Matthieu 11

Yoowaneesi tú u-boonnooliibi Yeesu cee

(Kpèè Luuki 7.18-35)

1Yeesu nín tīī u-boonnooliibi saalaa nì bilee isansaŋki ki dóòyee, ní u yíkì ki nín nìkì ntimu mun kíǹee ni ki sòoǹ Unimbɔti bɔti ki dàkà binib.

2Ní Yoowaneesi un fùul̀ binib Unimbɔti nyimee kāl̀ kusarkadiinee ki gbìl̄ Kriisitoo tuuŋŋi ŋin u tūǹee pu. Niinee ní u lēē u-boonnooliibi biba ki tú bí cùú bàlifì-u yii: 3«Sii di sá un ti nyí yii u dòońeeyaaa, tí nīn kā ki cí ubɔ ní?» 4Ní Yeesu kíí-bi yii: «Nín̄ cámaan kí māafì Yoowaneesi tin ni kée nì tin ni gbìl̄ee: 5Bijɔfub nimbiliŋ ŋúbitì, bideembi cōom̀, binyaŋgbantiibi wunti ŋáŋkì, bitafakpaafub kíǹ ki gbìl̀, bitaŋkpiibi fīkitì, m sòon̄ tibɔmɔntiil ki tīī binandambi#11.5 Dūú ŋmàntī nì Yees 35.5-6, 61.1.. 6Unil un fōō-mi ki kíí kaa gùgufēe bí mmɔnneeee!»

7Yoowaneesi boonnooliibi búntèe ní Yeesu bíi sòoǹ Yoowaneesi pu samaayee cee ki bí yii: «Ni nín cūtì kuteeun ki kpēē Yoowaneesee, dinicil dilal ní u sá? U sá kii dikaliŋgbaandi din kubuŋu fīintéeee? 8Ba ní ni cūtì ki kpēē ní? Unil un pēē agaajabɔkuteeee? Bin pēē agaajabɔkutee, bi kāntí bíǹ abeecinni ní! 9Kin, ba ní ni baasii cūtì niin ki kpēē ní? Ni cūtì ki kpēē Unimbɔti bɔnaatiliu níii? Iiin tiŋman, m tùkù-ni yii, un ní ni ká niinee jítiǹ Unimbɔti bɔnaatiliu pu gba. 10Kun puee Yoowaneesi sá un pu Unimbɔti gbɔŋku poon sòon̄ yii: Unimbɔti bí yii: <M làá tɔ̄ń m-tɔntɔnliu ú lìntīń a-nyɔkɔpu kí bɔ́ntí-si nsan.> Ní Yeesu gíti bí-bi yii: 11Ibaamɔn ní m sòoǹ, bin kɔkɔ unimpu núuĺ ki màl̄ee kansikinee, ubɔ kaa bí ki jítiǹ Yoowaneesi. Ama un sá kiwaai Unimbɔti Beelinee jítiǹ Yoowaneesi. 12Kí yòon̄ ŋyunti ŋun Yoowaneesi un fùul̀ binib Unimbɔti nyimee sòon̄ Unimbɔti bɔti ki dāa sāā díǹee, Unimbɔti Beel dɔ́miń nì mpɔn ní, bin nimbiliŋ máǹ di-puee di kóò. 13Unimbɔti bɔnaatiliibi kɔkɔ nì Mooyiisi marab sòon̄ Unimbɔti Beel pu bɔti ní ki dāa dūu sāā Yoowaneesi yuntiŋu. 14Ni yaa là kí gbìlīǹ-mee, Yoowaneesi di sá Eelii un bi nìn sòon̄ yii u làá gítińee. 15Un yaa cáá ditafalee ń gbìl̄.»

