Màteo 5
5
Yesù fiɔ ènu lè èto ji
1Kè Yesù kpɔ àmèhaa, e lia èto ɖe ji, nɔ̀ ànyi. Yebe nukplaviwo va e gbɔ, 2eye be fiɔ ènu wo, gblɔ̃ be:
Sìtunyàwo
(Luk 6.20-23)
3“Sìtu ɖèɖe ye e nyi na àmè kèwo ci àgba lè gbɔ̃gbɔ̃ mèa,
ɖo woa tɔ̀ ye nyi Mawu be fìɔdua.
4Sìtu ɖèɖe ye e nyi na hòmèfanɔ̀wo,
ɖo wo la ɖù ànyigbãa be ècrɔ̃#5.4 Xoma ɖewo sɔ hɛ̃hlɛ̃ àtɔ̃gɔ̃a ɖo hɛ̃hlɛ̃ ènɛ̀gɔ̃a be tèpe. .
5Sìtu ɖèɖe ye e nyi na àmè kèwo le lòfũa,
ɖo wo la ɖo àsi àkɔ na wo.
6Sìtu ɖèɖe ye e nyi na àmè kèwo ye jɔ̀jɔɛ wɔ̀wɔ be àdɔ̀ le wù ku sìkɔ le tìa,
ɖo wo la ɖɔpò.
7Sìtu ɖèɖe ye e nyi na ŋuzĩzĩɖèɖemewo,
ɖo wo la nɔ ku ŋuzĩzĩ na wo.
8Sìtu ɖèɖe ye e nyi na àmè kèwo ɖo èjì mè kɔ̀kɔ̀ɛa,
ɖo wo la kpɔ Mawu.
9Sìtu ɖèɖe ye e nyi na àvũɖatɔwo,
ɖo wo la nɔ̀ yɔ wo be Mawu be èviwo.
10Sìtu ɖèɖe ye e nyi na àmè kèwo yomè wo tĩ ɖo jɔ̀jɔɛwɔ̀wɔ taa,
ɖo woa tɔ̀ ye nyi Mawu be fìɔdua.
11Sìtu ɖèɖe ye e la nyi na mì, ne wo zũ mì, wo tĩ mìa yomè, eye wo hɛ̃ mìabe nyikɔ gble kunù tɔ̀ ɖo ŋuti nyèa. 12Mì jɔ̀jì, nɛ mìa sò àyo, ɖo mìabe àjɔ̀ lè jiŋùkusi lòlò, ɖo nènea ye wo tĩ Mawu be gblɔ̃ɖɛtɔ kèwo jè ŋùkɔ̀ na mìa yomèa yeŋu.”
Ànyigbãa be èjè ku xixea be kɔ̀kɔ̀ɛ
(Mrk 9.50; Luk 14.34-35)
13“Mìawo ye le nyi ànyigbã be èjè. Vɔ̀a, ne èjè bu yebe vevea, nukɛ ye wo la wɔ̀ ne bèa gbà ɖo è ò? Mu gbà nyɔ na ènu ɖekpe wu be woa sɔ ɛ̀ kɔ̃ŋùgbe, ne woa zɔ̃ e ji ò.”
14“Mìawo ye le nyi kɔ̀kɔ̀ɛ na xixea. Èdù kè wo tù ɖo èto jia, mu teŋu bè ò. 15Wo mu sũnà kãligbɛ̃ sɔna tɔ̀ka cɔ̃na ɛ̀ ò. Kãligbɛ̃ti ji ye wo sɔna ɛ̀ ɖo, eye bè nana kɔ̀kɔ̀ɛ àmè kèwo kpata lè àxuea mèa. 16Nènea ye, mìabe kɔ̀kɔ̀ɛ ɖo la kɔ̀ lè àgbètɔwo kpata be ŋùmè, eye, wo la kpɔ èdɔ nyuɛ̃ kè mì le wɔ̀a, sɔ na gogo mìa Tɔ kè lè jiŋùkusia.”
