Gɔ̃mèjèje be Xoma 32

1Labàn fɔ̃ ŋùdekɛ̃nyɛ fùtù, fã èvia nyɔ̃nùawo ku woabe èviawo kpla àsi èkɔ̀ na wo, tu sì na wo eye be trɔ yì woa de.

Yakɔb ku Esaò be gòdoa

2Yakɔb le yebe èmɔ̃ le yì wàlɛbɛ kè ye Mawu be àtikplɔtɔwo va dogò èa. 3Ekè be kpɔ wo zè ɖèkaa, e do àpa be: “Mawu be àsàɖa ye nyi fikèa”, eye e yɔ fikèa be Màhanàim. 4Yakɔb ɖo yebe àmèdɔ̃dɔ̃wo jè ŋùkɔ̀ ɖoɖa fòfoa Esaò lè Sèyir be ànyigbã ji lè Edɔ̀m be àgblèji. 5E do ègbè àsi na wo gblɔ̃ be: “Mì pò nupo na àpetɔ nyè Esaò àleke be: “Nène ye sumɔ̃vi wò Yakɔb gblɔ̃ be: 'Mù yì nɔ̀ Labàn gbɔ eye mù ci funua kaka va na fifì. 6Mù ɖo ènyì-suwo ku èsɔ àkɛtɛwo, àlɛ̃ha, sumɔ̃vi ŋusùwo ku sumɔ̃vi nyɔ̃nùwo, eye mù ɖo e be àmèdɔ̃dɔ̃ nyèwo woa va sìa àpetɔ nyè Esaò ne bèa teŋu kpɔ ɖo e mè na mù.'” 7Àmèdɔ̃dɔ̃wo trɔ gbɔ̀ va Yakɔb gbɔ eye wo gblɔ̃ be: “Mi yì fòfo wò Esaò gbɔ. Ye cã zɔ̃ gbãnà la va dogò wò; e ɖo ŋusùti èkàwo ɖo àsi.” 8Yakɔb vɔ̃ ŋutɔ eye àkpɔ̃ ɖɔ ɛ̀. E ma àmè kèwo lè ku ìa ɖo àkpa èvè, àlɛ̃ha kudo ènyì-suawo gbàkudo èsɔkpovènɔ̀awo cã, 9le gblɔ̃ be: “Ne Esaò teŋu va kè ɖo àkpa ɖèka ŋuti eye be kãkã ɛ̀a, àkpa èvègɔ̃a la teŋu si jo.” 10E yomè a, Yakɔb do àpa be: “Ètɔ nyè Abràham be Mawu, ètɔ nyè Izàk be Mawu, èwò Tɔhonɔ̀ kè gblɔ̃ na mù be: 'trɔ yì àpo ànyigbã ji ku àpo xòmè mè eye mù la wɔ̀ nyuɛ̃ na wò', 11mù hùe ŋutɔ ne àpo ègbèjinɔ̀nɔ kudo e mè kpɔkpɔ kè wò wɔ̀ na àpo sumɔ̃via! Ɖo ènyè ɖèka pɛɛ ye sò Yɔrdàn be ètɔ̀a sãa ku àpe èkpòa, vɔ̀ fifìa mù ɖo àsàɖa èvè. 12Tɔ̀wòjɔ̀, xɔ̀ mù lè fòfo nyè be àsi mè, lè Esaò be àsi mè ɖo mù le vɔ̃ ɛ̀, mù le vɔ̃ be e la va eye be la va wù mi; ènyè ku nyɔ̃nùawo ku ɖèviawo. 13E wò ya wò gblɔ̃ na mù be: 'mù ji be ma wɔ̀ ènyuɛ̃ na wò, eye mù la na àpo jìjimèviwo la sùgbɔ sìgbè àpùtakɔ kè wo mu la teŋu hlɛ̃ ò, ɖo e lè gbɛ̀lu!'” 14Eye e ci funu èzã ŋua èŋù kè. Lè èlã kèwo lè e sia mèa, Yakɔb ɖè èɖewo ɖovò na fòfoa Esaò: 15Ègbɔnɔ èkà àtɔ̃; gbɔgbɔɛ èwì àlɛ̃nɔ èkà àtɔ̃ ku àgbò èwì, 16Èsɔ kpovènɔ̀ ègbã kèwo nana ànɔsi a ku woabe èviwo, ènyìnɔ èkà ku ènyì-su èwo, èsɔ àkɛtɛvi èwì ku èsɔ àkɛtɛ èwo. 17E sɔ èlãha mamã vòvòawo do àsi na yebe sumɔ̃viawo ɖèka-ɖèka, eye be gblɔ̃ na wo be: “Mì jè ŋùkɔ̀ na mù eye mì a ɖè èmɔ̃ ɖo mìa nɔ̀nɔwo dòmè. 18E yomè a, e sɔ ègbè kèa do àsi na sumɔ̃vi cucugbã tɔ̀a be: “Wàlɛbɛ kè fòfo nyè Esaò la dogò wòa eye be la biɔ wò sè be: 'àmèkɛ tɔ̀ wò nyi ò? Fikɛ wò le yì ò? Àmè kɛ tɔ̀ ye nyi èlãha kè kplɔ̀ wò do ò?' 19Wò la ɖo e ŋuti be: 'àpo sumɔ̃vi Yakɔb tɔ̀ ye. Ènu nana ye be sɔ ɖoɖa àpetɔ nyè Esaò eye ye ŋutɔ lè ŋùgbedòmè gbãnà.'” 20Ègbè do àsi ŋua ke be sɔ na sumɔ̃vi èvègɔ̃a, sumɔ̃vi ètɔ̃gɔ̃a cã xɔ̀ ènyà ɖèka ŋua ke e yomè a, àmè kèwo kpata lè èlãha vòvòawo be ŋùgbeawo cã xɔ̀ ègbè do àsi ŋua ke: e gblɔ̃ be: “ènyà ɖèka ŋua kpò ye mù la gblɔ̃ na Esaò ne mì kpɔ ɛ̀a 21eye mì gblɔ̃ na ɛ̀ be: 'Sumɔ̃vi wò Yakɔb cã lè ŋùgbe gbãnà.'” Eye e gblɔ̃ le ye ɖokoe meè be: “Mù la flù ŋùmè na ɛ̀ ku ènunana kèwo jè ŋùkɔ̀ na mù a; e yomè a mù la kpɔ ɛ̀ àgbãŋùgbà, ta mu nyɔ òa, e la xɔ̀ mù.” 22Ènu nana jè ŋùkɔ̀, eye ye ŋutɔ ci àsàɖa mè dɔ̃, èzã ŋua mè.

