Èdɔwɔ̀wɔwo 1

Wo fìã Gbɔ̃gbɔ̃ Kɔ̀kɔ̀ɛ a be àjɔ̀gbè

1Teofilò lɔ̃lɔ̃tɔ! Lè xoma cucugbã nyèa mèa, mù ŋlɔ̀ ènu so ènu kèwo Yesù wɔ̀, ku ènu kèwo be fiɔ, so wàlɛbɛ kè be tɔ yebe èdɔ jia ŋuti, 2kaka va na gbè kè gbè wo kɔ ɛ̀ yì jiŋùkusia, kè be do ègbè àsi na àmèdɔ̃dɔ̃ kèwo be cã to Gbɔ̃gbɔ̃ Kɔ̀kɔ̀ɛ a ji vɔ̀a. 3*Àmèdɔ̃dɔ̃ kèawo ye Yesù ɖè ye ɖokoe fiɔ lè yebe èku yomè. E ɖè ye ɖokoe fiɔ wo, to èmɔ sùgbɔ nu, be Yè lè àgbè, eye, ŋùkèkè èkà sɔ̃ŋua, e to ɖo woa ji, pònà nupo na wo so Mawu be fìɔɖùɖu ŋuti. 4Wàlɛbɛ kè be le ɖù ènu kudo wo gbè ɖèkaa, e biɔ so woa si be: “Mì mu gbà jo lè Yèruzàlɛm ò, vɔ̀ mìa nɔ̀tè kpɔ ènu kè Àta fìã, eye mù gblɔ̃ na mìa. 5Đo Yòhanɛ̀s sɔ èsì lè mawusi na àmèwo, vɔ̀ mìawo yaa, mu la dìdì ò, wo la sɔ Gbɔ̃gbɔ̃ Kɔ̀kɔ̀ɛ lè è na mì.”

Yesù yì jiŋùkusi

6Nène a, ekè àmèdɔ̃dɔ̃awo gbà bɔ̀ ɖo dua, wo biɔ Yesù be: “Tɔhonɔ̀, fifì ye wò la gbìgbɔ̀ sɔ Izràɛl be fìɔɖùɖua do àsi na ɛ̀a?”

7Yesù ɖo e ŋuti na wo be: “Hùenu kè be la nyia, gà kè mè ye be la nyia, Mawu Àta ɖo è lè yebe ŋusɛ̃ mè; mu nyi mìabe ènyà ò. 8Vɔ̀ ne Gbɔ̃gbɔ̃ Kɔ̀kɔ̀ɛ a va mìa jia, mì la xɔ̀ ŋusɛ̃, eye mì la nyi ɖàsèfo nyèwo lè Yèruzàlɛm, lè Yudeà be àgowo keŋu ji, kudo Sàmarìa kaka sɔ yì xixea be nukpòpewo.” 9Eye ekè be gblɔ̃ ènyà kèawo vɔ̀a, wàlɛbɛ kè wo le kpɔ ɛ̀a, wo kɔ ɛ̀ yì jiŋùkusi, eye lili ɖe bu ì lè woabe ŋùmè. 10Wàlɛbɛ kè wo kpɔ̀tɔ̀ le kpɔ jiŋùkusi ɖoɖa, gà kè mè Yesù jo le yìa, ŋusù èvè ɖewo, lè àwù ɣe mè, to ɖo woa ji, gblɔ̃ na wo be: 11“Galileatɔwo, nukɛ be tè ye mì gbà kpɔ̀tɔ̀ lè, lè fikèa, le kpɔ jiŋùkusi ɖoɖa nène ò? Yesù kèa, ekè wo kɔ jo lè mìa gbɔ yì jiŋùkusia, la gbà va sìgbè lekè mì kpɔ ɛ̀, be yì jiŋùkusia nène.”

