Marc 13

Yeesu sòon̄ kunimbɔtidii wīitam bɔti

(Kpèè Maat 24.1-2, Luuki 21.5-6)

1Ŋyunti ŋun Yeesu nyēeń kunimbɔtidiinee, ní u-boonnooliibi kansikin ubɔ bí-u yii: «Ukpil, kpèè bi nín dū ataŋkpakpaan ŋin ki máń adikpaan an ŋān̄ miŋyee!» 2Ní Yeesu kíí-u yii: «Kéè a ká adikpaan neeyaa! Dalbee, ditaŋkpal diba kaa dāa gíti tɔ́kɔ́ di-juti pu. An kɔkɔ làá dāá wīī ní.»

Falaa un làá bàń kitiŋ kúntitamee

(Kpèè Maat 24.3-28, Luuki 21.7-24)

3Yeesu bàn̄ ki kāl̀ Ɔliifi sufii jool pu, u-nimbiin túliń kunimbɔtidiiyee watil, ní Peetroo nì Yakubu nì Yoowaneesi nì Andree bālifì-u tibɔti nee bi-ŋmaniŋma yii: 4«Tùkù-ti ŋyunti ŋun ní tin kɔkɔ a bàà lēe làá dāá bàńee, nì kudaaŋŋu kun ti làá dū kí béé yii ŋyunti bāańee.»

5Niinee, Yeesu kíĺ ki bíi sòoǹ nì bi yii: «Ní nīn nyíǹ ni-ba ubɔ ń taa ŋmàtiǹ-ni, 6kun puee binib tikpil làá dāá dū man yindi kí kpántí bi-yaŋ ní kí lì yii bíǹ di sá Meesiya ní kí ŋmàtiǹ binib tikpil. 7Ni làá dāá gbìl̄ bi sòoǹ tijáti tin pìlīǹ-nee nì tin dátiǹ-nee bɔti. Ama ni-pɔbiliŋ ń taa bīil̀. An máaǹ tíǹ kɔkɔ ń bàń kí wàatī, ama duulinya kúntitam kaa dá láá yá. 8Ditimbundi diba dāa yíkí kí jáǹ diba, ní dibeel diba mun ń jáǹ diba. Kitiŋ làá dāá cìŋkì ajan kupaau pu, ŋkùm làá dāá nyā. Tíǹ kɔkɔee dāa sá kii imatiŋween nín kífí puee ní. 9«Ní nīn nyíǹ ni-ba! Man puee bi làá dāá cùnnì-ni ibɔsoon, kí gbá-ni anaalab akpafidiinni, kí cáá-ni gɔminab nì bibɔtiibi nimbiin, mimmee ni làá ká mpaan kí sòoǹ nì bi man pu. 10Ama an máaǹ yii inibool kɔkɔ ń gbìl̄ m-bɔmɔntiiti kí wàatī ní duulinya ń nín kúntí. 11Ŋyunti ŋun bi yaa láa cúú-ni ki cáǹ ibɔsoonee, ní taa nín̄ yáliŋkí tin ni làá tin sòoǹee pu. Ni yaa láa bàn̄ee, ní sòoǹ tin Unimbɔti yaa tīī-ni niinee. Di sá yii, an kaa sá nimbi di làá sòoǹ, an sá Unimbɔti Fam di làá tīī-ni tin ni làá sòoǹee. 12Unil làá dāá cúú u-nabiki ní kí tīī bí kpɔ̀, ní ubaati ń dū u-biki kí tīī bí kpɔ̀, ní kibiki ń jáǹ ki-baa nì ki-na ní kí yàntī bí kpɔ̀-bi#13.12 Dūú ŋmàntī nì Miika 7.6.. 13Báà ŋma dāa ná-ni kun puee ni nóó-mi. Ama un yaa pɔ́ɔǹ u-ba ki tin kátì-kuee di làá dāá ŋmátí.»

