Lu̍kū 8

Tālo̍o̍ a̍ yɛ̄yi̍i̍ nda̍ sa᷄ŋ nde̍ o̍kɔ̄ɔ̄

(Māa̍ti̍u̍ 13:1-9; Ma̍kī 4:1-9)

1O̍ ko̍ŋ kɔ̍ɔ̍lī, mi̍ Chi̍i̍sū ba̍lū o̍ chi̍e̍e̍ŋ bɛ̍ndo᷄ŋ a̍ chi̍e̍e̍ŋ pɔ̍mbɔ᷄ŋ mbō dīmūl wa᷅ŋnda̍ yōōŋgū kɛ̄ndɔ̄ɔ̍ a̍ māsāle̍ Mɛ̄lɛ̄ka̍le̍ŋ o̍kɔ̄ɔ̄. Bu̍ɛ̍i̍yāā ndūāā tɔ̍ a̍ ā ŋīɔ̍ɔ̍ŋnda̍ ā wa̍ ndu̍ kɔ̄ɔ̄lī. 2Wāŋ lāāndūa̍a̍ bɛ̍ɛ̍ ā wa̍ ndu̍ kɔ̄ɔ̄lī ta̍u̍. Wāŋ lāāndūa̍a̍ ā pūm ā o̍ to̍ū nyi̍nāā wɔ̄ɔ̍ŋnda̍ kɔ̄ɔ̄lī mbo̍ sīŋgī nāālā ndāla̍ŋ nda̍ bɛ̍ɛ̍ ā wa̍ nda̍ tɛ̄ɛ̄ŋ. Mēēle̍ o̍ to̍ū nyi̍nāā wɔ̄ɔ̍ŋnda̍ kɔ̄ɔ̄lī ā ŋɔ᷄mmɛ̍ū wo̍, mā vēēlū ndu̍ vɛ̄lɛ̄ āā, Māŋgāli᷅ŋ, ndu̍ bɛ̍ɛ̍ ō wa̍ lo̍ŋ, 3a̍ Chōha̍nā, la̍nɔ̍ɔ̍ Chu̍u̍sā, po̍ ndu̍ o̍o̍ ma̍ndā nyɛ̍m Māsāa̍ Hɛ̍lɔ̄ɔ̄ wo̍ŋ ndo̍, a̍ chūā pīlɛ̍ dīōla̍ŋ Sūsa̍nā, a̍ wāŋ lāāndūāā ka̍ ka̍ che᷅le̍ŋ. Wāŋ lāāndūa̍a̍ ha̍ā nda̍ kpe̍de̍ wa̍ Chi̍i̍sū a̍ bu̍ɛ̍i̍yāā ndūa̍a̍ mālāa̍ a̍ nyɛ̄ o̍ nyɛ̄ fe̍e̍ ni̍.

4Mi̍ wāŋnda̍ cha᷄ŋ o̍ chi̍e̍e̍ŋ fa̍ŋgā fa̍ŋgā ma̍ chūūŋgi̍āŋ fa̍ŋgā bɛ̄ndōo̍ nāa̍ Chi̍i̍sū chu̍a̍. O̍ ko̍ŋ, mi̍ Chi̍i̍sū di̍mī tālo̍o̍ āā,

5“Pōo̍ chɛ̍ŋ ni̍ mbo̍ kūā wāa̍ o̍ chīɛ̄ī ndūɛ̍i̍ ni᷄ŋ. Mɛ̄ɛ̍ o̍ sa̍ŋ yɛ̄i̍ye̍, mi̍ ī pūm ī dēl o̍ nɛ̄ī kɔ᷅llo̍. Mi̍ ī pūm ī dēl o̍ lɛ̄ŋndē ba̍ndi̍la̍le̍ŋ chōo̍. Mi̍ ī pūm ī dēl o̍ fo̍ndāŋ yɔ̄ɔ̍ŋ ŋ̄ wūl lo̍. Mi̍ ī pūm ī dēl o̍ lɛ̄ŋndē kɛ̄ndɛ̄le̍ŋ chōo̍. Yɛ̄īyi̍i̍ de̍l o̍ nɛ̄ī kɔ᷅llo̍ ve̍, mi̍ wāŋnda̍ kēī nīɔ̄ū lēchōo̍, ndu̍yɛ̍, mi̍ yōūwa̍ chɔ̄ɔ̄vīāā. 6I̍ de̍l o̍ lɛ̄ŋndē ba̍ndi̍la̍le̍ŋ chōo̍ ve̍, mɛ̄ɛ̍ i̍ vi᷅l mi̍ ī nyāmālā. Kāni̍ fo̍ndōle̍, mɛ̄ŋmā ve̍ o̍ pūūlū ko̍ŋ ni᷄ŋ te̍. 7I̍ de̍l o̍ fo̍ndāŋ yɔ̄ɔ̍ŋ wūl lo̍ ve̍, ndi̍ ndi̍, mi̍ ī wūl lātūlu̍ a̍ yɔ̄ɔ̍ŋ. Mi̍ yɔ̄ɔ̍ŋ sɔ̄ɔ̄ŋgūū mi̍ ŋ̄ kāyā kāya᷄ŋ ndi̍. Mi̍ ŋ̄ dīī ndi̍. 8I̍ de̍l o̍ lɛ̄ŋndē kɛ̄ndɛ̄le̍ŋ chōo̍ ve̍, ndi̍ ndi̍, mi̍ ī wūl. Mi̍ ī hīndū. Mi̍ ī nāŋ nāŋɔ̄ɔ̍ pi̍la̍. Mi̍ ī kūām yāsāla̍ŋ kɛ̄mɛ̄.”