Wo cã àmè ɖo Yudà tèpe

12Eŋuã yomè a, *Àmèdɔ̃dɔ̃awo ɖì so èto kè wo yɔna be Àmìti-toa ji, trɔ va Yèruzàlɛm. Èto kèa mu dìdì lè èdùa gbɔ ò; e la nɔ̀ sìgbè èkpeti ɖèka nène. 13Ekè wo va èdùa mèa, wo yì àsãŋu kè ji wo donagò lèa ji, wo ɖo èxɔ̀ kè mè wo nɔ̀nà sãa mè. Àmè kèawo ye nyi Petrò, Yòhanɛ̀s, Yakobò ku Ãdre, Filipò ku Tomà, Bartelemeo ku Màteo, Yakobò, Alfeò be èvia, Simɔ̀n àvũ drɛ̃tɔ ɖo yebe èdùa ta, ku Yudà, Yakobò be èvia. 14Woawo keŋu be susu lè ɖèka eye wo fãnàkue veve ɖe, woa ku nyɔ̃nùwo, ku Maria, Yesù be ènɔ̀, kudo Yesù be nɔ̀viwo.

15Lè wàlɛbɛ ŋua mèa, xɔ̀sètɔ kèwo be hɛ̃hlɛ̃ mè la nɔ̀ sìgbè àgbètɔ èkà ètɔ̃ nènea bɔ̀, eye Petrò sitè lè woa dòmè, gblɔ̃ be: 16“Nɔ̀viwo, e jè be ènyà kè Gbɔ̃gbɔ̃ Kɔ̀kɔ̀ɛ a gblɔ̃ ɖɛ, lè Ŋɔ̀ŋlɔ̃awo mè, to èfìɔ David ji, ɖo Yudà, àmè kè nɔ̀ ŋùkɔ̀ na àmè kèwo le Yesùa ŋutia, bèa zɔ̃ sù. 17Yudà nyi mia dòmètɔ ɖèka sã, eye, ye cã kpɔ gomè lè sumɔ̃vi-dɔ kèa mè. 18E sɔ ènu kpòtoe kè be wɔ̀a be ègà sɔ plè ànyigbã ɖe, àfi kè be jè ànyi, jè èta ji lè, be kãkã lè dòdòmè, eye yebe àdɔ̀mènuwo keŋu to jè xixe nu lè. 19Àmè kèwo kpata lè Yèruzàlɛm awo, sè ènyà kèa, kaka wo yɔ ànyigbã ŋua lè woa de be ègbè mè be: 'Akɛldamà.' E gɔ̃mè ye nyi: 'Èhũ be àgblè.' 20Petrò yì e ji be wo ŋlɔ̀ ɛ̀ ɖɛ, lè Salmɔ̀wo be xoma mè be:

'Yebe àxue ne ci gbalo,

eye àmè ɖekpe mu gbà nɔ̀ e mè ò!'

Wo gbà ŋlɔ̀ ɖɛ be:

'Àmè bu ne xɔ̀ yebe èdɔa.'

21Ye ŋutia, àmè kèwo kpàsà mia do, wàlɛbɛ kè Tɔhonɔ̀ Yesù nɔ̀ ŋùkɔ̀ na mi, to èdùwo mè, 22so gbè kè gbè Yòhanɛ̀s lè mawusi na ɛ̀, kaka va jè gbè kè gbè wo kɔ ɛ̀ yì jiŋùkusi, jo lè mia gbɔa, woa dòmètɔ ɖèka ɖo la kpe mi, la nɔ̀ ɖù ɖase so yebe fɔ̃fɔ̃ so èku ŋuti.”

23Wo ɖè àmè èvè: Yozɛ̀f kè wo yɔna be Barsabas, eye wo ɖo nyikɔ na be Yustus àlo Àmè Jɔ̀jɔ̀ɛ a ku Màtia. 24Eŋuã yomè a, wo fãkue gblɔ̃ be: “Tɔhonɔ̀, èwò àmè kè nya àgbètɔwo keŋu be èjì mèa, ɖè àmè kè wò sɔ lè àmè èvè kèawo dòmèa fiɔ mi, 25ne bèa nɔ̀ Yudà tèpe, ne bèa wɔ̀ àmèdɔ̃dɔ̃ be èdɔ kè Yudà tàsi ɖɛ, jo yì tèpe kè ye ŋutɔ jia.” 26Eye wo dà àkɔ̀ na wo. Àkɔ̀a jè Màtia ji, eye wo sɔ ɛ̀ kpe ɖo Àmèdɔ̃dɔ̃ woeɖèkaawo ŋuti.

Currently Selected:

Èdɔwɔ̀wɔwo 1: GEN

Highlight

Copy