Luc 8

Binimpoobi bin nìn nóó Yeesuee bɔti

1Boonee, Yeesu nìn kíǹ ki yìiǹ ntiŋkpaamun nì ntiŋwaamun ní ki sòoǹ tibɔmɔntiil tin sá Unimbɔti Beel bɔtee, ní u-boonnooliibi saalaa nì bilee táá-u. 2Ní binimpoobi biba bin pu u nìn jìn̄ arasiniibee nì bin u nìn cáaǹ iweenee mun nóó-u. Binimpoobee biba yiŋŋi sèé: Maarii un nyánní Magidalaa tiŋkin u jìn̄ arasiniibi biluli u-puee, 3nì Kusa un nìn kpèé ubɔti Eeroodi gaajatee nimpuu Jaani, nì Susana, nì binimpoobi tikpil bin nìn tìì tin bi cááyee ki tútúǹ Yeesu nì u-boonnooliibee.

Uwaŋyaanli bɔŋmantikaati

(Kpèè Maat 13.1-9, Maar 4.1-9)

4Ntimu kamaa poon nib nìn dòoń Yeesu cee, ní bi-kɔkɔ dūu kpáfì ki ŋá dinikitikpaandi, ní Yeesu dū tibɔŋmantikaal nee ki ŋmāntì-bi yii:

5«Uninja ubɔ di nyáń kí yàaǹ u-wamboolii u-kpaabun. U bíi yàantée, abil aba lítì nsan pu ní binib tàn̄ tàn̄ ní inoon dāa dūu jíń. 6Aba mun lítì ataŋkpee ni ki nyáń ní ki pūtì kpáàa kūń, kun puee kitiŋ kaa sɔ̀m̀. 7Ní aba mun lítì ikuŋkumin, ní an nì ikuŋkum nyáń dicilpu, ní ikuŋkumee wíiǹ ki múkúǹ ní ŋaa ŋúń ki lòon̄. 8Ama ní abil aba lítì laakin kitiŋ ŋān̄ee, ní ki nyáń ki wíiǹ ki cáá apoo, ki lòon̄, ní ŋfin kamaa lòon̄ dilaataal.» Ní Yeesu kútì ki lī yii: «Sii un yaa cáá ditafal kí gbìl̄ee ń gbìl̄.»

Kun pu Yeesu cáá tibɔti ki ŋmàntēe

(Kpèè Maat 13.10-17, Maar 4.10-12)

9Ní Yeesu boonnooliibi bālifì-u yii: «Tibɔŋmantikaalee taapu dàkà yii ba?» 10Ní u kíí-bi yii: «Unimbɔti yāntì nimbi béè u-Beel bɔti tin bí dibalinee taapu, ama bin kíǹee, án làá nīn sá bíǹ tibɔŋmantikaal ní, án nín làá ŋá pu

bi-nimbiliŋ ń nīn kpítì bí taa nín̄ wāĺee,

ní bí nīn pílifí kí taa nín̄ gbìl̀ee#8.10 Yees 6.9..»

Uwaŋyaanli bɔŋmantikaatee taapu

(Kpèè Maat 13.18-23, Maar 4.13-20)

11«M-bɔŋmantikaatee taapu sɔ̀. Ŋwamboolee di sá Unimbɔti nyɔɔbundi. 12Binib biba náań nì iwambool in lítì disaŋkaŋkpilee ní. Binibee gbìl̀ Unimbɔti bɔti ní Sitaan ń dāá cúú lēē bi-pɔbiliŋin bí taa fōō kí kíí kí ká difiil. 13Ní biba mun náań nì in lítì ataŋkpee poonee. Bíǹ gbìl̀ Unimbɔti bɔti ní ki fòol̄ ki kíikí nì dipɔɔpindi, ama ní kaa cáá inyaan kí báań kí sīĺ. Ŋyunti fiii ní bi dù bi-mákal kí páań Unimbɔti pu. Dinimbinaamandi yaa bāań-bee, ní bí lítí. 14Iwambool in lítì ikuŋkuminee náań nì bin gbìl̀ Unimbɔti bɔti ama ní ki yàntī ilandɔkɔ nì tigaajati nì duulinya mɔŋŋu jīǹ mpaan bi-ni, ní baa ti ŋūǹ kí lòoǹ abil án bēe. 15Iwambool in lítì kitimmɔntiinee náań nì bin gbìl̀ Unimbɔti bɔti nì dipɔɔmɔntiil ki fòol̄-tì ki kíikí ki kpáafí-tì bi-pɔbiliŋ poon tiŋan, ki pɔ̄ɔntí mmɔntiimin kí lòoǹ abilee.»

Fitila bɔŋmantikaati

(Kpèè Maar 4.21-25)

16Ní Yeesu gíti bí-bi yii: «Baa tùutī fitila kí dū dibool kí cíkiń u-pu, kaa tí dù-u kí síiń kilambaŋ taapu, ama bi dù fitila kí tɔ́kɔń kifaŋkɔlii pu ní, ní án nīn wāĺ bin kɔkɔ kóòńee#8.16 Dūú ŋmàntī nì Maat 5.15, Luuki 11.33.. 17Tin kɔkɔ bí dibalin binib kaa wāĺee làá dāá bìitī, ní tin kɔkɔ bí dibalin binib kaa nyée làá dāá nyā mpaampiin pu bí béé.

