Matthieu 18

Ŋma di sá ukpaan ní?

(Kpèè Maar 9.33-37, Luuki 9.46-48)

1Ŋyunti gbantee ní Yeesu boonnooliibi dɔ́miń u-cee ki bālifì-u yii: «Ŋma di sá ukpaan Unimbɔti Beelin ní?» 2Ní u yíiń kibiyaawaai kiba ki yóoǹ bi-nimbiin, 3ní ki bí-bi yii: «Ibaamɔn ní m tùkù-ni, ni yaa kaa kpántì ni-bimbim ki ŋá kii mbiyaamuee, ni kpá kí kɔ́ Unimbɔti Beelin. 4Un sá ukpaan Unimbɔti Beelinee di sá un di sìntīǹ u-ba ki kpántí kii kibikee. 5Un kamaa yaa fōō kibiyaawaai kiba kii kíǹee juti man puee, udaan fōō man dee.»

Unil ń nīn nyíǹ u-ba nì ikpiti

(Kpèè Maar 9.42-48, Luuki 17.1-2)

6«Ama un di yaa yāntì mbiyaamu mun fōō-mi ki kíí nee kansikin kiba ŋá ikpitee, an sɔ́ bí dū kunakpaaŋŋu kí kúĺ udaan neen kí cáá-u kí tɔ̄ tiŋkun ú múĺ taapu taapu. 7Mbusu bí duulinya pu, kun puee tiwan tikpil yàntī binib ŋáań ikpiti. Tin yàntī binib ŋáań ikpitee làá nīn pée bí ní. Ama mbusu bí ki tīī un pu ní án làá dīńee.

8«An yaa sá a-ŋal kii a-taal di yaa làá yàntī á ŋá ikpitee, gùutīí fá kí wàatī a-ba! Á kɔ́ dimaŋfal din kaa kúntée ni nì ditaagindi kii diŋaŋgindi sɔ́ nì a-ŋalii liitil nì a-taaŋi liitil ń nīn bí, bí cáá-si kí tɔ̄ ŋŋmi ŋun kaa kúù jaanjaanee ni. 9An yaa ti sá a-nimbil di yaa làá yàntī á ŋá ikpitee, á lúkutí-dì kí fá. Á kɔ́ dimaŋfal din kaa kúntée ni nì dinimbil dibee sɔ́ǹ a-nimbiliŋ liitil ń nīn kā, bí cáá-si kí tɔ̄ ŋŋmi ŋun kaa kúù jaanjaanee ni.»

Dipibil din wáŋkì bi fātìi kée bɔti

(Kpèè Luuki 15.3-7)

10«Ní nīn nyíǹ ni-ba kí taa kpèè mbiyaamu nee kansikin kiba fám. M tùkù-ni ibaamɔn ní yii ituun in kpèé-muee bí m-Baa un bí yilpuee nimbiin ŋyunti sá kamaa. [ 11Di sá yii man Kinibiki dɔ́miń kí fīī bin nìn wáŋkèe ní#18.11 Uyakatikaa nee kaa kā tigbɔŋkpikil tikpil poon. Kpèè Luuki 19.10..]

12«Ni dàkafī yii ba? Unil yaa cáá ipii dilaataal, ní ubɔ wáŋkì i-kansikinee, waa yàntī ubɔ kpá dilaataal in kíǹee ajoon pu kupikpaaun kí cùú nyàabìń ubɔ un wáŋkèeee? 13M tùkù-ni yii, u yaa tin ká-uee, u-bɔti mɔ́ɔkíǹ-u kí jītíǹ ubɔ kpá dilaataal in kaa wáŋkèe bɔti. 14Míǹ mbaantiim ní ni-Baa un bí yilpuee kaa là mbiyaamu nee kansikin báà kiba ń wāŋkì.»

Ŋāŋkì sii nì a-nabiki kansikin

(Luuki 17.3)

15«A-nabiki yaa yīntiǹ-see, cù u-cee kí dàkà-u min ní u ŋá-si an kaa kítèe sii nì u ŋmaniŋma. U yaa gbìl̄ ki tīiǹ-see, mimmee, a ŋúń ki gíiǹní a-nabiki nsammɔntin dee. 16Ama u yaa yíì, kaa gbìlīǹ-see, á kpáaǹ unil ubɔ kii bili kí cù u-cee, án nín làá ŋá pu binib bili kii bita ń ká kí ŋmā kí sòoǹ min udaan ŋá an kaa kítèe, kii Unimbɔti gbɔŋku poon nín lī puee#18.16 Ditee 19.15.. 17U yaa kaa tí gbìl̄ ki tīiǹ bi muee, á tùkù Unimbɔti nikitil. U yaa tí yíì, kaa gbìlīǹ Unimbɔti nikitilee, ú kpántí a-cee kii unil un kaa nóó Unimbɔtee.»

