Gɔ̃mèjèje be Xoma 43

Yakɔb lɔ̃ be Bɛnyamìn ne yì Ejiptè

1Àdɔ̀totoa le sɛ̃ŋu kpe lè Kanàn nyigbã ji. 2Eye wàlɛbɛ kè Yakɔb be àxuedo a ɖù àgblèmènuku kè wo hɛ̃ so Ejiptè a vɔ̀a, woa tɔ gblɔ̃ na wo be: “Mì trɔ yì Ejiptè ne mìa yì plè àgblèmènuku va.” 3Yudà ɖo e ŋuti na ɛ̀ be: “Ŋusùa do ègbè àsi na mi be: “Yè mu le ja xɔ̀ mi ne mia nɔ̀via mu kplɔ̀ mia do va ò.” 4Ne wò ɖo e be mia nɔ̀via la kplɔ̀ mia do a, eŋuã mi la yì plè àgblèmènuku lè Ejiptè; 5vɔ̀ ne wò mu ɖo e ku mi òa, mi mu la yì ò, ɖo ŋusùa gblɔ̃ na mi be: “Yè mu le ja xɔ̀ mi ne mia nɔ̀via mu kplɔ̀ mia do va ò.” 6Izràɛl yì e ji be: “Nukɛ ŋuti ye mì na ŋusù kèa nya be mì gbà ɖo nɔ̀vi ŋusù bu ò? Ènyà kɛ ye mì yì ji na mù lekea!” 7Wo ɖo e ŋuti be: “Ŋusùa ye biɔ mi ènyà fuu so mia ŋutɔ ku miabe xòmèa ŋuti be: “Mìa tɔa gbà lè àgbèa?” Mi ɖo la ɖo ènyà kèawo ŋuti na ɛ̀. Mi mu nya be e la va gblɔ̃ be: “Mì yì kplɔ̀ mìa nɔ̀via va na mù ò.” 8Yudà gblɔ̃ e yomè na ètɔa Izràɛl be: “Ɖè àsi lè ɖèvia ŋuti na mù. Mì sitè ne mia jè èmɔ̃, ne mi le ji la nɔ̀ àgbèa eye mu nyi be mia ku ò, mia ŋutɔ, èwò cã ku miabe viwo. 9Mù sɔ ɖokoe nyè le do àwòba, eye wò la teŋu biɔ mù ne nyè mu kplɔ̀ ɛ̀ gbɔ̀ va na wò òa; ne nyè mu gbà kplɔ̀ ɛ̀ va òa, mù la nyi èvuɛ̃wɔ̀tɔ lè ŋùkumè na wò gà sia gàmè. 10Ne mi mu kè gũ gàmè ɖo ènyà kèa ŋuti òa, mi kè trɔ gbɔ̀ so Ejiptè zè èvègɔ̃a vɔ̀.” 11Izràɛl, woa tɔa do àpa be: “Ne e lè nènea, eŋuã mì wɔ̀ ekèa. Mì sɔ mia de be àgbãmèkãnuwo do mìabe àkpɛtɛawo mè ne mìa sɔ wo yì na ŋusù kèa: mì sɔ àŋɔ̀trenu, lifi, ànyisì, àŋɔ̀rɔbà ku làdanɔ̀mrɔbà, ègbe hɔ̃hũɛwo ku àtiku sɛ̃sɛ̃wo. 12Mì trɔ sɔ ègà bu ɖo àsi eye mì mu gbà ŋlɔ̀be ègà kè wo sɔ do mìabe àkpɛtɛawo mè va yìa ò; ta mu nyɔ òa, ènu ŋlɔ̀be ye. 13Mì kplɔ̀ mìa nɔ̀via ne mìa jè èmɔ̃ yì ŋusù kèa gbɔ lè Ejiptè. 14Mawu ŋusɛ̃kpatatɔa ne tɔ àsi ŋusù kèa ne bèa xɔ̀ mì nyuɛ̃ ɖe àleke be, bèa ɖè àsi lè àmè ɖèa ku Bɛnyamìn ŋuti na mì! Ènyè ya, mù la ci sìgbè àmè kè mu ɖo èvi kpɔ òa nène.”