18«Ní kpèè tiŋan min ní ni pílifí tibɔtee. Di sá un yaa cáá tibee dāa fòol̄ kí kūtì, ní un yaa kaa cááyee, Unimbɔti dāa fòol̄ fiii un u bàà nyí yii u cááyee ní!»

Yeesu na nì u-naalib

(Kpèè Maat 12.46-50, Maar 3.31-35)

19Yeesu na nì u-naalib dɔ́miń kí ká-u, ama kunipaau puee baa ŋúń ki bàn̄ u-cee. 20Ní bi tùkū Yeesu yii: «A-na nì a-naalib yú mmɔŋki ki là kí ká-si.» 21Ní Yeesu kíí-bi yii: «Bin pílifí Unimbɔti bɔti ki kpáafí-tèe di sá m-na nì m-naalib.»

Yeesu yāntì kubuŋu ŋmíl̀

(Maat 8.23-27, Maar 4.35-41)

22Ŋwiin ŋubɔee, Yeesu nì u-boonnooliibi kɔ́ buŋalimbun, ní u bí-bi yii: «Tí dùtīmaan lapu pu mɔɔgbandi», ní bi búntì. 23Bi bíi ŋàal̀ kí dùtēe, ní Yeesu dūu gèen̄. Kpalaayee, kubuŋkpaaŋŋu kubɔ dɔ́miń ki bíi jītí dimɔɔl pu, ní nnyim bíi gbéè buŋalimbu. Niinee animbil mántì, 24ní u-boonnooliibi sútì ki pìl̄-u ní ki fīntì-u, ní ki bí-u yii: «Ukpil, ukpil, ti kpíì ní!» Yeesu fīntèe, ní ki kpātì kubuŋu nì nnyim pu. Niinee ní kubuŋu nì tinyiŋgban gbēeǹ ki ŋmíl̀ fɔ́ŋfɔŋ díkí diki 25ní u bālifì u-boonnooliibi yii: «Ni-fookiiu bí la?» Tifaandi kɔ́-bi, ní bi bākatì ki bàlifī tɔb yii: «Kijapaai nee nín sá ŋma ní ki sòoǹ nì kubuŋu nì nnyim gbìliǹ-u míǹ nan dee#8.25 Dūú ŋmàntī nì Ilan 65.8, 89.10, 107.23-32.?»

Yeesu cáaǹ uwaati ubɔ Geeraseen tiŋkin

(Kpèè Maat 8.28-34, Maar 5.1-20)

26Ní bi dūtì dimɔɔl ki bàn̄ Geeraseen tiŋki lapu mɔɔgbandi din túĺ Galiileeyee. 27Yeesu bíi kpákatí buŋalimbunee kpalaayee kitiŋee waatiu ubɔ dɔ́miń ki túŋkìń-u. Arasiniibi biba di nìn kā u-pu, ní u còom̄ dicancaŋgbeel kaa nìn gíti kóò mmɔŋki an yúntì, see kuceeun. 28U nín ká Yeesuee, ní u fáá mbiil ní ki lítì u-taaŋi taapu ki téeń mpɔn yii: «Yeesu Unimbɔti un bí yilpuee Jipɔɔn, a nyàab̀-mi nì tilati ní? M gbàam̄-si, taa sàaǹ-mi.» 29Kun pu uwaatee nìn lī mimmee di sá Yeesu nìn kíĺ ki bíi kpàtī arasiniiyee pu yii: «Á nyā uninja nee ni!» Arasinii gbantee nìn yíkí uninjee pu ní múlmul, ní báà bi yaa bàà dū ikusaka ki bóob́ u-taaŋi nì u-ŋalii kí kàan̄-u sooooyaaa, ní ú tìfì-i, ní arasiniiyee ń cáá-u kí cùnnì kuteeun. 30Ní Yeesu bālifì-u yii: «Bi yíì-si yii ba?» Ní u bí yii: «Bi yíì-mi yii Kupaau.» Kun pu u lī mimmee di sá yii arasiniibee nìn kā u-pu ki wīikí tikpil. 31Ní bi gbāam̀ Yeesu yii ú taa jà-bi kí kɔ́ǹ ditafadaaldi laŋki.

32Digbeetikitil#8.32 Digbeetikitil : kpèè Maar 5.11 diba nìn yú dijool pu niin ki jīǹ, ní bi gbāam̀ Yeesu ú pɔ̄-bi kinyɔkɔ bí cùú kɔ́ igbeetee ni, ní Yeesu pú-bi kinyɔkɔ. 33Niinee arasiniibee nyáń uninjee ni ní ki cūtìi kɔ́ igbeetee ni, ní digbeetikitilee sáǹ ki wúntì ki jéetì dimɔɔlin ki kpíì.

