fe̍e̍.
Hɛ̍lɔ̄ɔ̄ dɔ̍u̍nu᷄ŋ kɔ̄ndɔ̄fi̍li̍ a̍ Chi̍i̍sū o̍kɔ̄ɔ̄
(Māa̍ti̍u̍ 14:1-12; Ma̍kī 6:14-29)
7O̍ ko̍ŋ, mi̍ Māsāa̍ Hɛ̍lɔ̄ɔ̄ tu̍ɛ̍ī a̍ nyɛ̄ o̍ nyɛ̄ Chi̍i̍sū wa̍ tōsāa̍ o̍kɔ̄ɔ̄. Mbo̍ dūāūnu᷄ŋ kɔ̄ndɔ̄fi̍li̍. Kāni̍ fo̍ndōle̍, wāŋnda̍ ā pūm ā wa̍ dīmīo̍o̍ māā Chɔ᷄ŋ Wānā Yi̍ŋāa̍ ndu̍ mi̍i̍ŋgu̍ yōōmū ni̍. 8Mi̍ ā pūm dīmī māā Īla̍a̍chā hi᷅ŋ vɛ̄lɛ̄ ni̍. Mi̍ ā pūm dīmī vɛ̄lɛ̄ māā wānāā māsīndīa̍a̍ su̍a̍ā le̍ Mɛ̄lɛ̄ka̍ wa̍, ō pīlɛ̍ mi̍i̍ŋgu̍ yōōmū ni̍. 9Mɛ̄ɛ̍ Hɛ̍lɔ̄ɔ̄ tu̍e̍ī dīōmnda̍ŋ nda᷅ŋ, mbo̍ dīmī āā, “Kpōo̍, Chɔ᷄ŋ ya̍ ke̍lū bōlle̍ŋ mbo̍ wū wo̍, mbō mīīŋgu̍ vɛ̄lɛ̄ yōōmu̍? Kɛ̍ ndu̍yɛ̍, ō nɛ̄ɛ̍nɛ̍ che᷅le̍ŋ ya̍ I̍ chō yɛ̄ ho̍ō tɔ̍ɔ̍ wa̍ā nu̍a̍ā tūēīyɔ̄ɔ̍ a̍ ndu̍ o̍kɔ̄ɔ̄?” Mbo̍ kīndī le̍ mā chīīki̍āŋ nda̍ Chi̍i̍sū.
Chi̍i̍sū ke̍ wānāā wāa̍la̍ ŋu̍ɛ̍ɛ̍nu̍a̍a̍ nyɛ̄ dīa̍a̍
(Māa̍ti̍u̍ 14:13-21; Ma̍kī 6:30-44; Chɔ᷄ŋ 6:1-14)
10Mi̍ wānāā Chi̍i̍sū ve᷅m hɔ̄ltē ndɔ̄ wa̍ mīīŋgū ma̍ dōōnu᷄ŋ Chi̍i̍su̍ ko̍na̍ a̍ wa̍li̍ nda̍ tōsa̍ wo̍. O̍ ko̍ŋ kɔ̍ɔ̍lī, mi̍ Chi̍i̍sū chu̍ā nda̍ ma̍ kūānu᷄ŋ o̍ chi̍e̍e̍ pi᷅lɛ̍, dīōla̍ŋ āā, Bɛ̄tīsa̍i̍dā, nda̍ kpe̍e̍le̍. 11Mɛ̄ɛ̍ fāŋgāa̍ sīna̍ a̍ ndi̍ o̍kɔ̄ɔ̄, ma̍ tūāl ndu̍ kɔ̄ɔ̄lī. Mɛ̄ɛ̍ nda̍ kōma̍l ndu̍, mbo̍ chɛ̄l nda̍ a̍ kɔ̄l kɛ̄ndɛ̄. Mbo̍ sūāā nāa̍ nda̍ chūā a̍ māsāle̍ Mɛ̄lɛ̄ka̍le̍ŋ o̍kɔ̄ɔ̄. Mbo̍ sīŋgī wānāa̍ wa̍ a̍ nāāla̍ŋ nda̍.
