Luka 16

Omubi:ki omurangirangi

1Mbe nabwira abe:igisibwa bae one ati, Ariga:rio mu:nu muni:bi unu ariga:ri no mubi:ki wae. Oyo nibamubu:ra ati, Ke:seranya ebi:nu byao. 2Namubirikira namubu:sya ati, ?Niki cinu enungwa kwawe? Bara obukumi bwo bubi:ki bwao, okuba utaca:tura kuba mubi:ki. 3Omubi:ki oyo na:ika munda yae ati, ?Nje nikore kutiki, okuba Ratabugenyi kante:sya obubi:ki bwani? Okurima ntakutura, no kusabirisya eni:swara. 4Nimenyere cinu ndakora, araba banyirisya mu bubi:ki, jebankumega mu nyumba jebwe. 5Nabirikira buri unu ariga natongwa esebugenyi, nabu:sya owo kwamba ati, ?Ratabugenyi kakutonga ki? 6Na:ika ati, Madebe egana aga mafuta. Namubwira ati, Gega inyaruba yao, winyanje bwangu wandike makumi gata:nu. 7Niwo nabu:sya oundi ati, ?Ka:we outongwa ki? Na:ika ati, Misere egana ejo buro. Namubwira ati, Gega inyaruba yao wandike makumi gata:nu na gasatu. 8Mbe esebugenyi nakuya omubi:ki omurangirangi, okuba akora eco bwenge. Okuba aba:na ba magoro ganu ni bengeso mwiimbo ryebwe kukira aba:na bo bweru. 9Anye enibabwira ati, Mutaranega obusa:ni nimukorera jimpirya jo burangirangi, korereki jikawao, babakume emwe mu bwikaro bunyatawao.

10Unu ari mwiikanyibwa ku ci:nu ecito:to, na ku cinene one ni mwiikanyibwa. Na unu kanyamura ku ci:nu ecito:to, na ku cinene one kanyamura, 11Mbe mukaba mutari be:ikanyibwa ku mpirya jindangirangi, ?niga unu aribabi:kisya obuni:bi bwe cimari? 12Na mukaba mutari be:ikanyibwa ku bya bandi, ?niga unu aribayana ebyemwe? 13Atario mukosi unu katura okukorera besebugenyi babiri. Okuba katamanganwa no umwi, nenda oundi, amwi karuma ku umwi, nagaya oundi. Mutakutura kukorera Nyamuanga no kukorera jimpirya one.

14Na Bafarisayo, banu bariga mbarigira jimpirya, nibongwa ejo jo:ne, nibamuseka. 15Nababwira ati, Emwe nemwe omwikora barenge:resi imbere ya ba:nu, nawe Nyamuanga amenyere emitima jemwe. Okuba jinu ejisi:mwa mu ba:nu ni ja bujabi imbere ya Nyamuanga. 16Ebiragiro byariga birio na baragi kukinga ku Yoana. Okwambira mu siku ijo Ebigambo byo bwana ebyo bukama bwa Nyamuanga ebira:sibwa, na mu:nu wo:ne ke:ingisyamo biiga. 17Nawe ni kwangu orwire na i:si okuwao, okukira inyuguta eimwi eya mu biragiro okuwao.

Ebyo kuta:na mu butwasi

(Mt. 5:27-32; 19:3-12; Mk. 10:2-12; 1 Bakor. 7:10-15)

18Omu:nu wo:ne unu arairisyaga omugasi wae, natwara oundi, kaba muromesi. Na unu aratwaraga unu omurume wae airisisye, kaba muromesi.

Lajaro no muni:bi

19Ariga:rio mu:nu muni:bi ariga nafwara omwenda gwo ruyoyo na bafuta nde:si, nakonderwa kusiku mu byo rumura. 20Na ka ariga:rio no mutaka risi:na ryae Lajaro, ama:mibwaga aanja ku muryango gwae aoe birondaronda. 21Ne:sigomberaga okwiguta binu byaragaraga okuso:ka ku meja yo muni:bi. Na jimbwa nijija nijimurambaramba ebironda.

22Ejire e:ya omutaka nafwa nagegwa na bamaraika nibamusira mu cifuba ca Iburaimu. No muni:bi one nafwa ne:swa. 23Ne:namusya ame:so gae ebwire ari mu nya:ko, namurora Iburaimu ari kura, na Lajaro ari mu cifuba cae. 24Na:ikirira inguru ati, Rata Iburaimu, nfwira ecigongo, utume Lajaro, e:ne isonde ye ca:ra cae mu manji anyirisye orurimi rwani, okuba ena:sibwa mu muriro gunu. 25Nawe Iburaimu namubwira ati, Mwana wani, icuka ati, awe wabonaga ebikonde mu buanga bwao, na Lajaro one kutyo abonaga ebibi:bi. Nawe woryanu omwene kakondererwa, nawe awe ounya:sibwa. 26Na kukira ejo ririo eugo ere:ra aagati yeswe nemwe, korereki banu abenda okuso:ka enu okuja eyo kwimwe bataja kutura, norwo abendeyo bataja kwambuka kuja enu kwiswe. 27Na:ika ati, Mbe enikuremberesya, rata, numutume mu nyumba ya rata, 28okuba ndi na bamura ba:su bata:nu. Ababwire batarija ku:ja anu one mu kunya:sibwa kunu. 29Nawe Iburaimu na:ika ati, Bari na Musa na baragi, babongwe abo. 30Na:ika ati, Uri Rata Iburaimu. Nawe oumwi ku bafu:ye akabaja:ko abata. 31Namubwira ati, Bakarema okungwa Musa na baragi, nakabee ari umwi ku bafu:ye akasu:ka, one batakwikirisya.

Currently Selected:

Luka 16: KIJ1960

Highlight

Copy