Romains 8

Unimbɔti Fam tīī-ti dimaŋfal

1Kɔŋkɔnnee, bin nì Yeesu Kriisitoo ŋá ubaantee, dibɔkpil diba kaa ti dɔ̄ ki cí-bi. 2Di sá yii Circir Fam min tīī-ti dimaŋfal Yeesu Kriisitoo puee marau nyántì-ti ikpiti nì ŋkúm marau ŋaan. 3Di sá yii Mooyiisi marab kaa nìn ŋúń ki ŋá míǹ, kun puee binib bí iwɔfin, kaa ŋūǹ kí nóó marabee. Ama ní Unimbɔti dū úǹ u-ba Jipɔɔn ki túnní, u dɔ́miń ki cáá tiwumbaantiil kii timbi bikpitibee, ki ŋúń ki lēē ikpiti. Unimbɔti ŋá míǹ ki kúntì mpɔn ŋun ikpiti cáá binib puee. 4Mimmee, timbi bin kaa nóó mbimbikpitim ama ní ki nóó Circir Fam nín kpòotī-ti puee, ti kpántí deedeedambi kii marab nín là puee dee. 5Bin bin nóó mbimbikpitimee nyàab̀ kí nīn ŋáań tin fáatì-bee ní, ní bin nóó Circir Famee mun nyàab̀ kí nīn ŋáań tin Circir Fam lèe. 6Mbimbikpitim nín là tiwan tiŋyee di cāabìń ŋkúm. Circir Fam nín là kun kuŋyee di cāabìń mmaŋfafɔkɔn nì ŋgbansɔŋfi. 7Bin nóó bi-bimbikpitim nín là puee sá Unimbɔti nannanliibi ní. Baa sìntīǹ bi-ba ki tìì Unimbɔti marab, kaa pée ŋūǹ gba. 8Bin nóó bi-bimbikpitim nín là puee kaa ŋūǹ kí fáatíǹ Unimbɔti.

9Ama nimbee, nimbi kaa nóó ni-bimbikpitim nín là puee. Min min Unimbɔti Fam lèe, míǹ ní ni nóó, kun puee u-Fam kóò ni-ni. Un yaa kaa cáá Kriisitoo Famee, kaa sá u-yɔu. 10Kriisitoo yaa bí a-ni, nì min kɔkɔ ikpiti puee a-wunti làá kpúee, Circir Fam làá tīī-si dimaŋfal, kun puee a bí deedee. 11Unimbɔti un fīkitì Yeesu Kriisitoo ditaŋkpiilinee Fam yaa kóò a-nee, Unimbɔti gbanti un fīkitì Kriisitoo ditaŋkpiilinee làá dāá yàntī u-Fam min kóò a-nee ń tīī a-wunti tin kúùyee dimaŋfal.

12Mimmee, m-nabiyaamu, taa ti cáá ti-bimbikpitim dipɔndi diba, kí nīn ŋáań mì nín là puee. 13Ni yaa gbíntì ki ŋáań min ni-bimbikpitim lèe, ni kúù ní. Ama Circir Fam pɔŋŋu puee, ni yaa kūū tin ni-bimbikpitim là ní ŋée, ni kāntí dimaŋfal. 14Di sá yii bin kɔkɔwoooo Unimbɔti Fam kpòotēe sá Unimbɔti biyaamu ní. 15Mimmee, naa ti máaǹ kí nīn gbíntìi fàŋkí kii iyumbuee, kun puee ni fōō Unimbɔti Fam min yāntì Unimbɔti fōō-ti ti yíì-u yii ti-Baayee, 16ní Circir Fam mi-ba tùkù ti-pɔbiliŋ poon yii ti sá Unimbɔti biyaamu. 17Ti nín sá u-biyaamu puee, ti fòol̄ u-gaajawanti. Ti nì Kriisitoo di dāa fòol̄-tì. Ti yaa kpáfì ki jīǹ falaayee, boonee ti nì u di dāa tí fòol̄ tinyool#8.17 Dūú ŋmàntī nì 2 Kɔra 4.17, 1 Peet 4.13..

Tinyool tin bí ki dòońee

18M nyí yii falaa un ti bíi jīǹ ti-yuntiŋu nee kaa wīikí ki bàn̄ Unimbɔti nyooti tin u làá dāá tīī-tee. 19Unimbɔti nín náań tiwan tin kɔkɔee jìkì ki cí ŋwiin ŋun Unimbɔti làá dāá tīī u-biyaamu tinyool báà ŋma ń kée. 20Unimbɔti wannaaŋkaati gbanti kɔkɔ ŋá fám. Kaa sá yii tì là, Unimbɔti di yāntì an ŋá míǹ. Nì min kɔkɔ tì kpántì fámee, tì máká yii 21tì làá dāá nyā ntimbiil gbanti yuŋkun kí kpāfì nì Unimbɔti biyaamu kí tɔ̄ ti-ba ní kí fōō tinyool. 22Ti nyí yii Unimbɔti wannaaŋkaati gbanti kɔkɔ bí falaa ni áli ki dāa sāā díǹ kii upɔdaan nín yáliŋkí imatiŋween puee. 23Ama an kaa sá tiwannáaŋkaal gbanti baba, ki kpáaǹ timbi bin Unimbɔti tìì u-Fam min yāntì ti dáká tin bí ki dòońee. Ti mun bí ki yáliŋkíǹ ti-ba ki cí ŋyunti ŋun ti làá kpántí Unimbɔti biyaamu mbaamɔminee, an dàkà yii ŋyunti ŋun u làá dāá fīī ti-wunti mun kí lííyee#8.23 Dūú ŋmàntī nì 2 Kɔra 5.2-4.. 24Mimmee, ti ká difiil, ama ní an dáá nín bí dimákalin. A yaa ká kun a mákée, an kaa ti sá dimákal, kun puee tiwan tin a fōōyee, a gíti ŋūǹ kí nīn máká ti-puɔɔɔ? 25Ti yaa máká tin taa láá kée puee, see tí jī kimɔtii kí nīn kpèé nsan pú.