O̍ mɛ̄ɛ̄lu̍la̍ŋ, mi̍ Chi̍i̍sū di̍mī chōo̍ cho̍o̍ āā, “Wānā o̍ wāna̍ nɔ̍ nīla̍ tūɛ̄īyāā īsɔ̄ɔ̍ pɛ̍, lā ya᷄ŋ ni᷅la̍ŋ mī lā tūēī mī lā sīna̍ pɛ̄ŋgu̍.”

Chi̍i̍sū tɛ̍ɛ̍si̍a̍a̍ tālo̍o̍ a̍ yɛ̄yi̍i̍ nda̍ sa᷄ŋ nde̍ o̍kɔ̄ɔ̄

(Māa̍ti̍u̍ 13:10-17; Ma̍kī 4:10-20)

9Mi̍ bu̍ɛ̍i̍yāā ndūa̍a̍ nyūnā ndu̍ le̍ sa̍bū tālo̍o̍ ho̍ō si᷄m ndo̍. 10O̍ ko̍ŋ, mi̍ Chi̍i̍sū di̍mī āā, “Nya̍ Mɛ̄lɛ̄ka̍ chɛ᷄l le̍ mī lā sīna̍ nyɛ᷄m wa̍ ŋ̄ vīāŋna᷄ŋ a̍ māsāle̍ Mɛ̄lɛ̄ka̍le̍ŋ o̍kɔ̄ɔ̄ wo̍ŋ ni̍. Kɛ̍ wāŋnda̍ ā pīli̍a̍a̍ nda̍, o̍ tāle̍la̍ŋ ni᷄ŋ ya̍ I̍ su̍a̍ā nāa̍ nda̍ chūā ni̍. O̍ ko̍ŋ, mā nu̍a̍ kɛ̍, ā chi᷅ le̍. Mā ya᷄ŋ nīla̍ŋ mā tūēī kɛ̍, ā si̍nā pɛ̍ŋgu̍ le̍.

