Marc 8

Yeesu kpíiǹ binib kutukub binaa

(Kpèè Maat 15.32-39)

1Iwiin gbanti poonee, kunipaau kubɔ tí fātìi kpáfì u-cee, ní kaa nìn cáá tiba kí jī. An puee Yeesu yíiń u-boonnooliibi ki bí-bi yii 2«Nnibiim nee gbí-mi falaa, di sá yii iwiin ita sèé bi nín bí m-cee, kaa ti cáá tiba kí jēe. 3M yaa jìn̄-bi nì ŋkùm nee bí nīn kùǹ bi-dumpuyee, bi làá yɔ̀l̄ nsanni, kun puee bi-kansikin tikpil nyánní ndan.» 4Niinee ní u-boonnooliibi kíí-u yii: «La ní ti làá kánní tijin kuteeu nee ni kí kpíiǹ binib nee?» 5Ní Yeesu fātìi bālifì-bi yii: «Kpɔnɔb biŋa ní ni cáá?» Ní bi kíí-u yii: «Biluli.» 6U yāntì kunipaau kāl̀ taapu ki dóòyee, ní u yōoǹ kpɔnɔb bilulee ki jáam̀ Unimbɔti tijin gbanti pu, ní ki gífì gífì ki tīī u-boonnooliibi ń yàkatī binib. Ní bi dūu yākatì kunipaauee. 7U-boonnooliibi nìn cáá njɔmbiyaamu mubɔ mun. U jáam̀ Unimbɔti mu mun pu ki dóòyee ní ki tùkū-bi yii bí dū-mu kí yàkatī. 8Kunipaauee jíń ki díkí, ní bi kóoǹ ajɔŋgin nì akpɔnɔkati ŋin kíǹee ki gbéeǹ tikabiti tiluli. 9Bin nìn jíń an jikaatee ŋūǹ kí bà binib kutukub binaa. Bi jíń ki dóòyee, ní u yāntì bi nín kùǹ, 10ní u nì u-boonnooliibi kɔ́ buŋalimbun ki nín cá Dalmanuta watil.

Fariisab nyàab̀ kí ká maamaaci

(Kpèè Maat 16.1-4)

11 Fariisab nìn jīnní Yeesu boon ki bāań ki bíi kpākantí-u kí píĺ-u tibɔti. Bi nìn bālifì-u yii ú ŋá maamaaci ubɔ un nyánní Unimbɔti ceeyee. 12Ní Yeesu fáá diniindi ní ki lī yii: «Ba pu ní waanee nib nee bàlifī kí ká maamaaci án nīn sá-bi kudaaŋŋu? Ibaamɔn ní m sòoǹ nì ni, ni kpá kí ká maamaaci báà ubɔ!» 13U lī míǹ ki dóòyee, ní ki fātìi tí kɔ́ buŋalimbun ki dūtì lapu pu mɔɔgbandi ki wāatì-bi.

Ní taa fōō Fariisab nì Eeroodi dàkatam

(Kpèè Maat 16.5-12)

14Yeesu boonnooliibi nìn súntì kaa kpáaǹ tijin, asee kpɔnɔbaanti di nìn tàkā bi-cee buŋalimbun. 15Ní Yeesu kpáafì-bi ki bí-bi yii: «Nín̄ nyím̀maan ni-ba nì Fariisab nì Eeroodi kpɔnɔnyɔkɔŋu!» 16U-boonnooliibi dākafì ki lī bi-ŋmaniŋma kansikin yii: «Ti nín kaa ŋúb́ tijinee pu ní u kalin sòoǹ mimmaaa?» 17Yeesu béè bi-landɔkɔyee ní ki bí-bi yii: «Ba pu ní ni sòoǹ ni nín kaa ŋúbiń kpɔnɔee pu? Nìn díǹ naa láá gbìl̀ tibɔti taapuɔɔɔ? Naa láá béè-maaa? 18Ni pɔbiliŋ tīlifì níii? Ni cáá animbil fám ní kaa wāĺaaa? Ni cáá atafal ki pílifí ní kaa gbìl̀aaa? Naa cáá nlandɔkɔ 19kí téetí ŋyunti ŋun m dū kpɔnɔb biŋmoo ki gífì gífì ki tīī binib kutukub biŋmoo bi ŋmɔ́ ki díkéeee? Tikabiti tiŋa ní ni tōō akati ki gbéeǹ ní?» Ní bi kíí-u yii: «Saalaa nì tili#8.19 Kpèè 6.35-44..» 20«Kin, m nín gífì gífì kpɔnɔb biluli ki tīī binib kutukub binaayee, tikabiti tiŋa ní ni tí kóoǹ akati ki gbéeǹ ní?» Ní bi tí kíí-u yii: «Tiluli#8.20 Kpèè 8.1-9..» 21Ní u lī-bi yii: «Ní áli nìn díǹ, naa láá gbìl̄aaa?»