Nnaabukpaan ŋun dòońee bɔti

14«Ni làá ká <kuwaŋkpitiu kun cāabìń ntimbiilee> kɔ́ ki kíǹ ki bí laakin kuaa bàà máaǹ kí kɔ́ee#13.14 Kpèè Dani 9.27, 11.31, 12.11.. - Un kàaǹ tibɔti nee máaǹ kí ŋá ŋká! - Ŋyunti gbantee, bin yaa láa bí Juudee tiŋkinee ń sāǹ kí dàb̄ ajoon. 15Un yaa láa bí dicindee ń taa lì yii u làá kpákatí kí kɔ́ kudiin kí yòon̄ tiba#13.15 bí dicindee: kpèè Maat 24.17., 16ní un yaa láa bí kusaauee ń taa lì yii u là kí fàtī mmɔŋki kí yòon̄ u-bɔkutil. 17Ama falaa dɔ̄ ki cí bipɔdambi nì bimatib yaadal wiiŋyi! 18Mèèmaan Unimbɔti an bɔti ń taa bàń kuseeun. 19Doooo, Unimbɔti nín náań kitiŋ ki dāa sāā díǹ nee, an falaau juti kaa láá jéetì nnibiyaamu pu, míǹ ní falaa gbanti juti mun kaa ti bí kí dāan̄#13.19 Dūú ŋmàntī nì Dani 12.1.. 20Ti-Dindaan yaa kaa bàà bātì falaayee wiiŋyi pu, báà unibaanti kaa bàà ŋmátí. Ama bin u lútì bí nīn sá u-yabee pu ní u bātì an wiiŋyi. 21«Ŋyunti gbantee, ubɔ yaa tùkū-ni yii, Meesiya bí doo, àá u bíń lapu, ní taa fōō kí kíí. 22Di sá yii bin làá mɔ̄ntì yii bíǹ di sá meesiyabee nì Unimbɔti bɔnaatiliibee làá dāá nyā ki ŋáań tikpaŋkpantiil nì maamaaci tuuŋŋi, kí bàà dūú ŋmàtiǹ bin Unimbɔti lútèe gba. 23Míǹ puee, ní nīn nyíǹ ni-ba. M tùkū-ni tikɔkɔ ní nīn nyí ki yóoǹ ní án nín bàń.»

Kinibiki gítintam

(Kpèè Maat 24.29-31, Luuki 21.25-28)

24«Falaayee yaa jítì boonee, ŋwìiń dāa kpántí dibɔmbɔndi, uŋmal mun kaa dāa gíti pīiǹ. 25Iŋmalbijaa dāa kìtīń kutaa pu ki lítiń, ní ipɔn in bí kutaa puee ń cìŋkì#13.25 B. 24-25: dūú ŋmàntī nì Yees 13.10, 34.4, Eesee 32.7, Joow 2.10, 3.4.. 26Ŋyunti gbantee ní bi làá ká man Kinibiki dòoń atagbanni ki cáá mpɔn tikpil nì tinyool#13.26 Dani 7.13.. 27M làá dāá tɔ̄ń Unimbɔti tuuŋyi ń cù duulinya kɔkɔn, kí tin sāā kutagbɔŋu nì kitiŋkuntinyɔkɔ, kí kóoǹní bin bin Unimbɔti lútèe#13.27 Dūú ŋmàntī nì Ditee 30.4, Saka 2.10, Neey 1.9..»

Tin fiigi subu dàkà-tee

28«Ní pīlifìmaan fiigi subu nín dàkà-ti tibɔti tiŋyee. Di sá yii ni yaa ká fiigi subu tɔ́ apan ki bíi túkù tifaapɔnee, ni béetí yii kuseeu tóobiń dee. 29Míǹ mbaantiim, ni yaa ká tin kɔkɔ m máafì-ni nee bíi jītée, béémaan yii m-dāantam tóobiń dee. 30Ibaamɔn ní m tùkù-ni, waanee nib kaa làá kpú kí kúntí ní an bɔti kɔkɔ ń bàń. 31Kutagbɔŋu nì kitiŋ dāa bí kí kúntí, ama man bɔti kaa bí kí kúntí jaanjaan.

Unimbɔti baba di nyí ŋwiin

(Kpèè Maat 24.36-44)

32Ubɔ kaa nyí ŋwiin nì kukúluu kun ní an bɔtee làá bàńee. Unimbɔti tuuŋyi in bí yilpuee kaa nyí, man u-Jipɔɔn gba kaa nyí, asee ti-Baa Unimbɔti baba di nyí. 33Ní nīn nyíǹ ni-ba kí taa gèeǹ. Di sá yii naa nyí an yuntiŋu. 34An dāa bí kii unil ubɔ nín cá nsan pu ki yāntì u-tɔntɔnliibi u-cindee ní. U yākatì báà ŋma nì u-tundi, ní ki kpáafì un cí kipunyɔkɔee ń taa nín̄ gèeǹ, ní ki búntì. 35Taa gèem̀maan! Di sá yii naa nyí ŋyunti ŋun kudiidaan làá bàńee, an yaa sá kujooueeee, kunyataasiiueeee, ŋkoosiimeeee, kutaafaaueeee, naa nyí. 36Ní taa yàntī ú bàń kí túuǹ-ni ni dɔ̄ ki gèeǹ. 37Tin m lì nee, m lì ki tùkù báà ŋma ní: taa gèem̀maan!»

Currently Selected:

Marc 13: BASSARDC

Highlight

Copy