Matthieu 7

Taa nín̄ sòoǹ ki bíiĺ tɔb

(Luuki 6.37-38,41-42)

1«Taa nín̄ sòom̀maan tɔb bɔti, ní Unimbɔti ń taa sòoǹ ni mun yati. 2Min min ní a dì kí sòoǹ a-nabiki bɔtee, míǹ ní Unimbɔti làá dī kí sòoǹ si mun yati. A nín ŋmàntī min kí tīī a-jutee, míǹ ní u làá dāá ŋmàntī kí tīī si mun. 3Ba pu ní a wāĺ kimɔmbiki kin kā a-nabiki nimbilinee, ní kaa wāĺ didɔjal din kā sii a-ba yalinee? 4Mana ní a ŋūǹ kí lì yii: <M-nabiki, yàntī ḿ lēē-si kimɔmbiki a-nimbilin,> ŋyunti ŋun didɔjal kā sii nimbilinee? 5Mpoonnyoondaan, péé kí lēē didɔjal din kā sii a-ba nimbilinee kí wàatī, ní kí nín wāl̀ mmɔntiimin kí lēē kimɔmbiki kin kā a-nabiki yalinee.

6«Ní taa dū tin bí circiree kí tīī iboo, yaa sá fám i làá fàtī ni-pu kí tɔ̀ntī-ni. Ní taa dū ni-beedimbiliŋ kí lúkú igbeeti, yaa sá fám bi làá tāā kí bīil̀.»

Un bàlifēe kāntí ní

(Luuki 11.9-13, 6.31)

7«Mèèmaan Unimbɔti, u làá tīī-ni. Nyàab̀maan, u làá yàntī ní ká. Fáámaan, u làá pìitī-ni kipunyɔkɔ. 8Kun puee sii un yaa mēē Unimbɔti tibee, see ú tīī-si kudɔŋu, ní sii un yaa nyàab̀ tibee, see á ká kudɔŋu, sii un yaa tí yú ki fátée, see bí pìitī-si. 9Ni-kansikin ubɔ jipɔɔn di yaa mēē-u kpɔnɔ, u kíikí kí dū ditaŋkpal kí tīī-uaaa? 10U yaa tí mēē-u ujɔm, u kíikí kí dū ukoobu kí tīī-uaaa? 11Nimbi binikpitib nyí kí tīī ni-biyaamu tiwammɔntiil, kin ataa aŋa pu ní ni-Baa un bí yilpuee kaa nín ŋūǹ kí dū tiwammɔntiil kí tīī bin mèé-uee?

12«Min ní ni yaa là bí ŋá kí tīī-nee, ŋámaan míǹ kí tīī bi mun. Mooyiisi marab nì Unimbɔti bɔnaatiliibi gbɔnti nín lì puee dee#7.12 Dūú ŋmàntī nì Room 13.8-10..»

Kipunyɔkɔwaai bɔti

(Luuki 13.24)

13«Dīmaan kipunyɔkɔwaai kí kɔ́. Kun puee kipunyɔkɔ nì nsan ŋun wāāyee di cáǹ binib diwaŋkilin, niin ní kunipaau nóó. 14Ama kipunyɔkɔwaai kin pɔ̄ɔ̄ dijitilee nì nsan ŋun kaa wāāyee di cáǹ binib dimaŋfal laŋki, binib fiii di kāntí-ŋu kí dī.»

Busubu nì bu-biliŋ bɔti

(Luuki 6.43-44)

15«Ní nīn nyím̀maan ni-ba nì bin yíì bi-ba yii Unimbɔti bɔnaatiliibi kin kaa sée. Bi yaa dòoń ni-ceeyee, bi bí soooo kii apibilee, ama ní bi-pɔbiliŋ sá isaakpan yaŋ ki cútí. 16Bi-tuuŋŋi ní ni làá dūú béé-bi, kun puee baa tòó atùun abɔjanaakun pu, kaa tí kìtī kɔŋkib bukuŋkumbu pu. 17Busumɔntiibu sá kamaa lòoǹ asubimɔnti ní, ní busukpitibu lòoǹ asubikpiti. 18Busumɔntiibu kaa ŋūǹ kí lòoǹ asubikpiti, míǹ ní busukpitibu kaa tí ŋūǹ kí lòoǹ asubimɔnti. 19Isufi in kɔkɔ kaa lòoǹ asubimɔntee, bi làá gāā-i ní kí tɔ̄ ŋŋmin. 20An puee, bin yíì bi-ba yii Unimbɔti bɔnaatiliibi kin kaa sée tuuŋŋi ní ni làá dū kí béé-bi.»

Yeesu boonnooliibi tiŋman pu yab

(Luuki 13.25-27)

21«An kaa sá bin kɔkɔ yíì-mi yii: <M-Dindaan, m-Dindaanee> di làá dāá kɔ́ Unimbɔti Beelin, asee bin ŋáań min m-Baa un bí yilpuee lèe baba di dāa kóò. 22Ibɔsoon dalee binib tikpil làá dāá lì-mi yii: <Ti-Dindaan, ti-Dindaan, a-yindi puee, Unimbɔti kaa nìn sòon̄ nì ti, ti dūu nāatì binibaaa? Taa jìn̄ arasiniibi a-yindi puɔɔɔ? Taa ŋáaǹ maamaacib a-yindi puɔɔɔ?> 23Niinee ní ḿ dāá tùkù-bi yii: <Maa nyí-ni ki ká kpataaa. Sútímaan niin kí wàatī-mi, nimbi bikpitiŋaliibee dee#7.23 Sútímaan niin kí wàatī-mi, nimbi bikpitiŋaliibee dee: dūú ŋmàntī nì Ilan 6.9.!>»

Adiin ali bɔti

(Luuki 6.47-49)

24«Míǹ ní un kamaa yaa gbìl̄ man bɔti tin m sòon̄ nee ní ki yaa kíǹ ki ŋáań mimmee, udaan náań nì uciŋfiti un máń u-diiku ki tɔ́kɔ́ǹ ditaŋkpal puee ní. 25Utaa dɔ́miń ki nìn̄, ní nnyiŋgbeen dɔ́miń ki léeǹ kudiiyee pu, ní kubuŋkpaaŋŋu jítì, ama kudiiyee kaa lítì, kun puee ku tɔ́kɔ́ ditaŋkpal pu. 26Ama un kamaa di yaa gbìl̄ man bɔti tin m sòon̄ nee ní kaa ŋáań mimmee náań nì ugbaan un máń u-diiku ki tɔ́kɔ́ǹ dibul puee ní. 27Utaa dɔ́miń ki nìn̄, ní nnyiŋgbeen dɔ́miń ki léeǹ kudiiyee pu, ní kubuŋkpaaŋŋu dɔ́miń ki jítì, ní ku lítì ki nàn̄ dúsi dusi.»

Binib bākatì nì Yeesu bɔsòontam

28Yeesu nín sòon̄ ki dàkā samaayee ki dóòyee, ní u-dàkatam gbanti kɔ́-bi tikpil, 29kun puee úǹ dàkatamee cáá mpɔn, kaa bí kii bimaradakaliibi yamee.

Currently Selected:

Matthieu 7: BASSARDC

Highlight

Copy