12Pāa̍le̍ŋ le̍e̍ wa̍ ni᷅ŋ dēlɔ̄ɔ̍. Le̍ he̍ī, mi̍ bu̍ɛ̍i̍yāā tɔ̍ a̍ ā ŋīɔ̍ɔ̍ŋnda̍ hūŋ nāa̍ Chi̍i̍sū chu̍a̍. Ma̍ dīmūl ndu̍ āā, “Pāa̍le̍ŋ lē chō ni᷅ŋ dēlɔ̄ɔ̍. Le̍la̍ŋ, to̍sa̍ mī wāŋnda̍ kūɛ̄ o̍ chi̍o̍o̍ŋ a̍ sɔ̄ndɔ̄kɔ̍lta̍ŋ mā kɔ̍ nu̍u̍vīāā nāa̍ hi̍nīa̍a̍ a̍ nyɛ̄ dīa̍a̍ mā dē. Nūm pi̍la̍ ā chē nāa̍ na̍a̍ ŋ̄ chō o̍ po̍llo̍ ni᷄ŋ na̍nu᷄ŋ nda̍.”
13Kɛ̍ mi̍ Chi̍i̍sū di̍mūl nda̍ āā, “Lā ke̍ nda̍ nyɛ̄ dīa̍a̍ ā di̍o̍.”
Ma̍ dīmūl ndu̍ āā, “Bēe̍dīi̍yo̍ kpūŋgba᷄ŋ ŋ̄ ŋūɛ̍ɛ̍nu̍ a̍ sūūwa̍ ā ŋīɔ̍ɔ̍ŋ ko̍ni̍ na̍a̍ ŋ̄ nɔ̄ ni̍. Mɛ̄ɛ̍ ni᷅ŋ dɔ̍ɔ̍ mā di̍mi̍ māā ŋ̄ kɔ̍ pi̍o̍ndū nyɛ̄ dīa̍a̍ le̍ fāŋgā ka̍āku̍u̍wo̍ ho̍ō kpo̍u̍.” 14Ndu̍yɛ̍, pūa̍a̍ su̍e̍e̍ nda̍ a̍a̍ wa᷅ wa̍a̍la̍ŋ lā ŋūɛ̍ɛ̍nu̍.
Mi̍ Chi̍i̍sū di̍mūl nda̍ āā, “Lā tōsa̍ mī wāŋnda̍ cha᷄l a̍ ku̍ndāla̍ŋ, ku̍ndā o̍ ku̍ndā ŋ̄wāŋ be̍le̍-ŋu̍ɛ̍ɛ̍nu̍.”
15Mi̍ bu̍ɛ̍i̍yāā ndūa̍a̍ tōsā mɛ̄ɛ̄ o̍ di̍mu̍l nda̍ yɛ̍. Mā tōsā mi̍ wāŋnda̍ chāl. 16Mi̍ Chi̍i̍sū bi̍ī bēe̍dīi̍ kpūŋgbāŋ ŋu̍ɛ̍ɛ̍no̍o̍ a̍ sūūwāā ŋīɔ̍ɔ̍ŋnda̍. Mbo̍ tōfa̍ chōo̍ cho̍o̍. Mbo̍ mēl Mɛ̄lɛ̄ka̍ ba̍li̍ka̍. Mbo̍ yīmī yīmī. Mbo̍ kē bu̍ɛ̍i̍yāā ndūa̍a̍ le̍ mā pīɔ̍u̍ wāŋnda̍. 17Nda̍ kpo̍u̍ ma̍ dīā ma̍ pūm. Ma̍ dēmā. Mi̍ bu̍ɛ̍īya̍ chɔ̄ɔ̄vīāā ō bīŋgī bi̍ŋgī nda̍ dēma̍ wo̍ ma̍ dūāū o̍ kāmbɛ̍i̍la̍ŋ ni᷄ŋ. Mbo̍ pīā kāmbɛ̍i̍la̍ŋ tɔ̍ a̍ lā tīɔ̍ɔ̍ŋ.
Pītɛ̍ di̍mi̍ māā Chi̍i̍su̍ cho̍ wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ wo̍ ni̍
(Māa̍ti̍u̍ 16:13-19; Ma̍kī 8:27-29)
18Pāa̍le̍ pi᷅lɛ̍, Chi̍i̍sū wa̍ Mɛ̄lɛ̄ka̍ pīɛ̄īyo̍ ndu̍ pīlɛ̍, mi̍ bu̍ɛ̍i̍yāā ndūa̍a̍ wā īchāli̍ ndu̍ i̍kɛ̍i̍. Mi̍ Chi̍i̍sū lo᷅ lo̍ŋ mbo̍ nyūnā nda̍ āā, “Wāna̍ māā vɛ̄ɛ̍nɛ̍ wāŋnda̍ dīmi̍ yɛ̄ māā ya̍ cho̍?”
