Marc 16

Yeesu fīkitì ditaŋkpiilin

(Kpèè Maat 28.1-10, Luuki 24.1-12, Yoow 20.1-10)

1 Ŋwiŋŋuŋfikaa jítèe, Maarii un nyánní Magidalaa tiŋkinee, nì Maarii Yakubu na, nì Saloomee cūtì ki dáń talaalub bin bi cáa ŋáŋkí bitaŋkpiibi wuntee, kí cáá ŋmìtī Yeesu wunti. 2Ku wúntì ŋwimpeekaa dal kutaafaau pɔ̀lpɔlee ní bi búntì dikaakul laŋki. 3Bi cée ní ki bàlifī tɔb yii: «Ŋma di làá tin bìkitī-ti ditaŋkpal kí wàatī dikaakul nyɔkɔ dee?» 4Bi wáaǹ ki kpēēyee, ki ká ditaŋkpakpaandee bíntì ki wāatì dikaakul nyɔkɔ. 5Binimpoobee bāań ki kɔ́ dikaakulinee, ní ki wál̀ unaacimpɔɔn ubɔ kā bi-ŋaŋgiil pú ki pēē jibapiin, ní tifaandi kɔ́-bi. 6Ama ní unaacimpɔɔnee bí-bi yii: «Taa fàŋkìmaan! M nyí ni nín nyàab̀ Yeesu Naasaareeti yɔu un bi kpáá ndɔpuntikaa puee. U fīkitì, waa bí doo. Kpèèmaan, laakin bi nìn bíl̀-uee sèé, 7kí nín̄ cámaan kí tùkù u-boonnooliibi nì Peetroo yii u làá lìntī, ni tin kāntí-u Galiilee. Niin ní ni làá tin ká-u, kii u nín nìn pée tùkū-ni puee.» 8Bi nyáń dikaakulinee bi-pɔbiliŋ bíil̀ ní bi sáń bi-wunti gbáà. Bi nín fàŋkée puee, baa pée máafì báà ubɔ tiba.

Yeesu lēē u-ba ki dàkā Maarii Magidalaa yɔu

(Kpèè Maat 28.9-10, Yoow 20.11-18)

[ 9#16.9 Biyakatikaabi 9-20 kaa bí tigbɔŋkpikil tikpil poon. Yeesu nín fīkitì kinyɔŋ wimpeepeekaaŋuee, Maarii un nyánní Magidalaa tiŋkin, un ni u nìn jìn̄ arasiniibi bilulee ní u yāntì u péé ki ká-u. 10Unimpuee cūtì ki máafì bin nì Yeesu nìn tāatée. U bàn̄ee bíǹ kā nì dinimbinaamandi ki sūǹ. 11Ama bi nín gbìl̄ unimpuee cee yii Yeesu bí dimaŋfalin u ká-u muee, baa fōō ki kíí.

Yeesu lēē u-ba ki dàkā u-boonnooliibi bili

(Kpèè Luuki 24.13-35)

12Míǹ boonee, Yeesu gíti tí lēē u-ba mbamin nsanni ki dàkā u-boonnooliibi kansikin bili bin nìn yíkì ki cá kitimbilii kibanee. 13Bi nìn fātìi gítìń ki máafì bin kíǹee, ní baa tí fōō bi mun bɔti ki kíí.

Yeesu lēē u-ba ki dàkā u-kpambaliŋ

(Kpèè Maat 28.16-20, Luuki 24.36-49, Yoow 20.19-23, Atuun 1.6-8)

14Boonee ní u nyántì u-ba ki dàkā u-kpambaliŋ saalaa nì dibee ŋyunti ŋun bi kā ki jīǹ tijinee. Yeesu wòon̄-bi bi-pɔbiliŋ nín gbìfì baa fōō-u ki kííyee pu, kun puee baa nìn fōō bin ká u nín fīkitèe bɔti ki kíí. 15Ní u tùkū-bi yii: «Cùmaan kitiŋ jaŋŋi kɔkɔwoooo kí sòoǹ tibɔmɔntiil nee kí tīī kunibuluu kamaa#16.15 Dūú ŋmàntī nì Atuun 1.8.! 16Un yaa fōō ki kíí ní bi fùl̄-u Unimbɔti nyimee kāntí difiil. Ama un yaa kaa fōō ki kííyee dāa kóò ditafadaaldin ní. 17Maamaaci tuuŋŋi ŋin bin yaa fōō-mi ki kííyee làá nīn ŋáańee sɔ̀. M-yindi puee bi làá jà arasiniibi, ki làá sòoǹ isooncaan. 18Bi làá cūtì ikoobu, kí nyɔ̀ ndabiim, tiba kaa làá ŋá-bi. Bi dāa pāantí bi-ŋalii bibunliibi pu ní bí ká dicáaǹdi.»

Yeesu cāntì-bi ki nín jɔ́ḿ yilpu

(Kpèè Luuki 24.50-53, Atuun 1.9-11)

19Ti-Dindaan Yeesu sòon̄ nì bi míǹ ki dóòyee, ní ki yíkìi nín jɔ́ḿ yilpu ki tin kāl̀ Unimbɔti ŋaŋgiil pú#16.19 Dūú ŋmàntī nì Atuun 1.9-11.. 20Ní u-boonnooliibi búntì ki sòoǹ tibɔmɔntiilee ajan kɔkɔ, ní ti-Dindaan bí bi-cee ki tūǹ maamaaci tuuŋŋi ki dàkà yii tibɔti tin bi sòoǹee sá ibaamɔn.]

Currently Selected:

Marc 16: BASSARDC

Highlight

Copy