Matthieu 12

Yeesu nì ŋwiŋŋuŋfikaa bɔti

(Kpèè Maar 2.23-28, Luuki 6.1-5)

1Boonee ní Yeesu nì u-boonnooliibi bíi jītí bilee kpaaŋŋin ŋwiŋŋuŋfikaa dal. Ŋkùm cúú u-boonnooliibee, ní bi bíi gífí bilee fiŋyi ki ŋmèem̄ abil ki ŋmóò#12.1 Kpèè Ditee 23.26.. 2Fariisab nín ká mimmee, ní bi bí Yeesu yii: «Kpèè a-boonnooliibi bíi ŋáań min ti-marau kòó ŋwiŋŋuŋfikaa dalee#12.2 Kpèè Disa 34.32.!» 3Ní Yeesu kíí-bi yii: «Naa láá pée kàan̄ dalba ŋkùm nín nìn cúú Daafiidi nì u-naacimbi bi ŋá pueeee? 4U nìn kɔ́ kunimbɔtidiin ní usaraaŋakpil tīī-u kpɔnɔb bin bi nìn dūu ŋá Unimbɔti saraayee u nì u-naacimbi ŋmɔ́, ama ti-marau poonee, an kaa nìn pú nsan yii u nì u-naacimbi ń ŋmɔ́ kpɔnɔb gbanti an yaa kaa sá usaraaŋal#12.4 ŋmɔ́ kpɔnɔb: kpèè 1 Sami 21.2-7. - ...kaa sá usaraaŋal: kpèè Akoo 24.9.. 5Àá, naa kàan̄ Mooyiisi marab gbɔŋkun yii ŋwiŋŋuŋfikaa dalee, bisaraaŋaliibi yìntī ŋwiŋŋuŋfikaa marau kunimbɔtidiin, an kaa sá-bi ikpiti#12.5 Kpèè Dikà 28.9-10.? 6Ama m tùkù ki cántí-ni yii, man un jítiǹ kunimbɔtidiiyee bí doo. 7Ni yaa bàà nyímaan Unimbɔti nyɔɔbundi nee taapu yii: <Maa là saraabi, m là ní nīn sūǹ tɔb saai ní#12.7 Oosee 6.6.,> naa bàà kù ibaamɔndambi nee bɔti fám. 8Kun puee man Kinibiki di sá ŋwiŋŋuŋfikaa daan.»

Yeesu cáaǹ unil un ŋal fákée ubɔ

(Kpèè Maar 3.1-6, Luuki 6.6-11)

9Yeesu nyáń niinee ní ki búntì bi-kpafidiiku kubɔn. 10Uninja ubɔ nìn bí niin, u-ŋal fáká, ní bi bālifì Yeesu yii: «Ti-marau pú nsan bí cáaǹ ubunli ŋwiŋŋuŋfikaa dalaaa?» Kun pu ní bi nìn bàlifī-u mimmee di sá bi nìn nyàab̀ nnaakpal kí kɔ́ǹ-u tibɔtin. 11Ní Yeesu bālifì-bi yii: «Ni-kansikin ubɔ di yaa cáá dipibaabil ní dì yaa jéetì mboon ŋwiŋŋuŋfikaa dalee, waa cá kí nyāntí-dàaa? 12Kin, ŋma nín kàlaasì unil un jítiǹ upii kpataaayee. Míǹ puee an pú nsan tí ŋá tiŋan kí tīī unil ŋwiŋŋuŋfikaa dal.» 13Ní u bí kijapaayee yii: «Tàntī a-ŋal!» Ní u tāntì-ŋu. Niinee ní u-ŋal pɔ́ɔkì, ki ŋáŋkì kii ŋun béeyee. 14Niinee, Fariisab búntì ki cūtì ki kpáfì kí kpèè bi nín làá ŋá pu kí kpɔ̀ Yeesuee.

Yeesu ní Unimbɔti lēē

15Yeesu nín béè mimmee, ní u yíkì niin. Binib tikpil nóó-u ní u cāantí bibunliibi kɔkɔ. 16Ama ní u nìn kpáafí-bi tiŋan bí taa tùkù báà ubɔ un ní u sée. 17An ŋá míǹ kí dàkà Unimbɔti bɔnaatiliu Yeesaya nín nìn lī tibɔti tiŋyee dee, yii:

18«Unimbɔti bí yii: <Kpèè m-tɔntɔnliu un m lēēyee sèé.

Úǹ ní m néeń ní m-pɔbil sɔ̀m̀ u-pu.

M làá dū m-Fam kí ŋá u-pu.

Úǹ di làá dāá sòoǹ deedee bɔti kí tùkù atimbun kɔkɔ.

