Marc 15

Bi cáá Yeesu gɔmina Piilati cee

(Kpèè Maat 27.1-2,11-14, Luuki 23.1-5, Yoow 18.28-38)

1Kutaafaau pɔ̀lpɔlee, bisaraaŋakpilib péé ki kpáfì, bi nì bitindaŋkpilib nì bimaradakaliibi, bíǹ bibɔsoonliibi kitilee kɔkɔ, kí sòoǹ Yeesu bɔti, ní ki bóob́-u ŋŋmii ki cáa ŋúbiǹ gɔmina Piilati. 2Ní Piilati bālifì-u yii: «Sii di sá Juuda yab bɔtiuaaa?» Ní Yeesu kíí-u yii: «Míǹ ní a lī nee#15.2 Míǹ ní a lī nee: kpèè Maat 27.11..» 3Bisaraaŋakpilibee dɔ́miń ki sòon̄ tibɔti tikpil ki túǹ u-pu. 4Míǹ puee, ní Piilati fātìi gíti bālifì-u yii: «A ŋmí níii? Aa gbìl̀ tin kɔkɔ bi sòoǹ ki tūntí a-pueeee?» 5Yeesu kaa ti pée gātì tiba, ní Piilati bākatì sèeee.

Piilati kíí bí kpɔ̀ Yeesu

(Kpèè Maat 27.15-31, Luuki 23.13-25, Yoow 18.38–19.16)

6 Dilákatil jiŋaaliu kamaayee, gɔmina Piilati nìn gīintí usarkadaan ubɔ, un samaa yaa mēē-uee ní kí líí. 7Kijapaai kiba nìn bí, bi yíì-kì Baaraabaasi. Bi nìn cúú u nì u-jutiibi biba ki tɔ́ sarkan, kun puee bi nìn kūū unil daliŋkin kunipaau kubɔ nìn yíì yii baa là kí pīlifiǹ gɔminee. 8Ní kunipaau jɔ́m̀ ki bālifī Piilati ń gíiǹ un bi lèe kí líí, kii u nín kpààa ŋáań-bi puee. 9Ní u bālifì-bi yii: «Ni là ḿ gíiǹ Juuda yab bɔtiu kí líí-naaa?» 10Di sá yii u nìn béè yii kináŋ kin kin bisaraaŋakpilib nìn cáá Yeesu puee di yāntì bi cáań-u ki ŋúbíǹ-u. 11Niinee, bisaraaŋakpilibee téé kunipaau ń lì yii bi là gɔmina ń gíiǹ Baaraabaasi ní kí líí. 12Ní Piilati fātìi bālifì-bi yii: «Kin, m làá ŋá un ní ni yíì Juuda yab bɔtiuee mana?» 13Ní bi fātìi kíí-u ki téeń mpɔn yii: «Bí kpáá-u ndɔpuntikaa pu!» 14Ní gɔmina Piilati fātìi bālifì-bi yii: «Tikpitil tin u ŋée di sá tilati?» Niinee ní bi mɔ̄tìi kúuǹ mpɔn yii: «Bí kpáá-u ndɔpuntikaa pu!» 15Piilati là kí sɔ̀ŋkì bi-pɔbiliŋee, ní ki gíiǹ Baaraabaasi ki líì-bi, ní ki yāntì bi gbáń Yeesu anaalab, ní ki dū-u ki tīī-bi bí cáá-u kí kpáá ndɔpuntikaa pu.

