Marc 7

Juuda yab yaajakoobiliŋ

(Kpèè Maat 15.1-9)

1 Fariisab nì bimaradakaliibi biba nìn nyánní Jeerusaleem ki dɔ́miń ki kpáfì Yeesu cee. 2Bi bí niinee, ní ki ká Yeesu boonnooliibi biba jīǹ, kaa fíntì bi-ŋalii kii bi-yaajakoobiliŋ nín sá puee. 3Di sá yii Fariisab nì Juuda yab bin kíǹee kɔkɔ yaa kaa fíntì bi-ŋalii tiŋan, kii bi-naanjab nín nìn ŋáań puee, baa jīǹ#7.3 Dūú ŋmàntī nì Luuki 11.38.. 4Bi yaa tí nyánní kitiŋin ki bāańee, baa tí jīǹ asee bí fíntí bi-ba nì nnyim kí wàatī, ní kí nín jī. Bi cáá akoobil tikpil ki kútì ŋin bí nee pu: ŋiba sá bí fíntí kɔŋkɔmbi, kí fíntí aboon nì asambil.

5Tíǹ pu ní Fariisab nì bimaradakaliibee nìn bālifì Yeesu yii: «Ba pu ní a-boonnooliibi kaa ŋúb̀ ti-yaajakoobiliŋ, kaa fíntí ki jīǹ?» 6Ní Yeesu kíí-bi yii: «Mpoonnyoondambi, an pu ní Unimbɔti bɔnaatiliu Yeesaya ŋmàn̄ u-gbɔŋkun ki sòon̄ ni-pu yii Unimbɔti bí yii:

<Binib nee nyɔ́ŋkí-mi nì bi-nyɔmmun fám ní.

Ama bi-pɔbiliŋ dátiǹ-mi.

7Bi jáaḿ-mi fám ní,

kun puee tin binib náańee ní bi dàkà, ní ki cáa yíì man marab.#7.7 Yees 29.13.>»

8Ní Yeesu nìkī ki lī-bi yii: «Ni féeń Unimbɔti marab ki fòol̄ nnibiyaamu koobiliŋ.»

9Ní u gíti kútì yii: «Ni féeń Unimbɔti marab tiŋan pu kí ŋmā kí ŋúb́ nimbi ni-ba koobiliŋ. 10Mooyiisi nìn lī u-marabin yii: <Á nīn tɔ́ a-baa nì a-na,> ní ki gíti lī yii: <Un yaa sòon̄ ki bíil̀ u-baa kii u-nee, see bí kpɔ̀-u#7.10 Kpèè Disa 20.12 nì Ditee 5.16, Disa 21.17 nì Akoo 20.9..> 11Ama nimbi lì yii, unil yaa cáá tiba ki bàà ŋūǹ kí tīī u-na kii u-baayee, u ŋūǹ kí lì yii: <An wanti sá Kɔɔban>, (an dàkà yii saraa ki tīī Unimbɔti). 12U yaa lī mimmee, naa ti yàntī ú ŋá tiba kí tīī u-baa kii u-na. 13Míǹ ní ni cáá nimbi ni-ba koobiliŋ ŋin ni-baabi dàkā-nee ki cáa kpìtī Unimbɔti bɔti. Tiwan tikpil bí ni ŋáań míǹ mbaantiim.»

Tin kɔ̄ntí unil tijɔkɔndee

(Kpèè Maat 15.10-20)

14Míǹ boonee, Yeesu gíti yíiń kunipaau u-cee, ní ki tùkū-bi yii: «Ni-kɔkɔ ń pīlifìmaan kí gbìl̄ m nín làá lì puee taapu! 15Tiba kaa nyēeń dipaal pu kí kɔ́ unilin kí kɔ́ǹ-u tijɔkɔndi Unimbɔti nimbiin. An sá tin nyēeń unilinee di kɔ̄ntí-u tijɔkɔndi Unimbɔti nimbiin. [ 16Un yaa cáá ditafalee ń gbìl̄ taapu#7.16 Uyakatikaa nee kaa bí tigbɔŋkpikil tikpil poon.!»]

