Romains 9

Unimbɔti nì dinibul din u lēēyee

1M sòoǹ ibaamɔn kii Kriisitoo yɔu nín máaǹ kí sòoǹ puee ní. Maa mɔ́ntí, Circir Fam mun sòoǹ m-pɔbil poon yii an sá tiŋman, 2yii m-pɔbil poon gbí kunimbaakpaaŋŋu ní m yáliŋkí baabadal. 3M yaan ŋūǹ Unimbɔti ń ŋá-mi fám, man nì Kriisitoo ń yàkatī tɔbin, m-nabiyaamu man nì bin pēē mmaalee ń ŋmā kí ká difiilee, m bàà là. 4M-nabiyaamu gbanti di sá Isirayeel yab bin Unimbɔti lútì bí nīn sá u-biyaamuee. U nì u-walifiŋu nìn kóò bi-kansikin, ní u nì bi ŋá mpèé. U tīī-bi marab ki dàkā-bi min ní bi làá nīn jáaḿ-uee, ki pōoǹ-bi ipoon#9.4 Kpèè Disa 4.22, Ditee 7.6, Oosee 11.1.. 5Bi-naanjab sá Jaakɔb jipɔmbi saalaa nì bilee ní. A yaa kpēē tinitanee, Kriisitoo mun sá bi-maaliŋu poon, Kriisitoo un di tɔ́kɔ́ tikɔkɔ nì tikɔkɔ pu ki sá Unimbɔti un máaǹ inyɔŋki baabadal kí nīn pée cá jaanjaanee! Ameeni.

6Isirayeel yab nín kaa fōō Yeesu ki kííyee, an kaa dàkà yii Unimbɔti poondi ŋá fám. Di sá yii an kaa sá bin kɔkɔ nyánní Isirayeel maaliŋunee#9.6 Kpèè Diny 32.29. di sá Isirayeel yab páaa. 7Bin kɔkɔwoooo nyánní Abraam maaliŋunee kaa sá u-biyaamu páaa, kii Unimbɔti nín nìn sòon̄ nì Abraam puee yii: «See Isaaki naantiibi baba di làá fōō a-yindi#9.7 Kpèè Diny 21.12..» 8An dàkà yii an kaa sá mmaal ŋun ti nyí nee#9.8 Dūú ŋmàntī nì Gala 4.22-23. di màal̀ Unimbɔti biyaamu. Abraam naantiibi bin Unimbɔti nìn pōoǹ ki tīīyee baba di sá bimɔntiibi, 9kii Unimbɔti nín nìn pōoǹ-u puee yii: «Ŋyunti ŋun m yóoǹee yaa bāańee, m làá dāan̄, ní a-nimpuu Saara ń màal̀ kibininjabiki#9.9 Kpèè Diny 18.10..»

10Tiba mun gíti sɔ̀: Reebeeka mun bɔti bí. U màl̄ ti-naanja Isaaki mbininjabiyaamu muli ní. 11-12Kí wàatī ú màal̀ mbiyaamu gbantee, muaa láá nyáń ki ŋá tiŋanaaa, kaa láá ŋá ikpiti, ní Unimbɔti tùkū Reebeeka yii: «Ukpil di làá dāá nīn bí kiwaai taapu,» án ŋmā kí nóó nì Unimbɔti nín lēē ki síiǹ u-ban puee. Míǹ ní u yíì binib, kaa kpèé bi-tūntɔtam pu#9.11-12 Diny 25.23., 13kii an nín ŋmàn̄ puee, yii:

«M néeń Jaakɔb, ní kaa là Eesayuu#9.13 Kpèè Mala 1.2-3..»

14Ti yaa kpēē an bɔtee, ti làá lì yii Unimbɔti kaa sá ibaamɔndaanaaa? Aayee, kpataaa! 15Di sá u nìn tùkū Mooyiisi yii: «Un saai m yaa là kí sɔ̄ee, úǹ saai ní m sūǹ, ní un m yaa là kí ŋá tiŋanee, úǹ ní m ŋáań tiŋan#9.15 Kpèè Disa 33.19..» 16Mimmee, an kaa nyēeń unil nín là pueeyaaa, kaa nyēeń u-pɔ́ɔǹtam pu, Unimbɔti di sūǹ unil saai kí fīī udaan. 17Unimbɔti gbɔŋku poonee, ti kāntí yii Unimbɔti tùkū Eejipiti bɔtiu yii: «Kun pu m baasii kāaǹ-si dibeelee di sá ḿ dī a-pu kí dàkà m-pɔŋŋu kí yàntī ntimu nib kɔkɔ ń béé m-yindi#9.17 Kpèè Disa 9.16..» 18An dàkà yii Unimbɔti yaa là kí fīī binibaaa, u yaa tí là kí nyìŋfì bi-pɔbiliŋaaa, an bí úǹ cee ní.