Soojab bíi bèel̄ Yeesu

(Kpèè Maat 27.27-31, Yoow 19.2-3)

16Niinee, soojab cáá Yeesu ki kɔ́ǹ gɔmina cindi poon ní ki yíiń disoojakitil din kíǹee kɔkɔ. 17Ní bi dū dibɔkutimandi cínciŋ ki pēeǹ Yeesu, ní ki dū ikuŋkum ki lùn̄ kibeefuulii ki cíkiǹ-u. 18Bi nìn kíĺ ki jáaḿ-u yii: «Ti jáaḿ-si Juuda yab bɔtiu!» 19Bi cáá ŋkpandɔ ki fátí u-yil ki tíiĺ timɔtan ki làbitī-u, ní ki dòoń ki gbàantí u-nimbiin. 20Bi bēel̀-u míǹ ki dóòyee, ní ki cúú dibɔkutimandee ki pēetì-u ní ki gíiǹ úǹ u-ba wampeeŋkaati ki pēeǹ-u, ki nyántì-u kí cáá tin kpáá ndɔpuntikaa pu.

Bi kpáá Yeesu ndɔpuntikaa pu

(Kpèè Maat 27.32-44, Luuki 23.26-43, Yoow 19.17-27)

21Bi cée, ki ká usanjitil ubɔ nyánní kusaau, bi yíì-u Siimɔn, u sá Siireen tiŋki, Aleekisandir nì Rufusi baa dee#15.21 Dūú ŋmàntī nì Room 16.13.. Bi nìn páb́-u yii ú fōō Yeesu dɔpuntikaaŋu kí bùkun̄, 22ní ki cáá Yeesu ki cūnnì laakin bi yíì Gɔlgɔtee (an taapu sá yii Kuyikpabiku laŋki). 23Bi tīī-u ndamam min ni nnyɔkɔ ŋun bi yíì miiree ŋmàl̄ee ú nyɔ̀, ama u yíì, kaa nyùn̄. 24Ní bi dū-u ki kpáá ndɔpuntikaa pu, ní ki yākatì u-wampeeŋkaati, ki tɔ́ kasi kí kpèè báà ŋma nín làá jī kuŋyee#15.24 Kpèè Ilan 22.19.. 25An nìn sá ntaafaawìiń tikúti tiwa ní bi kpáá-u ndɔpuntikaa pu ki dūu cóoǹ. 26Bi nìn ŋmàn̄ tiŋmaŋmabiti ki nákáǹ u-yilpu kí dàkà kun pu ní bi kūū-uee, yii: «Juuda yab bɔtiu sèé.» 27Bi nìn kpáá digaŋgandambi bili mun idɔpuntikaa pu ki dūu cóoǹ ki ŋàl̄-u, ubɔ u-ŋaŋgiil pú, un kíǹee u-ŋaŋgan pú. [ 28An ŋá kii an nín nìn ŋmàn̄ puee dee yii: «Bi dū-u ki ŋàl̄ binikpitib#15.28 Uyakatikaa nee kaa bí tigbɔŋkpikil tikpil poon, kpèè Luuki 22.37 nì Yees 53.12..»]

29Bisanjitiliibi nìn bèel̄-u ní ki gàatī diyil ki lì yii: «Iiin, sii un lī yii a làá gbá kí wīī kunimbɔtidii kí fàtīí mā-ku iwiin ita dalee#15.29 Kpèè 14.58, Ilan 22.8, Yoow 2.19., 30fīī a-ba kí kpákatiń ndɔpuntikaa pu!» 31Bisaraaŋakpilib nì bimaradakaliibi mun nìn bí ki bèel̄-u ki lì tɔb cee yii: «U fīī bin kíǹee ní kaa ŋūǹ kí fīī u-ba! 32Isirayeel yab bɔtiu Meesiya ń kpákatiń kɔŋkɔnnee, tí kpèè kí nín fōō-u kí kíí!» Bin bi nìn kpáá idɔpuntikaa pu ki cóoǹ ki ŋàl̄-uee mun nìn bí ki sìí-u.