19Ma̍ mūlī āā, “Ā pūm ā dīmi̍ āā, ‘Chɔ᷄ŋ Wānā Yi̍ŋāa̍ ŋ̄ chō ni̍.’ Ā pūm yɛ̍ āā, ‘Īla̍a̍chā.’ Ā pūm yɛ̍ āā, ‘Wānāā māsīndīa̍a̍ nda̍ a̍a̍ su̍a̍ā le̍ Mɛ̄lɛ̄ka̍ wa̍ ō pīlɛ̍ mi̍i̍ŋgu̍ yōōmū ni̍.’ ”
20Mbo̍ nyūnā nda̍ āā, “Vɛ̄ɛ̍nɛ̍ nya̍ nya̍ dīmi̍ yɛ̄, wāna̍ māā vɛ̄ɛ̍nɛ̍ ya̍ I̍ cho̍ yɛ̄?”
Mi̍ Pītɛ̍ mu̍lī āā, “Nu᷄m cho̍ Ki̍li̍tī ni̍, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍.”
Chi̍i̍sū so̍ō a̍ mɔ̍nɛ̍i̍ ndūɛ̍i̍ ndu̍yɛ̍ a̍ pīɔ̍m ndɔ̄ɔ̍ o̍kɔ̄ɔ̄
(Māa̍ti̍u̍ 16:20-28; Ma̍kī 8:30–9:1)
21Kɛ̍, mbo̍ sīlā nda̍ ō kālā ka̍lā māā ā di̍mūl wānā o̍ wānā a̍ ndi̍ o̍kɔ̄ɔ̄ le̍. 22Mi̍ Chi̍i̍sū di̍mūl bu̍ɛ̍i̍yāā ndūa̍a̍ āā, “Wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ ō nɔ̄ le̍ mɔ̍nɛ̍i̍ bīyɔ̄ɔ̄ ta̍u̍. Ndu̍yɛ̍, lāŋgba̍ā kālla̍, a̍ wānāā bɛ̄ndūāā sōlīāā lāsa̍lāa̍, a̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍, ā chō ndu̍ kɛ̄ɛ̄, ndu̍yɛ̍ mā dīī ndu̍. Kɛ̍ ndu̍yɛ̍, tē pālɛ̍i̍ ī hīōū pɛ̍ i̍ ya̍a̍, Mɛ̄lɛ̄ka̍ mīŋgi̍ ndu̍ yōōmū.”
23Mi̍ Chi̍i̍sū di̍mūl wāŋnda̍ kpe̍de̍ āā, “Wānā o̍ wāna̍ hɛ̍na̍ŋ le̍ wāa̍ wāna̍ nī pɛ̍, mɛ̄ɛ̍ wānā ko̍ŋ ō to̍sā hɛ̄na᷄ŋ kɔ̄l ndɔ̄ɔ̍ le̍. Ndu̍yɛ̍, wānā ko̍ŋ nɔ̄ mbō wa̍ ō bɛ̄ɛ̄ndīa̍ŋ le̍pa̍a̍ ō lēpāa̍ le̍ mā dīī ndu̍. Ndu̍yɛ̍ o̍ ko̍ŋ kɔ̍ɔ̍lī, mbō sīmnu᷄ŋ bu̍ɛ̍ī nī. 24Kāni̍, wānā o̍ wāna̍ ki̍ndi̍ le̍ yōōmū ndɔ̄ɔ̍ chīīndīa̍a̍ pɛ̍, mɛ̄ɛ̍ ō chō yōōmū kpe̍e̍kpe̍i̍yo̍ fūlā. Kɛ̍ ndu̍yɛ̍, wānā o̍ wāna̍ yōōmū ndɔ̄ɔ̍ hɛ̄lu᷄ŋ ndu̍ le̍ ya̍ pɛ̍, mɛ̄ɛ̍ ō chō hūnɔ̄ɔ̄ yōōmū kpe̍e̍kpe̍i̍yo̍ sɔ̄lā. 25Kāni̍, tɔ̄nɔ̍ yɛ̄ɛ̍nɛ̍ wāŋndo̍ sɔ̄lā yɛ̍, tē ō wa̍ pɛ̍ mbō sɔ̄la̍ chi̍e̍ēŋndo̍ ho̍ō kpo̍u̍, kɛ̍ o̍ ko̍ŋ kɔ̍ɔ̍lī, mbō fūla̍ yōōmū kpe̍e̍kpe̍i̍yo̍? 26Ya̍ wāna̍ nda̍ vēēlū ho̍ō āā, Po̍ Wānā Pɔ̍nɔ̍ɔ̍ wo̍ I̍ cho̍ hūnɔ̄ɔ̄ o̍ nāŋɔ̄ɔ̄ nūu̍ ni᷄ŋ, a̍ o̍ nāŋɔ̄ɔ̍ Fi̍nyā nūu̍ ni᷄ŋ, a̍ nāŋɔ̄ɔ̍ ki̍i̍la̍a̍ Mɛ̄lɛ̄ka̍a̍. O̍ ko̍ŋ, wānā o̍ wāna̍ kɛ̍ɛ̍ ya̍ te̍le̍ŋndo̍ ho̍ō pɛ̍, ndu̍yɛ̍, mbō kɛ̄ɛ̍ dīōmndā nīla̍ŋ pɛ̍, wānā ko̍ŋ, I̍ cho̍ hūnɔ̄ɔ̄ ndu̍ kɛ̄ɛ̄. 27Kɛ̍, mī di̍mu̍l nya̍ tōnya̍a̍, wānāā pūm ā chō na̍nu᷄ŋ, ā lō ni̍ŋ yo̍o̍mū mā chē māsāle̍ Mɛ̄lɛ̄ka̍le̍ŋ.”