19Waa làá nyàab̀ báà ubɔ tibɔti, kaa làá dāá nīn tátí,

baa làá dāá gbìl̄ u-nyɔkɔ pu sampaambi pu.

20U làá dāá tūtuǹ biwɔfib, kaa làá dāá púntí mmɔ́ɔn ŋun gíì ki gbàkēe,

kaa làá dāá gbíntí fitila un fòol̄ bílbilee.

U làá nīn ŋáań míǹ ní áli ibaamɔn ń dāá jī mpaan.

21Ní atimbun kɔkɔ ń dāá nīn kíǹ ki máká u-pu#12.21 Kpèè Yees 42.1-4..>»

Yeesu pɔŋŋu nín nyánní laakiŋyee

(Maar 3.20-30, Luuki 11.14-23, 12.10)

22Niinee ní bi cáań uninja ubɔ Yeesu cee, arasinii kā u-pu, u sá umɔɔmiin ki sá ujɔfu mun. Yeesu nìn cáaǹ-u, ní u kíǹ ki ŋūǹ ki sòoǹ ní ki wāĺ mun. 23Ní kunipaau kun yú niinee bākatì sèeee ní ki lì yii: «Daafiidi naantiiuee kaa kalin sɔ̀ɔɔ?» 24Ama Fariisab nín gbìl̄ bi lī mimmee, ní bíǹ bí yii: «An sá arasiniibi bɔtiu Beelseebuul di tīī uninja nee mpɔn ní u cáa jì arasiniibi.» 25Ama Yeesu nyí bi-landɔkɔi, ní ki bí-bi yii: «Dibeel din nib di yaa cúu yākatì ki jáà nì tɔbee, see dí kúntí, dàa ŋūǹ kí nīn bí ki cá. Kitiŋ kin kamaa di yaa fātì ki bíi jáaǹ ki-bee, kaa ŋūǹ kí nīn bí ki cá. Míǹ ní kudicaŋu kun kamaa di yaa jáaǹ ku-bee, kaa ŋūǹ kí nīn bí ki cá. 26Míǹ mbaantiim, Sitaan yaa fātìi bíi jì Sitaanee, mimmee u yākatì ki jáaǹ u-ba dee, mana ní u-beel ŋūǹ kí nīn bí ki cá? 27Ni bí yii arasiniibi bɔtiu Beelseebuul di tīī-mi mpɔn ní m jì arasiniibi, kin ŋma tīī ni-jipɔmbi bíǹ mpɔn ní bi cáa jì arasiniibi? Ni-jipɔmbi bi-ba dàkà yii ni bí diyìntil poon. 28Ama an yaa sá nì Unimbɔti Fam pɔŋŋu ní m jì arasiniibee, mimmee Unimbɔti Beel pɔŋŋu bāań-ni dee.

29«A yaa kaa bóob́ upɔɔl, aa ŋūǹ kí kɔ́ u-dumpu kí kóoǹ u-wanti. Asee a yaa bóob́-u ki dóòyee, ní á nín kɔ́ kí kóoǹ u-wanti.

30«Un yaa kaa bí man jandi púee jáà nì man dee, ní un kaa bíi tútúǹ-mi m kōontí ki kpáfée, udaan bíi kàfī ki yàantí dee. 31An pu ní m tùkù-ni yii ikpiti kamaa nì tibɔfan tin unil pée ŋūǹ kí sòoǹee, Unimbɔti ŋūǹ kí dūú pɔ̄ udaan. Ama un di yaa sòon̄ ki yīntiǹ Unimbɔti Famee kpá kí ká u-kpitii pɔ̄tam. 32Un di yaa sòon̄ ki yīntiǹ man Kinibikee ŋūǹ kí ká u-kpitii pɔ̄tam. Ama, un di yaa sòon̄ ki yīntiǹ Unimbɔti Famee, u kpá kí ká u-kpitii pɔ̄tam ŋyunti nee poonaaa, ki kpáaǹ ŋyunti ŋun dāa bí ki dòońee ni.»

Busubu nì bu-biliŋ bɔti

(Kpèè Luuki 6.43-45)

33«Kí wàatī á ká disubimɔntiilee, see á nīn cáá busumɔntiibu. A yaa cáá busukpitibuee, see á ká asubikpiti mun. Busubu biliŋ pu ní bi béetí-bu. 34Nimbi bin tū kii ikoowaatee! Nimbi bin sá binikpitibee! Mana ní ni ŋūǹ kí sòoǹ tibɔmɔntiil? Tin gbí dipɔbilinee, tíǹ ní kinyɔkɔ sòoǹ. Unimɔnti lèekī tin ŋān̄ee u-bɔnyaanti tin sá u-gaajatee poon ní, 35ní unikpiti pɔbikpitil mun sá-u tigaajati ní u lèekī tikpitil di-poon. 36M tùkù ki cántí-ni yii, ibɔsoon dalee Unimbɔti làá dāá bàlifì tibɔfan tin bi sòoǹee kɔkɔ pu. 37Kun puee a-nyɔɔbuŋŋi pu ní Unimbɔti dāa dì kí pɔ̀ a-bɔti, a-nyɔɔbuŋŋi pu ní u dāa tí dì kí kpɔ̀ a-bɔti.»

