Marc 9

1Ní Yeesu gíti kútì ki lī yii: «Ibaamɔn ní m tùkù-ni, ni-kansikin biba kaa làá kpú ní kí ká Unimbɔti Beel dɔ́miń nì mpɔn.»

Unimbɔti dàkā yii Yeesu sá u-Jipɔɔn

(Kpèè Maat 17.1-13, Luuki 9.28-36)

2Iwiin iluu boonee, Yeesu gāntì Peetroo nì Yakubu nì Yoowaneesi ki cáá-bi ki jɔ́m̀ dijoofɔkɔl diba pu. Niinee ní u cúú u-ba ki kpántì 3ní u-wampeeŋkaati píil̀ káŋkaŋ ki kíǹ ki jìl̀ pàlpal. Unil báà ubɔ kitiŋ nee pu kaa ŋūǹ kí fíntí tiwan tí pīil̀ kii u-wanti nín nìn pīiǹ puee#9.3 Dūú ŋmàntī nì 2 Peet 1.16-18.. 4Niinee ní akpambal atee kpēēyee, Eelii nì Mooyiisi di sí bi nì Yeesu sòoǹee. 5Ní Peetroo tùkū Yeesu yii: «Ukpil, an ŋān̄ tí nīn bí doo, tí gāā tibìń tita: sii kubɔ, Mooyiisi kubɔ, Eelii kubɔ!» 6Di sá yii waa ti pée nyí tin u làá sòoǹee, kun puee tifaandi nìn kɔ́-bi tikpil. 7Niinee, ditagbandi diba dɔ́miń ki bīiǹ bi-pu, ní bi gbìl̄ Unimbɔti sòon̄ní ditagbandee ni yii: «Un bí nee di sá m-Jipɔnneeŋkaau. Ní pīlifim̀maan-u!» 8Kpalaayee, bi fātìi kpēē ki māntì ki tú, kaa ti ká báà ubɔ asee Yeesu baba di kíǹ bi-cee.

9Ŋyunti ŋun bi fàtīi kpákatiń dijool puee ní Yeesu kpáafì-bi bí taa māafì báà ubɔ tin bi kée kí nīn cí daliŋkin úǹ Kinibiki làá dāá fìkitī ditaŋkpiilinee. 10Bi kpáafì dinyɔɔbundee bi-ni, nì míǹ kɔkɔee bi gíti bālifì tɔb yii: «Ba di sá yii ú fìkitī ditaŋkpiilinee?»

11Ní bi bālifì-u dinyɔɔbundi nee yii: «Ba pu ní bimaradakaliibi bí yii Eelii di máaǹ kí péé kí dāan̄ kí wàatī ní#9.11 Dūú ŋmàntī nì Mala 3.23.?» 12Ní Yeesu fātìi kíí-bi yii: «Ibaamɔn, Eelii máaǹ kí péé kí dāan̄ kí fàtīí bɔ́ntí tikɔkɔ. Too, an nín ŋmàn̄ man Kinibiki pu yii m làá jī falaa tikpil ní bí kpèè kí sìŋkīǹ-mee, ni dàkafī yii ba#9.12 Kpèè Yees 53.3, Ilan 22.1-18.? 13Càntī ḿ tùkùmaan-ni, Eelii pée dɔ́miń dooooyee, ní bi sāaǹ-u bi nín là puee, kii an nín ŋmàn̄ Unimbɔti gbɔŋkun ki síiǹ u-pu miŋyee.»

Yeesu jìn̄ arasinii kibiki kiba pu

(Kpèè Maat 17.14-21, Luuki 9.37-43a)