Chi̍i̍sū ma̍ŋga̍ŋ bu̍ɛ̍i̍yāā ndūa̍a̍ o̍ hɔ̄l
(Māa̍ti̍u̍ 17:1-8; Ma̍kī 9:2-8)
28Chɔ̍ŋ a̍ bōōndi̍i̍ Chi̍i̍sū di̍mi̍ dīōmnda̍ŋ nda᷅ŋ nde̍, pālɛ̍i̍ ī hīōū ī ŋɔ̄ma̍a̍. O̍ ko̍ŋ, mi̍ Chi̍i̍sū chu̍ā Pītɛ̍, a̍ Chɔ᷄ŋ, a̍ Chēmi̍si̍, ma̍ kūā o̍ pēmbēi̍ chōo̍ le̍ Mɛ̄lɛ̄ka̍ pīɛ̄īyo̍. 29Mɛ̄ɛ̍ o̍ wa̍ Mɛ̄lɛ̄ka̍ pīɛ̄īyo̍, mi̍ hɔ̄lāā ndūa̍a̍ māŋga᷄ŋ. Mi̍ nyɛ̄la̍ŋ ndu̍ lēkɔ̄ɔ̍ la̍ yɔ̄nu᷄ŋ ŋɛ̍lɛ̄ŋgi̍ ŋɛ̍lɛ̄ŋgi̍ bɛ̍ndū a̍ dīōndɔ̄ɔ̍. 30-31O̍ lēpīlɛ̍ ni᷄ŋ kpe̍, mi̍ wāŋ pīāāndūa̍a̍ fūlā ā ŋīɔ̍ɔ̍ŋ a̍ pa̍ŋgēlo̍o̍ ō bālāā nda̍ si̍lɔ̍. Ō pīlɔ̍ɔ̍ dīōla̍ŋ āā, Mūu̍sē, ō pīlɔ̍ɔ̍ dīōla̍ŋ āā, Īla̍a̍chā. Ā wa̍ sūūki̍āŋndo̍ nda̍ Chi̍i̍sū wa̍ā. Ā wa̍ sūɛ̍i̍ a̍ pīɔ̍m Chi̍i̍sū ndu̍ o̍o̍ nɔ̍ le̍ hūnɔ̄ɔ̄ sɔ̄lāa̍ Chūlu̍sɛ̄lɛ̄m ndo̍ o̍kɔ̄ɔ̄. 32A̍ bōōndi̍i̍ ke̍ŋ, Pītɛ̍ ni̍ a̍ chāāŋāā ndūa̍a̍ ā wa̍ o̍ lūa̍a̍ŋ. O̍ ko̍ŋ, ma̍ tīāndū. Tīōndɔ̄ɔ̍, ma̍ chā Chi̍i̍sū o̍ nāŋɔ̄ɔ̄ ndɔ̄ɔ̍ ni᷄ŋ. Wānāā ŋīɔ̍ɔ̍ŋnda̍ ha̍ā ā wa̍ ndu̍ īsīsi̍ i̍kɛ̍i̍. 33Mɛ̄ɛ̍ wāŋnda̍ ha̍ā ā wa̍ Chi̍i̍su̍ mɛ̄īyo̍ ma̍ wā kɔ᷄nda̍ŋ, mi̍ Pītɛ̍ di̍mūl Chi̍i̍sū āā, “Māsānɔ̄ɔ̍, ō bɛ̄nda̍ bɛ̍ɛ̍ mi̍ ŋ̄ wā na̍nu᷄ŋ. Ŋ̄ bāŋ ndɔ̍ būu̍ŋnda̍ŋ lā yāa̍, ō pīlɛ̍ le̍ nūm, ō pīlɛ̍ le̍ Mūu̍sē, ō pīlɛ̍ le̍ Īla̍a̍chā.” Kɛ̍, nyɛ̄ chēle̍ŋ ndo̍ pɔ̍ Pītɛ̍ ndu̍ wa̍ ho̍ō dīmīo̍o̍ ni̍.
