Luc 1
1
Ijaam
1Ukpil Teewoofiil#1.1 Dūú ŋmàntī nì Atuun 1.1.,
Binib tikpil pɔ́ɔǹ ki ŋmàn̄ ditundi din Yeesu túń ti-kansikinee bɔti. 2Bi pée ŋmàn̄-tì kii bin nìn ká tibɔtee kílilaŋki ki kíǹ ki sòoǹ ki nàatī Unimbɔti bɔtee nín máafì-tì puee ní. 3Míǹ puee, kii m nín nyàab̄ ki cúú mbaamɔm tin jítì doooo ŋkilkaaminee, an kítì yii ma mun ń dū-tì kí ŋmà kí tīī-si, 4án nín làá ŋá pu á ŋmā kí béé yii bi nín dàkā-si tibɔti tiŋyee sá ibaamɔnee.
Yoowaneesi unyiŋfaldi màaltam
5Ŋyunti ŋun Eeroodi nìn sá ubɔti Juudee tiŋkinee, usaraaŋal ubɔ nìn bí, bi yíì-u Sakari. U nìn sá usaraaŋal Abiiya#1.5 Kpèè 1 Kroo 24.7-18. kitil poon ubɔ ní. Bi nìn yíì u-nimpuu Eeliisabeeti, u mun sá Aarɔn maaliŋu poon. 6Bi-liitil nìn yú deedee Unimbɔti nimbiin ní ki tɔ́ ti-Dindaan marab kɔkɔ mmɔntiim, 7ama baa nìn cáá kibiki, kun puee Eeliisabeeti nìn sá uŋmaŋŋmanti, ní bi-liitil nìn púĺ.
8Sakari kitil yuntiŋu bāańee, bi fōō saraa tundi ní Sakari kɔ́ kunimbɔtidiin ki bíi tūǹ u-tundi Unimbɔti nimbiin. 9Kii bisaraaŋaliibi nín ŋáań puee, bi nìn tɔ́ kasi ní ki lēē-u ú kɔ́ ti-Dindaan diiku poon kí tūū talaalu#1.9 Kpèè Disa 30.7-8.. 10Kunipaau kɔkɔ nìn bí mmɔŋki ki mèé ŋyunti ŋun úǹ bíi tùutī talaalu nsaraafan puee. 11U bí niinee, ní ti-Dindaan tuuŋŋu ŋubɔ dɔ́miń ki yúl̀ nsaraafan cee ŋŋaŋgiil pú#1.11 Kpèè Disa 30.1-6, 1 Bib 7.48.. 12U ká ntuunee, ní u-pɔbil bíil̀, ní tifaandi cúú-u. 13Ní ntuunee bí-u yii: «Sakari, taa fàŋkì! Di sá yii Unimbɔti fōō a-wimmeem. A-nimpuu Eeliisabeeti làá dāá màal̀-si kibininjabiki, á dāá pɔ̄-kì diyindi yii Yoowaneesi. 14Án làá dāá nīn sá-si dipɔɔpiŋkpaandi nì mmɔn ní, ní binib tikpil làá fàal̀ u-màaltam pu. 15U làá dāá nīn sá unikpaan ti-Dindaan nimbiin. Waa dāa nyù ndaam nì tinyɔkaal tin kɔkɔ pée gbéèyee#1.15 Dūú ŋmàntī nì Dikà 6.3.. U làá dāá gbí Unimbɔti Fam doooo u-na poon ní. 16U làá dāá gíiǹ Isirayeel yab kupaau ti-Dindaan bi-Nimbɔtiu cee#1.16 Dūú ŋmàntī nì Mala 2.6.. 17U làá dāá lìntīń ti-Dindaan nyɔkɔpu kí dāá nīn cáá Unimbɔti Fam nì mpɔn kii Eelii nín nìn cáá puee. U làá yàntī bibaatiibi nì mbiyaamu ń mɔ̄ɔkì, ní kí gíiǹní bin gáatèe deedeedambi ciiŋŋun, ní kí bɔ́ntí dinikitil mmɔntiim kí yóoń ti-Dindaan.» 18Niinee ní Sakari bí Unimbɔti tuuŋŋuee yii: «M làá ŋá mana kí béé yii tibɔti nee sá ibaamɔn? Kun puee man púĺaaa, m-nimpuu mun púĺ.» 19Ní ntuunee bí-u yii: «Man di sá Gabriyeel#1.19 Kpèè Dani 8.16, 9.21, Luuki 1.26., man di bí Unimbɔti nimbiin ki tūǹ atuun. Unimbɔti di túnní-mi ḿ cáań dinyɔɔbummɔɔndi gbanti kí tùkù-si, 20ní saa fōō m-bɔti tin m sòon̄ nì si nee ki kíí. Ama an yuntiŋu yaa bàn̄ án làá ŋá míǹ. Míǹ puee, a làá kpántí umɔɔmiin, aa ti làá ŋmā kí sòoǹ kí nīn cí ŋyunti ŋun tibɔti tin m sòon̄ nee ń dāá ŋá.»
