Gɔ̃mèjèje be Xoma 44

Yosɛ̀f be fòfoawo trɔ gbɔ̀ va Kanàn

1Yosɛ̀f ɖè ègbè na yebe ènujikpɔtɔa gblɔ̃ be: “Lɔ àgblèmènukuwo ɖo àmè kèawo be àkpɛtɛawo, ne bèa sù nène kè wo la teŋu sɔa nu, eye sɔ àmè sia àmè be ègàa dà ɖo yebe àgbã ji lè àkpɛtɛa mè. 2Lè vifɛ̃tɔa be àkpɛtɛa mèa, sɔ kogò nyèa, klòsalò kogò nyèa ku yebe ènuplègàa do e mè na ɛ̀.” Eye e wɔ̀ ènu kè Yosɛ̀f gblɔ̃ na ɛ̀a pɛpɛpɛ. 3E kè èŋù kèa, wo tàsi wo jo ku woabe èsɔ àkɛtɛawo. 4Wo to lè èdùa mè eye wo mu kpɔ ɖo àfi ɖe gbɔ̀xue ye Yosɛ̀f gblɔ̃ na yebe ènujikpɔtɔa be: “Sitè kplà! Pu dù jè àmè kèawo yomè, ne wò xe woa, gblɔ̃ na wo be: “Nukɛ ŋuti ye mì wɔ̀ èvuɛ̃ ɖo ènyuɛ̃ tèpe ɖo ò? 5Nukɛ ŋuti ye mì fĩ àpetɔ nyè be kogò kè mè be nùnà lè gbà sɔ wɔ̀nà sɛ̃sɛ̃ ò? Ènu kè mì wɔ̀a nyi ènu bàɖà ŋutɔ.” 6Yosɛ̀f be ènujikpɔtɔa jè èmɔ̃, yì xe wo, eye e gblɔ̃ ènyà kèawo na wo. 7Wo ɖo e ŋuti na ɛ̀ be: “Àleke wɔ̀ ye mia àpetɔ la teŋu gblɔ̃ ènyà kèa ɖo? E la ɖèfũ ŋutɔ be sumɔ̃vi wòwo wɔ̀ ènu kèa! 8Ègà ku ègàkpɛtɛ kè mi kpɔ lè miabe àkpɛtɛawo mèa, mi mu trɔ sɔ wo so kaka Kanàn ke va na òa? Àleke ye mi la teŋu fĩ klòsalò àlo sìka lè àpetɔ wò be àxomè ɖo ò? 9Sumɔvi wò kè be àkpɛtɛ mè wo la kpɔ ènu kèa lèa, jè na èku! Eye mi la trɔ zũ kluvi na àpetɔ wòa.” 10E gblɔ̃ be: “E nyɔ, ne nyi àlekè ye mi gblɔ̃ ɛ̀a. Àmè kè gbɔ wo la kpɔ ɛ̀ lèa, la trɔ zũ kluvi nyè eye wo la ɖè àsi lè àmè kpɔ̀tɛawo ŋuti.” 11Wo ɖèbla ɖiɖi woabe àgbãwo ɖo ànyigbã, àmè sia àmè tu ye tɔ̀a. 12Ènujikpɔtɔa tɔ àgbãwo mè kãkã so àmègãxo tɔa ji va ɖo vifɛ̃tɔa ji eye wo kpɔ kogòa lè Bɛnyamìn be àkpɛtɛ mè. 13Wo zɛ̃ woabe àwùwo eye kè wo trɔ bla àgbã na woabe èsɔ àkɛtɛawo vɔ̀a, wo trɔ yì èdùa mè.

Ènyà dɔ̃dɔ̃ yeye: Yosɛ̀f le ye ɖokoe

14Yudà ku ètɔa be èviwo yì ɖo Yosɛ̀f be àxomè, wàlɛbɛ kè ye Yosɛ̀f mu kpɔ jo òa, wo jèklò sɔ ŋùmè cɔ̃ ànyi lè ŋùkɔ̀ na ɛ̀. 15E gblɔ̃ na wo be: “Nukɛ ye nyi ekèa mì wɔ̀ ò! Mì mu nya be àmè kè lè sìgbè ènyè nènea ɖo ŋusɛ̃ la kù ènu mè kpɔ òa?” 16Yudà ɖo e ŋuti be: “Nukɛ mi la teŋu gblɔ̃ na mia àpetɔ ò? Ènyà kɛ ò? Àmè tahlùɛ̃-nya kɛ ò? Mawu ye ɖè sumɔ̃vi wòwo be àgɔ̀jèje ɖo àma. Miawo ye kè, mi trɔ zũ mia àpetɔ be kluviwo, mia ŋutɔ cã ku àmè kè gbɔ wo kpɔ kogòa lèa.” 17Yosɛ̀f ɖo e ŋuti be: “E la ɖèfũ, ne ma wɔ̀ nène. Vɔ̀, àmè kè gbɔ wo kpɔ kogòa lèa ye la nyi kluvi nyè, mìa wo ya mì la trɔ yì mìa tɔ gbɔ gãgã ɖe.”

