Matthieu 9

Yeesu cáaǹ ufaliŋfaan ubɔ

(Kpèè Maar 2.1-12, Luuki 5.17-26)

1Niinee ní Yeesu kɔ́ buŋalimbun ki fātìi dūtì dimɔɔl ki nín gítiń u-tiŋkin#9.1 Maar 2.1 poonee, Kapeernayum ní bi yíiń Yeesu tiŋki. Kpèè Maat 4.13 mun.. 2Binib biba nìn túǹní ufaliŋfaan ubɔ nlún pu ki cáań ki bíl̀-u. Yeesu nín ká binib gbanti fōō ki kíí yii u ŋūǹ kí cáaǹ ubunlee ní u bí ufaliŋfaanee yii: «M-biki, pɔ́ɔǹ a-ba, m dū a-kpitii ki pú-si!» 3Niinee ní bimaradakaliibi biba bíi dàkafī bi-pɔbiliŋin yii: «Kijapaai nee ŋèeǹ nì Unimbɔti ní#9.3 Dūú ŋmàntī nì Akoo 24.16..» 4Yeesu béè tin bi bíi dàkafēe, ní ki bālifì-bi yii: «Ba pu ní ni cáá ilandɔkɔkpiti míǹ? 5Ba di pɔ̄ɔ̄ dilil ní: <A ká a-kpitii pɔ̄tam> di pɔ̄ɔ̄ dilil naaa, <Yīkì kí yūĺ kí nīn còom̄> di pɔ̄ɔ̄ ní? 6Ama ní béé yii, man Kinibiki cáá mpɔn kitiŋ pu kí dū unil kpitii kí pɔ̄-u.» Niinee ní u bí ufaliŋfaanee yii: «Yīkìm̄ kí yòon̄ a-lúŋŋu kí nīn kùǹ a-dumpu.»

7Ní kijapaayee nyīī ki yíkì ki nín kùǹ. 8Kunipaauee nín ká mimmee, ní tifaandi kɔ́-bi, ní bi bíi pàkà Unimbɔti u nín pú binib mpɔn ŋuŋyee pu.

Yeesu yíiń Maatiiu

(Kpèè Maar 2.13-17, Luuki 5.27-32)

9Yeesu nyáń niin ki cée, ní ki ká uninja ubɔ bi yíì-u Maatiiu u kā fɔtiku diikun. Yeesu nìn bí-u yii: «Dāan̄ kí nīn nóó-mi!» Niinee ní u yíkì ki táá-u.

10Yeesu kɔ́ ki kāl̀ Maatiiu dumpu ki bíi jīǹ tijinee#9.10 Dūú ŋmàntī nì Luuki 5.29. ní bifɔtiliibi tikpil nì binikpitib bin kɔ kíǹee dɔ́miń ki kútì u nì u-boonnooliibi pu ki mun bíi jīǹ. 11Fariisab ká mimmee, ní ki bí u-boonnooliibi yii: «Ba pu ní ni-kpiliu nì bifɔtiliibi nì binikpitib bin kɔ kíǹee kpáfì ki kā ki jīǹ tijin míǹ#9.11 Dū B. 10-11 kí ŋmàntī nì Luuki 15.1-2.?» 12Yeesu gbìl̄ an bɔtee, ní ki bí-bi yii: «Bin pɔ̄ɔ̄yee kaa nyàab̀ unyɔɔdaan, see bin būǹee. 13Cùú bīfìmaan Unimbɔti nyɔɔbundi nee taapu, yii: <Maa là saraabi#9.13 Oosee 6.6., m là ní nīn sūǹ tɔb saai ní.> Maa dɔ́miń kí yíiń deedeedambi, m dɔ́miń kí yíiń binikpitib ní.»

Bi bālifì Yeesu dinyɔɔboobil bɔti

(Kpèè Maar 2.18-22, Luuki 5.33-39)

14Niinee ní Yoowaneesi boonnooliibi sútìń ki pìl̄ Yeesu, ní ki bālifì-u yii: «Ba pu ní timbi nì Fariisab bōob̀ kinyɔkɔ múlmul, ní sii boonnooliibi kaa bōob̀ ní?» 15Ní Yeesu kíí-bi yii: «Unimpucaan cal bɔɔbi ŋūǹ kí nīn bí kunimbaaun ŋyunti ŋun unimpucaan cal u-ba dáá béeee? Aayee, baa ŋūǹ! Ama ŋyunti ŋubɔ bí ki dòoń, bi làá dāá yòon̄-u bi-kansikin, an yuntiŋu ní bi dāa bōob̀ kinyɔkɔ.

16«Baa gífí ŋŋaapɔɔn kí dūú lìb̄ dibɔkutikpikil. Bi yaa ŋá mimmee, ŋŋaapɔɔn kpāantí dibɔkutikpikil ní kí cátí ní dibùndee ń mɔ̀tīí wàan̄. 17Míǹ ní baa tí dù ndapɔm kí fúuń tilɔkpikilin. Bi yaa ŋá mimmee, tilɔti pòol̄ ní ndaam ń kpáatíí fá ní tilɔti mun ń bīil̀. Míǹ puee, bi dù ndapɔm ní kí sìtī tilɔpɔnni, ní an kɔkɔ ń nīn bí.»

