Luka 17

Ebyo kwiswaririra

(Mt. 18:21-22)

1Nabwira abe:igisibwa bae ati, Ebyo kwiku:jusya ni busibusi bi:je. Nawe jirimubona oyo kabire:ta! 2Akiri oyo okusibikwa orubui mu cimiro cae, e:swe mu nyanja, okukira okwiku:jusya umwi ku banu abato:to. 3Mukabuke. Omwana wanyu akakaya, umugonye. Akata, umwiswaririre. 4Akakukaya kwiya kata:nu na kabiri mu rusiku rumwi, nakusubako kwiya kata:nu na kabiri, na:ika ati, Nata, umwiswaririre. 5Jintumwa jae nijibwira Ratabugenyi ati, Congesyeko okwikirisya kweswe. 6Ratabugenyi na:ika ati, Kumba muri no kwikirisya rwa inje ya ikaradari, mukabwira rikuyu rinu ati, Iika, ujo:yambwa mu nyanja, ryakabonguywe.

Emirimu jo mugaya

7?Nawe niga kwimwe ari no mugaya narima amwi nare:ba, akengira naso:ka mwisambu, kamubwira ati, Ija bwangu winyanje urye? 8?Nawe amwi atakumubwira ati, Sabura ebiryo, nirye. Iboya unfurubendere, nimare okurya no kunywa, niwo awe one urye no kunywa? 9?Kamusi:ma omugaya oyo okukora jinu karagirirwa? 10Emwe one nikwo kutyo, wora mwamara okukora jo:ne jinu muragiriywe, mwaike ati, Eswe ciri bagaya banu bate:ire. Jinu jariga jici:ire okukora nijo cakorere.

Abe bigenge ekumi mbaosibwa

11Anu bariga bari mu njira nibagenda Yerusalemi, naitiŋana aagati ya Samaria na Galilaya. 12Mbe wejire engira mu musi gumwi, nabonana na be bigenge ekumi bemereguyu kura. 13Niba:ikirira inguru ati, Yesu Ratabugenyi, cifwire ecigongo. 14Wejire abarora, nababwira ati, Mugende mwiyeresye ku bagabisi. Mbe anu bariga bacagenda mbaosibwa. 15Mbe oumwi kwabo, wejire arora ati aora, nainduka nakuya Nyamuanga na buraka bunene. 16Nagwa mu maguru gae namusi:ma. Na ka oyo ariga:ri Musamaria. 17Yesu naindura na:ika ati, ?Bataosibwa bo:ne ekumi? ?Nawe bariya abata:nu na bana babee a:ki? 18?Bataboneka ba kuinduka okukusya Nyamuanga, tari omugenyi unu? 19Namubwira ati, Imuka, wigendere. Okwikirisya kwao kwakuonya.

Yesu naraga ejo kusuba kwae

(Ebikorwa 1:9-11)

20Wejire abu:sibwa Abafarisayo ati, ?Obukama bwa Nyamuanga obu:jari? Naindura na:ika ati, Obukama bwa Nyamuanga butaku:ja mburorwa. 21Amwi bataryaika ati, Rora, buri anu, amwi ati, Buri ariya. Okuba rora, obukama bwa Nyamuanga buri mwimwe. 22Nabwira abe:igisibwa bae ati, Jisiku jiri:ja runu muririgira okurora orumwi ku siku jo Mwana wo mu:nu, nawe mutarirubona. 23Mbe baribabwira ati, Rora ari ariya, amwi ati, Rora ari anu. Mutagendaga, amwi mutabaru:baga. 24Okuba rwo rurafi kutyo orurabisya kuso:ka ku rubara orumwi emwaro yo rwire kukinga ku rubara orundi emwaro yo rwire, nikwo kutyo no Mwana wo nu:nu ariba ku rusiku rwae. 25Nawe okwamba kumwiire okunya:sibwa kwafu no kuremwa na ba riimbo rinu. 26Mbe rwa kutyo jariga mu siku ja Nuu, nikwo kutyo one jiriba mu siku jo Mwana wo mu:nu. 27Baryaga nibanywa nibatwara nibagaburwa, okukinga ku rusiku rurya Nuu engiye mu ngaraba, induruma ni:ja ni:basingarisya bo:ne. 28Na rwa kutyo jariga mu siku ja Lutu, baryaga nibanywa nibagura nibaka:na nibabiba nibombaka. 29Nawe ku rusiku rurya Lutu aso:kere mu Sodoma, omuriro nigugwa no muti gwe cibiriti okuso:ka mu rwire, nibibasingarisya bo:ne. 30Nikwo kutyo one jiriba ku rusiku runu Omwana wo mu:nu ariswerurwa.

31Ku rusiku urwo unu ariba inguru ku nyumba, ne bi:nu byae biri mu nyumba, atari:ka kubiso:syamo. Na unu ari mwisambu one kutyo ataja kusuba inyuma. 32Mwicuke muka Lutu. 33Unu kayenja okuonya obuanga bwae aribubusya, nawe unu kabubusya niwe aribubona. 34Enibabwira ati, Mu ngeta eyo babiri bariba bama:mire ku buriri bumwi. Oumwi arigegwako, oundi nasigwa. 35Babiri bariba nibasya aamwi, oumwi arigegwako, oundi nasigwa. 36Ba:nu babiri bariba mwisambu, oumwi arigegwako, oundi nasigwa. 37Nibaindura nibamubu:sya ati, ?A:ki, Ratabugenyi? Nababwira ati, Anu oguba omutumbi, eyo niyo ejikofyanyisya jimpungu.

Currently Selected:

Luka 17: KIJ1960

Highlight

Copy