26Míǹ mbaantiim ní Circir Fam bí ki tútúǹ-ti ti-wɔfii poon, kun puee taa nyí min máaǹ tí mèèyee, ama Ŋfamee mi-ba yáliŋkí ki jítiǹ anyɔɔbun nín ŋūǹ kí sòoǹ tibɔti tiŋyee ki mèé Unimbɔti ti-pu. 27Ní Unimbɔti un wāĺ binib pɔbiliŋ poonee béetí kun Ŋfam lèe, di sá yii kun mì mèéyee nóó nì kun Unimbɔti là kí tīī u-yabee ní.

28Ní ti nyí yii tin kɔkɔ pée bàń bin néeń Unimbɔtee, Unimbɔti cáa kpántí tiŋan ní ki tìì-bi. Bíǹ ní u bɔ́ntì ki lēē ki síiǹ yii bí nīn sá u-yab. 29Bin u gāntì dooooyee ní u lēē ki yóoǹ bí kpántí kii u-Jipɔɔn nín bí puee, án nín làá ŋá pu u-Jipɔɔnee ń nīn sá ukpil u-nabiyaamu mun sá kunipaauee kansikinee. 30Bin u lēē dooooyee ki yóoǹee, u yíiń-bi. Bin u yíińee, ní u yāntì bi kpántì deedeedambi Unimbɔti nimbiin, ní bin u yāntì bi kpántì deedeedambee, u kɔ́ǹ-bi u-nyootin.

Unimbɔti neendi wīikí

31Ti làá gíti lì tibɔti nee pu yii ba dee? Unimbɔti yaa yú ti-boonee, ŋma di gíti ŋūǹ kí ŋá-ti tiba? 32Timbi pu ní Unimbɔti kaa tāaǹ úǹ u-ba Jipɔɔn ki dū-u ki ŋá saraa, mana ní u ŋūǹ kí yíí kí taa tīī-ti tikɔkɔ kí kūtì u-Jipɔɔnee pu? 33Unimbɔti bí yii bin u lútèe sá deedeedambi, kin, ŋma di gíti ŋūǹ kí ká tikpitil tiba bi-pu kí sòoǹ? 34Yeesu Kriisitoo un kpíì ki kpáàa fīkitì mun ki kā Unimbɔti ŋaŋgiil púee bí ki mèé ki tìì-ti. Kin ŋma di gíti ŋūǹ kí kpɔ̀ ti-bɔti? 35Dineendi din Kriisitoo cáá ti-puee, tiba ŋūǹ kí yàkatī ti-kansikinaaa? Falaa di ŋūǹ kí yàkatī-taaa, dinimbinaamandaaa, disàandaaa, ŋkùmaaa, disoolaaa, mbusuaaa, ŋkúm? 36Kii Unimbɔti gbɔŋku poon nín lī puee yii:

«Sii ti-Dindaan pu ní, kí yòon̄ kutaafaau kí dāá mɔ́-kuee,

ti tūŋkí ŋkúm,

ní bi ŋáań-ti kii ipii in bi cáǹ kí kpɔ̀ee#8.36 Kpèè Ilan 44.23..»

37Tíǹ kɔkɔ poonee, un néeń-tee tútúǹ-ti ti jáà ki jīǹ ki kúntí tikɔkɔ. 38M nyí ibaamɔn poon yii tiba kaa ŋūǹ kí yàkatī dineendi din bí timbi nì ti-Dindaan kansikinee: ŋkúmaaa, dimaŋfalaaa, Unimbɔti tuuŋyaaa, an yaa tí sá abeedambi bin baa wāĺeeyaaa, tin tin poon ti bí kɔŋkɔnneeyaaa, tin bí ki dòońeeyaaa, mpɔndambaaa, 39an yaa sá tin bí yilpuee nì tin bí taapueeyaaa, an yaa tí sá tiwannáaŋkaal tin kɔkɔ kíǹeeyaaa, báà tiba nì tiba kaa ŋūǹ kí yàkatī timbi nì dineendi din Unimbɔti dī ti-Dindaan Yeesu Kriisitoo pu ki dàkā-tee.

Currently Selected:

Romains 8: BASSARDC

Highlight

Copy