Matthieu 10

Yeesu kpambaliŋ saalaa nì ali yiŋŋi

(Maar 3.13-19, Luuki 6.12-16)

1Yeesu yíiń u-boonnooliibi saalaa nì bilee, ní ki tīī-bi mpɔn bí jà arasiniibi kí cáaǹ iween kɔkɔ nì bin wɔ̀b̄ee kɔkɔ. 2Yeesu kpambaliŋ saalaa nì alee yiŋŋi sɔ̀. Mbaayee, Siimɔn un bi gíti yíì Peetroo (an taapu sá yii: Ditaŋkpal), nì u-naal Andree, nì Seebeedee jipɔmbi Yakubu nì u-naal Yoowaneesi, 3nì Fiiliipi nì Baateeleemii, nì Toomasi nì Maatiiu un sá ufɔtilee, nì Yakubu Alfee jipɔɔn, nì Tadee, 4nì Siimɔn un nìn là kí jáǹ Room yabee, nì Juudasi Isikaariyɔti un dāa dū Yeesu ki nyáfiǹ u-nannanliibee.

Yeesu tú u-kpambaliŋ

(Kpèè Maar 6.7-13, Luuki 9.1-6)

5Yeesu nìn tú u-kpambaliŋ saalaa nì alee, ní ki kpáafì-bi yii: «Ní taa cù bin kaa sá Juuda yabee cee, kí taa kɔ́ Samaarii yab timmun. 6Túĺmaan Isirayeel yab bin bí kii ipii in wáŋkèe cee. 7Cùú sòom̀maan Unimbɔti bɔti yii: <Unimbɔti Beel sútì ki pìlīń-ni.> 8Cáam̀maan bibunliibi kí fìkitī bitaŋkpiibi kí ŋāŋkì binyaŋgbantiibi wunti, kí jà arasiniibi. Kii ni nín fōō faalaa puee, ni mun tīīmaan faalaa. 9Ní taa nyàab̀ sindaariya nì animbil nì tikúman nimbiliŋ kí fúuń ni-tɔkɔliŋin. 10Ní taa nyàab̀ tilɔti ni-saŋkindi pu, nì abɔkuti ali, nì anaataka nì ŋkpandɔ, kun puee bin kansikin ni bí ki tūǹ ditundee di máaǹ kí kpèè-ni#10.10 Dūú ŋmàntī nì 1 Kɔra 9.14, 1 Tiim 5.18..

11«Ni yaa bàn̄ ki kɔ́ kitiŋkpaaŋŋin àá kitiŋwaai poonee, nyàab̀maan kí béé un kítì kí fōō-nee. Ni yaa kɔ́ udaan ceeyee, ní kàl̄maan niin kí tin sāā ŋyunti ŋun ni làá dāá yīkì kitiŋ gbantinee. 12Ni yaa kɔ́ kudicaŋuee nee, ní péé kí jāam̀-bi, yii: <Unimbɔti ń tīī-ni ŋgbansɔŋfi#10.12 Isirayeel yab yaa làá jāam̀ unilee, bi mèé yii ŋgbansɔŋfi ń nīn bí udaan pu ní.!> 13Bin bí kudicaŋu gbantinee yaa kítèe, ní ni nín jáam̀ ki tīī-bi ŋgbansɔŋfi ŋuŋyee làá nīn bí bi-pu. Ama bi yaa kaa kítì kí fōō ŋgbansɔŋfi gbantee, ŋú fàtīí gítiń ni-cee. 14Ni yaa kɔ́ dicindi diban, àá kitiŋ kiban ní bi yaa yíì kaa fōō-ni, kaa là kí pīlifiǹ-nee, ní nyāmaan niin kí gbāfì ni-taaŋi kpɔŋkpɔm#10.14 Kpèè Maar 6.11 nì tin bi ŋmàn̄ kugbɔŋu faaku taapuee.. 15Ibaamɔn ní m tùkù-ni, ibɔsoon dalee, Unimbɔti nín nìn dáaĺ Soodoom nì Goomoora#10.15 Soodoom nì Goomoora: kpèè Diny 18-19. timmu tafal ki yāntì ŋŋmi nyánní yilpu ki wùn̄-mu puee dāa sɔ́ nì kitiŋ gbanti yab nín làá ká ditafadaaldi diŋyee.»

Bi làá sàaǹ Yeesu boonnooliibi

(Kpèè Maar 13.9-13, Luuki 21.12-17)

16Ní Yeesu bí-bi yii: «Ní pīlifì. M dū-ni ki tú kii ipiiyee isaakpan kansikin. An puee ní nīn nyíǹ ni-ba kii ikoobuee kí nīn bímaan soooo kii abeenanjilee. 17Ama ní nīn nyíǹ ni-ba nì binib, kun puee bi làá nīn cútí-ni ki cáǹ ibɔsoon, kí nīn gbáà-ni anaalab bi-kpafidiiŋŋin. 18Bi làá nīn cáǹ-ni biyidambi nì bibɔtiibi cee man pu, án nín làá ŋá pu ní sòoǹ tin ni nyí man puee Juuda yab nì bin kaa sá Juuda yabee nimbiinee. 19Bi yaa láa cáǹ-ni bibɔsoonliibi nimbiinee, ní taa nín̄ yáliŋkí min ní ni làá tin sòoǹee nì tin ni làá lèe pu. Ŋyunti gbantee ní Unimbɔti làá tīī-ni tibɔti tin sá ní lèe. 20An kaa sá nimbi ni-ba di làá sòoǹ, ni-Baa Unimbɔti Fam di làá dī ni-pu kí sòoǹ. 21Unil dāa cútí u-nabiki kí tīī bí kpɔ̀, ní ubaati ń dāá cúú u-biki kí tīī bí kpɔ̀, ní mbiyaamu mun dāa yíkí kí jáǹ bibaatiibi nì binaatiibi kí yàntī bí kpɔ̀-bi. 22Báà ŋma làá nīn ná-ni kun puee ni fōō-mi ki kíí. Ama un yaa pɔ́ɔǹ ki tin kátì-kuee dāa kāntí difiil. 23Bi yaa láa bíi páb̀-ni kitiŋ kibanee, ní sāǹ kí póotí kiban. Ibaamɔn ní m tùkù-ni, naa làá yìiǹ kí dóó Isirayeel timmu kɔkɔ ní man Kinibiki ń bàń.