Yesù ku Èsea
17“Mì mu gbà susu be, mù va la gũ Mosè be Èsewo àlo ènu kèwo wo ŋlɔ̀ ɖo Mawu be gblɔ̃ɖɛtɔwo be xomawo mè ò. Nyè mu va ne ma ɖè wo jo ò, vɔ̀a, ne ma ɖè woa gɔ̃mè tututu. 18Nyàwo mù le to na mì be kaka na gà kè mè jiŋùkusi ku ànyigbã la nɔ̀ ànyia, wo mu la ɖè ŋɔ̀ŋlɔ̃ kui kè hùe wu ŋɔ̀ŋlɔ̃ kuiwo kpataa àlo Èseawo be àkpa vi tukui ɖe jo keŋu gbɔ̀xue ènuwo kpata la zɔ̃ sù ò. 19Ye ŋutia, àmè ɖekpekpe kè la dà èse kèawo be dòmètɔ vi ɖèka ji, eye be la fiɔ àmèwo be woa wɔ̀ nènea, wo la yɔ ɛ̀ be àmè vitukui lè Mawu be fìɔdua mè. Vɔ̀a àmè ɖekpekpe kè la wɔ̀ ɖo e ji, eye be la fiɔ àmèwo, be woa wɔ̀ ɖo e jia, wo la yɔ àmè ŋua be àmègã lè Mawu be fìɔdua mè. 20Ye ŋutia, mù le to na mì be, ne mì mu wɔ̀nà ɖo Mawu be Èsewo ji, wu Èsefiɔtɔwo ku Farizìwo òa, mì mu la teŋu ɖo Mawu be fìɔdua mè ò.”
Èhlɔ̃ dãdã ku àvũ lele
21“Mì sè be wo do *èse na mìa tɔgbewo be: 'Mù gbà wù àmè ò. Ne àmè ɖe wù àmèa, wo la ɖo kòjo na ɛ̀.' 22Vɔ̀a ènyè yaa, mù le gblɔ̃ na mì be, àmè kè la bijì do nɔ̀viaa, wo la ɖo kòjo na ɛ̀. Àmè kè la zũ nɔ̀via be: 'Yɛ̀yìnɔ̀a', wo la kplɔ̀ ɛ̀ yì kòjoɖope gãa, ne woa ɖo kòjo na ɛ̀; eye àmè kè la zũ nɔ̀via be: 'Àɖàhùatɔa', e jè be woa sɔ ɛ̀ dà ɖo èzò màvɔ mè. 23Ye ŋutia, ne wò va *vɔsakpe be ŋùkɔ̀, le ji la na ènu Mawu, eye lè funua, wò ɖoŋù be ènyà ɖe lè èwò ku nɔ̀vi wò dòmèa, 24tàsi vɔsa wòa ɖo funu, ne wòa yì jrà èwò ku nɔ̀vi wòa dòmè ɖo gbɔ̀xue. E yomèa, trɔva sɔ vɔsa wòa na Mawu.”
25“Ne wò jè àgɔ̀ do nɔ̀vi wò, eye be kplɔ̀ wò le yì kòjoɖopea, jè àgbàgba ne wòa ɖèbla jrà wò ku ì dòmè ɖo lè èmɔa ji. Ne mu nyi nène òa, e la sɔ wò do àsi na kòjoɖotɔ, eye kòjoɖotɔa la sɔ wò do àsi na èkpòvitɔ, eye èkpòvitɔa la sɔ wò do-gà. 26Nyàwo mù le to na wò, wò la tu àgɔ̀ kè wò jè a be èfɛ̃a kpata, ɖekpe ma to le e mè keŋu gbɔ̀xue wo la ɖè wò to ò.”
Ènufiɔfiɔ so àhasìwɔ̀wɔ ŋuti
27“Mì sè, wo gblɔ̃ be: 'Mù gbà wɔ̀ *àhasì ò.' 28Vɔ̀a, ènyè yaa mù le to na mì be, àmè ɖekpekpe kè la kpɔ nyɔ̃nù eye be la jro#5.28 Jro: la ji be yèa dɔ̃ kudo è. èa, wɔ̀ *àhasì ku ì lè èjì mè xoxo. 29Ye ŋutia, ne àpo ɖùsi mè be ŋùkuvi la kplɔ̀ wò yì ènu vuɛ̃ mèa, hɔ̃ ɛ̀ to ne wòa sɔ ɛ̀ dãŋùgbe, ɖo, e la nyɔ na wò be wòa bu àpo ŋutinu ɖèka, wu be ènuwo kpata ne sɔ̀gbè lè ŋuti wò vɔ̀a, ne woa sɔ èwò ŋutɔ àmètia kpata dà ɖo èzò màvɔ mè. 30Ne àpo ɖùsi-lɔ ye dɔ̃nà wò ɖo ènuvuɛ̃ mèa, sò è, ne wòa sɔ ɛ̀ dãŋùgbe, ɖo e la nyɔ na wò be wòa bu àpo ŋutinu ɖèka, wu be, ènuwo kpata ne sɔ̀gbè lè ŋuti wò, vɔ̀a, woa sɔ àpo àmèti bliboa dà ɖo èzò màvɔ mè.”
