Marc 12

Bipaadaŋkpitib bɔŋmantikaati

(Kpèè Maat 21.33-46, Luuki 20.9-19)

1Niinee, Yeesu kíĺ ki cáá tibɔŋmantikaal ki sòoǹ, ní ki lī yii: «Uninja ubɔ di kùn̄ fiinyi sufii kpaabu. U cóoǹ kunaabakau ki māntì ki tú-bu, ní ki gbìn̄ mbòó#12.1 ki gāā isupaa: Dūú ŋmàntī nì Yees 5.1-2. - ki gbìn̄ mbòó: Kí wàatī bí cùkutī asubilee, bi nìn pōontí mbòó ŋun bi gbìn̄ee ní an jɔ̀m̀ ki ŋān̄. ŋun ni u làá nīn cùkutī abil ki lèekī ndamamee, ní ki gāā isupaa, ki dū bukpaayee ki kpāaǹ bipaadambi, ní ki búntì nsan. 2Isufee biliŋ kìtitam bāańee, ní u túnní u-tɔntɔnliu ubɔ bipaadambee cee ú dāá fōō u-jandi. 3Ní bi cúú utɔntɔnlee ki gbáń ní ki jìn̄-u ki gíiǹ nì iŋaŋkulim. 4Ní bukpaadaanee gíti tí nyàab̄ u-tɔntɔnliu upɔɔn ubɔ ki tú bi-cee. Ní bi gíti cúú u mun ki gbáń ki cíl̀ diyil ki sāaǹ-u. 5Ní bukpaadaan gíti tí lēē unitataati ki túnní ní bi kūū úǹ. Míǹ mbaantiim ní bi nìn ŋáaǹ bitɔntɔnliibi kupaau, bi nìn gbáń biba ní ki kūū biba. 6Báà ubɔ kaa ti bí ú tɔ̄, see u-jipɔmbaabil un u néeńee. Ní u dū-u ki túnní bi-cee njoolkaam, ki dākafì yii: <Bi làá fàŋkì m-jipɔɔn.> 7Ama bipaadambee nín wál̀ u dòońee, ní bi lī tɔb cee yii: <Kpèè, un làá dāá jī u-baa gaajawantee di dòońee! Tí kpɔ̀maan-u kí jī bukpaa.> 8U bāańee ní bi cìb̄ ki cúú-u ki kūū, ní ki dū-u ki lúkú ŋkpaabuku.»

9Yeesu lī míǹ ki dóòyee, ní ki bālifì-bi yii: «Kɔŋkɔnnee, bukpaadaanee làá ŋá mana? Asee ú dāan̄ kí kpɔ̀ bipaadambee, ní kí dū bukpaayee kí ŋúbíǹ bipɔmbi. 10Ni pée máaǹ ki kàan̄ Unimbɔti gbɔŋkun dinyɔɔbundi din lì yii:

<Ditaŋkpal din bidimaliibi nìn dūu fée,

díǹ di dāa kpántì ditaŋkpal din yì kudii pɔŋŋuee.

11Ti-Dindaan nín ŋá tiŋyee

kaa gbí mmaam ti-ceeee#12.11 Ilan 118.22-23.?>»

12Ŋyuntee, Yeesu nannanliibi bíi nyàab̀ kí cúú-u, ní ki gíti fàŋkí kunipaau. Di sá yii u-nannanliibee nìn béè yii bíǹ pu ní u nìn sòon̄ tibɔŋmantikaal gbanti. Ní bi yāntì-u ki búntì.

Bi bālifì Yeesu yii bí pà lampoooo?

(Kpèè Maat 22.15-22, Luuki 20.20-26)

