Marc 10

Unimpu nì u-cal ń taa yàkatī tɔbin

(Kpèè Maat 19.1-12, Luuki 16.18)

1Yeesu fātìi yíkì niin ki póotì Juudee watil ki dūtì Jɔɔdan buŋgbandi. Ní anikiti tí kóoǹní ki múkuǹ u-pu, ní u tí kíĺ ki bíi dàkà-bi Unimbɔti bɔti, kii u nín kpààa pée ŋáań puee. 2Niinee, Fariisab sútìń ki pìl̄-u ki nyàab̀ kí bàkan̄-u tibɔti. Bi bālifì-u yii: «An pú nsan yii uninja ń jà u-nimpuuaaa?» 3Ní u kíí-bi yii: «Mara ulɔu ní Mooyiisi nìn tīī-ni ní?» 4Ní bi fātìi kíí-u yii: «Mooyiisi bí yii uninja ń ŋmà kugbɔŋu kun dàkà kun pu ní u jìn̄ u-nimpuuee kí ŋúbiǹ-u ní kí nín jà-u#10.4 Kpèè Ditee 24.1..» 5Niinee ní Yeesu fātìi kíí-bi yii: «An sá ni-pɔɔgbifiŋŋu pu ní u síiǹ-ni an marau. 6Ama ŋyunti ŋun Unimbɔti kíĺ ki náań tiwan kɔkɔee, u nìn náań uninja nì unimpu ní#10.6 Diny 1.27, 5.2.. 7Míǹ puee ní an sá uninja ń yīkì u-baa nì u-na cee ní u nì u-nimpuu ń nīn bí, 8ní bi-liitil ń kpántí unibaanti#10.8 Diny 2.24.. Mimmee, baa ti sá binib bili, bi ŋá unibaanti dee. 9Míǹ puee, unil ń taa yàkatī tin Unimbɔti dūu kpáfèe.»

10Yeesu nì u-boonnooliibi bàn̄ kudiinee, bi fātìi bālifì-u an bɔti pu. 11Ní u kíí-bi yii: «Un kamaa yaa jìn̄ u-nimpuu ki fātìi cáá upɔɔnee, udaan ŋá tilaakpaal Unimbɔti nimbiin ki yīntì nì u-nimpupeepeekaau. 12Míǹ mun mbaantiim, unimpu yaa yíkì u-cal cee ki cūtìi mɔ́ǹ uninjapɔɔnee, u mun ŋá tilaakpaal Unimbɔti nimbiin ki yīntì nì u-calkpiki.»

Yeesu fōō mbiyaawaamu

(Kpèè Maat 19.13-15, Luuki 18.15-17)

13Bi nìn cāabìń mbiyaamu Yeesu cee ú dū u-ŋalii kí páań mu-pu kí mèè kí tīī-mu, ní u-boonnooliibi bíi wòoǹ bin cāabìń-muee. 14Yeesu ká mimmee, ní an kaa mɔ́ɔkiǹ-u, ní u bí-bi yii: «Yàntīmaan mbiyaamu ń dāan̄ m-cee kí taa pìim̄maan-mu nsan, kun puee Unimbɔti Beel sá ki tīī bin náań nì muee ní#10.14 Dūú ŋmàntī nì 9.37.. 15Ibaamɔn ní m sòoǹ nì ni, un kamaa yaa kaa fōō Unimbɔti Beel bɔti kibiyaawaai yamee, kaa dāa kóò di-ni.» 16Niinee ní u fōō mbiyaamuee ní ki dū u-ŋalii ki páaǹ mu-pu ní ki mēē Unimbɔti ú bìin̄ mu-boon.

Ugaaja ubɔ bɔti

(Kpèè Maat 19.16-30, Luuki 18.18-30)

17Yeesu yíkì ki tākaǹ nsan pu ki làá nīn cée, uninja ubɔ sáǹní ki dɔ́miń ki gbāaǹ u-nimbiin, ki bālifì-u yii: «Ukpimɔnti! M làá ŋá mana ní kí ká dimaŋfal din kaa cáá dikúntilee?» 18Ní Yeesu fātìi kíí-u yii: «Ba pu ní a yíì-mi yii umɔnti? Unil báà ubɔ kaa bí ki sá umɔnti, see Unimbɔti baba. 19Sii a-ba nyí Unimbɔti marab, an lī yii: <Á taa kpɔ̀ unil, á taa ŋá tilaakpaal, á taa yɔ̀, á taa lēē nnyimɔn seerau, á taa ŋmàtiǹ ubɔ, á nīn tɔ́ a-baa nì a-na#10.19 Kpèè Disa 20.12-16, Ditee 5.16-20..>» 20Ní uninjee fātìi kíí-u yii: «Ukpil, doooo m-naacimpɔntin ní m pée ŋúb́ an marab.» 21Niinee, Yeesu kpēē-u dímmm, ní uninjee bɔti fáatì-u, ní u lī-u yii: «Kuwambaantiiu di kíǹ-si á ŋá. Nín̄ cá kí nyāfì tin kɔkɔ a cááyee, kí dū animbil kí yàkatī bifalaadambi, ní kí tin ká tigaajati Unimbɔti cee. A yaa ŋá míǹ ki dóòyee, á dāan̄ kí nīn nóó-mi.» 22Kijapaayee gbìl̄ an nyɔɔbuŋŋee, u-nimbiin cúu bíil̀, ní u búntì nì kunimbaau, kun puee u nìn cáá tigaajawan tikpil.

