Romains 4

Abraam ŋabikau

1Mimmee, ti làá sòoǹ diyimɔɔl din timbi Juuda yab naanja Abraam nìn kée pu yii ba? 2An yaa sá Abraam tunnyaaŋŋi pu ní Unimbɔti yíiń-u deedeedaanee, u bàà ŋūǹ kí nīn dàkà u-ba. Ama waa ŋūǹ kí dàkà u-ba Unimbɔti nimbiin. 3Unimbɔti gbɔŋku poon lī yii ba ní? An lī yii: «Abraam nìn fōō Unimbɔti ki kíí, ní Unimbɔti ká u-fookiiu un u cáá u-puee ní ki yíiń-u deedeedaan#4.3 Diny 15.6..» 4Unil un túń ditundee, bi yaa pàn̄-uee, baa lì yii bi pú-u fám, ama u-tundi paati ní u fōō. 5Un kaa ŋá diba, ama ní ki fōō Unimbɔti un di yàntī binikpitib kpántí deedeedambee ki kííyee, Unimbɔti yíì udaan deedeedaan u-fookiiu pu ní. 6An di yāntì ní Daafiidi nìn lī yii un bí dipɔɔpindinee di sá unil un Unimbɔti yíiń deedeedaan an kaa sá u-tuuŋŋi puee.

7«Bin bin Unimbɔti dū bi-yìntitam ki pú-bi ki pítì bi-kpitiiyee

bí dipɔɔpindinaaa!

8Un ní ti-Dindaan kaa ti lì yii u ŋá ikpitee

bí dipɔɔpindinaaa#4.8 B. 7-8: Ilan 32.1-2.!»

9Mimmee, dipɔɔpindi gbanti sá ki tīī Juuda yab bin gífì dikpancandee ŋmaniŋma, kaa sá ki tīī bin kíǹeeee? Ti dáá ká yii: «Abraam nín fōō Unimbɔti ki kííyee pu ní Unimbɔti yíiń-u deedeedaan.» 10Ŋyunti ŋulɔŋu ní Unimbɔti yíiń-u deedeedaan ní? U nín gíí ki dóòyeeyaaa, u nín kaa láá gííyee? An kaa sá u nín gíí ki dóòyee ní u lī, an sá min waa láá gííyee ní u nìn lī. 11Boonee ní Unimbɔti bí Abraam ń gíí dikpancandi án nīn sá kudaaŋŋu#4.11 Kpèè Diny 17.9-14. yii u sá deedeedaan u-fookiiu pu. Míǹ puee, bin kɔkɔ fōō Unimbɔti ki kíí, kaa gífì ki sá deedeedambi Unimbɔti nimbiinee, bi-baa di sá Abraam, 12ní u sá bin gííyee mun baa. An kaa sá bi nín gííyee ŋmaniŋma pu, an sá bi nín fōō ki kííyee pu, kii ti-baa Abraam mun nín nìn fōō ki kíí pu, kaa láá gííyee.

Abraam fōō Unimbɔti poondi nì fookii

13Unimbɔti nìn pōoǹ Abraam nì u-naantiibi yii u làá dāá dū duulinya kí tīī-bi#4.13 Kpèè Diny 12.2-3, 17.4-6, 22.15-18.. An kaa sá Abraam nín nìn nóó marabee pu ní u nìn pōoǹ-u míǹ, ama an sá u nín nìn fōō Unimbɔti ki kíí Unimbɔti yíì-u deedeedaanee pu. 14An yaa sá tí nīn tɔ́ marab ní kí fōō tin Unimbɔti pōoǹ-tee, mimmee fookii ŋá fám dee, ní Unimbɔti poondi kaa ti bí tiban. 15Di sá yii marab cāabìń ditafadaaldi ní, ní laakin marab kpée, marab yìntitam mun kpá.

16Mimmee, ti ká yii ti nín fōō Unimbɔti ki kííyee pu ní ti fòol̄ tin u pòontí-tee. An sá Unimbɔti ŋanti pu ní an bí míǹ ki tīī Abraam maaliŋun yab kɔkɔ. An kaa sá ki tīī bin tɔ́ Mooyiisi marabee ŋmaniŋma, an sá ki kpáaǹ bin kɔkɔ fōō Unimbɔti ki kíí kii Abraam nín nìn fōō ki kíí puee. Timbi bin kɔkɔ fōō ki kííyee baa di sá Abraam. 17Unimbɔti lī u-gbɔŋku poon míǹ ní yii: «M dū-si ki kpántì atimbun tikpil baa#4.17 Kpèè Diny 17.5..» Unimbɔti un fìkitī bitaŋkpiibi ki wāĺ tin kaa láá bée kii tì bée, Unimbɔti un pu Abraam nìn mákée yāntì u sá ti-baa. 18Abraam nìn fōō ki kíí ní ki máká, nì min kɔkɔ dimákal diba nìn pée kpée, ní ki lafun dūu kpántì atimbun tikpil baa. Kii Unimbɔti nín nìn pée tùkū-u puee yii: «A-maaliŋun yab nín làá nīn wīikí min nyɔkɔmee dee#4.18 Kpèè Diny 15.5..» 19U nìn púĺ ki bàn̄ abin dilaataal. U yaa kpēē u-bee, u-wunti pēefì, ní u yaa tí kpēē u-nimpuu Saarayee, u mun kpántì unimpunaati. Bi-liitil nìn jítì mmaal pu, ama ní u-mákal dáá gbíntìi pɔ̄ɔ̄#4.19 Kpèè Diny 17.1,15-22.. 20Waa fá u-mákal kí dàkafì yii Unimbɔti kaa ŋūǹ kí ŋá tin u pōoǹee, ama u-mákal tīī-u mpɔn ní u nyɔ́ŋkì Unimbɔti, 21ki béè u-pɔbilin yii, ibaamɔn, Unimbɔti cáá mpɔn ki làá ŋá min u pōoǹee. 22An pu ní Unimbɔti yíiń-u deedeedaan. 23An kaa sá úǹ baba pu ní an ŋmàn̄ yii Unimbɔti yíiń-u deedeedaan. 24An sá ti mun pu, kun puee Unimbɔti kpèé-ti yii ti mun sá deedeedambi dimákal din ti cáá úǹ Unimbɔti un fīkitì ti-Dindaan Yeesu ditaŋkpiilinee pu. 25Ti-kpitii pu ní Yeesu kpíì#4.25 Kpèè Yees 53.4-6., ní ki fīkitì, ti mun ń ŋmā kí kpántí deedeedambi Unimbɔti nimbiin.

Currently Selected:

Romains 4: BASSARDC

Highlight

Copy