Yeesu cáaǹ ujɔfu ubɔ Beetisayida tiŋkin

22Bi bàn̄ Beetisayidee, binib biba cáań ujɔfu ubɔ Yeesu cee ki gbāam̀-u yii ú gbēē ujɔfuee. 23Yeesu cúú ujɔfuee ŋal ki kpáaǹ-u ki kpōotì kitimbiliiyee kpaanceetiŋu, ní ki tíil̀ timɔtan ki ŋá ujɔfuee nimbilin, ki dū u-ŋalii ki gbēē u-nimbiliŋ, ní ki bālifì-u yii: «A wāĺ tibaaa?» 24Ujɔfuee kpēē, ní ki bí yii: «M wāĺ binib, ní bi bí kii isufi di còom̄ee.» 25Niinee ní Yeesu gíti tí dū u-ŋalii ki gbēē u-nimbiliŋ. Ŋyunti gbanti ní ujɔfuee kpítì u-nimbiliŋ ki kpēē ní ki pɔ́ɔkì ki kíǹ ki wāĺ bɔ́mbɔŋ. 26Ní Yeesu tùkū-u yii: «Nín̄ kùǹ a-dumpu kí taa dī kitiŋ poon.»

Peetroo lī yii Yeesu sá Meesiya

(Kpèè Maat 16.13-20, Luuki 9.18-21)

27Yeesu nì u-boonnooliibi yíkìi búntì Seesaaree-Fiiliipi timbilimmu watil pú. Bi bàn̄ nsannee, ní u bālifì u-boonnooliibi yii: «Binib lì yii m sá ŋma ní?» 28Ní bi kíí-u yii: «Biba lì yii a sá Yoowaneesi un fùul̀ binib Unimbɔti nyimee, ní biba mun lì yii a sá Eelii. Biba bíǹ ceeyee, a sá Unimbɔti bɔnaatiliibi kansikin ubɔ ní.» Ní u bālifì-bi yii: 29«Kin nimbi fáà, ŋma ní nimbi nyí yii m sá ní?» Ní Peetroo kíí-u yii: «Sii di sá Meesiya!» 30Niinee ní Yeesu kpáafì-bi tiŋan bí taa sòoǹ u-pu míǹ báà ubɔ cee.

Yeesu sòon̄ u-kúm nì u-fìkititam bɔti

(Kpèè Maat 16.21-28, Luuki 9.22-27)

31Ŋyunti gbantee, u kíĺ ki bíi tùkù u-boonnooliibi yii: «An sá man Kinibiki ń jī falaa tikpil. Bitindaŋkpilib nì bisaraaŋakpilib nì bimaradakaliibi kɔkɔ làá dāá lì yii baa là m-bɔti, bi làá dāá kpɔ̀-mi, ní ḿ fàtīí fìkitī winta dal.» 32U nìn pée tùkù-bi an bɔtee ki cántí-bi ní. Ní Peetroo cáá-u ki kākatì ŋkpaanceeti ki kíĺ ki bíi wòoǹ-u. 33Niinee ní Yeesu fātìi kpēē u-boonnooliibi ní ki kpātì Peetroo pu ki bí yii: «Sii un cáá Sitaan landɔkɔŋuee, sútí kí wàatī-mi! Aa dàkafī Unimbɔti yam, a-landɔkɔi sá binib landɔkɔi ní.»

34U lī míǹ ki dóòyee, ní ki yíiń kunipaau nì u-boonnooliibi u-cee, ní ki bí-bi yii: «Un yaa là kí nóó-mee ń fá úǹ u-ba nín là puee kí nóó min ní man lèe, kí yòon̄ u-dɔpuntikaaŋu kí nīn nóó-mi. 35Kun puee un di yaa là kí fīī u-maŋfalee làá fá-dì, ama un di yaa dū u-maŋfal ki fá kí nóó-mi kí sòoǹ m-bɔmɔntiiti kí tīī binibee, udaan di làá fīī u-maŋfal. 36Unil, a yaa jíń duulinya nee kɔkɔ ní sisi a-ba wáŋkèe, a páatì ba? 37Ba ní a ŋūǹ kí dūú pà kí fīī a-ba? 38Un kamaa yaa cáá icoo man nì m-bɔti pu waanee nib bin nyēē Unimbɔti boon ki ŋáań ikpitee kansikinee, ŋyunti ŋun m yaa láa gítìń m-baa nyootin nì u-tuuŋyee, man Kinibiki làá dāá kɔ́ǹ udaan icoo.»

Currently Selected:

Marc 8: BASSARDC

Highlight

Copy