Gɔ̃mèjèje be Xoma 42

Yakɔb dɔ̃ èvia ŋusùwo ɖoɖa Ejiptè

1Kè e sè be nuku bɔ lè Ejiptè a, Yakɔb gblɔ̃ na èvi ŋusùawo be: “Nukɛ be ŋùmè, mì le kpɔ na mìa nɔ̀nɔwo ò?” 2E do àpa be: “Mù sè be nuku bɔ lè Ejiptè. Mì yì eye mìa plè nuku ne mia sɔ nɔ̀ àgbè, àlekea be mi mu gbà ku ò.” 3Yosɛ̀f be fòfo àmèwo ɖèbla yì Ejiptè ne woa yì plè nuku, 4vɔ̀a, Yakɔb mu na èmɔ̃ Yosɛ̀f be nɔ̀vi Bɛnyamìn be ne kplɔ̀ fòfoawo do ò, ɖo e le gblɔ̃ be: “Jɔ̀gbè vuɛ̃ ɖe teŋu va jò ɖo e ji.” 5Sìgbè àmè kpɔ̀tɛawo nènea, Izràɛl be ŋusùviwo yì la plè àgblèmènuku lè Ejiptè, ɖo àdɔ̀toto le sɛ̃ŋu ŋutɔ lè Kanàn nyigbã ji.

Yosɛ̀f ku fòfoawo be gòdo cucugbãa

6Yosɛ̀f ye nyi Ejiptè-nyigbã ji ɖùtɔ gã eye e sànà àgblèmènuku na dùkɔ̃a kpata. E wɔ̀ be Yosɛ̀f be fòfowo va eye wo do èta gũ na ɛ̀. 7Ekè Yosɛ̀f kpɔ fòfoawoa, e jèsi wo, vɔ̀ mu ɖè ye ɖokoe fiɔ wo ò, eye e pò nupo ku wo ku ŋùmè kãkã. E gblɔ̃ be: “Fikɛ ye mì so ò?” Wo ɖo e ŋuti be: “Mi so Kanàn nyigbã ji va be mia va plè àgblèmènukuwo.” 8Yosɛ̀f kpɔ fòfoawo jèsi, vɔ̀ woa ya, wo mu nya ò. 9Funu ye Yosɛ̀f ɖoŋù èdrɔ̃ kèwo be ku so woa ŋutia ji, eye e gblɔ̃ na wo be: “Sàkplɛsàtɔwo ye mì nyi eye mì va la kpɔ èdùa be gbãgbãpewo.” 10Wo ɖo e ŋuti be: “Kpaò, àpetɔ, sumɔ̃vi wòwo va la plè àgblèmènukuwo. 11Ŋusù ɖèka be èviwo ye mi nyi, kã ɖo mia ji be sumɔ̃vi wòwo mu nyi sàkplɛsàtɔwo ò.” 12E gbe è na wo be: “Aò! Mì va la kpɔ èdùa be gbãgbãpewo ye.” 13Wo yì e ji be: “Mi, àpo sumɔ̃viwo, mi nyi ŋusùvi woèvè, ŋusù ɖèka be èviwo lè Kanàn nyigbã ji. Ɖèvi vifɛ̃tɔa ya kpɔ̀tɔ̀ lè mia tɔ gbɔ eye àmè ɖèka dɛ̃.” 14Yosɛ̀f do àpa be: “Mù gblɔ̃ na mì nyuɛ̃ ɖe be mì nyi sàkplɛsàtɔwo. 15Ekèa ye mù la sɔ do mì kpɔ kaka kè ye Faraɔ̀n la nɔ̀ àgbèa, mì mu la to lè fikèa va na gà kè mè ye mìa nɔ̀via la va ò. 16Mì dɔ̃ mìa dòmètɔ ɖèka ɖoɖa ne bèa yì kplɔ̀ mìa nɔ̀via va. Eŋuã àmè kpɔ̀tɛawo trɔ zũ àhùale, sɔ do mìabe ènumè nyàwo kpɔ: nyàwo ye mì le toa? Mu nyi nène òa, mì kpɔ̀tɔ̀ le nyi sàkplɛsàtɔwo kaka kè Faraɔ̀n lè àgbèa!” 17E le fòfoawo kpata sɔ tu, xɔ̀ ŋùkèkè ètɔ̃. 18Ŋùkèkè ètɔ̃gɔ̃a gbèa, Yosɛ̀f gblɔ̃ na wo be: “Ènu kè mì la wɔ̀ sɔ nɔ̀ àgbèa ye kè. Nyè ya mù vɔ̃na Mawu. 19Ne woa sɔ kã ɖo mìa jia, àmè ɖèka la ci gàtɔnugbe lè fikèa. Eye (mì) àmè kpɔ̀tɛawo la sɔ àgblèmènuku yì na mìabe àmè kèwo le ku àdɔ̀a. 20E yomè a, mì la kplɔ̀ mìa nɔ̀vi vifɛ̃tɔa va na mù. Nène a ye mìabe ènyà la ɖo ètù eye mì mu gbà la ku ò.” Eye wo wɔ̀ ɖo e ji tututu. 21Wo gblɔ̃ lè woa nɔ̀nɔwo dòmè be: “Èweè! Mi le xɔ̀ mia nɔ̀via be ètodɔ̃ wàlɛbɛ kè be le hànua. E biɔ sɔsɔkè eye mi mu sè yebe ègbè ò. Ekèa ŋuti ye jɔ̀gbèvuɛ̃ kèa va mia ji ɖo.” 22Rubɛ̀n sɔ ènyà gblɔ̃ na wo be: “Nyè mu gblɔ̃ na mì be: “mi mu gbà wɔ̀ èvuɛ̃ ɖe ku ɖèvi kèa òa!” Eye mì mu sè àpe ègbè ò. Fifìa wo le biɔ mi yebe hlɔ̃.” 23Wo mu nya be Yosɛ̀f le sè ènyà kè yèwo le gblɔ̃a gɔ̃mè ò, ɖo e kplɔ̀ ègbègɔ̃mèɖètɔ ɖo ŋuti. 24E ye wɔ̀ be Yosɛ̀f tètè yì àzɔ̀ge, yì fãvi; e yomè a, e trɔ va woa gbɔ eye e pò nupo na wo.