11“Lā chē ni̍ko̍ tɛ̍ɛ̍sīāā tāle̍ kālāa̍. Dīo̍m Mɛ̄lɛ̄ka̍a̍ ndu̍ cho̍ yɛ̄i̍ye̍ he̍ī ni̍. 12Yɛ̄i̍ye̍ i̍ de̍l o̍ nɛ̄ī kɔ᷅llo̍ ve̍ ī chō māchūāā wāŋnda̍ ā pūm a̍ tu̍e̍ī Dīo̍m Mɛ̄lɛ̄ka̍a̍ wa̍. Mɛ̄ɛ̍ nda̍ tūēī, mi̍ māsa̍ nyi̍nāā wɔ̄ɔ̍ŋnda̍ hu᷄ŋ po̍o̍ndā ndu̍ nda̍ o̍ lākɔ̄l, yɔ̍ŋi̍ nda̍ lāāla̍ŋ mā pēŋ. 13Yɛ̄yi̍i̍ de̍l o̍ lɛ̄ŋndē ba̍ndi̍la̍le̍ŋ chōo̍ ve̍ ī chō māchūāā māā wāŋnda̍ ā pūm. Tē ā tūēī pɛ̍ Di̍o̍m Mɛ̄lɛ̄ka̍a̍, ā chɛ᷄l ndu̍ a̍ kɔ̄l kɛ̄ndɛ̄. Kɛ̍ mɛ̄ɛ̍ pūūndu᷅ŋ tɔ̄lɔ̄ɔ̍ ŋ̄ nɔ̍lā lu̍ɛ̍i̍yɔ̄ɔ̍ la̍nda̍ŋ o̍ lɛ̄ŋndē ba̍ndi̍la̍le̍ŋ te̍ yɛ̍, le̍nde̍ ko̍ wāŋnda̍ ha̍ā chō ni̍. Dīo̍m Mɛ̄lɛ̄ka̍a̍ ō lu̍e̍ī di̍ nda̍ o̍ lākɔ̄l te̍. Mī wāŋnda̍ ha̍ā lāāla̍ŋ le̍ te̍le̍ŋ ti̍ŋ. Kɛ̍, tē Māsa̍ Nyi̍nāā Wɔ̄ɔ̍ŋnda̍ dɛ̄ɛ̄ni̍a̍a̍ nda̍ pɛ̍ a̍ nyɛ̄ pālāa̍, ā ma᷄l dīōm kālāa̍. 14Yɛ̄yi̍i̍ de̍l o̍ fo̍ndāŋ yɔ̄ɔ̍ŋ ŋ̄ wūl lo̍ ve̍, ī chō māchūāā māā wāŋnda̍ ā pūm a̍ tu̍e̍ī dīo̍m Mɛ̄lɛ̄ka̍a̍ wa̍. Kɛ̍ ndu̍yɛ̍, tē ā vīōū pɛ̍ kpɛ̍ɛ̍, būūla᷄ŋ nyɔ̄ɔ̍ŋ, a̍ yēēmɛ̍i̍ sūllo̍, a̍ yēēmɛ̍i̍ nyɛ᷄m nɛ̍ŋī wa̍nā kɔ̍l lo̍ŋ, ŋ̄ lūɛ̄ī nda̍ o̍ lākɔ̄l. O̍ ko̍ŋ, mī ŋ̄ kāya̍ ka̍ya̍ŋ di̍o̍m Mɛ̄lɛ̄ka̍ nda̍ tūēī yo̍ mɛ̄ɛ̍ yɔ̄ɔ̍ŋ ŋ̄ kāyā kāyāŋ tɔ̍lɔ̄ɔ̍ yɛ̍. O̍ ko̍ŋ, mī dīōm kālāa̍ fōōfi̍ nda̍ ni᷄ŋ mɛ̄ɛ̍ tɔ̄lɔ̄ɔ̍ fōōfi̍ nu̍a̍ā yɛ̍. 15Yɛ̄yi̍i̍ de̍l o̍ lɛ̄ŋndē kɛ̄ndɛ̄le̍ŋ chōo̍ ve̍ ī chō māchūāā māā wāŋnda̍ ā pūm. Tē ā tūēī dīo̍m Mɛ̄lɛ̄ka̍a̍ pɛ̍, ā kɛ̄si̍ŋ ndu̍ o̍ lākɔ̄l nyɛ̄ kɛ̄ndɛ̄ kɛ̍ndɛ̍ī. O̍ ko̍ŋ, mā chɔ᷄m tɔ̄nɔ̄ɔ̍ le̍ mɛ̄ɛ̍ nda̍ bīūnu̍ŋ yɛ̍.”

Sɔ̄ɔ̍ŋ cho̍ ŋ̄ vīāŋna᷄ŋ ndo̍ŋ ŋ̄ chō wā ŋ̄ chɔ̄ɔ̄māā

(Ma̍kī 4:21-25)

16Mi̍ Chi̍i̍sū hi̍a̍ū lāchī a̍ sūɛ̍i̍. Mbo̍ dīmī āā, “Wānā o̍ wānā a̍ mɛ̍ndūl la̍mbūi̍yo̍ mā ku̍u̍mbu̍u̍ hɛ̄ŋgɔ̍ɔ̍ lēchōo̍ le̍, kɛ̄lɛ̄ŋgāā ni᷅ŋ te̍, mā lu̍e̍i̍ ndu̍ o̍ kpēlōo̍ bɛ̄ŋgu̍. Wānā o̍ wānā, tē a̍ mɛ̍ndu̍l la̍mbūi̍yo̍ pɛ̍, nāa̍ te̍ma̍a̍ ŋ̄ kɛ̄sī ndu̍ ni̍ le̍ mī wānāa̍ wa᷅ lu̍ɛ̍i̍yɔ̄ɔ̍ chīɛ̄ī ni̍ŋ nda̍ chē.

17“Nyɛ̄ o̍ nyɛ̍ cho̍ ō vīāŋāā, ō chō hūnɔ̄ɔ̄ chɔ̄mnɔ᷄ŋ kpe̍nde̍ke̍le̍. Ndu̍yɛ̍, nyɛ̄ o̍ nyɛ̍ cho̍ ō kūmbāā, wāŋnda̍ chō ndu̍ sāālɔ᷄ŋ mā sīna̍ a̍ ndu̍ o̍kɔ̄ɔ̄.

18“Le̍la̍ŋ, lā kɛ̄si̍ŋ nyɛ᷅ nya̍ tūēī yo̍ o̍ lākɔ̄l. Wānā o̍ wāna̍ nɔ̍ o̍ bā, wānā ko̍ŋ ndu̍ Mɛ̄lɛ̄ka̍ chɔ̄ɔ̄lū ke᷅ ni̍. Kɛ̍, wāna̍ nɔ̍ o̍ bā le̍ wo̍, ō pɔ̄mbɔ̄ o̍ nɔ̍ o̍ kɔ̄l māā ō nɔ̄ wo̍ bɛ̍ɛ̍, Mɛ̄lɛ̄ka̍ chō ndu̍ pōōndā o̍ bā.”

