Gɔ̃mèjèje be Xoma 34

Ènu bàɖà jɔ̀ lè Sikɛ̀m be èdùa mè

1Dinà, Leà be nyɔ̃nùvi kè e jì na Yakɔb, yì jè èxlɔ̃ ku èdùa mè be nyɔ̃nùviwo. 2Ekè Hìvitìtɔ Hamɔ̀r be èvi Sikɛ̀m, èdùa be gaa kpɔ ɛ̀a, e sò è èkɔ̃, eye e dɔ̃ ku ì àkpa sɛ̃sɛ̃tɔ̀. 3E sɔ yebe susu kpata dà ɖo Dinà, Yakɔb be èvi nyɔ̃nùa ji; e ɖo lɔ̃lɔ̃ na tùgbɛ̀jɛvia eye be pò nupo na yebe èjì. 4Sikɛ̀m pò nupo na ètɔa Hamɔ̀r gblɔ̃ be: “Kplɔ̀ nyɔ̃nù kèa na mù, ne bèa nyi èsrɔ̃ nyè.” 5Yakɔb sè be e pòɖi yebe èvi Dinà vɔ̀, kè e nyi be èvia ŋusùawo le àgblèji ku èlãhaa, e bɔ̀nu kaka wo gbɔ̀ va àxɔmè. 6Sikɛ̀m be ètɔ Hamɔ̀r to yì pò nupo ku Yakɔb. 7Yakɔb be èvi ŋusùawo trɔ gbɔ̀ so àgblèta va. E kè wo sè ènyàa, wo kpɔ ɛ̀ be wo kpɔ ŋùmè na yèwo eye wo bijì ŋutɔ, ɖo Sikɛ̀m wɔ̀ bùsunu gã ɖe lè Izràɛl kè e dɔ̃ ku Yakɔb be èvi nyɔ̃nùa. Àmè ɖekpe mu ɖo la wɔ̀ ekèa ò. 8Hamɔ̀r pò nupo na wo lè ènyà kèawo mè be: “Mìabe nyɔ̃nùvia be ènu jɔ̀jì na Sikɛ̀m, èvi nyè ŋusùa ŋutɔ, mì sɔ ɛ̀ na ɛ̀ ne bèa ɖè. 9Èsrɔ̃ ɖèɖe be kàdodo ne nɔ̀ mia dòmè: mìa sɔ mìabe èvi nyɔ̃nùwo na mia ɖè eye mìa cã mìa ɖè miabe èvi nyɔ̃nùwo. 10Mì la sò àxue ɖo mia gbɔ, ànyigbã la na mì èmɔ̃, mì nɔ̀ e ji, ne mìa wɔ̀ mìabe èdɔwo eye mìa ɖo tèpe ne mìa ɖokoe.” 11Sikɛ̀m pò nupo na tùgbɛ̀jɛvia be ètɔ ku nɔ̀viawo gblɔ̃ be: “Mì kpɔ ɖo e mè na mù eye mù la na mì ènu kè mì la gblɔ̃a. 12Mì kã jãnã ku àgbã gã ɖe na mù, eye mù la na ènu kè mì gbe biɔ kpòa, vɔ̀ e yomè a mì sɔ tùgbɛ̀jɛvia na mù ne ma ɖè.” 13Yakɔb be èvi ŋusùawo ɖo e ŋuti na Sikɛ̀m ku ètɔa Hamɔ̀r. Àmè bàba ma nɔ̀ e mèa, wo pò nupo na àmè kè pòɖi woa nɔ̀vi nyɔ̃nù Dinà. 14Wo gblɔ̃ na wo be: “Mi mu la teŋu wɔ̀ ènu kè wò le gblɔ̃a ò, ne mia sɔ mia nɔ̀vi nyɔ̃nù na ŋusù kè mu sò èvo ò, ɖo e la nyi ŋùkpɛ̃nu na mi. 15Mi mu la lɔ̃ na mì ne mì mu trɔ sìgbè miawo nène ò, ne mìa sò èvo na mìabe ŋusùawo ò. 16Mi la sɔ miabe nyɔ̃nùviwo na mì, mia cã mi la ɖè mìabe nyɔ̃nùviwo, mia kpata mi la sò àxue ɖo àfi ɖèka eye mi la trɔ zũ dùkɔ̃ ɖèka. 17Ne mì mu lɔ̃ ɖo miabe èvo sòso be ènyàa ji òa, mi la trɔ xɔ̀ miabe èvi nyɔ̃nùa eye mi la jo lè fikèa.” 