Matthieu 17

Unimbɔti lī yii Yeesu sá u-Jipɔɔn

(Kpèè Maar 9.2-13, Luuki 9.28-36)

1Iwiin iluu boonee, Yeesu yōoǹ Peetroo nì Yakubu nì Yoowaneesi un sá Yakubu naalee ki cáá-bi ki kpōotì ŋkpaanceeti dijoofɔkɔl diba pu, 2ní ki cúú u-ba ki kpántì bi-nimbiin, ní u-nimbiin kíǹ ki jìl̀ pàlpal kii ŋwìińee, ní u-wampeeŋkaati píil̀ bɔ́iii kii ŋwalifee#17.2 Dūú ŋmàntī nì 2 Peet 1.16-18.. 3Niinee ní u-kpambaliŋ kpēēyee Mooyiisi nì Eelii di sí bi nì Yeesu sòoǹee. 4Bi ká mimmee, ní Peetroo tùkū Yeesu yii: «M-Dindaan, an ŋān̄ tí nīn bí doo! A yaa là m làá gāā tibìń tita, sii kubɔ, Mooyiisi kubɔ, Eelii mun kubɔ.» 5U bíi sòoǹ mimmee, ní ditagbandi diba dɔ́miń ki bīiǹ bi-pu ki jìl̀ pàlpal, ní bi gbìl̄ Unimbɔti sòon̄ní ditagbandee ni yii: «Un bí nee di sá man Jipɔɔn un m néeń tiŋanee, u-pu ní m-pɔbil sɔ̀m̀. Ní pīlifìmaan-u.» 6U-boonnooliibi nín gbìl̄ an sòon̄ní mimmee ní bi fāŋkì tikpil ki lítì dicincibil, 7ama ní Yeesu sútì ki pìl̄-bi, ní ki gbēē-bi ki bí yii: «Yīkìmaan, taa fàŋkìmaan!» 8Bi wáaǹ ki kpēēyee ní kaa ti ká bin kíǹee, see Yeesu baba. 9Ŋyunti ŋun bi fàtīi kpákatiń dijool puee, Yeesu kpáafì-bi yii: «Ní taa māafì báà ubɔ tin ni kée kí nīn cí ŋyunti ŋun man Kinibiki làá fìkitī ditaŋkpiilinee.»

10Ní u-boonnooliibi bālifì-u yii: «Ba pu ní bimaradakaliibi bí yii Eelii di máaǹ kí péé kí dāan̄ kí wàatī ní#17.10 Dūú ŋmàntī nì Mala 3.23.?» 11Ní Yeesu fātìi kíí-bi yii: «Ibaamɔn, Eelii di máaǹ kí péé kí dāan̄ kí bɔ́ntí tikɔkɔ. 12Ama m tùkù-ni yii Eelii dɔ́miń dooooyee ní binib kaa béè-u, ki ŋá-u bi nín là puee. Míǹ mbaantiim ní bi làá tí sàaǹ man Kinibiki mun.»

13Niinee ní u-boonnooliibi béè yii Yoowaneesi un fùul̀ binib Unimbɔti nyimee pu ní u lì.

Yeesu cáaǹ ubimbidaan ubɔ

(Kpèè Maar 9.14-29, Luuki 9.37-43)

14Bi bàn̄ ki ŋmāntiǹ kunipaauee, ní uninja ubɔ dɔ́miń Yeesu cee ní ki gbāaǹ u-nimbiin, 15ki bí-u yii: «Ukpil, sɔ̄ m-jipɔɔn saai! U būǹ abimbil ní ki sàań tikpil. An pée líikí-u ní múlmul, ŋyunti ŋubɔee ŋŋmin, ŋyunti ŋubɔ muee nnyimin. 16Ní m bàà cáań-u a-boonnooliibi cee, ní baa ŋúń ki cáaǹ-u.» 17Ní Yeesu bí yii: «Óo binib nee, naa cáá fookii ki gáatì! Kí dāá sāā ŋyunti ŋulɔŋu ní ḿ bàà dūú kàl̄ ni-cee? M làá nīn jīǹ ni-pu kimɔtii kí tin sāā ŋyunti ŋulɔŋu ní? Cáaḿmaan-mi kibikee doo.» 18Ní Yeesu kpātì arasinii un kā ki-puee pu, ní u nyáń, ní kibikee pɔ́ɔkì dicilpu niin.

19Niinee ní Yeesu boonnooliibi dɔ́miń u-cee bi-ŋmaniŋma ki bālifì-u yii: «Ba pu ní timbi kaa ŋúń ki jìn̄ arasinii gbanti?» 20Ní Yeesu kíí-bi yii: «Di sá yii ni-fookiiu un ni cáá Unimbɔti puee di pátì. Ibaamɔn ní m tùkù-ni, ni-fookiiu yaa bàà náaǹ ki bàn̄ kii dijɔnjɔmbilee, ni bàà ŋūǹ kí tùkù dijool nee yii: <Yīkì laakin a bí nee kí nīn cá lapu doo!> Ní dí bàà lafun kpìkitī. Tiba kaa bàà ŋūǹ kí nīn pɔ̄ɔ̄ ki tīī-ni. [ 21An yaa kaa sá nì ŋwimmeem#17.21 Tigbɔn tiba poonee, bi lī yii: «An yaa kaa sá nì ŋwimmeem nì dinyɔɔboobil... nì dinyɔɔboobil, ubɔ kaa ŋūǹ kí jà arasiniibi nee jutiibi.]»

Yeesu gíti sòon̄ u-kúm nì u-fìkititam pu

(Kpèè Maar 9.30-32, Luuki 9.43-45)

22Dalba Yeesu nì u-boonnooliibi kpáfì ki bí Galiileeyee, ní u tùkū-bi yii: «Bi làá cúú man Kinibiki kí tīī binib, bí kpɔ̀-mi. 23Ama ní winta dalee ḿ fìkitī.» Niinee, an kɔ́-bi kunimbaau tikpil.

Yeesu pàn̄ kunimbɔtidii lampoou

24Yeesu nì u-boonnooliibi nín bàn̄ Kapeernayumee, bin nìn fòol̄ kunimbɔtidii lampoouee dɔ́miń Peetroo cee ní ki bālifì-u yii: «Ni-kpiliu kaa pà kunimbɔtidii lampoou níii#17.24 Kpèè Disa 30.11-16.?» 25Ní Peetroo kíí-bi yii: «U pà.» Ŋyunti ŋun Peetroo kóoń kudiin kpalaayee, ní Yeesu bí-u yii: «Siimɔn, a dàkafī yii ba? Bilab di pà fɔtiku nì lampoo ki tìì duulinya bɔtiibi ní? Bitindambaaa, binicambi ní?» 26Ní u kíí-u yii: «Binicambi.» Ní Yeesu bí-u yii: «Mimmee, bitindambi kaa pà dee. 27Ama timbi kaa là kí bàkan̄ binib gbanti, míǹ puee, nín̄ cá dimɔɔlin kí tɔ̄ njɔmpiin. Ujɔmpeepeekaa un a làá cúúyee, á tábití u-nyɔkɔ, a làá ká animbil ŋin làá ŋmàntī binib bili lampoouee. Cáań animbilee kí pà man nì sii yil pu.»

Currently Selected:

Matthieu 17: BASSARDC

Highlight

Copy