Wānāa̍ cho̍ wānāā kpe̍e̍kpe̍i̍ya̍a̍ Chi̍i̍sūa̍a̍ wa̍

(Māa̍ti̍u̍ 12:46-50; Ma̍kī 3:31-35)

19O̍ ko̍ŋ, mi̍ Chi̍i̍sū kāla̍ ndɔ̄ a̍ pɔ̄mbūāā ndūa̍a̍ hūŋ nāa̍ ndu̍ chu̍a̍. Kɛ̍, ā nɔ̄la̍ fūūlūūwo̍ nāa̍ Chi̍i̍sū wa̍ wa̍ le̍, kāni̍ fo̍ndōle̍, fāŋgāa̍ wa̍ ta̍u̍ ta̍u̍. 20Ma̍ dīmūl Chi̍i̍sū āā, “Kālā nu̍m a̍ pɔ̄mbūāā nūmnda̍ ā chō o̍ bɛ̍ɛ̄. Ā hɛ̄na̍ŋ mā chē nu̍m.”

21Kɛ̍, mbo̍ dīmūl nda̍ āā, “Wānāa̍ tu̍ɛ̍ī di̍o̍m Mɛ̄lɛ̄ka̍a̍, ndu̍yɛ̍ mā tōsa̍ nyɛ̄ o̍ di̍mi̍ wo̍ wa̍, nda̍ cho̍ kālāa̍ nīa̍a̍ ni̍. Ndu̍yɛ̍, nda̍ cho̍ pɔ̄mbūāā nīa̍a̍ ni̍.”

Chi̍i̍sū kpa̍a̍ hūēīyīī bɛ̄ndūe̍i̍

(Māa̍ti̍u̍ 8:23-27; Ma̍kī 4:35-41)

22Pāa̍le̍ pi᷅lɛ̍, Chi̍i̍sū nda̍ bu̍ɛ̍i̍yāā ndūa̍a̍ ā wa̍ o̍ mɛ̄ŋmā ībūŋga᷄ŋ i̍kɛ̍i̍. Mbo̍ dīmūl nda̍ āā, “Ŋ̄ tāŋnu᷅ŋ o̍ mɛ̄ŋmā ībūŋga᷄ŋ kɔ̄ŋgɔ̍ɔ̍ pīlɔ̍ɔ̄.” Ma̍ lūɛ̄ī o̍ dɛ̄ndɔ̄ɔ̍ ni᷄ŋ ma̍ kāndū kɔ̄la̍ŋ o̍ mɛ̄ŋnda̍ŋ chōo̍. 23Ā lo̍ kɔ̄la̍ŋ o̍ mɛ̄ŋnda̍ŋ chōo̍, mi̍ Chi̍i̍sū hi̍a̍u̍nu᷄ŋ o̍ lūa̍a̍ŋ. O̍ ko̍ŋ, mi̍ hūēīyīī bɛ̄ndūe̍i̍ sūŋgū hɔ̄ŋndo̍ o̍ mɛ̄ŋnda̍ŋ chōo̍. Mi̍ mɛ̄ŋnda̍ŋ mā kāndū lūɛ̄īyɔ̄ɔ̍ o̍ dɛ̄ndɔ̄ɔ̍ ni᷄ŋ ta̍u̍. Dɛ̄ndɔ̄ɔ̍ wa̍ ni᷅ŋ le̍ mɔ̄ɔ̄wā. 24Mi̍ bu̍ɛ̍i̍yāā ndūa̍a̍ kūā ma̍ tīndī ndu̍. Ma̍ dīmī āā, “Māsānɔ̄ɔ̍, Māsānɔ̄ɔ̍, ŋ̄ cha᷄l le̍ lō o̍ pēēlo̍.”

Mi̍ Chi̍i̍sū ti̍a̍ndū. Mɛ̄ɛ̍ o̍ te̍ndū, mbo̍ kpāā hūēīyīi̍ wa̍ hɔ̄ŋndo̍ ve̍ a̍ mɛ̄ŋma̍ wa̍ hīīlɔ᷄ŋ bɛ̍ndōo̍ wa̍ŋ. Mi̍ hūēīye̍ pɛ̄ŋgī hɔ̄ŋndo̍. Mi̍ mɛ̄ŋnda̍ŋ bɛ̍ɛ̍ ma̍ pɛ̍ŋgī hīīlɔ᷄ŋndo̍. 25Mbo̍ lō lo̍ŋ mbo̍ nyūnā bu̍ɛ̍i̍yāā ndūa̍a̍ āā vɛ̄ɛ̄, “Lā nɔ̍ lɛ̍ tīīnda᷄ŋ o̍ ya̍ ni̍ŋ te̍?”