14Bi bāań ki ŋmāntiǹ u-boonnooliibi bin kíǹeeyee, ní ki ká yii kunipaau sí ki māntì ki tú-bi. Bimaradakaliibi biba mun nìn bí niin, bi nì u-boonnooliibi sí ki kpákà. 15Kunipaauee wál̀ Yeesu kpalaayee ní an túuǹ-bi ní bi sáǹní kí dāá jāam̀-u. 16Ní Yeesu bālifì-bi yii: «Ni nì bi kpákà ba pu ní?» 17Ní kunipaauee kansikin ubɔ kíí-u yii: «Ukpil, arasinii di kā m-jipɔɔn pu ní ki yāntì waa ŋūǹ kí sòoǹ ní m bàà cáań-u a-cee. 18Arasiniiyee yaa yíkì u-puee, báà laakiŋyee u líikí-u kitiŋ, ní u ŋmóò u-nyiŋŋi ní kupumpukuu nyēē u-nyɔkɔn, ní u-wunti ń pɔ̄ɔkì kpàninini. Ní m gbāam̀ a-boonnooliibi ń jà arasinii gbanti ní baa ŋúń.» 19Ní Yeesu lī-bi yii: «Óo, nimbi waanee nib bin kaa cáá fookii nee! Ni là ḿ gíti kàl̄ ni-cee kí tin sāā ŋyunti ŋulɔŋu ní? M làá nīn jīǹ-ni kimɔtii kí tin sāā ŋyunti ŋulɔŋu ní? Cáaḿmaan-kì m-cee!» 20Ní bi cáań kibikee u-cee. Arasiniiyee nín wál̀ Yeesu kpalaayee ní u cīŋkì kibikee ŋkpitim pu, ní kì lítì kitiŋ ki bíi bíntí, ní kupumpukuu bíi nyēē ki-nyɔkɔn. 21Ní Yeesu bālifì ki-baa yii: «Ŋyunti ŋulɔŋu ní an kíĺ-u?» Ní u kíí-u yii: «Doooo u-biyatin ní an kíĺ-u. 22Arasiniiyee líikí-u iyunti iba ŋŋmin, iyunti iba mun nnyimin, ki nyàab̀ kí kpɔ̀-u. A yaa ŋūǹ kí ŋá tiba, sɔ̄ ti-saai kí jòoń-ti!» 23Ní Yeesu bí yii: «A yaa ŋūǹaa! An kɔ pɔ̀fì ki tīī un un fōō ki kííyee.» 24Niinee, kibikee baa téeń mpɔn yii: «M fōō-si ki kíí! Jòoń-mi, m-fookiiu kaa náaǹ!»

25Yeesu wál̀ kunipaau sánní ki gíti dòoń kí kūtèe, ní u kpātì arasinii pu ki lī yii: «Sii arasinii un yì kibiki nee mɔɔmiindi nì ki-tafakpaalee, nyā ki-ni kí taa ti gítiń, sii ní m lì!» 26Ní arasiniiyee fáá mbiil ki cīŋkì kibikee ŋkpitim pu, ní ki nyáń. Kibikee dōoǹ kii kì kpíìyee, ki yāntì binib tikpil bí yii: «Kì kpíì ní!» 27Ama ní Yeesu cúú ki-ŋal ki yáatì-kì ki síiǹ, ní kì síl̀. 28Ŋyunti ŋun Yeesu kɔ́ kudiinee, ní u-boonnooliibi bālifì-u bi-ŋmaniŋma niin, yii: «Ba pu ní timbi kaa ŋúń ki jìn̄ arasinii gbanti?» 29Ní Yeesu kíí-bi yii: «An yaa kaa sá nì ŋwimmeem#9.29 Tigbɔn tiba poonee, bi lī yii: «An yaa kaa sá nì ŋwimmeem nì dinyɔɔboobil... ubɔ kaa ŋūǹ kí jà arasiniibi nee jutiibi.»

Yeesu gíti tí sòon̄ u-kúm nì u-fìkititam bɔti

(Kpèè Maat 17.22-23, Luuki 9.43b-45)

30Bi yíkì niinee ní ki cūtìi jítì Galiilee. Yeesu kaa nìn là báà ubɔ ń béé u-pu. 31Di sá u nìn dàkà u-boonnooliibi ki tùkù-bi yii: «Bi làá cúú man Kinibiki kí ŋúbiǹ binib bí kpɔ̀-mi. Bi yaa kūū-mi, ŋwintataati dal m làá fìkitī.» 32U-boonnooliibi kaa nìn gbìl̄ tibɔtee taapu ní ki fāŋkì kaa bālifì-u ti-taapu.

Ŋma di sá ukpaan ní?

(Kpèè Maat 18.1-5, Luuki 9.46-48)

33Ŋyunti ŋun bi bàn̄ Kapeernayum ki kɔ́ kudiinee, ní Yeesu bālifì u-boonnooliibi yii: «Ba pu ní ni bàà kpákà nsannee?» 34Ní bi ŋmí: di sá yii tikpiti pu ní bi bàà kpákà. 35Niinee ní u kāl̀ ní ki yíiń u-boonnooliibi saalaa nì bilee ní ki tùkū-bi yii: «Un yaa là kí nīn sá usanliitee, udaan ń páań báà ŋma boon kí nīn sá báà ŋma tɔntɔnliu.» 36U lī míǹ ki dóòyee, ní ki cūtì ki cúuń kibiyaawaai kiba ŋal, ki cáań-kì ki síiǹ bi-kansikin, ní ki dū u-ŋalii ki kpàl̄-kì, ní ki bí-bi yii: 37«Un kamaa yaa fōō kibiyaawaai kiba kii kíǹee juti man puee, udaan fōō man dee. Un kamaa yaa tí fōō mamee, kaa sá man baba ní u fōō, udaan fōō un túnní-mee mun dee.»