Unimbɔti ŋuul nì u-saasɔl

19An yaa yíì, ubɔ ŋūǹ kí bàlifì-mi yii: «Kin mimmee, ba pu ní Unimbɔti gíti wòoǹ nnibiyaamu? Di sá ubɔ kaa yíití min Unimbɔti lèe.» 20M làá kíí udaan yii: «Unil, a sá ŋma ní ki kpākantí Unimbɔti? Tiwan tin bi máńee kaa ŋūǹ kí tùkù un máń-tèe yii: <Ba pu ní a máń-mi yéè#9.20 Dūú ŋmàntī nì Yees 29.16, 45.9.?>» 21Uyɔɔmaati ŋūǹ kí dū kuyɔkɔu kí mā kun kun u yaa lèe: u ŋūǹ kí dū-ku kí mā dibɔmɔntiil, ki tí ŋūǹ kí dūú mā kinyinsaŋ#9.21 Dūú ŋmàntī nì Yeer 18.6..

22Kin Unimbɔti fáà? U cáá nsan kí gíí diŋuul kí dàkà binib u-pɔŋŋu. U jíń kimɔtii tikpil bin bàà máaǹ ditafadaaldi ki ŋmāntì ú kúntí-bee pu, 23ní ki kpáàa là kí dàkà u-nyooti nín wīikí pu tikpil tikpil ki tīī bin u fīī ki bɔ́ntì ki yóoǹ bí kɔ́ u-nyootinee. 24Timbi bin u lútì ki yíiń Juuda yab nì bin kaa sá Juuda yabee kansikinee kɔkɔee, ti mun kútì poon. 25Míǹ ní u lī Ooseeya gbɔŋku poon yii:

«Bin kaa nìn sá m-nibulee

làá dāá nīn kíǹ ki sá m-nibul,

ní ditimbundi din maa nìn néeńee,

m làá nīn kíǹ ki néeń-dì tikpil.

26Ní laakin bi nìn tùkū-bi yii: <Naa sá man nibulee>,

niin ní bi làá yíiń-bi yii Unimbɔti un bí dimaŋfalinee jipɔmbi#9.26 B. 25: Oosee 2.25. - B. 26Oosee 2.1..»

27Unimbɔti bɔnaatiliu Yeesaya mun báakì ki sòon̄ Isirayeel yab bɔti yii: «Báà Isirayeel naantiibi yaa wīikí kii dibul din bí tiŋku gbandee, bi-kansikin binib fiii di làá kíń kí ŋmátí. 28Di sá yii ti-Dindaan làá ŋá tin tin kɔkɔ u sòon̄ ki síiǹ yii u làá ŋá kitiŋ puee malaa#9.28 B. 27-28: Yees 10.22-23..» 29Yeesaya gbanti di nìn gíti sòon̄ tibɔti nee ki yóoǹ dooooyee, yii:

«Ti-Dindaan Mpɔŋkɔdaan yaa kaa bàà kíǹ

ti-maaliŋu poon binib bibee,

ti bàà kpántì kii Soodoom tiŋkee ní,

ki bàà kíǹ ki náań nì Goomoora tiŋkee#9.29 Kpèè Yees 1.9. - Soodoom nì Goomoora : kpèè Diny 19.23-28..»

Isirayeel nì fookii un tìì difiilee

30Tibɔti tin ti sòon̄ee, ti làá kúntí-tì yii ba? Bin kaa sá Juuda yab, kaa nìn nyàab̀ kí nīn bí deedeeyee di kpántì deedeedambi Unimbɔti nimbiin, kun puee bi fōō-u ki kíí. 31Juuda yab bin nìn nyàab̀ kí nóó marab kí ŋmā kí kpántí deedeedambee kaa ŋúń ki ŋúb́ marab gbanti. 32Ba yì-tì? Kun puee bi dàkafī yii bi-tuuŋŋi pu ní bi ŋūǹ kí nīn bí deedee, kaa nyàab̀ kí fōō Unimbɔti kí kíí kí nīn bí deedee. Bi gbéetì ditaŋkpal 33din pu Unimbɔti gbɔŋku nìn ŋmàn̄ee yii:

«Kpèè, m bíl̀ ditaŋkpagbéetikaal Siiyɔn,

ditaŋkpal din líikí binibee.

Un yaa fōō-dì ki kííyee, icoo kaa làá jī udaan#9.33 Siiyɔn: An dàkà yii dijool din pu bi máń Jeerusaleem tiŋkee. - Kpèè Yees 28.16. Dūú ŋmàntī nì Yees 8.14-15..»

Currently Selected:

Romains 9: BASSARDC

Highlight

Copy