Luka 15

I:na:ma inu yaburire

(Mt. 18:12-14)

1Mbe abatobesya bo:ne na be bibi:bi bariga nibamufugerako korereki bamungwe. 2Abafarisayo na bandiki nibe:toŋanira, niba:ika ati, Omu:nu unu kakuma abe bibi:bi narya nabo. 3Nababwira ecijekekanyo ati, 4?Ni mu:nu ki kwimwe unu ana ji:na:ma rigana, akaburwako eimwi, atakujisiga ejo amakumi agata:nu na agana ne:ta:nu ne:na (99) emwira, naru:ba eyo yabura kukinga anu kaibonera? 5Mbe akaibona, kaitu:ra kwibega ryae nakonderwa. 6Akakinga ika, kabirikira abasa:ni bae na be:kasyanya bae, na:ika ati, Mukonderwe aamwi nanye, okuba nabona i:na:ma yani inu yariga iburire. 7Enibabwira ati, Nikwo kutyo kurabaga kukonderwa mu rwire kurwo we bibi:bi oumwi akata, okukira abarenge:resi amakumi agata:nu na agana na bata:nu na bana (99) banu batakenere kuta.

Orupirya runu rwaburire

8?Amwi ni mugasi ki unu ari na jimpirya ekumi, akaburirwako orumwi, atakukongesya itara, neerera inyumba, naruyenjera rukwebera kukinga anu karubonera? 9Akarubona, nabirikira abasa:ni bae na be:kasyanya bae, na:ika ati, Mukonderwe aamwi nanye, okuba nabona orupirya rwani runu rwari rumburire. 10Enibabwira ati, Nikwo kutyo kurabaga kukonderwa imbere ya bamaraika ba Nyamuanga kurwo we bibi:bi oumwi akata.

Omwana unu aburire

11Na:ika ati, Ariga:rio mu:nu unu ariga:ri na bamura bae babiri. 12Omuto:to nabwira esemwene ati, Rata, nana omugabo gwe bi:nu gunu gunyiire. Mbe nabagabira ebi:nu byae. 13Mbe wejire jaturao siku no:to, Omwana omuto:to nakofya ebi:nu byae byone, naribata nagenda mu:si ya kura. Nanyaramburire:yo ebi:nu byae mu ntungwa jimbi:bi. 14Mbe wejira amara okweseranya byone, njara nyafu ni:gwa mu:si eyo, namba okukena. 15Nagenda nagwatirirana na mwinengo umwi wa mu ca:ro eco. Oyo namutuma mu rure:bero rwae okure:ba jingurube. 16Ne:sigomberaga okwigusya inda yae na masusu ganu jingurube jaryaga, nawe ariga atario mu:nu wa kumuyana.

17Nawe ejire e:inda na:ika ati, Abakosi bo muyero aba rata ni baringa banu abe:guta ebiryo nibatamwa, ka:nye enifwira anu no mweko! 18Nje ni:muke nigende ku rata, nimubwire ati, Rata, nanyamuye mu rwire na imbere yao. 19Nitace:ire kutogwa mwana wao. Nkora rwo umwi ku bakosi bao. 20Ne:muka nagenda kwisemwene. Nawe anu ariga acari kura, esemwene namurora, namufwira ecigongo nabirima namugwa mu cifuba, namunyunya muno. 21Omwana namubwira ati, Rata, nanyamuye mu rwire na imbere yao. Nitace:ire kutogwa mwana wao. 22Nawe esemwene nababwira abagaya bae ati, Mugende bwangu mure:te omwenda gunu gukondere kukira jo:ne, mugumufwafye. Mumutere inarye ku ca:ra, ne bikwirya mu maguru gae. 23Mure:te ne cinyara ecinure, muci:te. Cirye cisandabe. 24Okuba Omwana wani unu ariga aburire abonekere. Nibamba okukonderwa.

25Nawe Omwana wae Omukuru ariga:ri mu ndimiro. Ejire afugera ku nyumba, nongwa okwimba no kubina. 26Nabirikira oumwi ku bagaya, namubu:sya ati, ?Ni misango ki ijo? 27Namubwira ati, Omumura wanyu e:jire, ne:somwana amwitiye ecinyara ecinure okuba amubwene ari muanga. 28Omwene nabiirwa, narema okwingira. Esemwene nauruka namuremberesya. 29Nawe omwene naindura nabwira esemwene ati, Rora, anye namarire emyaka jinu myafu ninkukorera, amwi nicariga kukaya ciragiro cao na katyari. Nawe ucariga kunanako na ka:nabusi korereki nikonderwe na basa:ni bani. 30Nawe Omwana wao oyo, unu amarire ebi:nu byao na bamaraya, niwe we:tira ecinyara ecinure. 31Mwene namubwira ati, Mwana wani, awe uri aamwi nanye kusiku, ne byani byone ni byao. 32Nawe kwari kwiire cikonderwe no kusandaba, okuba unu omumura wanyu unu ariga afu:ye asubiro:rora, ka:riga aburire naboneka.

Currently Selected:

Luka 15: KIJ1960

Highlight

Copy