13Bi túnní Yeesu cee Fariisab nì Eeroodi naacimbi kansikin biba bí dāan̄ kí píĺ-u tibɔti. 14Bi bāańee, ní ki bí-u yii: «Ukpil, ti nyí yii a sòoǹ ibaamɔn, kaa fàŋkí báà ubɔ, kaa fàtīi tɔ̄ báà udaan yaa bí puee, ki dàkà nnimbɔtisan nì ibaamɔn. Mimmee, ti-marau pú nsan yii tí pà lampoo kí tīī Room gɔminau Seesaaraaa, an kaa pú?» 15Yeesu béè bi-poonnyooŋŋu puee, ní ki bālifì-bi yii: «Ba pu ní ni píĺ-mi tibɔti míǹ kí kpèè m-nyɔkɔn? Cáaḿmaan-mi animbil ḿ kpèè!» 16Bi cáańee, ní u bālifì-bi yii: «Ŋma yindi nì u-yil di náká animbil pu na?» Ní bi kíí-u yii: «An sá Seesaar.» 17Niinee ní Yeesu fātìi kíí-bi yii: «Dūmaan tin Seesaar yèe kí tīī Seesaar kí dū tin Unimbɔti yèe kí tīī Unimbɔti!» Ní bi bākatì nì an nyɔɔbundi gbanti.

Bi bālifì Yeesu difìkitil bɔti

(Kpèè Maat 22.23-33, Luuki 20.27-40)

18Ŋyuntee ní Sadusab dɔ́miń Yeesu cee. - Bíǹ di sá dikitil din lì yii difìkitil kpée#12.18 Dūú ŋmàntī nì Atuun 23.8.. - Ní bi bí Yeesu yii: 19«Ukpil, Mooyiisi ŋmàn̄ ki síiǹ-ti yii, unil yaa cáá kinabiki ní kinabikee yaa kpíì ki yāntì unimpu kaa cáá kibikee, ú fōō ukpiipu kí màal̀ kí téeǹ u-nabikee yil#12.19 Kpèè Ditee 25.5-6.. 20Kun pu ti bàlifēe di sá nnabiyaamu mululi di nìn bí. Upeepeekaa cáá unimpu ní ki kpíì ki yāntì unimpuee, kaa màl̄. 21Uliliiti mun fōō ukpiipuee ní ki mun kpíì, kaa màl̄. Utataati mun míǹ, 22ki tin sāā bilulee kɔkɔ cáá-u ki kpíì, kaa ká kibiki. Bíǹ kɔkɔ kúm boonee, unimpuee mun dāa dūu kpíì. 23Míǹ puee, difìkitil dalee, bi-kɔkɔ yaa láa fīkitèe, bi-kansikin ŋma di dāa yì unimpuee? Kun puee bilulee kɔkɔ cáá-u ki ká.» 24Ní Yeesu kíí-bi yii: «Kun pu ni bí diyìntil poonee di sá naa nyí Unimbɔti gbɔŋku poon bɔti, kaa nyí Unimbɔti pɔŋŋu mun. 25Difìkitil yuntiŋuee, dinimpucaal nì dicamɔndi dāa kpá. Báà ŋma dāa bí kii Unimbɔti tuuŋyi nín bí pu yilpuee ní. 26An yaa kíǹ bitaŋkpiibi fìkititamee, naa kàan̄ Mooyiisi nín ŋmàn̄ pu u-gbɔŋkuneeee? Laakin sòoǹ tin jítì kikuŋkumbiki caŋinee, Unimbɔti nìn lī-u yii: <Man di sá Abraam Nimbɔtiu, Isaaki Nimbɔtiu nì Jaakɔb Nimbɔtiu#12.26 Kpèè Disa 3.2,6..> 27Waa sá bitaŋkpiibi Nimbɔtiu, u sá bin wāĺee yɔu ní. Ni baasii bí diyintikpaandin ní!»

Mara un sá ukpaanee

(Kpèè Maat 22.34-40, Luuki 10.25-28)