17Ŋyunti ŋun u yíkì kunipaau cee ki kɔ́ kudiinee, ní u-boonnooliibi bālifì-u dilaŋkpandi din u bàà gāāyee taapu. 18Ní u kíí-bi yii: «Ni mun kaa cáá iciin níii? Naa gbìl̀ yii tin kɔkɔ nyēeń dipaal pu ki kóò unilinee kaa ŋūǹ kí kɔ́ǹ-u tijɔkɔndi Unimbɔti nimbiinaaa? 19Di sá yii tijikaal kaa kóò unil pɔbilin, an kóò u-poon ní, ní ú cù ataa pu.» Yeesu lī míǹ ki dàkā yii tijikaal kɔkɔ ŋān̄ ki tīī unil ń jī#7.19 Dūú ŋmàntī nì Atuun 10.9-16.. 20U gíti lī yii: «Tin nyēeń unilinee di sá tin kɔ̄ntí-u tijɔkɔndi Unimbɔti nimbiinee. 21Di sá yii binib pɔbiliŋin ní ilandɔkɔkpiti kɔkɔ nyēeń: binaacimpɔmbi nì bisapɔmbi jɔkɔnti, bunaayubu, nnikpaakoon, 22binimpoobi nì bininjab laakpaati, ikummunti, digaŋgam, diŋmatindi, bimaramɔntiibi fátam, nnimbidiki, tibɔfan, timɔn nì ŋyipɔn. 23Tibɔkpitil gbanti kɔkɔwoooo nyēeń binib pɔbiliŋin ní ki kɔ̄ntí-bi tijɔkɔndi.»

Ukaanaannimpu ubɔ fookiiu

(Kpèè Maat 15.21-28)

24Yeesu yíkì niinee, ki póotì Tiir nì Siidɔn jaaŋŋu pú. U bàn̄ ki kɔ́ kudii kubɔn, kaa bàà là yii báà ubɔ ń béé u-pu. Nì míǹ kɔkɔee, waa ŋúń ki bál̀. 25Unimpu ubɔ nìn bí, ki cáá kisapɔmbiki arasinii kā ki-pu. U nín gbìl̄ bi sòon̄ Yeesu puee, waa ti kāl̀. U yíkìń ní malaa, ki dɔ́miń ki tātìi gbāaǹ u-taaŋi taapu. 26Unimpu gbanti kaa nìn sá Ujuudanimpu, u sá Feenisii, Siirii tiŋkin ní. U mēē Yeesu ń jà arasiniiyee u-bisal pu. 27Ní Yeesu kíí-u yii: «Yàntī mbiyaamu ń díkí kí wàatī. Kun puee an kaa máaǹ bí dū mbiyaamu jinti kí tīī mbɔbiyaamu!» 28Ní unimpuee fātì ki kíí-u yii: «Tiŋman, an sá míǹ ní, m-Dindaan. Ama mbiyaamu yaa bíi jīǹ an gbátée, mbɔbiyaamu mun tòó igbasigbasi ní.» 29Niinee, ní Yeesu bí-u yii: «A kíí tiŋan! Míǹ puee, nín̄ kùǹ. Arasiniiyee nyáń a-bisalin.» 30Unimpuee fātìi gítìń u-dumpuee, arasiniiyee nyáń u-bisalin u pɔ́ɔkì ki dɔ̄ u-dooŋu pu.

Yeesu cáaǹ umɔɔmiin ubɔ

31Yeesu yíkì Tiir tiŋkin ki fātìi dīń Siidɔn, ki jítìń ntimu saalaa pu ki nín dòoń Galiilee mɔɔl watil pú. 32U bàn̄ niinee, bi cáań-u umɔɔmiin ubɔ ní ki mēē-u yii ú dū u-ŋalii kí páań u-pu. 33Ní Yeesu cáá-u ki kākatì ŋkpaanceeti u nì u liitil, ki dū u-ŋambiyaamu ki bɔ́ umɔɔmiinee tafaliŋin, ní ki tíil̀ timɔtan ki dūu gbēē umɔɔmiinee limbil, 34ki wáaǹ ki kpēē kutaa ki fáá diniindi, ní ki lī yii: «Eefata!» An taapu sá yii: «Cúú ŋátí!» 35Niin niin ní umɔɔmiinee tafaliŋ cúu ŋátì, ní u-limbil mun bútì, ní u kíǹ ki sòoǹ tiŋan. 36Ní Yeesu kpáafì-bi bí taa pée māafì báà ubɔ tin jítèe. Ama Yeesu yaa nìn mɔ́tì yii bí taa lèe, míǹ ní bíǹ làá nín mɔ̀tīí lì. 37Bi nìn bākatì tikpil, ní ki lì yii: «Tin kɔkɔ u ŋáańee ŋān̄ ki lákatì, áli ki yàntī bitafakpaafub gbìl̀, bimɔɔmiimbi sòoǹ!»

Currently Selected:

Marc 7: BASSARDC

Highlight

Copy