Mi̍ kɔ̄ndɔ̄fi̍llo̍ bīī nda̍. Ma̍ yɔ̄ŋ sīōōŋnde̍. Ma̍ kāndū nyūūni̍āŋndo̍ āā, “Wāna̍ māāvɛ̄ɛ̍nɛ̍ cho̍ yɛ̄ ho̍ō. Mbō sōō o̍ hūēīye̍ lo̍ a̍ mɛ̄ŋnda̍ŋ bɛ̍ɛ̍, ndu̍yɛ̍, mī mā tōsa̍ nyɛ̄ o̍ di̍mī wo̍.” Mi̍ nyɛ̄ o̍ nyɛ̄ yɔ̄nu᷄ŋ le̍ pi᷅lɛ̍ do̍ŋ bɛ̍ndū.

Chi̍i̍sū to̍ū nyi̍nāā wɔ̄ɔ̍ŋnda̍ pōo̍ kɔ̄ɔ̄lī

(Māa̍ti̍u̍ 8:28-34; Ma̍kī 5:1-20)

26O̍ ko̍ŋ kɔ̍ɔ̍lī, mi̍ Chi̍i̍sū nda̍ bu̍ɛ̍i̍yāā ndūa̍a̍ fūūlūū o̍ lɛ̄ŋndē Kɛ̄lu̍a̍sāle̍ŋ ni᷄ŋ. O̍ lɛ̄ŋndē Kāli̍līle̍ŋ mātōū lɛ̄ŋnde̍ŋ nde᷅ŋ lē chō ni̍. 27Mi̍ Chi̍i̍sū fu̍lā o̍ dɛ̄ndɔ̄ɔ̍ ni᷄ŋ mbo̍ hēl o̍ kɔ̄ŋgɔ̍. Hēlɔ̄ɔ̍ o̍ kɔ̄ŋgɔ̍, mi̍ po̍ wa̍ā chi̍e̍e̍ lo̍ŋ ko̍māl ndu̍. Nyi̍nāā wɔ̄ɔ̍ŋnda̍ wa̍ pōo̍ ho̍ō kɔ̄ɔ̄lī. Ndu̍yɛ̍, le̍ te̍le̍ŋ vi̍lɛ̄ī ō wo̍u̍nūŋ la̍nyɛ̍ le̍. Ndu̍ o̍o̍ lɔ᷅l chi̍ɛ̍ī ni̍ŋ te̍. Nāa̍ nda̍ a̍a̍ chɔ᷅ wa᷅ŋnda̍ wa̍ ndu̍ o̍o̍ lɔ᷅l ni̍, o̍ sɛ̄īla̍ la̍ŋ tɛ̄ɛ̄ŋ. 28Mɛ̄ɛ̍ o̍ che᷅ Chi̍i̍sū, mbo̍ kāndū dēŋīo̍o̍. Mbo̍ dēl Chi̍i̍sū o̍ lābɛ̄ŋgu̍ ni̍ŋ. Mbo̍ nyūnā chōo̍ cho̍o̍ āā, “Chi̍i̍sū, Po̍ Mɛ̄lɛ̄ka̍ Bɛ̄ndōo̍, vɛ᷅ sōndōo̍ wōūwo̍ o̍ sūɛ̍i̍ nīi̍ ni᷄ŋ? Yāndi̍i̍ to̍sā mī bi̍ī mɔ̍nɛ̍i̍ le̍.” 29Ō dīmi̍ le̍nde̍ fo̍ndōle̍, kāni̍, Chi̍i̍sū ndu̍ o̍o̍ di̍mu̍l ni᷅ŋ nyi̍nā wɔ̄ɔ̍ŋndo̍ māā ō fāŋa̍ŋ po̍o̍ ho̍ō kɔ̄ɔ̄lī. Le̍ te̍le̍ŋnda̍ fa̍ŋgā nyi̍nāā ho̍ō wa̍ ndu̍ chūa̍a̍. Tē ndu̍ o̍o̍ chu̍a̍ ndu̍ pɛ̍, mɛ̄ɛ̍ mī nda̍ a̍a̍ dɔ̄ū ndu̍ o̍ yɔ̄lɔ᷄ŋ mā ba᷄ŋ ndu̍ o̍ kpi̍ɔ̍ɔ̍ le̍ ndu̍ wāa̍ lēhɔ̄l. Kɛ̍, pōo̍ ho̍ō yɔ̄lɔ᷄ŋ a̍ kpi̍ɔ̍ɔ̍ bɛ̍ɛ̍ bɛ̄ɛ̄ŋūūwo̍ mī nyi̍nā wɔ̄ɔ̍ŋ kōŋ sɔ̄ɔ̄ndi̍a̍a̍ ndu̍ yōndōo̍ ni᷄ŋ.

30Mi̍ Chi̍i̍sū nyu̍nā ndu̍ āā, “Ɔ̍ɔ̄ dīōlā nūmnda̍ŋ?”

Mbo̍ mūlī āā, “Dīōlā nīla̍ŋ āā, Fāŋgāa̍.” Ō dīmi̍ le̍nde̍ fo̍ndōle̍, nyi̍nāā wɔ̄ɔ̍ŋnda̍ ā wa̍ ndu̍ kɔ̄ɔ̄lī ta̍u̍. 31Mi̍ nyi̍nāā wɔ̄ɔ̍ŋāā kāŋ nyɔ̄ɔ̄lū Chi̍i̍sū māā ō wo̍ū nda̍ o̍ nyɛ̄ pālāā fɛ̍ɛ̍ŋ fɛ̍ɛ̍ŋndo̍ ni᷄ŋ te̍.