34Pītɛ̍ lo̍ sūɛ̍i̍, mi̍ yu̍mbu̍ yu̍mbo̍o̍ hu᷄ŋ ku̍mbū nda̍ kpu̍. O̍ ko̍ŋ, mi̍ sīōōŋnde̍ bīī nda̍. 35Mi̍ dīōmndo̍ sūāā o̍ yu̍mbu̍ yu̍mbo̍o̍ ni᷄ŋ āā, “Po̍ nūu̍ cho̍ ho̍ō ni̍. Ndu̍ ya̍ hɛ̍li̍ ni̍. Lā tūe̍i̍ ndu̍ dīōm.”
36Mɛ̄ɛ̍ dīōmndo̍ ho̍ō sōōnu᷄ŋ, ma̍ chā Chi̍i̍sū ndu̍ pīlɛ̍ ni᷅ŋ ko̍ni̍. Kɛ̍, bu̍ɛ̍i̍yāa̍ Chi̍i̍sūa̍a̍ ā dīmu̍l wa̍nā o̍ wānā bo̍o̍ndi̍i̍ kēŋ a̍ nyɛ̄ nda̍ chē ho̍ō wo̍ o̍kɔ̄ɔ̄ le̍. Ma̍ mēīnu᷄ŋ do̍ŋ.
Chi̍i̍sū to̍ū nyi̍nā wɔ̄ɔ̍ŋndo̍ pōo̍mbɔ̄ɔ̍ kɔ̄ɔ̄lī
(Māa̍ti̍u̍ 17:14-18; Ma̍kī 9:14-27)
37Dīi̍māndɔ̄ɔ̍, mi̍ Chi̍i̍sū nda̍ bu̍ɛ̍i̍yāā ndūa̍a̍ tūāl pēmbēi̍. Mɛ̄ɛ̍ nda̍ tōl, mi̍ fāŋgā bɛ̄ndōo̍ hūŋ ndu̍ dēmūl. 38Po̍ pi᷅lɛ̍ wa̍ o̍ fāŋgā ko̍ŋ tɛ̄ɛ̄ŋ, mbo̍ dīmī chōo̍ cho̍o̍ āā, “Yāndi̍i̍, Ti̍chā, yi̍ya̍ŋ po̍ nūu̍ chōo̍ fɔ̍. I̍ nɔ̍ chu̍a̍ chēle̍ŋ te̍ mɛ̄ɛ̍ ndu̍. 39Kɛ̍, nyi̍nā wɔ̄ɔ̍ŋndo̍ chō ndu̍ kɔ̄ɔ̄lī. Tē ō chu̍a̍ ndu̍ pɛ̍ pōo̍mbɔ̄ɔ̍ kōŋu̍l chōo̍ cho̍o̍ kpe̍le̍ŋ, ō bīōndu̍ŋ, mī hīīyo̍ fūlā ndu̍ o̍ sōndō. O̍ ko̍ŋ kɔ̍ɔ̍lī, mbō bōōlu̍u̍ ndu̍. Fo̍ndāŋ bɛ̍ɛ̍ ō ya̍lā ndu̍ mālɔ̄ɔ̄ le̍. 40Mi̍ nyɔ̍ɔ̍lū bu̍ɛ̍i̍yāā nūmnda̍ le̍ mā tōū ndu̍ nyi̍nāā ho̍ō kɔ̄ɔ̄lī. Kɛ̍, ma̍ būmbā.”
41Mi̍ Chi̍i̍sū di̍mī āā, “E̍e̍e̍ nya̍ wāŋnda̍ ha̍ā. Lā nɔ̍ la̍a̍la᷄ŋ te̍ ma᷅. Lā chō bɔ̄ɔ̍ wa̍nāā tūūndu̍ɛ̍i̍. I̍ vi̍o̍ū ni᷅ŋ a̍ nya̍ la̍tu̍lu̍ ma᷅. Ndu̍yɛ̍, I̍ sa̍ŋga̍ ni᷅ŋ a̍ nya̍ bīūwɔ᷄ŋndo̍ fɔ̍.” Mi̍ Chi̍i̍sū di̍mūl fi̍nyāa̍ pōo̍mbɔ̄ɔ̍ āā, “Hu̍ŋ a̍ po̍ nūmndo̍ na̍nu᷄ŋ.”
