Matthieu 8

Yeesu cáaǹ unyaŋgbanti

(Kpèè Maar 1.40-45, Luuki 5.12-16)

1Yeesu kpákatìń dijool puee, ní kunipaau nóó-u. 2Ní unyaŋgbanti ubɔ sútìń ki pìl̄-u, ki gbāaǹ u-nimbiin ki bí-u yii: «Ukpil, cáaǹ-mi kun puee m nyí yii a yaa là, a ŋūǹ kí cáaǹ-mi m-wunti ń ŋāŋkì.» 3Niinee ní Yeesu tāntì u-ŋal ki gbēē-u, ní ki bí yii: «M là. Pɔ̄ɔkìm̄!» Niin niin ní uninjee pɔ́ɔkì ní u-wunti ŋáŋkì. 4Ní Yeesu bí-u yii: «Pīlifì tiŋan, á taa tùkù báà ubɔ tibɔti nee, ama á cáá a-ba kí dàkà usaraaŋal ú bée yii a-wunti ŋáŋkì, ní kí ŋá saraa kii Mooyiisi marab nín lī puee ní usaraaŋal ń tùkù báà ŋma ń gbìl̄ yii a pɔ́ɔkì#8.4 Kpèè Akoo 14.2-32..»

Yeesu cáaǹ Room soojakpiliu tɔntɔnliu

(Kpèè Luuki 7.1-10 nì Yoow 4.43-54)

5Yeesu kɔ́ Kapeernayum tiŋkinee, ní Room soojakpiliu ubɔ sútìń ki pìl̄-u ki gbāam̀-u yii: 6«Ukpil, m-tɔntɔnliu dɔ̄ kudiin ki būǹ, ki fàl̄ ki yáliŋkí tikpil.» 7Ní Yeesu bí-u yii: «M làá cù kí cáaǹ-u.» 8Ní usoojakpilee bí-u yii: «Ukpil, maa máaǹ á kɔ́ m-dumpu. Pée lì dinyɔɔbundi dibaba m-tɔntɔnliu làá pɔ̄ɔkì. 9Di sá yii man m-ba, m cáá bikpilib bin taapu m bée, ní ki mun cáá soojab bin mun bí man taapuee. M ŋūǹ kí tùkù ubɔ yii: <Cù doo!> ní ú cù, ní kí bí ubɔ mun yii: <Dāan̄ doo!> ní ú dāan̄, ní kí bí m-tɔntɔnliu una yii: <Ŋá yéè!> ní ú ŋá.» 10Yeesu nín gbìl̄ an nyɔɔbuŋŋee, ní u bākatì ki bí bin nóó-uee yii: «Ibaamɔn ní m sòoǹ nì ni, maa láá pée ká Isirayeel yab kansikin ubɔ cáá fookii kii Uroomja nee. 11Míǹ ní m tùkù-ni yii binib tikpil làá dāá nyānní ŋwìiń nyalaŋki pú nì ŋu-jeetilaŋki pú kí kɔ́ Unimbɔti Beelin, bi nì Abraam nì Isaaki nì Jaakɔb ń kpāfì kí jī nnaam! 12Ama ní Isirayeel yab bin bàà máaǹ kí nīn sá Unimbɔti Beelin yabee, bí dāá nyāntiń-bi mmɔŋki kí tɔ̄ dibɔmbɔndin, laakin ní bi làá nīn sūǹ bi-nyiŋŋi gà tɔb kàkakee.» 13Ní Yeesu tùkū usoojakpilee yii: «Nín̄ kùǹ a-dumpu, a nín fōō ki kíí puee, án ŋá míǹ kí tīī-si.» Kukúluu gbanti poon ní utɔntɔnlee kpáàa pɔ́ɔkì.

Yeesu cáaǹ bibunliibi tikpil

(Kpèè Maar 1.29-34, Luuki 4.38-41)

14Yeesu kɔ́ Peetroo dumpuee ní ki ká Peetroo nimpuu na būǹ ki dɔ̄ u-wunti píĺ kpaŋkpam. 15Niinee ní Yeesu gbēē u-ŋal, ní u pɔ́ɔkì tiwun sɔ̄ŋkì ní u yíkì ki ŋá-u tijin u jíń.

16Kujoou jóotèe ní bi cáań-u binib bin pu arasiniibi kēe tikpil, ní u sòon̄ ki jìn̄ arasiniibee. U nìn cáaǹ bibunliibi kɔkɔ. 17U ŋá míǹ ki nóó nì Unimbɔti bɔnaatiliu Yeesaya nín nìn lī puee, yii: «U fōō ti-wɔfii nì ti-weeŋyi#8.17 Kpèè Yees 53.4..»