21Ŋyunti gbantee, an ŋá bin bí mmɔŋki ki cí Sakari ń nyānnée bitii, kun di ŋúb́-u kudii poon ní waa nyēeńee. 22U nín dāa nyánnée, waa ti ŋūǹ kí sòoǹ. U kíǹ ki lábití u-ŋalii mmɔɔmiin yaamin ní. Niinee ní bi béè yii Unimbɔti ŋúbitì u-nimbiliŋ u wál̀ tiba kudii poon.
23Iwiin in sá Sakari ń dūú tɔ̄ kunimbɔtidii poon tundee sāāyee, ní u nín kùǹ u-dumpu. 24Míǹ boonee ní u-nimpuu Eeliisabeeti cáá dipool, ní ki bál̀, kaa ti nyēē áli iŋmal iŋmoo, 25ní ki bí yii: «Kɔŋkɔnnee, kpèèmaan Unimbɔti nín ŋá min ki tīī-mee! U ŋá míǹ kí lēē kun nìn kɔ̄ntí-mi icoo binib kansikinee dee.»
Unimbɔti tuuŋŋu sòon̄ Yeesu màaltam pu
26Eeliisabeeti cáá dipool iŋmal iluuyee, ní Unimbɔti tú u-tuuŋŋu Gabriyeel Galiilee tiŋki kin bi yíì Naasaareetee 27usapɔɔn un kaa nyí uninja bi yíì-u Maariiyee cee. Usapɔɔnee nìn cáá bɔɔn, bi yíì-u Jooseefi. U nìn sá ubɔti Daafiidi maaliŋun ní. 28Ní Unimbɔti tuuŋŋuee kɔ́ usapɔɔnee cee ní ki bí yii: «M jáaḿ-si, sii un Unimbɔti pú diyimɔɔlee, ti-Dindaan bí a-cee.» 29U jáam̀ ki dóòyee, ní Maarii fāŋkì tikpil ní ki bālifì u-ba yii: «Ba jaamii di nín yá nan dee?» 30Niinee ní ntuunee bí-u yii: «Maarii, taa fàŋkì, diyimɔɔl ní a ká Unimbɔti cee. 31A làá cáá dipool kí màal̀ kibininjabiki, á dāá pɔ̄-kì diyindi yii Yeesu. 32U dāa sá unikpaan ní. Yilpu fɔ́ŋŋŋ Nimbɔtiu dāa yíì-u u-Jipɔɔn. Úǹ ní ti-Dindaan Unimbɔti làá dū u-naanja Daafiidi beel kí tīī. 33Úǹ di làá nīn sá Isirayeel yab bɔtiu kí nīn cá jaanjaan ní u-beel kaa dāa cáá dikúntil#1.33 Dūú ŋmàntī nì 2 Sami 7.12,13,16, Yees 9.6, Dani 7.14..» 34Ní Maarii bí ntuunee yii: «Maa nyí uninja, kin án làá ŋá mana ní kí bàń míǹ?» 35Ní ntuunee kíí-u yii: «Unimbɔti Fam di làá kpákatiń a-pu, ní Yilpu Fɔ́ŋŋŋ Nimbɔtiu pɔŋŋu ń bìin̄ a-pu kii mboonee. An pu ní circir biki kin a làá màal̀ee, bi dāa yíì-kì Unimbɔti Jipɔɔn. 36Kpèè, a-kpilintɔ Eeliisabeeti unimpunaatee mun cáá kibininjabiki pool. Úǹ un bi nìn yíì uŋmaŋŋmantee bí u-ŋmaluluutiu poon ní nee. 37Di sá yii tiba kaa bí ki pɔ̄ɔ̄ Unimbɔti cee#1.37 Dūú ŋmàntī nì Diny 18.14..» 38Ní Maarii bí yii: «M sá ti-Dindaan yumbuu ní, a nín lī puee, án ŋá míǹ.» Ní ntuunee yíkì u-cee.