23Niinee, Yeesu fātìi kpēē ki māntìi tú bin yú ki gɔ́ń-uee, ní ki bí u-boonnooliibi yii: «An dāa pɔ̄ɔ̄ ki tīī bigaajab bí kɔ́ Unimbɔti Beelineeee!» 24U-boonnooliibi bākatì nì an nyɔɔbuŋŋi gbanti. Ní Yeesu fātìi lī-bi yii: «M-biyaamu, an pɔ̄ɔ̄ ki tīī [bin kɔ dū bi-mákal ki ŋá tigaajatinee] ń kɔ́ Unimbɔti Beelineeee! 25An pɔ̀fì ki tīī ugutaamu ń jītí ujoo buŋŋun nì ugaaja ń kɔ́ Unimbɔti Beelin.» 26Niinee, u-boonnooliibi gíti bākatì tikpil, ki lì tɔb cee yii: «Kin, ŋma di nín ŋūǹ kí ŋmátí dee?» 27Ní Yeesu kpēē-bi ní ki bí yii: «Binib kaa ŋūǹ kí fīī bi-ba, asee Unimbɔti baba di ŋūǹ kí fīī-bi. Di sá yii Unimbɔti di ŋūǹ tikɔkɔ.» 28Ní Peetroo bí-u yii: «Kin, timbi nín yíkì ki fá tin kɔkɔ ti cááyee ki táá-see?» 29Ní Yeesu fātìi kíí-u yii: «M sòoǹ nì ni ibaamɔn ní, un kamaa yaa yíkì ki cāntì u-diiku nì u-nabiyaamu nì u-na nì u-baa nì u-biyaamu nì u-kpaatanti man pu ní ki sòoǹ m-bɔmɔntiiti ki tìì binibee, 30udaan làá fōō tipaal ŋyunti ŋun ti bí nee míǹ dilaataal pu. U làá fōō adiin nì nnabiyaamu nì nab, nì mbiyaamu nì tikpaatan, ní kí jī falaa mun. Ama ŋyunti ŋun bí ki dòońee poonee, udaan dāa fòol̄ dimaŋfal din kaa cáá dikúntilee. 31Bisanlintiliibi tikpil dāa kpántí biboompaanliibi, ní biboompaanliibi mun tikpil ń kpántí bisanlintiliibi.»

Yeesu sòon̄ ntataatiim u-kúm nì u-fìkititam bɔti

(Kpèè Maat 20.17-19, Luuki 18.31-34)

32Yeesu nì u-boonnooliibi nìn tàkā nsan ki jɔ́ḿ Jeerusaleem, ní u līī bi-nyɔkɔpu. U-boonnooliibi pɔbiliŋ nìn bíil̀ ní tifaandi kɔ́ bin kɔkɔ nìn nóó-uee. Ní Yeesu gíti tí yíiń u-kpambaliŋ saalaa nì alee ki síiǹ u-cee, ní ki kíĺ ki bíi tùkù-bi tin di làá bàń u-puee, yii: 33«Ti jɔ́ḿ Jeerusaleem ní nee, ti yaa bàn̄ niinee, bi làá cúú man Kinibiki kí tīī bisaraaŋakpilib nì bimaradakaliibi ní bíǹ ń cáá-mi ibɔsoon kí lì yii m máaǹ bí kpɔ̀-mi, ní bí dū-mi kí ŋúbiǹ bin kaa nyí Unimbɔtee. 34Bíǹ làá bèel̀-mi kí tíiĺ timɔtan kí sìtī m-pu, kí gbá-mi anaalab. Míǹ boonee ní bí kpɔ̀-mi. Bi yaa kūū-mee, ní ḿ fìkitī winta dal.»

