Màteo 6

Àdɔ̀mènyuɛ̃ wɔ̀wɔ

1“Mì mu gbà nɔ wɔ̀ ènu kèwo mìabe sɛ̃sɛ̃#6.1 Yudàviwo be sɛ̃sɛ̃: e le nyì ègbè ji nɔ̀nɔ na ènu veve ètɔ̃ kèwo lè Yudàviwo be èkɔ̀dowo mèa: àdɔ̀mènyuɛ̃ wɔ̀wɔ (6.2-4) kuefã (6.5-6) ku ènu babla (6.16-18). ɖo na mìa, àgbãŋùgbà ne àmè sia àmè bèa nɔ kpɔ ò, ɖo ne nène ye mì wɔ̀nàa, mì mu la kpɔ àjɔ̀ ɖekpe xɔ̀ so mìa Tɔ kè lè jiŋùkusia gbɔ ò. 2Ye ŋutia, ne wò le na ènu àmèa, mù gbà wɔ̀ sìgbè àyèmènuwɔ̀tɔwo nène ò; ɖo woawo yaa, ne wo le na ènu àmèa, ègà ye wo ɖona lè bɔ̀bɔ̀pewo ku èmɔwo to ne àmè sia àmè bèa kafu wo. Nyàwo mù le to na mì, wo xɔ̀ woabe àjɔ̀ vɔ̀ xoxo. 3Vɔ̀ ne wò le na ènu àmèa, mù gbà na àpo èmìɔ̃-lɔ ne nya ènu kè àpo ɖùsi-lɔa le wɔ̀ ò. 4Na be ènu nana wòa ne nyi lè wawla mè, eye Ètɔ wò kè kpɔna ènu kè lè wawla mèa, la ɖo e tèpe na wò.”

Kuefã

(Luk 11.2-4)

5“Ne mì le fãkuea, mì mu gbà nɔ wɔ̀ sìgbè àyèmènuwɔ̀tɔwo nène ò; ɖo woawo yaa, wo lɔ̃nà kuefã le ètènu, lè bɔ̀bɔ̀pewo ku èmɔwo to, ne àmè sia àmè bèa kpɔ wo. Nyàwo mù le to na mì, wo xɔ̀ woabe àjɔ̀ vɔ̀ xoxo. 6Vɔ̀ èwò yaa, ne wò le fãkuea, yì àpo èxɔ̀ gã mè, ne wòa tu èhɔ̃a. Fã yɔ Ètɔ wò kè lè wawla mèa, eye Ètɔ wò kè kpɔna ènu lè wawla pèa, la ɖo e tèpe na wò.”

7“Wàlɛbɛ kè mì le fãkuea, mì mu gbà nɔ pò nupo fuu sìgbè àlekè àgbàlèwo wɔ̀nà ɛ̀a nène ò, ɖo wo susuna be Mawu la ɖo èto yèwo, ne yèwo lè pò nupo sùgbɔa. 8Mì mu gbà ɖì wo ò, ɖo mìa Tɔ nya ènu kè hiã mìa gbɔ̀xue mì le biɔ ɛ̀. 9Àlekè mì ɖo la nɔ fãkue a ye nyi ekè:

'Mia Tɔ kè lè jiŋùkusia,

àpo nyikɔ ŋuti ne kɔ̀#6.9 Àɖèsã ye nyi àpo nyikɔ: na ne àmè sia àmè ne nya àpo àɖèsã nyikɔ ŋua.

10Àpo fìɔɖùɖua ne va.

ne wo a wɔ àpo jronu lè ànyigbãa ji,

sìgbè àlekè wo wɔ̀nà ɛ̀ lè jiŋùkusia nène.

11Na mi egbèa, miabe ŋùkèkè-nuɖùɖu,

12wòa sɔ miabe àgɔ̀ jèjewo sɔ kè mi,

sìgbè àlekè mi sɔ kènà àmè kèwo dà lè mia jia nène.

13Mù gbà na mia jè tètèkpɔ mè ò,

vɔ̀a, ɖè mi to lè èvuɛ̃ gbɔ.

[Đo tɔ̀ wò ye nyi fìɔɖùɖua, ku ŋusɛ̃#6.13 Ŋusɛ̃: sãa wo gblɔ̃ na hɔ̃hlɔ̃. ku gogo, kaka sɔ yì. * Àmèn.]'”

14“Đo ne mì sɔ àmèwo be dàdawo kè woa, mìa Tɔ kè lè jiŋùkusia la sɔ mìabe dàdawo kè mìa cã. 15Vɔ̀a, ne mì mu sɔna àmèwo be dàdawo kènà wo òa, mìa Tɔ kè lè jiŋùkusia cã mu la sɔ mìabe dàdawo kè mì ò.”

Ènubabla

16“Ne mì le bla ènua, mì mu gbà nɔ wɔ̀ ŋùmè kpɔ̃ɔ̃ sìgbè àlekè àyèmènuwɔ̀tɔwo wɔ̀nàa nène ò; wo wɔ̀nà ŋùkumè ɖo ɖe, ne àmèwo kpata ne nya be yèwo le bla ènu. Nyàwo mù le tɔ na mì: wo xɔ̀ woabe àjɔ̀ vɔ̀ xoxo. 17Vɔ̀a, èwò yaa, ne wò le bla ènua, jrà ɖokoe wò ɖo; fũ ŋùmè, si àmì hɔ̃hɔ̃ɛ ɖo èta, 18ne àmè ɖe mu gbà nya be wò le bla ènu, sɔ wu Ètɔ wò kè lè wawla mèa ò. Ètɔ wò kè kpɔna ènu lè wawla mèa, la ɖo e tèpe na wò.”

