Marc 11

Yeesu kɔ́ Jeerusaleem nì ifaal

(Kpèè Maat 21.1-11, Luuki 19.28-40, Yoow 12.12-19)

1Ŋyunti ŋun bi cōom̀ ki tóob́ Jeerusaleem ki pìlīǹ Beetifagee nì Beetanii, Ɔliifi sufii jool caŋinee, ní Yeesu tú u-boonnooliibi kansikin bili, 2ki tùkū-bi yii: «Cùmaan kitimbilii kin bíń ni-nyɔkɔpu nee. Ni làá ká dimampɔmbil din pu báà ubɔ kaa láá kāl̀ee. Ní gbìntīḿmaan-dì kí cáań-mi. 3Ubɔ yaa bālifì-ni yii, Ba ní ni ŋáańee? Ní kíí-u yii, ti-Dindaan di nyàab̀ kimaŋ, u yaa dóòyee, u làá gíiǹní-kì doo an kaa làá yúntí.»

4Bi búntì ki bàn̄ ki ká dimampɔmbilee gbìn̄ ki nákáǹ kipunyɔkɔ, mmɔŋki didandi caŋin, ní bi bíi gbìntī-dì. 5Bin nìn sí niinee biba bí-bi yii: «Ba di cáá-ni ní ni gbìntī kimaŋ?» 6Ní bi kíí-bi kii Yeesu nín bàà tùkū-bi puee, ní binibee yāntì bi gbīntì-kì. 7Bi cáań dimampɔmbilee Yeesu cee ní ki pēetì bi-wampeeŋkaati ki páaǹ di-pu, ní Yeesu jɔ́m̀ ki kāl̀#11.7 Dūú ŋmàntī nì Saka 9.9.. 8Binib tikpil nìn kpátí bi-wanti ki bīil̀ nsan poon. Ní biba mun gàń tifaal akpaanni ki bīil̀#11.8 Dūú ŋmàntī nì 2 Bib 9.13.. 9Bin nìn līī u-nyɔkɔpuee nì bin nìn pá u-boonee nìn kūuntí yii: «Oosaana! Unimbɔti ń bìin̄ un dòoń úǹ ti-Dindaan yindi puee! 10Unimbɔti ń bìin̄ ti-naanja Daafiidi beel din dòońee pu! Oosaana! Dàntìmaan un bí yilpu yilpuee#11.10 Dūú ŋmàntī nì Ilan 118.25-26. !» 11Yeesu bàn̄ Jeerusaleemee, ki kɔ́ kunimbɔtidiin. U kɔ́ee ní ki kpēē ki māntì ki tú. Ama kunyeeu nín nìn bíi móotée puee, ní u fātìi nyáń u nì u-kpambaliŋ saalaa nì alee nín cá Beetanii

Yeesu tɔ́ busubu bubɔ mbusu

(Kpèè Maat 21.18-19)

12Kutaa wúntèe, Yeesu nì u-boonnooliibi nyáń Beetanii tiŋkin ki cée, ŋkùm cúú-u. 13U kpēē ndanee, ki wál̀ busubu bun bi yíì fiigee sí ki cáá tifaal. Ní u cūtì bu-taapu kí kpèè u yaa bàà kāntí bu-biliŋ kí kìtī kí ŋmɔ́. U bàn̄ee, tifaal ŋmaniŋma di túkú. Kun puee an kaa nìn ŋmāntì ŋyunti ŋun busubuee lòoǹee. 14Niinee ní u lī busubuee yii: «Dalba dalba ubɔ ń taa láa gíti ŋmɔ́ sii biliŋ!» U nín sòon̄ mimmee, u-boonnooliibi gbìl̄.

Yeesu jìn̄ biwannyafiliibi kunimbɔtidiin

(Kpèè Maat 21.12-17, Luuki 19.45-48, Yoow 2.13-22)

