Matthieu 16

Fariisab nì Sadusab nyàab̀ maamaacib

(Kpèè Maar 8.11-13, Luuki 12.54-56)

1 Fariisab nì Sadusab dɔ́miń Yeesu cee kí píĺ-u tibɔti ní ki bí-u yii ú ŋá maamaaci ubɔ kí dàkà-bi yii Unimbɔti bí u-cee. 2Ní Yeesu kíí-bi yii: «Kujoouee, ni lì yii: <Kutagbɔŋu làá nīn ŋān̄, kun puee atagban ŋmàl̄ mmam.> 3Ní kutaafaauee ni lì yii: <Utaa làá nì díǹ kun puee atagban bí gùŋgum.> Ni nyí kutaa bimbim míǹ, ní kaa ŋūǹ kí béé tidaandi tin Unimbɔti bíi ŋáań iyunti in bí nee poonee#16.3 Tigbɔn tiba poonee, Yeesu bɔti tin u sòon̄ B. 2 nì 3 poonee kaa bí.. 4Waanee nib binikpitib bin kaa yú deedee nì Unimbɔtee bàlifī yii ḿ ŋá kudaaŋŋu kubɔ kí dàkà-bi. Baa làá ká kudaaŋŋu kubɔ asee kun náań nì Yoona yɔkɔee#16.4 Dūú ŋmàntī nì 12.39-40.!» U lī mimmee ní ki yāntì-bi ki búntì.

Ní taa fōō Fariisab nì Sadusab dàkatam

(Kpèè Maar 8.14-21)

5U-boonnooliibi nín dūtì dimɔɔgbandee, bi súntì kaa kpáaǹní kpɔnɔb. 6Ní Yeesu bí-bi yii: «Ní nīn nyí nì ni-ba nì Fariisab nì Sadusab kpɔnɔnyɔkɔŋu pu.» 7Ní u-boonnooliibi bíi dàkafī bi-ban yii: «Ti nín kaa kalin kpáaǹní kpɔnɔbee pu ní u lī mimmaaa?» 8Yeesu béè bi-landɔkɔi, ní ki lī-bi yii: «Ba pu ní ni bíi dàkafī ni-ban ni nín kaa ŋúbiń kpɔnɔbee pu? Ba pu ní ni-fookiiu kaa náaǹ míǹ? 9Nìn díǹ naa láá gbìl̄ taapuɔɔɔ? Naa téetí kpɔnɔb biŋmoo bin m gífì ki tīī binib kutukub biŋmoo ŋmɔ́ ki díkí áli ni tōō bin kíǹee tikabiti saalaa nì tileeee? 10Àá naa téetí kpɔnɔb biluli bin m gífì ki tīī binib kutukub binaa ŋmɔ́ ki díkée? Tikabiti tiŋa ní ni nìn tōō bin kíǹee ní? 11Ba pu ní m nín bí-ni yii ní nīn nyíǹ ni-ba nì Fariisab nì Sadusab kpɔnɔnyɔkɔŋu puee, naa béè yii an kaa sá kpɔnɔb pu ní m sòoǹ ní?

12Niinee ní u-boonnooliibi nín béè yii waa nìn bíi sòoǹ nì bi ŋkpɔnɔnyɔkɔ pu, ama Fariisab nì Sadusab dàkatam pu ní u nìn bíi sòoǹ.