32Pēūwāā chi̍e̍e̍ ni̍ŋ nda̍ ā wa̍ di̍o̍la̍ŋ ku̍ndā bɛ̄ndōo̍ o̍ pēmbēi̍ īkɛ̄i̍. Mi̍ nyi̍nāā wɔ̄ɔ̍ŋāā kāŋ ā nyɔ̄ɔ̄lū Chi̍i̍sū le̍ mbō chɛ᷄l nda̍ mā tōl pēūwāā kāŋ kɔ̄ɔ̄lī. Mi̍ Chi̍i̍sū chɛ᷅l nda̍ dīōm. 33O̍ ko̍ŋ, ma̍ fāŋa᷄ŋ po̍o̍ ho̍ō kɔ̄ɔ̄lī. Ma̍ tūāl pēūwa̍ kɔ̄ɔ̄lī. Mi̍ pēūwāā ku̍ndāa̍ ha̍ā tūāl kɔ̄ŋgɔ̍ fe̍ke̍ fe̍ke̍ ko̍ŋ a̍ kīlta̍ŋ. Ma̍ dēlī o̍ mɛ̄ŋmā ībūŋga᷄ŋ ni᷄ŋ. Ma̍ wū kpo̍u̍.

34Mɛ̄ɛ̍ wānāa̍ wa̍ pēūwa̍ māndāa̍ wa̍ chē nyɛ̍ yɔ̍nu̍ŋ ndo̍, ma̍ nyāānu᷄ŋ. Ma̍ kɔ̍ di̍mūl wāŋnda̍ chi̍e̍e̍ lo̍ŋ a̍ ha̍ā o̍ sɔ̄ndɔ̄kɔ̍lta̍ŋ a̍ ndi̍ o̍kɔ̄ɔ̄. 35O̍ ko̍ŋ, mi̍ wāŋnda̍ cha᷄ŋ ma̍ hūŋ le̍ mā chē nyɛ̍ yɔ̍nu̍ŋ ndo̍. Ma̍ hūŋ nāa̍ Chi̍i̍sū chu̍a̍. Hūnɔ̄ɔ̍ ma̍ kōmāl po̍ nyi̍nāā wɔ̄ɔ̍ŋnda̍ wa̍ ko̍ŋ kɔ̄ɔ̄lī wo̍ īchāli̍ Chi̍i̍sū īkɛ̄i̍. Nyɛ̄la̍ŋ lā wa̍ ndu̍ lēkɔ̄ɔ̍, ndu̍yɛ̍, ō wa̍ ni᷅ŋ ō kīāndāā kɔ̄l nyɛ̄ kɛ̄ndɛ̍ī. 36Mi̍ wānāa̍ wa̍ o̍ hɔ̄lndɔ̄ ma̍ chā mɛ̄ɛ̍ po̍ nyi̍nāā wɔ̄ɔ̍ŋnda̍ wa̍ kɔ̄ɔ̄lī wo̍ sɔ̄la̍ sīōŋgɔ̄ɔ̍ yɛ̍ wa̍, ā chɔ̄m wāŋnda̍ mɛ̄ɛ̍ Chi̍i̍sū lo̍o̍ku̍ ndu̍ sīŋgī yɛ̍. 37Mi̍ sīōōŋnde̍ bīī wāŋnda̍ o̍ tāndā lɛ̄ŋndē Kɛ̄lu̍a̍sāle̍ŋ ni᷄ŋ ta̍u̍. O̍ ko̍ŋ kɔ̍ɔ̍lī, ma̍ dīmūl Chi̍i̍su̍ māā ō fāŋa̍ŋ o̍ lɛ̄ŋndē nda̍le̍ŋ ni᷄ŋ. Le̍ he̍ī, mi̍ Chi̍i̍sū lu̍ɛ̍ī o̍ dɛ̍ndɔ̄ɔ̍ ni᷄ŋ le̍ mīīŋgɔ᷄ŋndo̍. 38Mi̍ po̍ nyi̍nāā wɔ̄ɔ̍ŋnda̍ wa̍ kɔ̄ɔ̄lī wo̍ nyɔ̄ɔ̄lū Chi̍i̍sū le̍ mā kūɛ̄ nda̍ ndu̍.

Kɛ̍, Chi̍i̍sū chɛ̍l le̍ mā kūɛ̄ nda̍ ndu̍ le̍. 39Mi̍ Chi̍i̍sū dīmūl ndu̍ āā, “Kɔ̍ o̍ nūm ndo̍ mā kɔ̍ di̍mūl wānāā nūmnda̍ a̍ mɛ̄ɛ̍ kpɛ̍ Mɛ̄lɛ̄ka̍ tōsa̍l nu̍m yɛ̍.”