42Mɛ̄ɛ̍ pōo̍mbɔ̄ɔ̍ wa̍ kɔ̄la̍ŋ, mi̍ nyi̍nā wɔ̄ɔ̍ŋ kōŋ chūā ndu̍ bɛ̄ɛ̄. Mbo̍ vīɔ̄l ndu̍ lɛ̄ŋ kpɔ̍l. Mbo̍ tōsā mi̍ pōo̍mbɔ̄ɔ̍ bīōndū. O̍ ko̍ŋ, mi̍ Chi̍i̍sū kpa̍ā nyi̍nā wɔ̄ɔ̍ŋndo̍. Mbo̍ tūāū ndu̍ pōo̍mbɔ̄ɔ̍ kɔ̄ɔ̄lī. Mbo̍ dīmūl fi̍nyā ndɔ̍ āā, “Ā chē po̍ nu̍mndo̍.” 43Mi̍ kɔ̄ndɔ̄fi̍llo̍ bīī wāŋnda̍ kpo̍u̍ a̍ kpāāyā bɛ̍ndū Mɛ̄lɛ̄ka̍ nɔ̄ wo̍.
Chi̍i̍sū so̍ō vɛ̄lɛ̄ a̍ pīɔ̍m ndɔ̄ɔ̍ o̍kɔ̄ɔ̄
(Māa̍ti̍u̍ 17:22, 23; Ma̍kī 9:30-32)
Kɔ̄ndɔ̄fi̍llo̍ wa̍ wɔ̄ wāŋnda̍ kpo̍u̍ a̍ nyɛ̄ ō nyɛ̄ Chi̍i̍sū to̍sa̍. O̍ ko̍ŋ, mbo̍ di̍mūl bu̍ɛ̍i̍yāā ndūa̍a̍ āā, 44“Lā ya᷄ŋ ni᷅la̍ŋ nyɛ̄ kɛ̄ndɛ̍ī o̍ dīōmndā ya̍ I̍ cho̍ la᷅ŋ nya̍ dīmūl la̍ŋ. Wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ ā chō ndu̍ mālɔ̄ɔ̄ wāŋnda̍ o̍ bā.” 45Kɛ̍, bu̍ɛ̍i̍yāā ndūa̍a̍ sīna̍ nyɛ᷅ Chi̍i̍sū di̍mi̍ wo̍ pɛ̄ŋgu̍ le̍. Mi̍ ī yɔ̄nu᷄ŋ nda̍ mɛ̄ɛ̍ nda̍ vīŋ wa̍nā i̍sɔ̍ɔ̍ yɔ̍ŋi̍ nda̍ a̍a̍ si̍na̍ ndi̍ pɛ̄ŋgu̍. Kɛ̍, sīōōŋnde̍ wa̍ nda̍ le̍ ndu̍ nyūnāa̍.
Wāna̍ cho̍ wānā ba̍nāa̍ wo̍
(Māa̍ti̍u̍ 18:1-5; Ma̍kī 9:33-37)
46Te̍le̍ŋ pi᷅lɛ̍, mi̍ bu̍ɛ̍īya̍ sāā dīōmnda̍ŋ hīŋa᷅ŋndo̍ le̍ bu̍ɛ̍i̍ wa᷅ nda̍ chōo̍ wa̍nā ba̍nāa̍ wo̍. 47Le̍ he̍ī, mɛ̄ɛ̍ Chi̍i̍sū si̍na̍ nyɛ̄ nda̍ yīya᷄ŋ ndo̍, mbo̍ chūā chūāāmbɔ̄ pɔ̄mbɔ̄ɔ̍ mbo̍ sīmi᷄ŋ ndu̍ īkɛ̄i̍. 48Mbo̍ dīmūl nda̍ āā, “Wānā o̍ wāna̍ chɛ̍l chūāāmbɔ̄ wāā nu̍a̍ā pɛ̍ le̍ mɛ̄ɛ̍ ŋ̄ chō bu̍ɛ̍ī nī yɛ̍ pɛ̍, mɛ̄ɛ̍ ya̍ ŋ̄ chɛ᷄l ko̍ŋ ni̍. Ndu̍yɛ̍, wānā o̍ wāna̍ chɛ̍l la̍ pɛ̍, mɛ̄ɛ̍ wāna̍ ve᷅m ya̍ wo̍, ndu̍ ŋ̄ chɛ᷄l ko̍ŋ ni̍. Kāni̍ fo̍ndōle̍, wāna̍ cho̍ ō pɔ̄mbɔ̄ nya̍ tɛ̄ɛ̄ŋ kpe̍de̍ wo̍, ndu̍ cho̍ wānā ba̍nā kpe̍e̍kpe̍i̍yo̍ ni̍.”