Maarii cūtìi māntì Eeliisabeeti pu
39Ŋyunti gbanti poon ní Maarii yíkì Naasaareeti ki nín cá Juudee jooŋŋi watil pú malaa. 40U kɔ́ Sakari dumpu ní ki jáam̀ Eeliisabeeti. 41Eeliisabeeti nín gbìl̄ Maarii jaamiiyee, ní kibiki cīŋkì u-poon, ní u gbí Unimbɔti Fam 42ní kí téeń mpɔn yii: «Unimbɔti bīiǹ a-pu ki jítiǹ binimpoobi kɔkɔ, ní ki bīiǹ kibiki kin a làá màal̀ee mun pu. 43Ma mun ŋma ní m-Dindaan na ń dāan̄ m-cee? 44Di sá m nín pée gbìl̄ a-jaamiiyee, ní kibiki cīŋkì m-poon nì ifaal. 45Án nīn mɔ̄ǹ sii un fōō ki kíí yii ti-Dindaan nín lī miŋyee, an làá lafun ŋá mimmee.»
Maarii laŋŋu ŋun u gāāyee
46Ní Maarii bí yii#1.46 Dū B. 46-55 kí ŋmàntī nì 1 Sami 2.1-10.:
«M nyɔ́ŋkí ti-Dindaan nì m-pɔbil kɔkɔ
u nín sá ukpaanee puee,
47an mɔ̄ǹ-mi tikpil Unimbɔti m-Fiiliu pu,
48kun puee u tīntìń ki kpēē man u-tɔntɔnliu nín sīntiǹ u-ba puee#1.48 Dūú ŋmàntī nì 1 Sami 1.11..
Ní kí yòon̄ díǹ kí nīn cée, iyunti kɔkɔ nib làá yíiń-mi
diyimɔɔl daan.
49Kun puee Unimbɔti Mpɔŋkɔdaan un bí circiree túń atuŋkpaan ki tīī-mi.
U-yindi bí circir.
50U-saasɔl bí kí nīn cá abin abin
ki tīī bin fàŋkí-uee.
51U-pɔŋŋu ní u dūu túń atuŋkpaan,
ki yāaǹ bin dàkà bi-bee.
52U téé bibɔtiibi bi-jaliŋ pu ki lúkú,
ki yōoǹ binandambi yilpu#1.52 Dūú ŋmàntī nì Yoob 5.11, 12.19..
53U yāntì bin ŋkùm nìn cááyee ká digbíl mmɔntiim
ní ki jìn̄ bigaajab ki gíiǹ nì iŋaŋkulim.
54U jōoń u-tɔntɔnliibi Isirayeel yab,
ki téetì u-poondi pu ki ŋá-bi tiŋan,
55kii u nín pée pōoǹ ti-naanjab, Abraam nì u-maaliŋu kɔkɔ puee,
kí nīn cá jaanjaan.»
56Maarii nìn kāl̀ Eeliisabeeti cee iŋmal ita nyɔkɔm ní ki fātìi nín kùǹ.