Yeesu fīkitì kisapɔmbiki ki cáaǹ unimpu ubɔ

(Kpèè Maar 5.21-43, Luuki 8.40-56)

18Yeesu nìn bí ki sòoǹ nì bi an bɔtee, ní Juuda yab yidaaŋwu ubɔ bāań ki gbāaǹ u-nimbiin, ní ki bí yii: «M-sapɔmbiki dáá pée kúù dee, dāan̄ kí dū a-ŋal kí páań ki-pu, kì làá fìkitī!» 19Ní Yeesu yíkì ní u-boonnooliibi nóó-u.

20Ní unimpu ubɔ nìn bí ki fùul̀ ŋkpin doooo abin saalaa nì ali an kaa gúǹ. Yeesu còom̄ ki cée, ní u dīń Yeesu boon pú ki dɔ́miń ki gbēē u-bɔkutijúti. 21Kun puee u nìn dākafì u-pɔbilin yii: «M yaa pée ŋúń ki gbēē u-bɔkutil kpaŋkpamee, m bàà pɔ́ɔkí.» 22Yeesu fātì ki ká-u ní ki bí yii: «M-bisal, pɔ́ɔǹ a-ba, a nín fōō ki kíí puee fīī-si.» Niin niin ní unimpuee pɔ́ɔkì.

23Yeesu dūu bàn̄ uyidaanee dumpuee ki ká bin búǹ awul ki gà ikpiisilanee nì kunipaau kun bíi gà dituweelee gbí niin kìlammm. 24Niinee ní u bí-bi yii: «Nyāmaan doo! Kisapɔmbiki kaa kpíì, kì gèeǹ ní.» Ní bi bíi bèel̄-u. 25Bi nìn nyántì binib kɔkɔ, ní Yeesu nín kóò kudii poon ní ki cúú kisapɔmbikee ŋal ní kì yíkì. 26An bɔtee nìn dūu gbītì kitiŋ gbanti jaŋŋi kɔkɔn.

Yeesu cáaǹ bijɔfub bili

27Yeesu nyáń niin ki búntèe, ní bijɔfub bili páaǹ u-boon ki tátí yii: «Daafiidi naantiiu, sɔ̄ ti-saai!» 28Yeesu bàn̄ kudiinee, ní bijɔfubee sútì ki pìl̄-u, ní u bālifì-bi yii: «Ni fōō ki kíí yii m lafun ŋūǹ kí cáaǹ-naaa?» Ní bi kíí-u yii: «Iiin, Ukpil, a ŋūǹ kí cáaǹ-ti.» 29Ní Yeesu gbēē bi-nimbiliŋ ki bí-bi yii: «Ni nín fōō ki kíí yii m ŋūǹ kí cáaǹ-nee, án ŋá míǹ kí tīī-ni.» 30Niinee ní bi-nimbiliŋ cúu ŋúbitì. Ní Yeesu kpáafì-bi yii: «Ní pīlifì tiŋan, ní taa pée yàntī ubɔ ń béé tibɔti nee!» 31Ama bi nyánnée ní ki kíĺ ki bíi sòoǹ Yeesu pu kitiŋ gbanti kɔkɔn.

Yeesu cáaǹ umɔɔmiin ubɔ

32Bi nyáń niin ki cée ní bi cáań uninja ubɔ Yeesu cee, arasinii kā u-pu ní u sá umɔɔmiin. 33Ŋyunti ŋun Yeesu jìn̄ arasiniiyee, ní umɔɔmiinee kíĺ ki bíi sòoǹ, ní kunipaau kun nìn bí niinee bākatì sèeee ní ki lī yii: «Doooo nee, taa láá pée ká yéè Isirayeel tiŋkin ki ká!» 34Ama ní Fariisab bíǹ bí yii: «An sá arasiniibi bɔtiu di tīī-u an pɔŋŋu ní u cáa jì arasiniibi#9.34 Dūú ŋmàntī 12.24..»

Yeesu súń kunipaau saai

35Yeesu nìn yìiǹ ntiŋkpaamu nì ntiŋwaamu poon ki dàkà binib akpafidiinni, ki sòoǹ tibɔmɔntiil tin sá Unimbɔti Beel bɔtee, ki cāantí iween kɔkɔ nì bin kɔkɔ wɔ̀b̄ee. 36U nín nìn ká kunipaau gbantee ní an kɔ́-u inimɔɔn kun puee binibee nìn gīī bi-wunti yɔ̄tì a lì kii ipii in kaa cáá ukpaalee#9.36 Dūú ŋmàntī nì Dikà 27.17, 1 Bib 22.17.. 37Niinee ní u bí u-boonnooliibi yii: «Kudiceeu wīikí tikpil, ama ní bicaliibi kaa náaǹ. 38An puee, ní mèèmaan kusaaudaan ú tɔ̄ń bitɔntɔnliibi ń dāá cā!»

Currently Selected:

Matthieu 9: BASSARDC

Highlight

Copy