18«Ibaamɔn ní m tùkù-ni, tin ní ni yaa bóob́ taapu dooyee, míǹ ní an bóob́ yilpu mun#18.18 Dūú ŋmàntī nì 16.19, Yoow 20.23..

19«Ibaamɔn ní m tùkù-ni, binib bili ni-kansikin yaa kpáfì kinyɔkɔ taapu doo ki mēē báà kuŋyee, m-Baa un bí yilpuee làá tīī-bi kudɔŋu. 20Di sá yii laakin binib yaa kpáfì bili kii bita man yindi puee, m bí bi-kansikin.»

Utɔntɔnli un kaa pūǹ ikpitee

21Niinee ní Peetroo dɔ́miń Yeesu cee ki bālifì-u yii: «Ukpil, m-nabiki yaa yīntiǹ-mi, kí tin sāā miŋa ní an máaǹ ḿ dūú pɔ̄-u ní? Kí tin sāā milulaaa?» 22Ní Yeesu kíí-u yii: «Aayee, an kaa sá miluli, an sá kí tin sāā imuŋku ita nì saalaa miluli pu ní á pɔ̄.» 23An puee, Unimbɔti Beel náań nì kii ubɔti ubɔ nín yíiń u-tɔntɔnliibi bí dāá pà-u bi-pɔɔŋŋi puee ní. 24U kíĺ ki bíi kàaǹee, ní bi cáań-u u-pɔ̀nliu ubɔ un cáá-u dipɔndi miiliyɔmbi kutukuee. 25Kijapaayee nín kaa nìn cáá kun ní u làá dūú pèe, ní ukpilee bí yii bí dū u nì u-nimpuu nì u-biyaamu nì tin kɔkɔ u cááyee kí nyāfì án ŋmā kí bà kunimbiŋmiiu. 26Ní utɔntɔnlee tātìi gbāaǹ u-kpiliu nimbiin, ki dɔ̄ kitiŋ ki fìlim̄ ki gbāam̀-u yii: «Á jī kimɔtii! M làá dāá pà-si kɔkɔ.» 27U nín kaa ŋūǹ kí pà puee ní u-kpiliu súń u-saai ki dū u-pɔndi ki pú-u, ní ki bí yii ú nīn cá. 28«Utɔntɔnlee nyáńee ní ki dūu tú u-tɔntɔnjuti un mun cáá úǹ dipɔndi kutukuee nsan, ní ki cìb̄ ki cúú-u ki ŋmáaḿ u-neen ki bí-u yii <Pà-mi m-nimbiliŋ!> 29Ní u-tɔntɔnjutee gbāaǹ u-nimbiin ní ki gbāam̀-u yii: <Á jī kimɔtii, m làá pà-si.> 30Ama waa kíí see u nín cáá-u ki tɔ́ sarka ú pà u-pɔndi kɔkɔee. 31U-tɔntɔnjutiibi nín ká min jítèe, ní an kɔ́ bíǹ inimɔɔn, ní bi cūtìi kàan̄ tin jítèe kɔkɔ ki tùkū bi-kpiliu. 32Niinee ní bi-kpiliu yíiń utɔntɔnlee ní ki bí-u yii: <A sá utɔŋfiti ní! A nín gbāam̀-mi puee ní m dū a-pɔndi ki pú-si. 33An kaan máaǹ á sɔ̄ a-bɔɔ saai kii man nín súń a-saai pueeee?> 34Ní u-kpiliuee gíí diŋuul, ní ki yāntì bi dū-u ki tɔ́ sarkan bí dáaĺ u-tafal áli ú dāá pà u-pɔndi kɔkɔ kí dóó.»

35Ní Yeesu bí yii: «Míǹ ní m-Baa un bí yilpuee làá dāá ŋá un kamaa kaa dū u-nabiki kpitii ki pú-u nì u-pɔbil kɔkɔee.»

Currently Selected:

Matthieu 18: BASSARDC

Highlight

Copy