Yoowaneesi unyiŋfaldi màaltam
57Ŋyunti ŋun Eeliisabeeti làá màal̀ee dūu bàn̄ ní u màl̄ kibininjabiki. 58U-kɔŋkɔnnaatɔb nì u-nabiyaamu nín gbìl̄ tiŋaŋkpaandi tin ti-Dindaan ŋá ki tīī-uee puee, ní bi nì u kɔkɔ bíi fàal̀. 59An tú iwiin iniiyee, ní bi dɔ́miń ki nyántì kibiki ní ki gíí-kì dikpancandi#1.59 Kpèè Akoo 12.3. ní ki bàà là kí pɔ̄-kì ki-baa yindi Sakari. 60Ní ki-na bí yii: «Aayee, ti làá nīn yíì-u Yoowaneesi ní.» 61Ní bi bí-u yii: «A-yɔu ŋma ní bi yíì míǹ?» 62Niinee ní bi bālifì ubaati mmɔɔmiiŋyaamin diyindi din u là bí pɔ̄ kibikee, 63ní u yāntì bi tīī-u kupiliŋu, ní u ŋmàn̄ yii: «U-yindi di sá Yoowaneesi.» Ní báà ŋma bākatì sèeee. 64Niinee, Sakari limbil cúu kpātì, ní u kíĺ ki bíi sòoǹ ki nyɔ́ŋkí Unimbɔti. 65An yāntì tifaandi kɔ́ bi-kɔŋkɔnnaatɔb, ní binib kíǹ ki máafí an bɔti Juudee tiŋki kin sá ajoonee kɔkɔn. 66Bin kɔkɔ nìn gbìl̄ an bɔtee nìn bíi dàkafī ti-pu, ní ki bàlifī bi-ba yii: «An bikee làá dāá nīn bí mana dee?» Tiŋman, ti-Dindaan pɔŋŋu nìn bí kibikee pu.
Unimbɔti Fam gbí Sakari u nāatì tibɔti
67Niinee ní Unimbɔti Fam gbí Sakari, kibikee baa, ní ki yāntì u bíi nàatī Unimbɔti bɔti yii:
68«Ti-Dindaan Isirayeel Nimbɔtiu ń ká inyɔŋki,
kun puee u gíiǹní u-landɔkɔŋu u-niboolii pu ki fīī-bi ki líì.
69U nyántìń-ti Ufiil mpɔndaan ubɔ,
udaan sá u-tɔntɔnliu ubɔti Daafiidi maaliŋu poon ní.
70Kii u nín nìn yāntì u-circir bɔnaatiliibi bin nìn bí njaminee
sòon̄ ki síiǹ puee,
71yii: u làá nyāntí-ti ti-nannanliibi nì bin kɔkɔ ná-tee ŋaan.
72U làá dàkà ti-naanjab u-saasɔl, kí téetí u-circir poondi
din u nìn pōoǹ-bee pu,
73kii u nín nìn pūtì ki pōoǹ ti-naanja Abraam cee puee#1.73 Kpèè Diny 22.16-17..
74U nìn pōoǹ-u yii u làá nyāntí-ti ti-nannanliibi ŋaan,
tí ŋmā kí nóó-u kí taa fàŋkì,
75kí nīn bí circir nì deedee u-nimbiin áli ti-kúm dal.
76Ní sii, kibiki, bi làá dāá nīn yíì-si Yilpu Fɔ́ŋŋŋ Nimbɔtiu
bɔnaatiliu ní.
Di sá yii sii di làá dāá nīn līī ti-Dindaan nyɔkɔpu
kí ŋāŋkì u-saŋŋu#1.76 Dūú ŋmàntī nì Mala 3.1.,
77ní u-nibul ń béé yii u làá dāá fīī-bi kí dū bi-kpitii kí pɔ̄-bi.
78Kun puee Unimbɔti nín cáá tiŋan u-poon mɔ̄ puee,
u làá yàntī yilpu walifiŋu ń ŋmíntí ti-pu
kii ŋwìiń nín nyēē puee.
79Ŋu làá ŋmíntí bin bí dibɔmbɔndinee
nì bin bin bí ŋkúm saŋŋu puee,
kí kpòotī-ti kí gíiǹ ŋgbansɔŋfi saŋŋun#1.79 Dūú ŋmàntī nì Yees 9.1..»
80Kibikee nìn wīintí ní ki-ciiŋyi mun wīintí. U nìn kóòń kuteeun ní áli ki tin sāā daliŋkin u kíĺ ki bíi sòoǹ nì Isirayeel yab Unimbɔti bɔtee.
Currently Selected:
Luc 1: BASSARDC
Highlight
Share
Copy
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.