18Yudà dɔ̃ gogo Yosɛ̀f eye e do àpa gblɔ̃ be: “Àpetɔ nyè, tɔ̀wòjɔ̀! Ɖè èmɔ̃ na sumɔ̃vi wò bèa gblɔ̃ ènyà ɖe ne wòa sè, co mu gbà do àdɔ̀mèze na wò ò! Àlekè Faraɔ̀n lèa ke wò cã wò lè. 19Èwò mia àpetɔ ŋutɔ ye biɔ ènyà mia sumɔ̃viawo sè gblɔ̃ be: “Ètɔ ku nɔ̀vi ŋusù lè mìa sia?” 20Mi ɖo e ŋuti na mia àpetɔa be: “Mi ɖo ètɔ sĩsĩ eye ɖèvi kè be jì lè yebe tɔgbekuku mèa nyi vifɛ̃. Fòfoa ku, ye ɖèka ye kpɔ̀tɔ̀ na ènɔa eye ètɔa kebe na ɛ̀.” 21E wɔ̀ ye wò gblɔ̃ na sumɔ̃vi wòwo be: “Mì yì kplɔ̀ ɛ̀ va na mù ne ma lebè na ɛ̀.” 22Mi ɖo e ŋuti na mia àpetɔ be: “ɖèkajɛvi kèa mu la teŋu jo lè ètɔa gbɔ ò, ɖo ne e jo kpòa, ètɔa la ku.” 23Nène a ye wò gblɔ̃ na sumɔ̃vi wòwo be: “Ne mìa nɔ̀vi vifɛ̃tɔa mu va ku mì òa, nyè mu gbà la xɔ̀ mì gbèɖe ò.” 24Vɔ̀, wàlɛbɛ kè ye mi yì mia tɔ kè le nyi àpo sumɔ̃via gbɔa, mi ɖè èwò mia àpetɔ be ènyà na ɛ̀. 25Ekè mia tɔ gblɔ̃ be: “Mì trɔ yì plè àgblèmènukuwo va so Ejiptè a”, 26mi ɖo e ŋuti na ɛ̀ be: “Mi mu la teŋu yì ò. Ne mia nɔ̀vi vifɛ̃a kplɔ̀ mia do a, mi la yì; ɖo ŋusù kèa mu la kpɔ mia gbɔ ne mia nɔ̀vi vifɛ̃a mu kplɔ̀ mia do ò.” 27Àpo sumɔ̃vi, mia tɔa gblɔ̃ na mi be: “Mì nya nyuɛ̃ ɖe be woa nɔ̀a, ŋusùvi èvè kpò be jì na mù. 28Ekè ɖèka jo lè gbɔ nyèa, mì gblɔ̃ be: èlã wɔ̀ àdã ɖe vũvũ ì na mù. Eye nyè mu gbà kpɔ ɛ̀ gbèɖe kpɔ ò. 29Eye mì gbà le ji la kplɔ̀ ye cã jo lè gbɔ nyèa! Ne mì ɖèmɔ̃ ye ènu ɖe yì wɔ̀ ɛ̀a, mù la sɔ èta bebe nyèa yì èkuwode lè ènu hàha mè.” 30Ne mù yì ètɔ nyè kè nyi àpo sumɔ̃via gbɔ fifì, eye nyè mu kplɔ̀ ɖèvia yì òa, yebe àgbèa kù ɖo ɖèvia tɔ̀ ŋuti 31be e la ku ne e kpɔ be ɖèvia mu trɔ gbɔ̀ ku mù òa. Sumɔvi wòwo la kplɔ̀ mia tɔ kè sĩ vɔ̀a, lè ènuhàha mè yì èyɔ̀ mèa! 32Nya nyuɛ̃ ɖe be mù kã àtãŋu lè ètɔa be ŋùmè be: “Ne nyè mu kplɔ̀ ɛ̀ gbɔ̀ òa, mù la nyi àgɔ̀jètɔ tɛ̀gbɛ̀dò lè ètɔ nyè be ŋùmè.” 33Ɖè èmɔ̃ ne ènyè sumɔ̃vi wòa, ma trɔ zũ kluvi na àpetɔ nyèa ɖo nɔ̀vi nyè tèpe! Na be bèa trɔ yì ku fòfoawo! 34Ne mu nyi nènea òa, àleke ye ma teŋu trɔ yì ètɔ nyè gbɔ ne ɖèvi kèa mu yì ku mù ò? Nyè mu la teŋu kpɔ jɔ̀gbè vuɛ̃ kè la jè ètɔ nyè ji ò!”

Currently Selected:

Gɔ̃mèjèje be Xoma 44: GEN

Highlight

Copy