15Bi búntèe, ki bàn̄ Jeerusaleem ki kɔ́ kunimbɔtidiin ní Yeesu kíĺ ki bíi jì biwannyafiliibi nì bidaliibi bin nìn bí niinee, ki lábití binimbikpantiliibi teebilib nì binanjinyafiliibi jaliŋ ki cìb̀. 16Waa pú mpaan ubɔ ń yòon̄ u-wanti kí còom̀ kí pùntī kunimbɔtidiin. 17Ní u kíĺ ki bíi sòoǹ nì bi yii: «An kaa ŋmàn̄ ki síiǹ yii: M-diiku làá nīn sá ŋwimmeem diiku ní ki tīī atimbun kɔkɔɔɔ? Ama ní nimbi dū-ku ki kpántì kunaayudii#11.17 Dūú ŋmàntī nì Yees 56.7, Yeer 7.11..» 18Bisaraaŋakpilib nì bimaradakaliibi gbìl̄ mimmee, ní ki bíi nyàab̀ nsan ŋun bi làá dī kí kpɔ̀-uee. Di sá yii bi nìn fàŋkí-u, kun puee tin u sòoǹee nìn kɔ́ samaa tikpil. 19Ku jóotèe ní Yeesu nì u-boonnooliibi nyáń kitiŋin.

Fiigi subu bun kpíìyee bɔti

(Kpèè Maat 21.20-22)

20Bi fàtīi gítiń kutaafaauee, ní ki ká fiigi subuee kūń ki kpáaǹ bu-nyaaŋyi. 21Niinee, Peetroo téetì, ní ki bí Yeesu yii: «Ukpil, kpèè fiigi subu bun a fu tɔ́ mbusuee kūń!» 22Ní Yeesu fātìi kíí-bi yii: «Fōōmaan Unimbɔti kí kíí! 23Ibaamɔn ní m sòoǹ nì ni, ubɔ yaa lī dijool nee yii: Á yīkì laakin a yú nee kí cùú jēetí tiŋkun, ní ki yaa kaa dàkafī ki gùgufī u-pɔbilin, ama ní ki yaa máká yii u nín lī puee làá ŋá mimmee, asee án lafun ŋá míǹ kí tīī udaan. 24Míǹ pu ní m tùkù-ni yii, tin kɔkɔ ní ni yaa mēē Unimbɔtee, ní nīn máká yii ni fōō, ni làá lafun fōō kudɔŋu. 25Ni yaa bíi mèé Unimbɔti ní ni nì ni-jutiibi kansikin kaa mɔ̄ee, dūú pɔ̄maan-bi, ní ni-Baa un bí yilpuee ń ŋmā kí dū ni mun yìntitam kí pɔ̄-ni.» [ 26Ama ni yaa kaa pūǹ ni-jutiibi bi-kpitiiyee, ni-Baa un bí yilpuee kaa làá dū ni mun kpitii kí pɔ̄-ni#11.26 Uyakatikaa nee kaa bí tigbɔŋkpikil tikpil poon. Kpèè Maat 6.15..]

Yeesu pɔŋŋu nín nyánní laakiŋyee

(Kpèè Maat 21.23-27, Luuki 20.1-8)

27Bi nìn tí fātìi gítì Jeerusaleem. Ŋyunti ŋun Yeesu kɔ́ ki bíi còom̄ kunimbɔtidiinee, bisaraaŋakpilib nì bimaradakaliibi nì bitindaŋkpilib dɔ́miń u-cee 28ní ki bí-u yii: «Nì nsan ŋulɔŋu pu ní a fu jìn̄ binib kunimbɔtidiin ní? Ŋma di pú-si an saŋŋu ní?» 29Ní Yeesu fātìi kíí-bi yii: «Dinyɔɔbumbaantiil ní m làá bàlifì-ni, ní kíí-mi kí wàatī ní ḿ nín tùkù-ni nì nsan ŋun pu ní m ŋáań mimmee. 30Yoowaneesi nín fùul̀ binib Unimbɔti nyimee, ŋma di tīī-u an pɔŋŋu ní? Unimbɔtaaa, binib? Kíímaan-mi!» 31Ní bi kíĺ ki bíi lɔ́kɔfí bi-ŋmaniŋma yii: «Ti yaa kíí-u yii: <Unimbɔti di tīī-u>, u làá bàlifì-ti yii: <Kin ba ŋá ní naa fōō u-bɔti ki kíí?> 32Mimmee, tí lì yii: <Binib di tīī-uaaa?...>» (Ama baa là kí lì míǹ, kun puee bi fàŋkí kunipaau. Di sá yii báà ŋma nìn nyí Yoowaneesi pu yii ibaamɔn u sá Unimbɔti bɔnaatiliu.) 33Niinee, ní bi kíí Yeesu yii: «Taa nyí.» Ní Yeesu mun fātìi kíí-bi yii: «Ma mun kaa làá tùkù-ni nì nsan ŋun pu ní m ŋáań mimmee!»

Currently Selected:

Marc 11: BASSARDC

Highlight

Copy