18Yakɔb ku èviawo be ènyàwo do jìjɔɛ na Hamɔ̀r kudo èvia Sikɛ̀m. 19Ɖèkajɛvia mu dokpò ènu kè wo gblɔ̃a wɔ̀wɔ ò, ɖo e ji kòkòkò la kplɔ̀ Yakɔb be nyɔ̃nùvia. E nyi àmè ŋùkuta ɖèka lè ètɔa be àxomè. 20Hamɔ̀r ku èvia Sikɛ̀m wo yì èdùa be àgbonu eye wo pò nupo na èdùamètɔwo ku ènyà kèawo be: 21“Àmè kèawo lè ŋuti fàfa mè ku mi, wo ne nɔ̀ miabe ànyigbã ji eye woa do woabe àjɔwo ne ànyigbã kèa ne nɔ̀ fàa na wo; mia ɖè woabe nyɔ̃nùviwo eye mia sɔ mia tɔ̀awo na wo ne woa ɖè. 22Lè ekpata mèa, àmè kèawo mu la lɔ̃ sò àxue ɖo miabe ànyigbã ji ne mia kpata mia trɔ zũ dùkɔ̃ ɖèka ne miabe ŋusùwo mu sò èvo sìgbè woawo ke nène ò. 23Woabe èlãwo ku woabe àdɔ̀kùnuwo mu la va trɔ zũ mia tɔ̀ ne mi gbe lɔ̃ ɖo woabe ènyà ji eye wo teŋu sò àxue ɖo miabe ànyigbã ji òa?” 24Àmè kèwo keŋu to va èdùa be àgboa nua sè Hamɔ̀r ku èvia Sikɛ̀m be ènyà; eye ŋusùawo kpata sò èvo, àmè kèwo to va èdùa be àgboa nua. 25Vɔ̀a, lè ŋùkèkè ètɔ̃a gbèa, wàlɛbɛ kè ye ŋusùawo kpata gbà le sè vevea, Yakɔb be ŋusùvi èvè Simeɔ̀n ku Levì, tùgbɛ̀jɛvi Dinà be fòfowo, ɖo èdùa mè kudo èwui ku kãkã ɖoji eye wo wù ŋusùawo kpata. 26Nène a ke wo wù Hamɔ̀r ku èvia Sikɛ̀m cã, eye wo kplɔ̀ woa nɔ̀vi Dinà eye wo to jo. 27Yakɔb be ŋusùvi (kpɔ̀tɛawo) pò àmè kèwo xɔ̀ àbìawo wu eye wo gbã èdùa, ɖo wo do ŋùkpɛ̃ woa nɔ̀vi nyɔ̃nù. 28Wo lɔ woabe àlɛ̃wo ku ènyìwo, woabe èsɔàkɛtɛwo, woabe ènu ɖekpekpe kè lè èdùa mè ku àgblèjia jo; 29wo lɔ woabe àdɔ̀kùnuwo kpata, woabe èviwo kpata, woa srɔ̃wo, eye wo kãkã ènu kè gbe lè woabe àxomè kpòa. 30Yakɔb gblɔ̃ na Simeɔ̀n ku Levì be: “Mì yì ji ènyà na mù lè Kanàntɔwo kudo Perizìtɔwo gbɔ ekè mì sɔ mù wɔ̀ èhlɔ̃dãtɔ lè ànyigbã kèa ji nɔ̀tɔwo gbɔ. Mi mu sùgbɔ ò, wo la bɔ̀ ɖodu ɖo ŋuti nyè eye wo la wù mù, wo la gũ ènyè ku àxuedo nyèa.” 31Wo ɖo e ŋuti be: “E jè be woa wɔ̀ ku mia nɔ̀vi nyɔ̃nùa sìgbè àhasìtɔ nènea?”

Currently Selected:

Gɔ̃mèjèje be Xoma 34: GEN

Highlight

Copy