Yàbɔk mè toto va yì

23Èzã ŋua ke mèa, e sitè, kplɔ̀ èsrɔ̃a èvèawo, yebe sumɔ̃vi nyɔ̃nù èvèawo, yebe ŋusùvi woeɖèkawo, eye be sò Yàbɔk be èsìa lè àfi kè àŋuia ta lèa. 24E kplɔ̀ nyɔ̃nùawo ku sumɔ̃viawo sò èsìa eye e na wo sɔ ènu kèwo nyi ye tɔ̀awo cã sò èsìa, 25eye Yakɔb ɖèka ci funua. Ŋusù ɖe wɔ̀ àvũ kudo è kaka ɖo fɔ̃fɔ̃mè. 26E kpɔ be yè mu la teŋu ɖù e ji ò, e gblà Yakɔb be àlì gbɔ eye àlìa gli na ɛ̀ wàlɛbɛ kè be le blìbɔ̀ ɛ̀a. 27E gblɔ̃ na ɛ̀ be: “Ɖè àsi lè ŋuti nyè ɖo èŋù le kè.” Yakɔb ɖo e ŋuti na ɛ̀ be: “Ne wò mu tu sì na mù òa, nyè mu la ɖè àsi lè ŋuti wò ò.” 28E gblɔ̃ na ɛ̀ be: “Àpo nyikɔ ɖe?” E ɖo e ŋuti be: “Yakɔb!” 29E yì e ji be: “Wo mu la gbà yɔ wò be Yakɔb ke ò, vɔ̀a Izràɛl, ɖo wò wɔ̀ àvũ ku Mawu gbàku àgbètɔwo eye wò ɖùji.” 30Yakɔb biɔ ɛ̀ sè be: “Tɔ̀wòjɔ̀, yɔ àpo nyikɔ na mù.” E gblɔ̃ be: “Nukɛ ŋuti ye wò le biɔ mù nyikɔ nyè ò?” Funua ke e tu sì na ɛ̀ lè. 31Yakɔb yɔ tèpea be Penùɛl, kè gɔ̃mè ye nyi Mawu be ŋùmè, ɖo “mù kpɔ Mawu àgbãŋùgbà eye mù gbà lè àgbè.” 32Dɔ̃ŋùkusu le to wàlɛbɛ kè e le to Penùɛl va le yìa. E le zɔ̃ lè àlì ji. 33Ènu kè ŋuti kaka va na egbèa, Izràɛlviwo mu ɖùnà àta be èlã kè yì àlì mèa ò. Ɖo wo gblà Yakɔb be àlì lè àta be èlã kè yì àlì mèa gbɔ.

Currently Selected:

Gɔ̃mèjèje be Xoma 32: GEN

Highlight

Copy