Wānā o̍ wāna̍ tu̍l na̍a̍ lēyɛ̄ le̍ mɛ̄ɛ̍ ō chō le̍ na̍a̍
(Ma̍kī 9:38-40)
49Mi̍ bu̍ɛ̍i̍ Chi̍i̍sōo̍, ndu̍ yɔ̍nūŋ māā Chɔ᷄ŋ ni̍, mbo̍ di̍mūl Chi̍i̍sū āā, “Māsānɔ̄ɔ̍, ŋ̄ chē pōo̍ dīōlā nūmnda̍ŋ pīɔ̄lɔ̄ɔ̍ o̍ nyi̍nāā wɔ̄ɔ̍ŋnda̍ tōūwɔ̄ɔ̍ ni᷄ŋ. Ndu̍yɛ̍, mi̍ ŋ̄ kūūnā ndu̍, kāni̍ fo̍ndōle̍, ō cho̍ wa̍nā na̍a̍ le̍.”
50Kɛ̍, mi̍ Chi̍i̍sū di̍mūl ndu̍ āā, “Lā ku̍u̍nā ndu̍ le̍. Kāni̍, wānā o̍ wāna̍ tu̍l nu̍m lēyɛ̄ le̍, mɛ̄ɛ̍ kūmbū nūmndo̍ o̍ cho̍ ni̍.”
Wāŋnda̍ kɛ̄ɛ̍ Chi̍i̍sū o̍ sɔ̄ndɔ̄kɔ̍lɔ̍ māSāme̍e̍līāā pīlɛ̍
51Mɛ̄ɛ̍ te̍le̍ŋ Chi̍i̍sū ndu̍ o̍o̍ nɔ̍ le̍ hēlɔ̄ɔ̍ o̍ fo̍nda᷄ŋ Mɛ̄lɛ̄ka̍a̍ wo̍ ō wa̍ le̍ fūūlūūwo̍, mbo̍ kɛ̄ɛ̄sīāā le̍ kɔ̄la̍ŋ Chūlu̍sɛ̄lɛ̄m. Mbo̍ bīī nɛ̄īyo̍. 52O̍ ko̍ŋ, mbo̍ sōlī ŋ̄wāŋ mbo̍ vīām nda̍ le̍ mā hīōū pɔ̄ɔ̄ ndu̍ lāchī. Mi̍ wānāā o̍ ve᷅m nda̍ ā kūā o̍ sɔ̄ndɔ̄kɔ̍lɔ̍ māSāme̍e̍līāā pīlɛ̍ le̍ mā bɛ̄ɛ̄ndi̍a̍a̍ nāa̍ hi̍nīa̍a̍ lo̍ŋ le̍ ndu̍. 53Kɛ̍, mi̍ wāŋnda̍ o̍ sɔ̄ndɔ̄kɔ̍lɔ̍ɔ̍ ho̍ō ā kɛ̄ɛ̄ le̍ Chi̍i̍sū nāa̍ hi̍nīa̍a̍ kīo̍o̍, kāni̍ fo̍ndōle̍, le̍ mɛ̄ɛ̍ o̍ wa̍ kɔ̄la̍ŋ Chūlu̍sɛ̄lɛ̄m yɛ̍. 54Mɛ̄ɛ̍ bu̍ɛ̍i̍yāā ndūa̍a̍, Chēmi̍si̍ ni̍ a̍ Chɔ᷄ŋ, mɛ̄ɛ̍ nda̍ tūēī a̍ ndi̍ o̍kɔ̄ɔ̄, ma̍ nyūnā Chi̍i̍sū āā vɛ̄ɛ̄, “Māsānɔ̄ɔ̍, ŋ̄ tōsa̍ mī yīŋnde̍ŋ lē chɛ᷄ŋ ɛ̄chɛ̍nɛ̄ mī lē hu᷄ŋ di̍ū nda̍ kpo̍u̍?”
