Gɔ̃mèjèje be Xoma 33

Gòdo ku Esaò

1Yakɔb kɔ ŋùmè yì ji eye e kpɔ be Esaò gbãnà ku àgbètɔ èkà èwo. E mã sumɔ̃viawo ɖo Leà, Raxɛ̀l ku sumɔ̃vi nyɔ̃nù èvèawo nu. 2E sɔ sumɔ̃vi nyɔ̃nù èvèawo ku woabe èviawo ɖo ŋùkɔ̀, lè woa yomè a Leà ku èviawo, eye e yomè a Raxɛ̀l ku Yosɛ̀f. 3Ye ŋutɔ jè ŋùkɔ̀ na wo eye e blìbɔ̀ zè adrɛ̃ lè ànyigbã kaka va ɖo fòfoa gbɔ. 4Esaò pu dù yì dogò è, e fã ɛ̀, kù kpla èkɔ̀ na ɛ̀ eye be fã ɛ̀ sɛ̃sɛ̃ɖe; wo àmè èvèawo fã àvi. 5E yomè a, Esaò kɔ ŋùmè yì ji eye e kpɔ nyɔ̃nùawo ku sumɔ̃viawo. E gblɔ̃ be: “Àmè kɛwo ye ò?” Yakɔb ɖo e ŋuti be: “Sumɔvi kèwo Mawu na àpo sumɔ̃via ye.” 6Sumɔvi nyɔ̃nùawo zɔ̃ gogo è ku woabe èviawo eye wo do èta gũ na ɛ̀. 7Leà ku èviawo cã zɔ̃ yì do èta gũ na ɛ̀. E yomè a Yosɛ̀f ku Raxɛ̀l cã wo zɔ̃ yì eye wo do èta gũ na ɛ̀. 8Esaò gblɔ̃ be: “Nukɛ wò ja sɔ àsàɖa gbogbo kè mù dogòa sɔ wɔ̀ ò?” Yakɔb ɖo e ŋuti be: “Mù le ji be àpetɔ nyè ne kpɔ ɖo e mè na mù.” 9Esaò yì e ji be: “Ènu nɔ̀amèsi sù àsi nyè lè gbɔsùsu mè, nɔ̀vi nyè, ènu wòa ne nyi tɔ̀ wò kpò!” 10Yakɔb do àpa be: “Ào, mù ɖè kuku na wò! Ne wò teŋu kpɔ ɖo e mè na mù a, wò la lɔ̃-xɔ̀ ènunana nyèwo. Eye kè e nyi be mù kpɔ àpo ŋùmè sìgbè àlekè wo kpɔna Mawu be ŋùmè eye wò lɔ̃-xɔ̀ mù a, 11xɔ̀ nyɔna kè ye so e mèa cã, ɖo Mawu ye sɔ wo sɔ na mù; ènu sia ènu lè àsi nyè.” E zĩ e ji eye e cã lɔ̃-xɔ̀ ɛ̀. 12Esaò gblɔ̃ be: “Mi gbã àsàɖa ne mia jo lè fikèa. Mù la zɔ̃ ku mì.” 13Yakɔb ɖo e ŋuti na ɛ̀ be: “Àpetɔ nyè nya be sumɔ̃viawo nyi gbɔ̀jɔ̀gbɔjɔmewo eye mù ɖo àlɛ̃nɔ ku ènyìnɔ kèwo jì èviawo; ne wo do nupo na woa, ne e gbà nyi ŋùkèkè ɖèka cã, àlɛ̃awo la ku. 14Ne e jro àpetɔ nyè ne bèa jè ŋùkɔ̀ na yebe sumɔ̃via. Ènyè ya mù la zɔ̃ blɛ̀wù ku àmèha kè kplɔ̀ mù do a lè ɖèviawo be àgbàgba jèje nu kaka va ɖo àpetɔ nyè gbɔ lè Seyirà.” 15Esaò gblɔ̃ be: “Mù jro be ma ɖè àsi lè àmè nyè ɖewo ŋuti na wò.” E ɖo e ŋuti be: “E gbà hiãa? Ne àpetɔ nyè gbe teŋu kpɔ ɖo e mè na mù kpòa, e vɔ̀!” 16Gbè ŋua gbè kea, Esaò yì yebe èmɔ̃ zɔ̃zɔ̃ a ji yì Seyirà. 17Wàlɛbɛ kè Yakɔb jo yì Sukɔ̀t àfi kè be tù àxue ɖo eye e gbà tù èkpawo na yebe èlãwo lèa; ènu kè ŋuti ye wo yɔ na tèpea be Sukɔ̀t, kè gɔ̃mè ye nyi èkpawo.

Yakɔb lè Kanàn

18Yakɔb trɔ gbɔ̀ so Aràm be ègbàji, va ɖo Sikɛ̀m be èdù kè lè Kanàn nyigbã jia sɛ̃sɛ̃ɖe eye e sò àxue ɖo èdùa be ŋùkɔ̀ je. 19Kudo klòsalò ga èkà èvè takpoa, e plè àgblè nyigbã lè Sikɛ̀m be ètɔ, Hamɔ̀r be èviwo si àfi kè e tù yebe gòxɔa ɖoa. 20E li vɔsakpe ɖèka ɖo funua eye be yɔ ɛ̀ be: “Ɛl, Izràɛl be Mawu.”

Currently Selected:

Gɔ̃mèjèje be Xoma 33: GEN

Highlight

Copy