16Ní Yeesu gíti bí yii: «Ba ní m làá dū waanee nib kí ŋmàntīǹ dee? Bi náań nì mbiyaamu mun kā sampaan puee ní, mubɔ kūuntí ki lì mu-jutiibi yii: 17<Ti búń-ni awul, naa ŋɔ́ń, ki gāā-ni ikpiisilan, naa súń.> 18Di sá yii Yoowaneesi un fùul̀ binib Unimbɔti nyimee dɔ́miń ní kaa là tijinaaa, kaa là ndaam, ní ni bí yii: <Arasinii di bí u-pu.> 19Ní man Kinibiki dɔ́miń ki jīǹ ki nyù, ní ni bí yii: <Uninja nee sá upoofu, ki sá udanyɔl, ní ki bɔ́ɔtí bifɔtiliibi nì binikpitib bin kɔ kíǹee.> Ama bin fōō Unimbɔti ciiŋyi ki kííyee dàkà yii i sá deedee.»

Mbusu dɔ̄ ki cí ntiŋkpitimu

(Kpèè Luuki 10.13-15)

20Niinee ní Yeesu bíi wòoǹ ntimu mun poon u nìn ŋá maamaacib tikpilee nib, kun puee baa kpántì bi-bimbim. 21U bí yii: «Mbusu dɔ̄ ki cí nimbi Koorasin tiŋki nib, mbusu dɔ̄ ki cí ni mun Beetisayida tiŋki nib. Kun puee, maamaacib bin m ŋá ni-cee nee di yaa bàà nìn ŋámaan Tiir nì Siidɔn timmun, niin yab bàà nìn kpántìmaan bi-bimbim malaa, ki pēeǹ kpɔsatab ki dū ŋfantam ki pùkū bi-ba#11.21 Tiir nì Siidɔn: dūú ŋmàntī nì Yees 23.1-18, Eesee 26, Joow 4.4-8, Amoo 1.9-10.. 22An puee m tùkù-ni yii, ibɔsoon dalee, nimbi tafadaaldi dāa jítiǹ Tiir nì Siidɔn nib yal. 23Kin, nimbi Kapeernayum tiŋki nib, ni nyí yii ni làá yīkì yilpu kí tin tūū kutagbɔŋu níii? Ni làá sìntī kí bà taapu taŋkpiibi ní, kun puee maamaacib bin m ŋá ni-cee nee di yaa bàà nìn ŋámaan Soodoom tiŋkinee, bíǹ bàà nìn kpántìmaan bi-bimbim ki bàà dáá gbíntìi bí díǹ#11.23 ni làá yīkì... taapu taŋkpiibi: kpèè Yees 14.13-15. Soodoom : kpèè Diny 19.24-28. 24An puee ní m tùkù-ni yii, ibɔsoon dalee, Soodoom tiŋki tafadaaldi dāa sɔ́ǹ nimbi yal.»

Dāam̄maan m-cee kí ká diŋuŋfil

(Kpèè Luuki 10.21-22)

25Ŋyunti gbantee ní Yeesu bí yii: «Óooo, m-Baa, yilpu nì taapu Dindaan, m nyɔ́ŋkí-si a nín dū tibɔti nee ki bál̀ bin yíì bi-ba biciŋfitiibi nì binyiliibi, ki dū-tì ki dàkā bin sá ŋwaamuee#11.25 Dūú ŋmàntī nì 1 Kɔra 1.17-29.. 26M-Baa, tiŋman a ŋá míǹ kun puee míǹ di ŋān̄ a-cee ní ki fáatì-si.

27«M-Baa dū tikɔkɔ ki ŋúbiǹ-mi, ní báà ubɔ kaa nyí man u-Jipɔɔn, asee m-Baa baba. Míǹ ní ubɔ mun kaa tí nyí m-Baa asee man u-Jipɔɔn baba, nì bin man u-Jipɔɔnee yaa là kí dū-u kí dàkèe.

28«Nimbi bin tú awaŋgul ki gīīyee, dāam̄maan man cee ḿ túutí-ni ní ŋùŋfì, 29kí yòom̄maan man kpaambooku kí fōōmaan m-bɔti. Kun puee m-poon mɔ̄, ní m-bɔti kaa pɔ̄ɔ̄, ni làá ká diŋuŋfil#11.29 Dūú ŋmàntī nì Yeer 6.16.. 30Man kpaambooku pɔ̀fì ní m-waŋgul mun bí fúku fuku.»

Currently Selected:

Matthieu 11: BASSARDC

Highlight

Copy