Peetroo lī yii Yeesu di sá Meesiya

(Kpèè Maar 8.27-30, Luuki 9.18-21)

13Ní Yeesu nì u-boonnooliibi búntì Seesaaree Fiiliipi tiŋki watil pú. Bi cée, ní u bālifì-bi yii: «Binib lì man Kinibiki pu yii m sá ŋma ní?» 14Ní bi kíí-u yii: «Biba bí yii a sá Yoowaneesi un fùul̀ binib Unimbɔti nyimee, ní biba mun bí yii a sá Unimbɔti bɔnaatiliu Eelii, ní biba mun bí yii sii di sá Yeereemii àá Unimbɔti bɔnaatiliibi kansikin ubɔ.» 15Ní Yeesu bālifì-bi yii: «Kin nimbi fáà, ŋma ní nimbi nyí yii m sá ní?» 16Ní Siimɔn Peetroo kíí-u yii: «Sii di sá Meesiya, ki sá Unimbɔti un bí dimaŋfalinee Jipɔɔn.» 17Ní Yeesu bí-u yii: «Siimɔn, Yoowaneesi jipɔɔn, a bí mmɔnni! Di sá yii an kaa sá unil di lēē an baamɔŋyi ki dàkā-si, an sá m-Baa un bí yilpuee di dàkā-si. 18Man tùkù-si yii: sii di sá Peetroo, ditaŋkpakpaandi nee pu ní m làá mā m-nikitil kí tɔ́kɔń#16.18 Dūú ŋmàntī nì Eef 2.20., ní ŋkúm nì mi-pɔŋŋu làá nyàfiǹ kí gúĺ, kaa làá ŋmā kí ŋá-dì tiba. 19M làá dū Unimbɔti Beel saafiibi kí tīī-si, ní a yaa sòon̄ ki síiǹ pu taapu dooyee, míǹ ní an sòon̄ ki síiǹ yilpu mun#16.19 Dūú ŋmàntī nì 18.18, Yoow 20.23..»

20Yeesu lī míǹ ki dóòyee, ní ki bí u-boonnooliibi yii bí taa pée tùkù báà ubɔ yii úǹ di sá Meesiya.

Yeesu sòon̄ u-kúm nì u-fìkititam pu

(Kpèè Maar 8.31–9.1, Luuki 9.22-27)

21Ŋyunti gbantee ní Yeesu kíĺ ki sòoǹ ki cántí u-boonnooliibi yii: «An sá yii ḿ cù Jeerusaleem, bitindaŋkpilib nì bisaraaŋakpilib nì bimaradakaliibi ń sàaǹ-mi tikpil, ní kí kpɔ̀-mi, winta dalee, ní ḿ fìkitī.» 22Ní Peetroo cáá-u ki kākatì ŋkpaanceeti ki wòon̄-u yii: «Ukpil, Unimbɔti ń cùnnì mbusu ndan! An kaa làá bàń-si míǹ.» 23Ní Yeesu fātìń Peetroo pu ní ki bí-u yii: «Sii un cáá Sitaan landɔkɔŋuee, sútí niin kí wàatī-mi. A sá-mi kisugiŋ ní nsan pu. Saa dàkafī Unimbɔti yam, a dàkafī nniyaamin ní.»

24Niinee ní Yeesu tùkū u-boonnooliibi yii: «Un yaa là kí nóó-mee ń fá úǹ u-ba nín là puee, kí yòon̄ u-dɔpuntikaaŋu kí nīn nóó-mi. 25Kun puee un di yaa là kí fīī u-maŋfalee làá dāá lántí-dì, ama un di yaa fá u-maŋfal man puee di làá dāá fīī-dì. 26Unil, a yaa jíń duulinya nee kɔkɔ ní ki yaa fá a-naŋkee, ba ní a páatì? Ba ní a ŋūǹ kí dūú pà kí fīī a-ba? 27Man Kinibiki làá dāan̄ nì m-Baa Unimbɔti nyooti, ní m-tuuŋyi dāa nóó-mi, ní ḿ dāá pà báà ŋma nì u-tundi nín sá puee#16.27 Dūú ŋmàntī nì Ilan 62.13, Room 2.6.. 28Ibaamɔn ní m tùkù-ni, biba bí ni-kansikin doo kaa làá kpú ní kí ká man Kinibiki ń dāan̄ kii ubɔtee.»

Currently Selected:

Matthieu 16: BASSARDC

Highlight

Copy