Yeesu kúm

(Kpèè Maat 27.45-56, Luuki 23.44-49, Yoow 19.28-30)

33Kuwiŋkuluu gbáńee dibɔmbɔndi jéetì kitiŋ kɔkɔ pu ki tin sāā tikúti tita. 34Tikúti titee, Yeesu fáá mbiil mpɔn, yii: «Eelooi, Eelooi, lama sabakitanii?» - An taapu sá yii «M-Nimbɔtiu, m-Nimbɔtiu, ba ŋá ní a dū-mi ki fá#15.34 Ilan 22.2.?» - 35Bin bí niinee biba nín gbìl̄ u fáá mbiil mimmee, ní bi bí yii: «Pīlifìmaan! U yíì Eelii dee!» 36Ní bi-kansikin ubɔ sáǹ ki yōoǹ kuca ki múĺ ndaam min gàm̀ee ni, ní ki dūu túuń ŋkpandɔ pu ki tīī Yeesu ń nyɔ̀#15.36 Dūú ŋmàntī nì Ilan 69.22., ní ki lī yii: «Tí yàntīmaan kí kpèè Eelii yaa làá dāan̄ kí kpákatiń-u!» 37Yeesu gíti fáá mbiil mpɔnee, ní ki sīntì.

38Sata un nìn pītì kunimbɔtidii poon ki gāntì laakin bi yíì circir páaa laŋkee nì laan kíǹee cúu cátì abuku ali ki kíliń yilpu ki dāa kátì taapu. 39Room yab soojakpiliu un nìn sí ki bíitìń Yeesuee wál̀ u nín sīntì puee, ní ki lī yii: «Tiŋman kijapaai nee lafun sá Unimbɔti Jipɔɔn ní.»

40Binimpoobi biba mun nìn sí kudandaŋu ki kpèé. Maarii un nyánní Magidalaa tiŋkinee, nì Saloomee nì Maarii un sá Yakubuwaai nì Joosee nee, mun nìn bí bi-kansikin. 41Bíǹ di nìn táá Yeesu ki tútúǹ-u ŋyunti ŋun u nìn bí Galiileeyee. Binimpoobi biba mun tikpil nìn céeǹní-u ki jɔ́m̀ Jeerusaleem.

Bi síb́ Yeesu

(Kpèè Maat 27.57-61, Luuki 23.50-56, Yoow 19.38-42)

42-43 Bibɔsoonliibi kitil kansikin ukpil ubɔ nìn bí, binib nìn tɔ́-u tiŋan pu, bi yíì-u Jooseefi u sá Arimatee#15.42-43 Arimatee : kpèè Maat 27.57. tiŋkin, u mun nìn bɔ́ntì u-ba ki cí Unimbɔti Beel. Ŋwìiń nín tóob́ kí jēetí ŋwiŋŋuŋfikaa ń kíĺee, ní u ká dipɔbil ki cūtì Gɔmina Piilati cee ki mēē-u nsan kí yòon̄ Yeesu wunti. 44Gɔmina Piilati nín gbìl̄ yii Yeesu pūtì kpáàa kpíìyee, ní u bākatì, ní ki yíiń usoojakpil ki bālifì-u yii Yeesu nín kpíìyee an yúntàaa. 45Usoojakpilee nín tùkū-u yii Yeesu lafun kpíì an yúntèe, ní Piilati pú Jooseefi kinyɔkɔ yii ú cùú yòon̄ Yeesu wunti. 46Ní Jooseefi cūtì ki dá ŋŋaapiin ki dɔ́miń ki kpáatì Yeesu wunti, ki dūu tākaǹ ŋŋaapiinee ni, ní ki cáá-u ki bíl̀ dikaakul din bi nìn lùkū ditaŋkpalinee. U dū-u ki ŋá dikaakulee ni ki dóòyee, ní ki bíntì ditaŋkpakpaandi diba ki dūu pīiǹ dikaakul nyɔkɔ. 47Maarii un nyánní Magidalaa tiŋkinee nì Maarii Joosee na mun nìn sí ki kpèé laakin bi dū-u ki bíl̀ee.

Currently Selected:

Marc 15: BASSARDC

Highlight

Copy