Yakɔb be ŋusùvi ɖewo trɔ yì Kanàn

E le Simeɔ̀n bla lè woabe ŋùmè. 25E yomè a, Yosɛ̀f na ègbè be woa lɔ èlù ɖɔ woabe àkpɛtɛawo, ne woa trɔ sɔ àmè sia àmè be ègàa do yebe àkpɛtɛ mè eye woa gbà na wo nuɖùɖu sɔ zɔ̃ èmɔ̃. Nène a ye Yosɛ̀f wɔ̀ ku fòfoawo. 26Wo do àgblèmènuku be àgbã na woabe èsɔ àkɛtɛawo eye wo so jè èmɔ̃. 27Kè wo va tɔtè lè èmɔ̃ jia, àmè ɖèka hũ yebe àkpɛtɛa ne bèa na nuɖùɖu yebe èsɔ àkɛtɛa, e kpɔ yebe ègà kè be la sɔ tu àgbã kè wo do na ɛ̀a be èfɛ̃a lè àkpɛtɛa mè! 28E gblɔ̃ na kpɔ̀tɛawo be: “Wo trɔ sɔ ègà nyèa na mù. Mù kpɔ ɛ̀ lè àkpɛtɛ nyèa mè!” Ènu ku na wo eye kè wo vɔ̃a, wo gblɔ̃ be: “Nukɛ ŋùkumè ye Mawu wɔ̀ na mi le ke ò!” 29Wo va yì ɖo woa tɔ Yakɔb gbɔ lè Kanàn nyigbã ji eye wo ɖè ènyàwo keŋu na ɛ̀. 30Wo gblɔ̃ be: “Ŋusù kè nyi àpetɔ lè èdùa mèa pò nupo na mi ku ŋùmè kãkã. E sɔ mi sìgbè èdùa be sàkplɛsàtɔwo nène. 31Mi ɖo e ŋuti na ɛ̀ be: “Mi mu ɖo ŋùmè kãkã be ènu ɖe lè mia mè ò, ɖo mi mu nyi sàkplɛsàtɔwo ò. 32Mi nyi ètɔ ɖèka be èvi ŋusù woèvè; àmè ɖèka mu gbà lè ò eye vifɛ̃tɔa ya kpɔ̀tɔ̀ lè mia tɔ gbɔ lè Kanàn nyigbã ji fifì.” 33Ŋusù kèa, kè nyi àpetɔ na èdùa gblɔ̃ na mi be: “ekèa mù la sɔ nya be mì le to nyàwo: Mì la gble mìa nɔ̀vi ɖèka ɖo fikèa eye mì sɔ àgblèmènuku kè jè na mìabe àmè kèwo le ku àdɔ̀a ne mìa jè èmɔ̃. 34Mìa yì kplɔ̀ mìa nɔ̀vi vifɛ̃tɔa va na mù, eŋuã mù la nya be mì mu nyi sàkplɛsàtɔwo ò, vɔ̀a mì nyi àmè kèwo ji wo la kã ɖoa. Lè funua, mù la ɖè àsi lè mìa nɔ̀via ŋuti na mì eye mì la teŋu wɔ̀ ènu ɖekpe kè jro mìa lè èdùa mè.” 35Eye wo tɔ ènuwo ɖɔ̀lì lè woabe àkpɛtɛawo mè; lè àkpɛtɛ ɖe kpekpe mèa, wo kpɔ ègàkpɛtɛvi ku àmè sia àmè be ègà lè e mè. Wàlɛbɛ kè ye wo ku woa tɔ, wo kpɔ ègàa, wo vɔ̃. 36Yakɔb, woa tɔ gblɔ̃ na wo be: “Mì ji kòkòkò la sɔ mù ɖo èkònɔ̀a! Yosɛ̀f mu gbà lè ò, Simeɔ̀n mu gbà lè ò eye mì gbà le ji la kplɔ̀ Bɛnyamìn cã a! Ènu sia ènu sitè ɖo ŋuti nyè.” 37Rubɛ̀n gblɔ̃ na ètɔa be: “Ne nyè mu trɔ kplɔ̀ àdɔ̀mlɛ̃via va na wòa, wò teŋu wù ŋusùvi nyè èvèawo. Sɔ mù ɖo ekèa be ŋùkɔ̀ eye mù la trɔ kplɔ̀ ɛ̀ gbɔ̀ va na wò.” 38E gbe na wo be: “Ɖèvi nyè ŋusùa mu le yì ku mì ò. Fòfoa ku vɔ̀, ye ɖèka kpò ye kpɔ̀tɔ̀. Ne ènu bàɖà ɖe jɔ̀ ɖo e ji lè èmɔ̃a jia ɖe, fikɛ mù la to ò, ma sɔ vève sèse yì èkuwode ɖo mìabe wɔ̀na ŋuti.”

Currently Selected:

Gɔ̃mèjèje be Xoma 42: GEN

Highlight

Copy