Bin là kí nóó Yeesuee bɔti

(Kpèè Luuki 9.57-62)

18Yeesu nín ká yii kunipaau māntì ki tú-uee, ní u pú u-boonnooliibi kinyɔkɔ yii bí kɔ́ buŋalimbu kí dùtī kí cù lapu pu mɔɔgbandi. 19Niinee ní umaradakal ubɔ sútìń ki pìl̄-u ní ki bí yii: «Ukpil, m làá nīn nóó-si báà laakin ní a yaa cée.» 20Ní Yeesu kíí-u yii: «Jiiŋkpaaibi cáá bi-kɔŋkooŋyi ki dɔ̀, ní nnɔmbiyaamu mun cáá mu-diiŋŋi, ama man Kinibiki kaa cáá laakin m làá bíĺ m-yil kí ŋùŋfèe.» 21Ní bin nìn nóó-uee kansikin ubɔ bí-u yii: «Ukpil, pɔ̄-mi nsan ḿ síb́ m-baa.» 22Ní Yeesu bí-u yii: «Sii dee, nóó man, kí yàntī bitaŋkpiibi ń nīn síb̀ bi-taŋkpiibi.»

Yeesu yāntì kubuŋu ŋmíl̀

(Kpèè Maar 4.35-41, Luuki 8.22-25)

23Niinee ní Yeesu kɔ́ buŋalimbun ní u-boonnooliibi mun nóó-u ki búntì. 24Kpalaayee kubuŋkpaaŋŋu kubɔ kíĺ ki bíi jītí dimɔɔl pu ní buŋalimbuee bíi gbéè nnyim, ama ní Yeesu dɔ̄ ki gèeǹ. 25Ní u-boonnooliibi sútì ki pìl̄-u ní ki fīntì-u ki bí-u yii: «Ti-Dindaan, fīī-ti, ti kpíì ní!» 26Ní Yeesu bí-bi yii: «Ba ŋá ní ni fàŋkí míǹ? Ni-fookiiu kaa náaǹ báà fiii!» U lī míǹ ki dóòyee, ní ki yíkì ki yúl̀ ki kpātì kubuŋu nì nnyim pu, ní an ŋmíl̀ fɔ́ŋfɔŋ díkí diki. 27Ní binibee bākatì sèeee, ní ki bíi lì yii: «Kin, u nín sá ŋma dee ní ki kpáaǹ kubuŋu nì dimɔɔl tɔ́-u nan#8.27 Dūú ŋmàntī nì Ilan 65.8, 89.10, 107.23-32.?»

Yeesu cáaǹ biwaatiibi bili

(Kpèè Maar 5.1-20, Luuki 8.26-39)

28Yeesu nín dūtì lapu mɔɔgbandi Gadaraa#8.28 Gadaraa kaa sá Juuda yab tiŋki. Kí nyā niin kí cù Galiilee mɔɔlee, an sá ataŋkpee saalaa ní. yab tiŋkinee, ní binib bili bin pu arasiniibi kā bi wáatèe nyánní kuceeun ki túŋkiń-u. Biwaatiibee nìn cáá ntoom tikpil, an puee ubɔ kaa nìn màkantí kí dī niin. 29Bi nìn bíi kūuntí yii: «Unimbɔti Jipɔɔn, a nyàab̀-ti nì tilati poon ní? Ibɔsoon yuntiŋu kaa láá bāań ní a dɔ́miń doo kí sàaǹ-taaa?» 30Digbeetikitikpaandi#8.30 Kpèè Maar 5.11 nì tin bi ŋmàn̄ kugbɔŋu faaku taapuee. diba nìn bí ŋkpaanceeti niin ki jīǹ. 31Ní arasiniibee gbāam̀-u yii: «A yaa làá jà-tee, á jà-ti kí kɔ́ǹ digbeetikitil nee ni» 32Ní u bí yii: «Nín̄ cámaan!» Ní bi nyáń biwaatiibin ki kɔ́ digbeetikitilee ni, ní igbeetee sáǹ ki wúntì nsitimin ki jéetì dimɔɔlin ki gbíntì nnyimin ki kpíì.

33Ní bin kpàá igbeetee sáǹ ki cūtì ki tùkū kitiŋin tin kɔkɔ jítèe ki kpáaǹ bin pu arasiniibi nìn kēe mun yati. 34Ní kitiŋin nib kɔkɔ nyáń ki nín túŋkí Yeesu. Bi nín ká-uee, ní bi gbāam̀-u yii ú yīkì bi-tiŋki pu.

Currently Selected:

Matthieu 8: BASSARDC

Highlight

Copy