Mbo̍ kūā mbo̍ kɔ̍ ba̍lū chi̍e̍e̍ lo̍ŋ kpe̍de̍ a̍ wāŋnda̍ dīmūllo̍ mɛ̄ɛ̍ kpɛ̍ Chi̍i̍sū to̍sa̍l ndu̍ yɛ̍.

Chūāāmbɔ̄ vi᷅ wo̍ a̍ chu̍a̍ pi̍la̍ŋ Chi̍i̍sū wo̍

(Māa̍ti̍u̍ 9:18-26; Ma̍kī 5:21-43)

40O̍ ko̍ŋ kɔ̍ɔ̍lī, mɛ̄ɛ̍ Chi̍i̍sū mi̍i̍ŋgu̍ o̍ mɛ̄ŋmā ībūŋga᷄ŋ lēe̍lōo̍, mi̍ wāŋnda̍ fāŋgā bɛ̍ndōo̍ dēmūl ndu̍. Nda̍ a̍a̍ wa̍ ni᷅ŋ ndu̍ chūmndo̍. 41Mi̍ po̍ pi᷅lɛ̍ hūŋ nāa̍ ndu̍ chu̍a̍ dīōla̍ŋ āā, Cha̍a̍līɔ̄ɔ̄. Nda̍ wa̍ wānāā bɛ̄ndūa̍a̍ lo̍ŋ le̍ chīɛ̄ī Chu̍ūwa̍ pīɛ̄ī Mɛ̍lɛ̄ka̍ wo̍ ni̍. Mbo̍ hu᷄ŋ de᷅l Chi̍i̍sū o̍ lābɛ̄ŋgu̍ ni̍ŋ. Mbo̍ nyɔ̄ɔ̄lū ndu̍ le̍ mī Chi̍i̍sū ku̍ɛ̄ o̍ chīɛ̄ī ndɔ̄ɔ̍. 42Kāni̍ fo̍ndōle̍, chūā ndɔ̄ɔ̍ wa̍ tēndu̍ pīɔ̍m. Chūāāmbɔ̄ɔ̍ ho̍ō ndu̍ o̍o̍ wa̍ ni᷅ŋ wɔ̄sīla̍ŋ tɔ̍ a̍ lā tīɔ̍ɔ̍ŋ. Ndu̍yɛ̍, ndu̍ ko̍ni̍ Cha̍a̍līɔ̄ɔ̄ ndu̍ o̍o̍ ve̍lū chūā ni̍.

Mɛ̄ɛ̍ Chi̍i̍sū wa̍ kɔ̄la̍ŋ o̍ chīɛ̍i̍ Cha̍a̍līɔ̄ɔ̄ wo̍, mi̍ fāŋgāa̍ bālū ndu̍ si̍lɔ̍. Ā wa̍ nyīīnda᷅ŋndo̍. 43Chūa̍a̍ pūm ō wa̍ lo̍ŋ, ndu̍ o̍o̍ nɔ̍ nāā ŋ̄wāŋ lāāndū wɔ̄ɔ̍ŋ pūm. Le̍ wɔ̄sīla̍ŋ tɔ̍ a̍ lā tīɔ̍ɔ̍ŋ nāa̍ ho̍ō chō ndu̍. Ndu̍yɛ̍, wānā o̍ wānā nɔ̍la̍ ndu̍ sīŋgī le̍. 44Mi̍ chūa̍a̍ ho̍ō hūŋ Chi̍i̍su̍ a̍ mākɔ̄ɔ̄ mbo̍ pīla᷄ŋ do᷅ma̍ ndɔ̄ɔ̍ bɔ̄ɔ̄le̍ŋ. Mi̍ nāā ndɔ̄ɔ̍ sīāŋgū o̍ lēpīlɛ̍ ni᷄ŋ kpe̍. 45O̍ ko̍ŋ, mi̍ Chi̍i̍sū nyu̍nā āā, “Ō nɛ̄ɛ̍nɛ̍ pi̍la̍ŋ yɛ̍ ya̍?”

Wānā o̍ wānā sɔ̍lɔ̍la̍ŋ te̍. Le̍ he̍ī, mi̍ Pītɛ̍ di̍mī āā, “Māsānɔ̄ɔ̍, wāŋnda̍ chō nu̍m ā bālāā pɛ̍, ndu̍yɛ̍ mā wā nyīīnda᷅ŋndo̍ pɛ̍, ā tōl nyūnāa̍ āā, ‘Nɛ̄ɛ̍nɛ̍ pi̍la̍ŋ yɛ̍ ya̍?’ ”