Yɔsɛ̀f dogò fòfoawo zè èvègɔ̃a

15Ekè wo bla àgbãmèkãnuawo vɔ̀a, wo sɔ ègàkpɛtɛ èvèawo eye wo kplɔ̀ Bɛnyamìn ɖo ŋuti. Wo so jè èmɔ̃ tùtà Ejiptè-nyigbã ji eye wo yì ɖo Yosɛ̀f be ŋùkumè. 16Ekè e kpɔ Bɛnyamìn ku woa, Yosɛ̀f gblɔ̃ na yebe ènujikpɔtɔ be: “Kplɔ̀ àmè kèawo yì àxomè ne wòa wù èlã ɖèka eye wòa jrà ɛ̀ ɖoɖɛ. Ɖo ŋusù kèawo la ɖùnu ku mù gà woèvè mè.” 17Ènujikpɔtɔa wɔ̀ ɖo ènyà kè Yosɛ̀f gblɔ̃ na ɛ̀a ji eye e kplɔ̀ àmèawo yì Yosɛ̀f be àxomè. 18Vɔ̃vɔ̃ ɖo wo be wo kplɔ̀ yèwo yì Yosɛ̀f be àxomè. Wo do àpa be: “Ègà kè wo trɔ sɔ do miabe àkpɛtɛwo mè sã ŋuti ye. Wo kplɔ̀ mi ku miabe èsɔ-àkɛtɛwo ne woa wɔ̀ èfũ ku mi eye woa dɔ̃ èto na mi sìgbè kluviwo nène.” 19Wo dɔ̃ gogo Yosɛ̀f be ènujikpɔtɔa eye wo pò nupo kudo è lè àgboa mɔnu. 20Wo gblɔ̃ be: “Mia àpetɔ, mi va kpɔ va plè àgblèmènukuwo. 21Vɔ̀, ekè mi trɔ le yì àxue eye mi va tɔtè lè èmɔ̃ jia, wàlɛbɛ kè mi hũ miabe àkpɛtɛwoa, àmè sia àmè kpɔ yebe ègàkpɛtɛ ku ègà lè àkpɛtɛawo mè. Mi do è jèsìdo be mia ŋutɔ be ègà kè mi sɔ plè àgblèmènukua ye mi gbà trɔ sɔ le jo 22ye ŋuti ye mi trɔ ɛ̀ sɔ va ku ègà bu kè mi la sɔ plè àgblèmènuku buwoa. Mi mu nya àmè kè trɔ sɔ ègà do miabe àkpɛtɛawo mè ò.” 23E ɖo e ŋuti be: “Èjì ne jè e mè na mì, mì mu gbà vɔ̃ ò. Mìabe Mawu kè gbà nyi mìa tɔgbe be Mawu a ye sɔ àdɔ̀kù kèa do àkpɛtɛawo mè. Ɖo mù xɔ̀ mìabe èfɛ̃tua xoxo.” E yomè a, e ɖè àsi lè Simeɔ̀n ŋuti na wo. 24Ènujikpɔtɔa na woa kpata gɛ̃ ɖo Yosɛ̀f be àxomè. E kùsì va na wo ne woa sɔ klɔ àfɔ̀wo eye e gbà ji nuɖùɖu na woabe èsɔ-àkɛtɛawo. 25Wo jrà woabe àgbãmèkãnuwo ɖo le tɔtè kpɔ Yosɛ̀f be gbɔ̀gbɔ lè gà woèvè mè; wo va sè egɔ̃mè be funu ye, yèwo la ɖùnu lè. 26Wàlɛbɛ kè Yosɛ̀f gbɔ̀ va àxomèa, fòfoawo ku nɔ̀viawo sɔ àgbãmèkãnu kèwo lè woa sia na ɛ̀ eye wo do èta gũ kaka yì ànyigbã lè ŋùkɔ̀ na ɛ̀. 27E biɔ àlekè wo fɔ̃ ɖoa, e yomè a, e gblɔ̃ be: “Àleke ye mìa tɔ sĩsĩ kè be ènyà mì gblɔ̃ na mù a fɔ̃ ɖo ò? E gbà kpɔ̀tɔ̀ lè àgbèa?” 28Wo ɖo e ŋuti be: “Àpo sumɔ̃vi mia tɔ, lè nyuɛ̃ ɖe; e gbà kpɔ̀tɔ̀ lè àgbè.” Eye wo bɔ̀bɔ̀ gbà do èta gũ na ɛ̀. 29Ekè e kɔ ŋùmè yì jia, Yosɛ̀f kpɔ ènɔa be èvi Bɛnyamìn kè nyi nɔ̀via. E gblɔ̃ be: “Àmè kèa ye nyi mìa nɔ̀vi vifɛ̃ kè be ènyà mì gblɔ̃ na mù a?” E yomè a, e gblɔ̃ be: “Mawu ne tu sì na wò èvi nyè.” 30Ekè e wɔ̀ kɔ̀bɛ na ɛ̀ ɖo e kpɔ nɔ̀via, e ɖèbla ji tèpe kè be la yì fãvi lèa. E gɛ̃ ɖo yebe èxɔ̀ dɔ̃me mè. Lè funua, e fãvi. 31E yomè a, e fũ ŋùkumè eye e to va. Kè e ɖù ye ɖokoe ji vɔ̀a, e gblɔ̃ be: “Mì mã ènuɖùɖu na mi.” 32Wo wɔ̀ Yosɛ̀f tɔ̀a na ɛ̀ ɖovò eye wo wɔ̀ fòfoawo ku nɔ̀via tɔ̀ na wo. Ejiptètɔ kèwo lè funuawo le ɖùnu ku Yosɛ̀f lè àkpa ɖèka ɖo Ejiptètɔ mu ɖo la ɖùnu ku Hebrùwo ò. Ekèa nyi èhlɔ̃nu ne e va e mèa. 33Hebrù kèawo nɔ̀ ànyi lè Yosɛ̀f be ŋùkɔ̀, so àmègãxotɔa ji va ɖo vifɛ̃tɔa ji, eye wo le kpɔ ŋùmè na woa nɔ̀nɔwo ku vɔ̃vɔ̃. 34Yosɛ̀f na wo wɔ̀ ènuɖùɖu kè lè yebe kplɔ̃a jia tutu na wo, vɔ̀ Bɛnyamìn tɔ̀ sùgbɔ wu kpɔ̀tɛawo zè àtɔ̃. Eye woa kpata wo nù àhà gbà kpɔ jìjɔɛ ŋutɔ.

Currently Selected:

Gɔ̃mèjèje be Xoma 43: GEN

Highlight

Copy