24Utumbifil ubɔ kaa bí ki jítiǹ un dàkà-uee, míǹ ní utɔntɔnli ubɔ mun kaa bí ki jítiǹ u-kpiliu. 25An ŋmāntì utumbifil ń nīn kíǹ ki bí kii un dàkà-uee, ní utɔntɔnli mun ń nīn kíǹ ki bí kii u-kpiliuee. Bi yaa yíiń kudiidaan yii Beelseebuul, arasiniibi bɔtiuee, mana ní baa dāa ŋūǹ kí yíiń u-dicaŋku yab bíǹ míǹ?»

Un unil máaǹ kí fàŋkèe

(Kpèè Luuki 12.2-7)

26An puee, ní taa fàŋkìmaan binib. Tin kɔkɔ bí dibalinee làá dāá nyā mpaampiin pu ní tin pu baa nyée, bi làá dāá béé-tì. 27Tin ní m tùkū-ni dibɔmbɔndinee, sòom̀maan-tì ŋwiimpu, ní tin ní m lɔ́kɔfì-ni dibalinee, dū-tì kí bāakìmaan. 28Taa fàŋkìmaan bin ŋūǹ kí kpɔ̀-ni ama ní kaa ŋūǹ kí kpɔ̀ ni-naŋkee. Ama fàŋkìmaan Unimbɔti un ŋūǹ kí dū ni nì ni-naŋki kɔkɔ kí tɔ̄ ŋŋmin kí nàan̄ee#10.28 Dūú ŋmàntī nì Yaku 4.12.. 29Baa nyáfí seerib bili gbòooo? Nì míǹ kɔkɔee, ni-Baa Unimbɔti yaa kaa pú nsan, seer ubɔ kaa lítiń kitiŋ. 30Nimbee, Unimbɔti kàan̄ ni-yikpiti kɔkɔ ní. 31An puee, ní taa fàŋkì: ni pɔ̄ɔ̄ kudaau ki jítiǹ kuseerpaau.

Yeesu nyí un nyí-uee

(Kpèè Luuki 12.8-9)

32Un kamaa yaa lī binib nimbiin yii u sá man yɔuee, ma mun dāa lì m-Baa un bí yilpuee nimbiin yii u sá m-yɔu ní. 33Ama un di yaa néè binib nimbiin yii waa nyí-mee#10.33 Dūú ŋmàntī nì 2 Tiim 2.12., ma mun làá néé m-Baa un bí yilpuee nimbiin yii maa nyí-u.

An sá kujaau ní, kaa sá ŋgbansɔŋfi

(Kpèè Luuki 12.51-53, 14.26-27)

34«Ní taa dàkafì yii m cáań ŋgbansɔŋfi kitiŋ pu, maa cáań ŋgbansɔŋfi, kitàataajiki ní m cáań. 35M dɔ́miń kí yàkatī unil nì u-baa, usapɔɔn nì u-na, unimpu nì u-beel ní. 36Unil nannanliibi di dāa sá u-dicaŋkun yab#10.36 B. 35-36, kpèè Miika 7.6.. 37«Un néeń u-baa àá u-na ki jítiǹ mamee kaa kítì kí nīn sá man yɔu, ní un néeń u-jipɔɔn àá u-bisal ki jítiǹ mamee kaa kítì kí nīn sá man yɔu. 38Un yaa kaa yōoǹ u-dɔpuntikaaŋu ki túǹ kí nīn nóó-mee, kaa kítì kí nīn sá man boonnooliu. 39Un di nyàab̀ kí fīī u-maŋfalee làá fá-dì. Un di yaa dū u-maŋfal ki fá man puee di dāa kāntí u-maŋfal.»

Tipaal dɔ̄ ki cí bin ŋáań tiŋanee

(Kpèè Maar 9.41)

40«Un yaa fōō-nee, fōō man dee, ní un yaa fōō-mee fōō un túnní-mee dee. 41Un yaa fōō Unimbɔti bɔnaatiliu yii u nín sá Unimbɔti bɔnaatiliuee puee, udaan làá dāá fōō tipaal tin Unimbɔti bɔnaatiliuee làá dāá fōōyee ní. Ní un yaa fōō un yú deedee Unimbɔti nimbiinee, yii u nín yú deedee Unimbɔti nimbiinee puee, udaan làá dāá fōō tipaal tin un yú deedee Unimbɔti nimbiinee làá dāá fōōyee ní. 42Un di yaa pú ŋwaamu nee kansikin kiba nnyinsɔm kpaŋkpam kì nyùn̄ yii kì nín sá man boonnooliuee puee, ibaamɔn ní m tùkù-ni, udaan làá ká u-paati.»

Currently Selected:

Matthieu 10: BASSARDC

Highlight

Copy