Romains 7

Dicamɔndi bɔŋmantikaati

1Nnabiyaamu, m pàkā yii m bíi sòoǹ nì binib bin nyí marabee ní. Ni nyí yii mara cáá mpɔn unil pu ŋyunti ŋun u dáá bí dimaŋfalinee ŋmaniŋma ní. 2Míǹ ní unimpu yaa mɔ́ǹ ticatee, mara bóob́-u ki nákáǹ u-cal ŋyunti ŋun u dáá bí dimaŋfalinee. U-cal yaa kpíìyee, mara bútì-u ki nákatiǹ u-cal un u nìn nákée dee. 3Mimmee, unimpu cal yaa dáá bí, kaa kpíì, u yaa yíkìi mɔ́ǹ ubɔee, bi ŋūǹ kí yíiń-u kinimpulaakpaai. U-cal yaa kpíìyee, mara un bóob́-u ki nákáǹ u-calee cúu bútì dee, u ŋūǹ kí mɔ̄ǹ uninjapɔɔn ubɔ. Niinee, baa ti yíì-u kilaakpaai. 4M-nabiyaamu, míǹ mbaantiim, ni nín kpáfì ki kpíì nì Kriisitooyee, ni-kúmee yākatì ni nì marab kansikin. Kɔŋkɔnnee, ni kíǹ ki sá Kriisitoo un fīkitì ditaŋkpiilinee yab ní. Tí lòoǹ abimɔnti kí tīī Unimbɔti. 5Dooooyee, ti nín nìn dáá bí ki ŋáań ti-ba lammee, marab nìn tútúǹ ti-landɔkɔkpitii in téekí-ti, ti tūǹ atuun ŋin cáǹ-ti ŋkúminee. 6Dooooyee, marab nìn cúú-ti kuyuŋu, ama kɔŋkɔnnee ti yākatì tɔbin, baa ti cáá ti-pu mpɔn, ti tɔ́ ti-ba. Míǹ puee, ti ŋūǹ kí tɔ̄ ditundi min ní Circir Fam kpòotī-tee, an kaa ti sá min min kugbɔŋu poon marab nìn kpòotī-ti dooooyee.

Mara nì ikpiti

7Mimmee, tí lì yii ba? Marab sá ikpiti deeyaaa? Aayee kpataaa! An yaa kaa sá marab pu, maa bàà nyí kun di sá ikpitee. Di sá yii marab yaa kaan lī yii: «Á taa nín̄ cáá nnimbitaataam», maa bàà nyí kun bi yíì nnimbitaataamee#7.7 Kpèè Disa 20.17, Ditee 5.21.. 8Marab lī mimmee, ní tikpitil ká nsan kí kɔ́ǹ-mi tiwan kɔkɔ nnimbitaataam. Di sá yii, marab yaa kpée, ikpiti kaa cáá mpɔn. 9Doooo min marab nìn kpée, m nìn bí dimaŋfalin. Ama marab nín bāańee, ikpiti dɔ́miń ki fōō mpaan, 10ní man kpíì. Mimmee, marab bin bàà sá ukpootil kí cáá-mi dimaŋfalinee#7.10 Dūú ŋmàntī nì Akoo 18.5, Ditee 4.1, 5.33, Eesee 20.11. fātìi téé-mi ki tɔ́ ŋkúmin. 11Ní ikpiti dī marab pu ki ká nsan ki kíil̀-mi#7.11 Dūú ŋmàntī nì Diny 3.13. ki kūū-mi marab gbanti pu.

12Marab bi-ba bí circir, ní isaŋki in bi sáŋkí-tee mun bí circir ki bí deedee ki ŋān̄. 13Mimmee, tin sá tiwammɔntiilee di cáań-mi ŋkúmaaa? Aayee, kpataaa! An sá ikpiti di cáań míǹ, ki dūu dīń tiwammɔntiil pu ki kūū-mi, ki dàkā i nín sá ikpiti iŋyee mbaamɔmin. Marab puee, ti béè yii ikpiti kaa lafun sàafì.

Ti là kí ŋá tiŋan ní kaa ŋūǹ

14Ti nyí yii marab lafun sá Unimbɔti wanti. Ama ní man sá nniwuŋgban, ikpiti dá-mi kuyuŋu. 15Maa nyí tin m ŋáańee, kun puee maa ŋáań tin m bàà là kí ŋée, ní ki ŋáań tin tin m ná, kaa bàà là kí ŋée. 16M yaa bíi ŋáań tin tin maa là kí ŋée, mimmee m béè yii marab ŋān̄ dee. 17Mimmee, an dàkà yii an kaa sá man m-ba di bíi ŋáań tikpitil, an sá ikpiti in bí m-nee di ŋáań. 18M nyí tiŋman yii tiŋan kaa bí m-ni, an dàkà yii m-wuntin. Nì min kɔkɔ m bàà cáá nlandɔkɔmɔnti kí ŋá tiŋanee, mpɔn kpá ḿ ŋmā kí ŋá. 19Tiŋan tin m bàà là kí ŋée, maa ŋáań tíǹ, tikpitil tin maa bàà là kí ŋée, tíǹ ní m ŋáań. 20Mimmee, m yaa bíi ŋáań tin tin maa bàà là kí ŋée, an kaa ti sá mama m-ba di bíi ŋáań, an sá ikpiti in bí m-nee di bíi ŋáań.

21M dáań ki ká tiba: m yaa bàà bí yii ḿ ŋá tiŋanee, tikpitil ní m ŋáań. 22M-pɔbilinee, Unimbɔti marab di fáatì-mi, 23ama m ká yii mpɔn ŋubɔ bí m-wunti nì ti-jaŋŋin ki jáaǹ kun kun m-landɔkɔŋu fáatèe, ki dū-mi ki nyáfiǹ ikpiti pɔŋŋu ŋun bí m-wuntinee. 24Man nimbinaamandi neeee! Tiwun nee dátí-mi ki cáǹ ŋkúmin, ŋma di làá fīī-mi kí líí? 25Tí jāam̀maan Unimbɔti ti-Dindaan Yeesu Kriisitoo un fìil̄-tee pu!

Mimmee, m-landɔkɔŋu poonee, m bàà là kí nóó Unimbɔti marab, ama iwɔfi in bí m-wuntinee là kí nóó ikpiti.

Currently Selected:

Romains 7: BASSARDC

Highlight

Copy