Fariisab nyàab̀ Yeesu ń ŋá maamaaci ubɔ

(Kpèè Maar 8.12, Luuki 11.29-32)

38Niinee ní bimaradakaliibi nì Fariisab biba bí Yeesu yii: «Ukpil, ŋá maamaaci ubɔ kí dàkà-taa!» 39Ní u kíí-bi yii: «Nimbi waanee nib sá binikpitib, ni nyēē Unimbɔti boon, ní ki bàlifī yii ḿ ŋá maamaaci ubɔ kí dàkà-ni.» Naa làá ká maamaaci ubɔ asee un náań nì Unimbɔti bɔnaatiliu Yoona yɔuee.

40Kii Yoona nín nìn ŋá ujɔŋkpaan poon iwiin ita ŋwiimpu nì kunyeeu ki dāa nyánnée#12.40 Kpèè Yoona 2.1., míǹ ní man Kinibiki làá dāá ŋá iwiin ita ŋwiimpu nì kunyeeu dikaakulin ní kí dāá fìkitī. 41Ibɔsoon dalee, kitiŋ kin bi yíì Niiniifee yab làá dāá kpɔ̀ nimbi waanee nib bɔti, kun puee, Yoona nín nìn cūtì ki sòon̄ nì bi Unimbɔti bɔtee, bi nìn kpántì bi-bimbim ní#12.41 Niiniifi yab bakpantil bɔtee: kpèè Yoona 3.5.. Ama, ubɔ bí doo ki jítiǹ Yoona ní ki sòon̄ nimbi kaa kpántì ni-bimbim. 42Ibɔsoon dalee, Seeba tiŋki nimpubɔtiu làá dāá yīkì kí kpɔ̀ waanee nib bɔti, kun puee úǹ nìn nyánní doooo kitiŋgbeennyɔkɔ ní ki dɔ́miń ki pílifì Saloomɔn nín sòoǹ nì iciin puee#12.42 Kpèè 1 Bib 10.1-10., ama ubɔ bí doo ki jítiǹ Saloomɔn.

Arasinii ŋūǹ kí fàtīí gítiń

(Kpèè Luuki 11.24-26)

43«Arasinii yaa nyáń unilinee, u búntí ki yìiǹ kitimpiliŋ pu ní kí nyàab̀ ŋkɔŋkoon. U yaa nyàab̄ ki gīī, kaa kée, 44ní ú bí yii: <M làá fàtīí gítí laakin m nìn nyánnée.> U yaa fātì niin ki ká ŋkɔŋkoonee dɔ̄ fám ki ŋātì dándanee, 45ní ú cùú cáań arasiniibi biluli bin gíti sá bikpitib ki jítiǹ úŋ̀wuee, ní bi-kɔkɔ ń dāan̄ kí kpāfì kí kàl̄ udaan pu, ní ú mɔ̀tīí bīil̀. Míǹ mbaantiim ní an dāa sá ki tīī waanee nib binikpitib.»

Yeesu na nì u-naalib bɔti

(Kpèè Maar 3.31-35, Luuki 8.19-21)

46Ŋyunti ŋun Yeesu dáá bíi sòoǹ nì kunipaauee, ní u-na nì u-naalib bāań ki yú mmɔŋki ki bàà nyàab̀ kí sòoǹ nì u. 47Ní ubɔ bí-u yii: «Kpèè, a-na nì a-naalib yú mmɔŋki ki nyàab̀ kí sòoǹ nì si#12.47 Uyakatikaa nee kaa bí tigbɔn tikpil poon..» 48Ní Yeesu fātìi kíí kijapaayee, yii: «Ŋma di sá m-na ní bilab di sá m-naalib, kpèè bin sá m-na nì m-naalibee sèé.» 49Ní u dàkā u-boonnooliibi ŋŋal ki bí yii: «Kpèè, m-na nì m-naalib sèé! 50Un kamaa di yaa ŋáań m-Baa un bí yilpuee nín là puee, udaan di sá m-naal, m-niisal àá m-na.»

Currently Selected:

Matthieu 12: BASSARDC

Highlight

Copy