Yesù fiɔ ènu so èsrɔ̃ gbegbe ŋuti
(Màt 19.9; Mrk 10.11-12; Luk 16.18)
31“Wo gbà gblɔ̃ be: 'Ne àmè ɖe gbe èsrɔ̃aa, ne ŋlɔ̀ xoma do àsi na ɛ̀, be yè gbe è.' 32Vɔ̀a, ènyè yaa, mù le to na mì be ne àmè ɖe gbe èsrɔ̃aa, eye mu nyi be àhasì ye nyɔ̃nùa wɔ̀ òa, àmè kè gbe nyɔ̃nùa, ye dɔ̃ ɛ̀ bè wɔ̀ àhasì, eye àmè kè ɖè nyɔ̃nù kè wo gbea cã wɔ̀ àhasì.”
Ènu tàtaa
33“Mì gbà sè, wo gblɔ̃ na mìa tɔgbewo be: 'Mù gbà kã àtãŋu be yèa wɔ̀ ènu ɖe vɔ̀a, wòa dokpò ènua wɔ̀wɔ ò. Wɔ̀ ènu kè wò tà Mawu be yèa wɔ̀a kpata.' 34Vɔ̀a, ènyè yaa mù le to na mì be, mì mu gbà tà ènu klua ò. Mì mu gbà tà jiŋùkusi ò, ɖo Mawu be fìɔzìkpe ye be nyi. 35Mì mu gbà tà ànyigbã ò, ɖo Mawu be àfɔ̀ɖope ye be nyi; mì mu gbà tà Yèruzàlɛm ò, ɖo èfìɔ gãa be èdù ye be nyi. 36Mù gbà tà èta wò ŋutɔ cã ò, ɖo wò mu la teŋu wɔ̀, èɖà kè le èta na wòa be kui ɖèka bèa ɣe, àlo bèa nyrɔ̃ ò. 37Mìabe 'Ɛ̃ɛ', ne nyi 'Ɛ̃ɛ', mìabe 'Ào' ne nyi 'Ào.' Ènyà bu kè kpata kplɔ̀nà ɛ̀ do a, àmè flùtɔa gbɔ ye be sona.”
Èvuɛ̃ ɖo èvuɛ̃ tèpe
(Luk 6.29-30)
38“Mì sè wo gblɔ̃ be: 'Ŋùkuvi ɖo ŋùkuvi tèpe, àɖu ɖo àɖu tèpe.' 39Vɔ̀a, ènyè yaa mù le to na mì be, mì mu gbà sitè ɖo àmè vuɛ̃ ŋuti ò, vɔ̀ bòhũa, ne àmè ɖe pò ɖùsi be èto mè na wòa, trɔ èmìɔ̃ tɔ̀a cã na ɛ̀. 40Ne àmè ɖe ji la sãma wò, la xɔ̀ àpo àwùa, ɖè àpo àwù gãa cã na ɛ̀. 41Ne àmè ɖe zĩ ji wò be wòa zɔ̃ èmɔ ku yè, kpeti ɖèkaa, zɔ̃ èmɔ ku ì kpeti èvè. 42Na ènu àmè kè biɔ wòa. Ne àmè ɖe ji la wue ènu lè àsi wòa, mù gbà ɖèkɔ̀ le e ŋuti ò.”
Mì lɔ̃ mìabe kɛ̃tɔwo
(Luk 6.27-28, 32-36)
43“Mì sè wo gblɔ̃ be: 'Wò la lɔ̃ èha wòvi, eye wò la crì àpo kɛ̃tɔ.' 44Vɔ̀a, ènyè yaa, mù le gblɔ̃ na mì be, mì lɔ̃ mìabe kɛ̃tɔwo; mì fãkue ɖo àmè kèwo le tĩ mìa yomèa ta. 45Nènea ye mì la ɖè è fiɔ be mì nyi mìa Tɔ kè lè jiŋùkusia be èviwoa yeŋu; ɖo e nana dɔ̃ŋùkusu hũnà ɖo àmè nyuɛ̃wo ku àmè vuɛ̃wo ji, gbà nana èji jànà ɖo àmè jɔ̀jɔɛwo ku àmè màjɔ̀ màjɔwo ji. 46Đo ne àmè kèwo lɔ̃ mìawo ɖèɖe kpò mì lɔ̃nàa, àjɔ̀ kɛ ye Mawu la na mì ò? Èdɛ̃jɔ̀tɔwo cã mu wɔ̀nà nènea? 47Ne mìa nɔ̀viwo kpò ye mì dona ègbè na a, nukɛ ye mì wɔ̀ wu àgbàlèwo ò? Àmè kèwo mu sɛ̃nà Mawu òa cã wo mu wɔ̀nà nènea? 48Ye ŋutia, mì ɖù blibo sìgbè àlekè mìa Tɔ kè lè jiŋùkusia ɖù bliboa nène.”
Currently Selected:
Màteo 5: GEN
Highlight
Share
Copy
Want to have your highlights saved across all your devices? Sign up or sign in
Mina Bible © Bible Society of Togo, 2014.