Un kaa jáà nì tee sá ti-yɔu ní

(Maat 10.42, Luuki 9.49-50)

38Ní Yoowaneesi bí-u yii: «Ukpil, ti ká uninja ubɔ un kaa sá ti-yɔuee cáá a-yindi ki jì arasiniibi, ní ti bí yii ú taa ti ŋá míǹ, kun puee waa bí ti-kansikin.» 39Ní Yeesu kíí-u yii: «Taa nín̄ pìintímaan-u nsan! Di sá yii unil kaa ŋáań maamaaci man yindi pu, kí pūtì kpáàa bíi sòoǹ m-pu tikpitil. 40Un kaa jáà nì tee sá ti-yɔu ní. 41M tùkù-ni ibaamɔn yii un kamaa di yaa pú-ni kinyinnyɔyukubiki ni nyùn̄ yii ni nín sá Kriisitoo yabee puee, udaan kaa làá lántí u-paati.»

Unil ń sāǹ ikpiti

(Maat 18.6-9, Luuki 17.1-2)

42«Ama un di yaa yāntì mbiyaawaamu mun fōō-mi ki kíí nee kansikin kiba ŋá ikpitee, an sɔ́ bí dū kunakpaaŋŋu kí kúĺ udaan neen kí cáá-u kí tɔ̄ tiŋkun. 43A-ŋal yaa làá yàntī á ŋá ikpitee, á tùkutī-ŋu kí fá. An sɔ́ á kɔ́ dimaŋfal din kaa cáá dikúntilee ni nì diŋaŋgindi ki jítiǹ á nīn cáá iŋal ili kí tin kɔ́ ŋŋmi ŋun kaa kúù jaanjaanee ni. [ 44Niin ní akoosibil ŋin kaa kúùyee bí ki ŋmóò binib. Niin di sá ŋŋmi ŋun bí kaa cáá digbíntilee#9.44 Uyakatikaa nee kaa bí tigbɔŋkpikil tikpil poon..] 45A-taal di yaa làá tí yàntī á kɔ́ ikpitinee, gùutī-dì kí fá. An sɔ́ á kɔ́ dimaŋfal din kaa cáá dikúntilee ni nì ditaagindi ki jítiǹ á nīn cáá ataa ali bí tin dū-si kí tɔ̄ ŋŋmi ŋun kaa cáá digbíntilee ni. [ 46Niin ní akoosibil ŋin kaa kúùyee bí ki ŋmóò binib. Niin di sá ŋŋmi ŋun bí kaa cáá digbíntilee#9.46 Uyakatikaa nee kaa bí tigbɔŋkpikil tikpil poon..] 47An yaa sá a-nimbil nín kpèé kuŋyee di yaa yàntī a ŋáań ikpitee, á lúkutí-dì kí fá. An sɔ́ á kpáaǹ diniŋkpundi kí kɔ́ Unimbɔti Beelin ki jítiǹ á nīn cáá animbil ali bí tin dū-si kí tɔ̄ ŋŋmin. 48Niin ní akoosibil ŋin kaa kúùyee bí ki ŋmóò binib. Niin di sá ŋŋmi ŋun bí kaa cáá digbíntilee#9.48 Dūú ŋmàntī nì Yees 66.24..» 49Ŋŋmi dāa sá kii ŋyaamee ní bí dūú pùkū báà ŋma pu#9.49 Ti gíti ŋūǹ kí nàatī uyakatikaa 49 yii: «Ŋyaam nín mɔ́ɔkí tijin puee, míǹ ní falaa làá yàntī ni-kɔkɔ ń nīn mɔ̄.».

50«Ŋyaam sá tiwammɔntiil: ama ŋyaam yaa fá mi-mɔŋŋuee, mana ní ni làá gíti ŋá ní mí mɔ̄ɔkì? Ŋyaam ń nīn bí ni-ni, ŋgbansɔŋfi ń nīn bí ni-kansikin.»

Currently Selected:

Marc 9: BASSARDC

Highlight

Copy