Romains 5

Kriisitoo yab cáá ŋgbansɔŋfi nì Unimbɔti

1Mimmee, ti ká yii ti nín fōō-u ki kííyee pu ní ti kpántì deedeedambi Unimbɔti nimbiin, ní ti nì Unimbɔti kansikin ŋáŋkì ti-Dindaan Yeesu Kriisitoo pu. 2Yeesu Kriisitoo puee ní ti ŋúń ki jéetì diyimɔɔl din poon ti bí nee, ti nín fōō-u ki kííyee pu. Ní kun mɔ̄ǹ-tee di sá ti cɔ́tí yii ti làá kɔ́ Unimbɔti nyootin. 3Áli gba, ti nín jīǹ falaa puee, an mɔ̄ǹ-ti, kun puee ti nyí yii falaa di yàntī unil ń pɔ́ɔǹ u-ba, 4ní dipɔ́ɔǹdi ń yàntī unil ń ŋmā kí já kí nyā dinimbinaamandin, ní ki kíǹ ki kā ki cɔ́tí yii Unimbɔti nín lī puee, u làá ŋá míǹ. 5Taa cɔ́tí fám, kun puee Unimbɔti pú-ti Circir Fam min di gbēentí ti-pɔbiliŋ u-neendee.

6Ti nín nìn dáá bí iwɔfineee, ní ŋyunti ŋun Unimbɔti yóoǹee bāań, ní Kriisitoo kpíì binikpitib pu. 7An pɔ̄ɔ̄ unil ń kíí kí kpú deedeedaan pu. An yaa yíì ní ni kāntí ubɔ ń kíí kí kpú unimɔnti pu. 8Ama Unimbɔti dàkà-ti u nín néeń-ti min bulifee di sá yii, ŋyunti ŋun ti dáá sá binikpitibee, Kriisitoo kpíì ti-pu. 9U nín kpíìyee, ní u-fatikuu yāntì ti kpántì deedeedambi Unimbɔti nimbiin. Kin, an làá ŋá mana ní kɔŋkɔnnee waa làá ŋmā kí fīī-ti tí taa kɔ́ Unimbɔti ŋuulin? 10Dooooyee, ti nìn dáá sá Unimbɔti nannanliibi ní. U-Jipɔɔn kúm di ŋáŋkì ti-kansikin, ní ti mɔ́ɔkì. Kɔŋkɔnnee, ti-kansikin mɔ́ɔkì ki dóò, ní u-Jipɔɔn bí dimaŋfalin, kin, án làá gíti ŋá mana ní taa làá ká difiil? 11Tiba mun gíti sɔ̀: ti-Dindaan Yeesu Kriisitoo yāntì ti nì Unimbɔti kansikin ŋáŋkèe, ní ti bí ki fàal̀ Unimbɔti pu.

Adam nì Yeesu bɔŋmantikaati

12Unibaanti Adam pu ní ikpiti dī ki kɔ́nní duulinyan, ní ikpitee cáań ŋkúm, ní báà ŋma kúù, kun puee báà ŋma ŋá ikpiti#5.12 Kpèè Diny 2.17, 3.6,17-19.. 13Dooooyee, kí wàatī Unimbɔti ń nìn tīī Mooyiisi marabee, ikpiti nìn pée bí kitiŋ pu dee. Míǹ ní marab yaa kpá, baa ŋūǹ kí lì yii unil ŋá ikpiti. 14Nì míǹ kɔkɔee, kí yòon̄ Adam yuntiŋu kí dāá sāā Mooyiisi yuntiŋuee, ŋkúm di nìn jíń báà ŋma, ki kpáaǹ binib bin kaa ŋá ikpiti kii Adam nín ŋá puee.

Adam nìn sá Yeesu un dāa dɔ́miń boonee naŋku ní. 15Ama Adam yìntitam nín cáań-ti tiŋyee kaa pēē nì tin Unimbɔti pūǹ-ti faalaayee. Tiŋman, binib kupaau kpíì unibaanti Adam yìntitam pu, ama Unimbɔti nín ŋáań binib tiŋan puee, ní u dū diyimɔɔl bulifi ki pú binib kupaau unibaanti Yeesu Kriisitoo pu. 16Unimbɔti pɔl nín tūǹ ditundi diŋyee nyáń di-ba nì unibaantee kpitii tundi. Unibaantee kpitii nín cáań-ti kun kuŋyee di sá ŋkúm. Unimbɔti ŋanti tin u pú-ti faalaayee nín cáań-ti kuŋyee di sá, a-kpitii yaa yāntì ki wīikí min kamaa, u làá dūú pɔ̄-si. 17Tiŋman, unibaanti yìntitam pu ní ŋkúm jíń báà ŋma. Ama Yeesu Kriisitoo ubaanti pu ní binib fōō tiŋan tin bulifi Unimbɔti ŋée. U pú-bi bí nīn bí deedee u-nimbiin, bidambi ń nīn cáá dimaŋfal kí jī dibeel.

18Kii Adam baba kpitii nín cáań nnibiyaamu kɔkɔ ŋkúm puee, Yeesu Kriisitoo tundi din u túń nì deedeeyee yāntì nnibiyaamu kɔkɔ ŋūǹ kí kpántí deedeedambi kí ká dimaŋfal. 19Kii unibaanti yìntitam nín kɔ́ǹ binib tikpil ikpitin puee, míǹ ní unibaanti nín tɔ́ Unimbɔti puee di cāntì binib tikpil làá kpántí deedeedambi.

20Mara úǹ dɔ́miń ikpiti ń wíiǹ ní. Ama ikpiti yaa yāntì ki wīikí min kamaa, Unimbɔti ŋanti wīikí ki jítiǹ-i. 21An di yì-tì ní, kii ikpiti nín nìn jíń báà ŋma ki cáań ŋkúm puee, Unimbɔti ŋanti kíǹ ki jīǹ mpaan binib ń kpántí deedeedambi kí fōō dimaŋfal din kaa cáá dikúntilee ti-Dindaan Yeesu Kriisitoo pu.

Currently Selected:

Romains 5: BASSARDC

Highlight

Copy