55Kɛ̍, mi̍ Chi̍i̍sū mu̍li᷄ŋ nāa̍ nda̍ chūā mbo̍ dōōnu᷄ŋ nda̍ tu̍mbe̍. 56Ma̍ māl ma̍ hīāū o̍ sɔ̄ndɔ̄kɔ̍lɔ̍ chēle̍ŋ.
Nyɛ̄ Chi̍i̍sū di̍mu̍l wānāa̍ hɛ̍na̍ŋ le̍ ndu̍ tōlɔ̄ɔ̍ kɔ̄ɔ̄lī wa̍ wo̍
(Māa̍ti̍u̍ 8:19-22)
57Mɛ̄ɛ̍ nda̍ wa̍ kɔ̄la̍ŋ, mi̍ po̍ pi᷅lɛ̍ dīmūl Chi̍i̍sū āā, “Fāllo̍, bā o̍ bā fe̍e̍ ŋ̄ kɔ̍, I̍ cho̍ nu̍m tōlɔ̄ɔ̄ kɔ̄ɔ̄lī.”
58Mi̍ Chi̍i̍sū lo᷅ lo̍ŋ, mbo̍ dīmūl ndu̍ āā, “Vīsīāā yōndūa̍a̍ nɔ̄ fo̍ndāŋndā lɔ̄lāāla̍ŋ la̍ nda̍la̍ŋ. Yōūwa̍ bɛ̍ɛ̍ ā nɔ̄ wāa̍ŋnde̍ le̍ lūa̍a̍ŋ lēni᷄ŋ. Kɛ̍, wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ ō nɔ̍ fo̍ndāŋ o̍ hi̍nī mbō lɔ᷄l te̍.”
59Mi̍ Chi̍i̍sū di̍mūl pōo̍ pīlɔ̍ɔ̄ āā, “Hu̍ŋ mā sīmnu᷄ŋ bu̍ɛ̍ī nī.”
Kɛ̍, mi̍ pōo̍ dīmūl ndu̍ āā, “Fāllo̍, I̍ ku̍ā wɔ̍ fɛ̍lɛ̍ŋ mī kɔ̍ ku̍mbū fi̍nyā nūu̍.”
60Mi̍ Chi̍i̍sū di̍mūl ndu̍ āā, “Wānāa̍ nɔ̍ yo̍o̍mū kpe̍e̍kpe̍i̍yo̍ ō Nyi̍na̍ Mɛ̄lɛ̄ka̍a̍ yɔ̄ŋgū wo̍ le̍ wa̍, nda̍ chɔ̍ wa̍nāā ndāa̍ vi᷅ wa̍. Kɛ̍, nūm kɔ̍ mā kɔ̍ di̍mūl wāŋnda̍ a̍ māsāle̍ Mɛ̄lɛ̄ka̍le̍ŋ o̍kɔ̄ɔ̄.”
61Mi̍ pōo̍ pīlɔ̍ɔ̄ dīmūl ndu̍ āā, “Fāllo̍, I̍ cho̍ hūnɔ̄ɔ̄ mī wa̍ bu̍ɛ̍ī nūm, kɛ̍ I̍ ku̍ā wɔ̍ o̍ na̍a̍ lo̍ mī kɔ̍ cho̍ŋgu᷄ŋ wānāā nīa̍a̍.”
62Mi̍ Chi̍i̍sū di̍mūl ndu̍ āā, “Wānā o̍ wāna̍ ka̍ndu̍ wa̍llo̍ o̍ māsāle̍ Mɛ̄lɛ̄ka̍le̍ŋ bɛ̄ŋgu̍ pɛ̍, kɛ̍ mbō sāa̍ yēēmɛ̍i̍ le̍ sɔ̄ɔ̍ŋ wɔ̍ɔ̍ŋ ndu̍ o̍o̍ to̍sā pa̍a̍ndū wo̍ŋ mīīŋgū tōsāa̍ pɛ̍, mɛ̄ɛ̍ ō bɛ̄nda̍ le̍ wa̍llo̍ tōsāa̍ o̍ māsāle̍ Mɛ̄lɛ̄ka̍le̍ŋ bɛ̄ŋgu̍ le̍.”
Chi̍i̍sū ve᷅m ŋ̄wāŋ be̍le̍-ŋɔ̍mmɛ̍ū a̍ wānāā ŋīɔ̍ɔ̍ŋ
Currently Selected:
Lu̍kū 9: YM
Highlight
Share
Copy
Want to have your highlights saved across all your devices? Sign up or sign in
Kisi Bible © Bible Society in Liberia, 2015.