Jiŋùkusi be àdɔ̀kùnuwo

(Luk 12.33-34)

19“Mì mu gbà bɔ̀ àdɔ̀kùnuwo na mìa ɖokoewo lè xixe kèa mè, àfi kè èye ku èŋɔ gblena ènu lè, àfi kè fìãfìwo gbãnà èhɔ̃, fĩnà ènu lèa ò. 20Vɔ̀a, mì bɔ̀ mìabe àdɔ̀kùnuwo ɖo jiŋùkusi, àfi kè èye ku èŋɔ mu gblena ènu lè, eye fìãfìwo cã mu gbãnà èhɔ̃, fĩnà ènu lè ò. 21Đo àfi kè àpo àdɔ̀kùnuwo lèa, ye àpo èjì cã la nɔ̀.”

Ŋutilã be kãligbɛ̃

(Luk 11.34-36)

22“Ŋùkuviwo ye nyi àmèti bliboa be kãligbɛ̃. Ne àpo ŋùkuviwo lè nyuɛ̃ ɖe a, àpo àmèti bliboa mè la kɔ̀. 23Vɔ̀a, ne àpo ŋùkuviwo mu nyɔ òa, àpo àmèti bliboa mè la do vìvìti. Eye ne kɛ̃klɛ̃ kè la nɔ̀ èmè wòa jo nyi vìvìtia, eŋuã vìvìti kèa la nyrɔ̃ cicri ŋutɔ!”

Mawu loo, àlo ègà

(Luk 16.13)

24“Àmè ɖekpe mu teŋu sumɔ àpetɔ èvè ò. E la lɔ̃ ɖèka eye be la crì èvègɔ̃a. Àlo e la tɛ ɖo ɖèka ŋuti eye be la gbe èvègɔ̃a. Mì mu teŋu sumɔ Mawu la gbà nɔ sumɔ ègà ò.”

Flima cici

(Luk 12.22-31)

25“Ye ŋutia, mù le to na mì be mì mu gbà ci flima ɖo ènu kè mì la ɖù, ku ènu kè mì la nù, sɔ nɔ̀ àgbè a ŋuti ò. Mì mu gbà ci flima ɖo àvɔ kè mì la tà ku ènu kèwo mì la do a ŋuti ò. Àgbè mu wu ènu ɖùɖua? Eye ŋutilã cã mu wu àvɔa? 26Mì kpɔ àyamè xèviwo ɖa! Wo mu dona ènu ò, wo mu yànà ènuku, bɔ̀nà ɖo àvàwo ji ò. Gãke mìa Tɔ kè lè jiŋùkusia nana wo ènu ɖùɖu. Mìawo yaa, mì mu lè veve ɖe na ɛ̀ wu xèviwo òa? 27Ne àmè ɖe lè mìa dòmè ci flima ɖo yebe àgbè ŋutia, e la teŋu sɔ ŋùkèkè ɖèka tigɔ̃ kpe yebe àgbènɔ̀zãa?”

28“Nukɛ ŋuti ye mì lè jè tagbã ɖo ènu kè mì la do a ŋuti ò? Mì kpɔ àlekè èsepòpowo wuna lè ègbe mèa ɖa! Wo mu wɔ̀nà èdɔ ɖe ò; wo mu lɔ̃nà àvɔ ò; 29gãke, mù le to na mì be èfìɔ Salomɔ̀n ŋutɔ, lè yebe gogo gã ŋua mèa, mu do àwù kè ɖo àcɔ sìgbè èsepòpo kèawo dòmètɔ ɖèka nène ò. 30Eŋuãa, ne Mawu ɖo àcɔ na ègbe kè lè àve mèa nène, ègbe kè le ètè egbè, eye èsɔ̀ kè gbãnà a, wo la kɔ̀ ɛ̀ ɖo èzò mèa, mu la na mìawo yaa ènu kèwo mì la do a wua? Aò, mìa xɔ̀sèvitɔwo! 31Ye ŋutia, mì mu gbà ci flima, la nɔ gblɔ̃ be: 'Nukɛ ye mi la ɖù ò? Nukɛ ye mi la nù ò? Àlo nukɛ ye mi la tà ò?' 32Đo àmè kèwo mu xɔ̀ Mawu ji sè ò a, ye puna èdù jè ènu kèawo yomè. Mìa Tɔ kè lè jiŋùkusia nya be ènu kèawo kpata hiã mì. 33Ye ŋutia, mì ji Mawu be fìɔɖùɖua ku yebe jɔ̀jɔɛ nyinyia jè ŋùkɔ̀, eye wo la sɔ ènu kèawo kpata kpe è na mì. 34Eŋuã, mì mu gbà ci flima ɖo èsɔ̀ kè gbãnà a ŋuti ò; ɖo èsɔ̀ kè gbãnà a, la va ku ye ŋutɔ be èhiãwo. Gbè sia gbè be àgbàgba jèje sù na ye ɖokoe.”

Currently Selected:

Màteo 6: GEN

Highlight

Copy