46Kɛ̍ mi̍ Chi̍i̍sū di̍mī āā, “Wāŋndo̍ pīla̍ŋ ya̍. Kāni̍ fo̍ndōle̍, I̍ si̍na̍ŋ ya̍ pi̍la̍ māā kpāāyāa̍ fūlā ya̍ o̍ ŋ̄dīāl.” 47Mɛ̄ɛ̍ chūa̍a̍ chē māā ā sīna̍ a̍ ndu̍ o̍kɔ̄ɔ̄, mbo̍ fūlā a̍ nyīīyāa̍. Mbo̍ hu᷄ŋ de᷅l lɛ̄ŋ Chi̍i̍su̍ lāchī. Mbo̍ chɔ̄ɔ̄mūū wāŋnda̍ kpe̍de̍ o̍ hɔ̄l le̍ sa̍bū o̍ pi̍la̍ŋ Chi̍i̍su̍ wo̍. Ndu̍yɛ̍, mbo̍ chɔ̄m a̍ mɛ̄ɛ̍ o̍ se̍ŋgū o̍ lē pīlɛ̍ ni᷄ŋ kpe̍ yɛ̍. 48Mi̍ Chi̍i̍sū di̍mūl ndu̍ āā, “Chūā nūu̍, tīīnda᷄ŋ ŋ̄ dɔ̄ū o̍ Mɛ̄lɛ̄ka̍ ni᷄ŋ ndo̍ tōsa̍ ma̍ sɔ̄lā sīōŋgɔ̄ɔ̍. Kɔ̍ a̍ kɔ̄l kɛ̄ndɛ̄.”

49Chi̍i̍sū lo̍ sūɛ̍i̍ mi̍ wānā ve̍e̍lāa̍ cha᷄ŋ o̍ chīɛ̍i̍ wānā bɛ̍ndōo̍ Cha̍a̍līɔ̄ɔ̄ wo̍. Mbo̍ hu᷄ŋ di̍mūl Cha̍a̍līɔ̄ɔ̄ āā, “Chūā nūmndo̍ vī. Yɛ̍ī lɛ̄ ti̍chā īkɔ̄ɔ̄ le̍.”

50Kɛ̍ mɛ̄ɛ̍ Chi̍i̍sū tu̍e̍ī nyɛ̄ pōo̍ dīmi̍ wo̍, mbo̍ dīmūl Cha̍a̍līɔ̄ɔ̄ āā, “Yɔ᷅ŋ īsīōōŋ te̍. Nūm nɔ̍ la̍a̍la᷄ŋndo̍ su̍e̍e̍. Yōōmōo̍ chō ndu̍ mīīŋgū o̍ mīli̍ŋ.”

51Mi̍ Chi̍i̍sū fu̍u̍lūū o̍ chīɛ̍i̍ Cha̍a̍līɔ̄ɔ̄wo̍. Ndu̍yɛ̍, ō chɛ᷄l mī wānā o̍ wānā che᷅le̍ŋ lūɛ̄ī ndu̍ kɔ̄ɔ̄lī chīɛ̄ī ni̍ŋ te̍, mɛ̄ɛ̍ Pītɛ̍, a̍ Chɔ᷄ŋ, a̍ Chēmi̍si̍, a̍ fi̍nyāa̍ chūāāmbɔ̄ɔ̍, a̍ kāla̍ ndɔ̄. 52Wāŋnda̍ kpe̍de̍ ā wa̍ cha᷄ŋnda̍ŋ mā mɛ̄lī yi̍e̍e̍la̍ŋ chōo̍ cho̍o̍. Mi̍ Chi̍i̍sū di̍mūl nda̍ āā, “Lā cha᷅ŋ te̍. Ō vi̍ le̍. O̍ lūa̍a̍ŋ o̍ cho̍ ni̍.”

53Mɛ̄ɛ̍ o̍ di̍mi̍ le̍nde̍, ma̍ sa̍āŋ ndu̍ māmɔ̄ɔ̍. Kāni̍ fo̍ndōle̍, ā sīna̍ māā ō vī. 54Mɛ̄ɛ̍ Chi̍i̍sū lu̍ɛ̍ī chīɛ̄ī ni̍ŋ, mbo̍ sāā chūāāmbɔ̄ɔ̍ bāa̍. Mbo̍ dīmūl ndu̍ āā, “Chūa̍a̍, chɔ̍ŋ.” 55Mi̍ yōōmōo̍ mīīŋgū chūāāmbɔ̄ɔ̍ o̍ mīli̍ŋ. Mbo̍ cha᷄ŋ o̍ lē pīlɛ̍ ni᷄ŋ kpe̍ mbo̍ chāl. Mi̍ Chi̍i̍sū di̍mī māā ā ke̍ ndu̍ nyɛ̄ dīa̍a̍ mbō dē. 56Mi̍ kɔ̄ndɔ̄fi̍llo̍ bīī fi̍nyā ndɔ̍ a̍ kāla̍ ndɔ̄. Mi̍ Chi̍i̍sū di̍mūl nda̍ māā ā di̍mūl wānā o̍ wānā a̍ nyɛ̍ yɔ̍nu̍ŋ ndo̍ o̍kɔ̄ɔ̄ le̍.

Currently Selected:

Lu̍kū 8: YM

Highlight

Copy