34Bin kpàá igbeetee nín ká mimmee, ní bi sáǹ ki cūtìi tùkū kitiŋin nì ikaan kɔkɔ. 35Ní binib nyánní kí dāá kpèè tin di ŋée. Bi bāań Yeesu ceeyee, ní ki ká uninja un pu u jìn̄ arasiniibee pɔ́ɔkì ki kā u-cee ki pēē tiwan ki yì u-nimbiliŋ. Bi ká-uee, ní tifaandi kɔ́-bi. 36Bin ká tin jítèe bíi máafí bin kíǹee an nín ŋá pu ní arasiniibi nyáń uninjee ni ní u pɔ́ɔkèe.

37Niinee ní Geeraseen tiŋkin yab kɔkɔ gbāam̀ Yeesu yii ú yīkì bi-tiŋkin, kun puee bi fāŋkì tikpil. Yeesu kɔ́ buŋalimbun kí búntée, 38ní uninja un pu u jìn̄ arasiniibee gbāam̀-u yii ú yàntī ú nīn bí u-cee. 39Ní Yeesu bí yii: «Nín̄ kùǹ a-dumpu kí tin māafì a-yab Unimbɔti nín ŋá min kɔkɔ ki tīī-see.» Ní kijapaayee lafun nín kùǹ, ki bàn̄ ki máafì kitiŋ kɔkɔ dituŋkpaandi din Yeesu túń ki tīī-uee.

Yeesu fīkitì Jayirusi sapɔmbiki

(Kpèè Maat 9.18-26, Maar 5.21-43)

40Yeesu nín fātìi dūtì dimɔɔgbandee, dinikitikpaandi nìn kā ki cí-u, kí fōō-u. 41Niinee ní uninja ubɔ dɔ́miń u-cee, bi yíì-u yii Jayirusi, u sá kukpafidii kpiliu. U dɔ́miń ki gbāaǹ Yeesu nimbiin ní ki gbāam̀-u yii ú dāan̄ bí cù u-dumpu, 42kun puee u-sapɔmbaabil bíi kúù. U nìn cáá abin saalaa nì ali nyɔkɔm.

Ŋyunti ŋun Yeesu kíĺ nsan ki cá ukpilee dumpuee, binib nìn bīī u-pu bɔ̀mmm. 43Unimpu ubɔ nìn bí ki fùul̀ ŋkpin an kaa gúǹ áli abin saalaa nì ali. U nìn bíil̀ u-nimbiliŋ kɔkɔ binyɔɔdambi cee, báà ubɔ mun kaa ŋúń ki cáaǹ-u. 44Ní unimpuee dīń Yeesu boon pú ní ki gbēē u-bɔkutil kpaanceetii. Niin niin ní fatiku kpáàa gúń. 45Ní Yeesu bālifì yii: «Ŋma di gbēē-mee?» Ní bi-kɔkɔ bí-u yii baa gbēē-u. Ní Peetroo lī yii: «Ukpil, binib di múkú a-pu ní ki téekí-si.» 46Ní Yeesu bí yii: «Ubɔ gbēē-mi, kun puee m gbìl̄ mpɔn ŋubɔ nyáń m-ni.» 47Unimpuee ká yii Yeesu béè u-puee, ní u dɔ́miń ki gbāaǹ Yeesu nimbiin, tiwun jìkì kpàkpakpa, ki lī kunipaaun niin kun weeŋyi u būǹee nì u nín gbēē Yeesu min ní ki ká dicáaǹdi dicilpu dicilpuee. 48Niinee ní Yeesu bí-u yii: «M-bisal, a-fookiiu di fīī-si. Nín̄ cá nì ŋgbansɔŋfi.»

49Yeesu kaa láá ŋmíl̀ ní unil nyánní kukpafidii kpiliuee dumpu, ní ki bí kukpafidii kpiliu yii: «A-bisal kpíì, taa ti páb́ ukpil fám.» 50Yeesu gbìl̄ee, ní ki bí Jayirusi yii: «Taa fàŋkì, fōō kí kíí, u làá ŋmátí.» 51Bi búntì ki bàn̄ mmɔŋkee, úǹ nì Peetroo nì Yoowaneesi nì Yakubu nì kibiki na nì ki-baa di kɔ́, waa yāntì bin kíǹee kɔ́ kudiin. 52Binib nìn bíi sūǹ ki yáliŋkí kibiki gbanti pu. Ní Yeesu bí-bi yii: «Taa ti sɔ̄maan! Kàa kpíì, kì gèeǹ ní.» 53Niinee ní bi bíi bèel̄ Yeesu, kun puee bíǹ nìn nyí yii kì kpíì. 54Ní Yeesu cúú ki-ŋal ní ki téeń yii: «Kibikee, yīkì.» 55Niinee ní ki-fam fātìi dɔ́miń ki-ni. Kì fīkitì kpalaayee ní ki yáatìi kāl̀. Ní Yeesu bí yii bí tīī-kì tijin kí jī. 56An ŋá kibikee baa nì ki-na bitii ní Yeesu kpáafì-bi yii, tin ŋá nee, bí taa pée māafì-tì báà ubɔ cee.

Currently Selected:

Luc 8: BASSARDC

Highlight

Copy