Yakubu nì Yoowaneesi nín mēē Yeesu tiŋyee

(Kpèè Maat 20.20-28)

35Ŋyunti gbanti ní Seebeedee jipɔmbi Yakubu nì Yoowaneesi sútìń ki pìl̄ Yeesu ní ki bí-u yii: «Ukpil, ti là kí mèè-si tiba, á ŋá kí tīī-ti!» 36Ní u fātìi kíí-bi yii: «Ni là ḿ ŋá ba ní kí tīī-ni?» 37Ní bi kíí-u yii: «Ti là yii, ŋyunti ŋun a yaa láa kpántì ubɔtee, ti-kansikin ubɔ ń dāá nīn kā a-ŋaŋgiil pú, un kíǹee a-ŋaŋgan pú.» 38Ní Yeesu kíí-bi yii: «Naa nyí tin ni mèéyee. Ni ŋūǹ kí nyɔ̀ falaa un m làá nyɔ̀ naaa? Ni ŋūǹ kí fàl̀ falaa kii un man làá fàl̀ naaa?» 39Ní bi kíí-u yii: «Iiin, ti ŋūǹ.» Ní Yeesu bí-bi yii: «Ibaamɔn, ni làá nyɔ̀ falaa un m làá nyɔ̀ee, ní kí fàl̀-u kii m nín làá fàl̀-u pu nee#10.39 Dūú ŋmàntī nì Atuun 12.2.. 40Ama an yaa kíǹ m-ŋaŋgiil nì m-ŋaŋgan kakaaŋuee, an kaa sá man di pūǹ an paaŋyi. Ipaan gbanti sá ki tīī bin pu Unimbɔti bɔ́ntì-i ki síiǹee ní.»

41 Akpambal saalaa ŋin kíǹee gbìl̄ mimmee, ní ki fōō diŋuul Yakubu nì Yoowaneesi pu. 42Ní Yeesu yíiń bi-kɔkɔ u-cee, ní ki bí-bi yii: «Ni nyí yii duulinya yidambi bin kpèé ntimuee tɔ́kɔ́ bin kíǹee pu, ní ki cáá bi-pɔŋyi ki fàantí-bi. 43An kaa máaǹ kí nīn bí míǹ nimbi kansikin, ama un yaa là kí nīn sá ukpaan ni-kansikinee, udaan ń gíiǹ u-ba ni-tɔntɔnliu. 44Míǹ mun ní un kamaa yaa là kí nīn sá ukpaan ni-kansikinee, udaan ń gíiǹ u-ba ni-kɔkɔ yumbuu. 45Kun puee man Kinibiki kaa dɔ́miń bí ŋá tiba kí tīī-mi, m dɔ́miń kí tɔ̄ atuun kí tīī binib, ní kí dū m-maŋfal kí pà kí fōō binib tikpil kí líí#10.45 Dūú ŋmàntī nì 14.24, 1 Tiim 2.6..»

Yeesu cáaǹ ujɔfu Baatiimee

(Kpèè Maat 20.29-34, Luuki 18.35-43)

46Yeesu nì u-boonnooliibi nì kunipaau nìn bàn̄ Jeeriikoo. Bi yíkì Jeeriikoo kí nīn càatēe, ujɔfu ubɔ kā disaŋkaŋkpil ki mèé bisanjitiliibi animbil. Bi nìn yíì ujɔfu gbanti Baatiimee ní ki yíì u-baa Tiimee. 47Ŋyunti ŋun u béè yii an sá Yeesu Naasaareeti yɔu di jītée, ní u kíĺ ki bíi tátí mpɔn yii: «Yeesu Daafiidi naantiiu, sɔ̄ m-saai!» 48Binib tikpil nìn bí ki wòoǹ-u yii ú ŋmīĺ, ní u mɔ̀tīi tátí mpɔn yii: «Daafiidi naantiiu, sɔ̄ m-saai!» 49Yeesu sāā ki síl̀, ní ki bí yii: «Yíiḿmaan-u!» Ní bi yíiń ujɔfuee ní ki bí-u yii: «Pɔ́ɔǹ a-ba kí yīkì, u yíì-si!» 50Niinee ní ujɔfuee lēē u-satau ki lúkú, ki nyīī ki yíkì kùrub ki síl̀ ní ki nín cá Yeesu cee. 51Ní Yeesu bālifì-u yii: «Ba ní a là ḿ ŋá kí tīī-si ní?» Ní ujɔfuee fātìi kíí-u yii: «Ukpil, m là kí wāl̀ ní!» 52Ní Yeesu bí-u yii: «Nín̄ cá, a-fookiiu di fīī-si!» Kpalaa niinee, u-nimbiliŋ cúu ŋúbitì, ní u kíǹ ki táá Yeesu.

Currently Selected:

Marc 10: BASSARDC

Highlight

Copy