28 Bimaradakaliibee ubɔ nìn bí ki gbìl̄ tibɔti tin pu Yeesu nì Sadusab nìn kpákèe. U nín ká yii Yeesu kíí-bi mmɔntiimee ní u sútìń ki pìl̄-u ki bālifì-u yii: «Marab kɔkɔ kansikinee, ulɔu di sá ukpaan ní?» 29Ní Yeesu kíí-u yii: «Mara un sá ukpaanee di sá un lì yii: <Isirayeel yab pīlifìmaan. Ti-Dindaan Unimbɔti sá ubaanti ní. 30Ni máaǹ kí nīn néeń ni-Dindaan ni-Nimbɔtiu nì ni-pɔbiliŋ kɔkɔ nì ni-naŋki kɔkɔ nì ni-landɔkɔŋu kɔkɔ nì ni-pɔŋŋu mun kɔkɔ#12.30 Ditee 6.4-5..> 31Maraliliiti di sá yii: <Á nīn néeń a-juti kii sii a-bee#12.31 Akoo 19.18..> Mara ubɔ kaa ti bí ki jítiǹ bin bí nee.» 32Ní umaradakalee lī-u yii: «An kā, ukpil. A lī nì ibaamɔn ní yii Unimbɔti sá ubaanti, ubɔ kaa ti bí asee úǹ baba#12.32 Dūú ŋmàntī nì Ditee 4.35.. 33Unil máaǹ kí nīn néeń Unimbɔti nì u-pɔbil kɔkɔ nì u-ciiŋyi kɔkɔ nì u-pɔŋŋu kɔkɔ, ní ki máaǹ kí nīn néeń u-juti kii úǹ u-bee. Míǹ jítiǹ tiwaŋkuti saraabi bin bi dù kí wà ŋŋmi kí tīī Unimbɔtee nì saraabi bin kɔ kíǹee#12.33 Dūú ŋmàntī nì Oosee 6.6..» 34Yeesu ká yii u kíí-u nì iciinee, ní u lī-u yii: «Aa dátiǹ Unimbɔti Beel.» Niinee báà ubɔ kaa ti mākaǹ kí bàlifì-u tiba.

Meesiya nì Daafiidi bɔti

(Kpèè Maat 22.41-46, Luuki 20.41-44)

35Yeesu nìn bíi dàkà binib Unimbɔti bɔti kunimbɔtidiinee, u bālifì-bi tibɔti yii: «Nì nsan ŋulɔŋu poon ní bimaradakaliibi lì yii Meesiya sá Daafiidi naantiiu ní? 36Di sá Unimbɔti Fam yāntì Daafiidi u-ba sòon̄ yii:

<Ti-Dindaan tùkū m-Dindaan yii:

Kàl̄ m-ŋaŋgiil pú kí nīn cí ŋyunti ŋun

m làá yàntī á nīn kíǹ ki tɔ́kɔ́ a-nannanliibi puee#12.36 Ilan 110.1..>

37Daafiidi u-ba yíì-u yii u-Dindaan, kin mana ní u ŋūǹ kí nīn sá u-naantiiu mun?» Kunipaau nìn pílifíǹ Yeesu ní an mɔ̄ǹ-bi.

Yeesu kūū bimaradakaliibi bɔti

(Kpèè Maat 23.1-36, Luuki 20.45-47)

38Yeesu dàkatam poonee, ní u gíti lī yii: «Nín̄ nyím̀maan ni-ba nì bimaradakaliibi! Bíǹ di néeń ki pèentí abɔkutifɔkɔ ki yìiǹ bi jáaḿ-bi ipaan in pu binib kpáfée, 39ki kàal̀ nyɔkɔpu jaliŋ akpafidiinni nì diinabin. 40Bíǹ di fìkì bikpiipoobi wanti ki gbēentí ki mèé ŋwimmeem ki yúntí fɔ́rrr bí ká-bi. Bíǹ gbanti di dāa kóò ditafadaaldi din gíti lákatèe ni!»

Unimpukpiipu ubɔ saraau

(Kpèè Luuki 21.1-4)

41Yeesu cūtìi kāl̀ ki bíitiǹ laakin bi tòó saraa nimbiliŋee, ki kpèé kunipaau nín tòó animbil puee. Bigaajab tikpil nìn tòó animbikpaan, 42ní ukpiipusoodaan ubɔ mun cáań igboo ili ki tɔ́. 43Niinee ní Yeesu yíiń u-boonnooliibi ki bí-bi yii: «Ibaamɔn ní m tùkù-ni, ukpiipusoodaanee tɔ́ ki jítiǹ bin kɔkɔ tɔ́ saraa dooyee. 44Bin béeyee cáań bi-nimbiliŋ ŋin baa làá dūu ŋá nì tibee ní ki tɔ́, ama unimpu nee, nì u-sool poonee, tin kɔkɔ u bàà cáá kí jēe ní u kúntì ki tɔ́.»

Currently Selected:

Marc 12: BASSARDC

Highlight

Copy