Luc 9

Yeesu tú u-kpambaliŋ saalaa nì ali

(Kpèè Maat 10.5-15, Maar 6.7-13)

1Yeesu yíiń u-kpambaliŋ saalaa nì alee ki kpáfì ki tīī-bi mpɔn bí nīn jì arasiniibi kɔkɔ, kí nīn cāantí bibunliibi. 2U nìn tú-bi bí nīn sòoǹ Unimbɔti Beel bɔti kí nīn cāantí bibunliibi. 3Ní u bí-bi yii: «Ni yaa cée, ní taa yòon̄ báà tiba: ní taa ŋúb́ ŋkpandɔɔɔ, kuloouaaa, tijinaaa, animbilaaa, kí taa ŋúb́ abɔkuti ali ali. 4Ni yaa kɔ́ kudicaŋu kun ni ní bi yaa fōō-nee, nín̄ bímaan niin kí tin sāā daliŋkin ni làá yīkèe. 5Laan kamaa ní ni yaa bàn̄ ní baa fōō-nee, ní yīkì kitiŋ gbanti pu kí gbāfì ni-taaŋi kpɔŋkpɔm#9.5 Kpèè Maar 6.11., kí dàkà yii ni sòon̄ ki kpáafì-bi.» 6U sòon̄ nì bi míǹ ki dóòyee, ní bi búntì ki yìiǹ ntimbilimu kɔkɔn ki sòoǹ Unimbɔti bɔti, ki cāantí bibunliibi an kɔkɔ.

Ubɔti Eeroodi bàkatitam

(Kpèè Maat 14.1-12, Maar 6.14-29)

7Ubɔti Eeroodi nín nìn gbìl̄ tin kɔkɔ bíi jītée, u bākatì, kun puee biba nìn bí yii: «Yoowaneesi di fātìi fīkitì.» 8Ní biba mun bí yii: «Unimbɔti bɔnaatiliu Eelii di nyánní yilpu ki fātìń.» Ní biba mun bí yii: «An sá Unimbɔti bɔnaatiliibi dooooyee yab ubɔ di fātìi fīkitì.» 9Ama ní Eeroodi bí yii: «Man yāntì bi lēē Yoowaneesi yil, kin ŋma di gíti sá kijapaai kin pu bi sòoǹ míǹ nan dee?» Niinee ní u kíĺ ki nyàab̀ kí ká Yeesu.

Yeesu kpíiǹ binib kutukub biŋmoo

(Kpèè Maat 14.13-21, Maar 6.30-44, Yoow 6.1-14)

10Yeesu kpambaliŋ ŋin u nìn túee bāań ki kpáfì u-cee ki bíi máafí-u bi nín ŋáaǹ puee. Ní Yeesu cáá-bi ki kpōotì bi-ŋmaniŋma kitiŋ kin bi yíì Beetisayidee caŋin. 11Ama kunipaau nín dāa béè laakin bi túĺee ní bi nín jì bi-boon. Ní Yeesu fōō-bi ki sòon̄ nì bi Unimbɔti Beel bɔti, ní ki cáaǹ bin nìn nyàab̀ ú cáaǹ-bee. 12Kujoou nìn bíi jóotée, ní Yeesu kpambaliŋ saalaa nì alee sútìń ki pìl̄-u ní ki bí-u yii: «Yàntī binib nee ń nīn cá ntimbilimun nì ikaan kí nyàab̀ tijin nì laakin bi làá dòon̄ee. Di sá yii laakin ti bí nee, binib kpá.» 13Ní Yeesu kíí-bi yii: «Nimbi ni-ba tīīmaan-bi bí jī.» Ní bi bí-u yii: «Timbi cáá kpɔnɔb biŋmoo nì njɔmbiyaamu muli ja ní, àá a là tí cùú dāń tijin kí cáań kí tīī samaa nee kɔkɔ ń jī ní.» 14Kunipaauee poonee bininjab nìn bàn̄ kutukub biŋmoo nyɔkɔm. Ní Yeesu bí u-boonnooliibi yii: «Ní yàntī bí kàl̄ ikuul ikuul, ŋkuul kamaa ń nīn cáá binib ili nì saalaa nyɔkɔm.» 15U-boonnooliibi nìn ŋá u nín lī puee ki yāntì bi kāl̀ ikuul ikuul. 16Ní Yeesu yōoǹ kpɔnɔb biŋmooyee nì njɔmbiyaamu mulee ní ki wáaǹ ki kpēē kutaa ki jáam̀ Unimbɔti tijin gbanti pu, ní ki gífì ní ki dūu tīī u-boonnooliibi bí yàkatī kunipaau kɔkɔ ń jī. 17Báà ŋma nìn jíń ki díkí, ní bi tōō akpɔnɔkati nì ajɔŋgin ŋin bi ŋmɔ́ ki kíǹee an gbí tikabiti saalaa nì tili#9.17 Dūú ŋmàntī nì 2 Bib 4.42-44..

Peetroo lī yii Yeesu di sá Meesiya

(Kpèè Maat 16.13-19, Maar 8.27-29)

18Dalba Yeesu tí kākatì ki bí laaba u-baba ki mèé. U-boonnooliibi nìn bí u-cee ní u bālifì-bi yii: «Binib lì yii m sá ŋma ní?» 19Ní bi kíí-u yii: «Biba lì yii a sá Yoowaneesi un fùul̀ binib Unimbɔti nyimee. Biba mun lì yii a sá Unimbɔti bɔnaatiliu Eelii, biba mun lì yii an sá Unimbɔti bɔnaatiliibi bikpikib kansikin ubɔ di fīkitì.» 20Ní Yeesu fātìi bālifì-bi yii: «Kin nimbi fáà, ŋma ní nimbi nyí yii m sá?» Ní Peetroo kíí-u yii: «A sá Meesiya un Unimbɔti túnnée ní.»

Yeesu bíi sòoǹ u-kúm nì u-fìkititam pu

(Kpèè Maat 16.20-28, Maar 8.30–9.1)

21Ní Yeesu kpáafì-bi tiŋan yii bí taa pée lì-tì báà ubɔ cee, 22ní ki gíti lī yii: «An máaǹ man Kinibiki ń jī falaa tikpil. Bitindaŋkpilib nì bisaraaŋakpilib nì bimaradakaliibi làá dāá yíí-mi, kí kpɔ̀-mi, ní ḿ dāá fìkitī winta dal.»

23Ní u tùkū bi-kɔkɔ yii: «Un yaa là kí nóó-mee ń fá úǹ u-ba nín là puee kí yòon̄ u-dɔpuntikaaŋu kí nīn nóó-mi baabadal. 24Un di yaa là kí fīī u-maŋfalee làá dāá fá-dì, ama un di yaa dū u-maŋfal ki fá man puee làá dāá fīī-dì. 25Unil, a yaa jíń duulinya nee kɔkɔ, ní sisi a-ba wáŋkèe, ba ní a páatì? 26Un yaa cáá man nì m-bɔti pu icooyee, man Kinibiki mun làá dāá nīn cáá udaan pu icoo m yaa láa gítìń nì m-nyootin nì m-Baa nì u-circir tuuŋyi nyootinee. 27Ibaamɔn ní m sòoǹ nì ni, ni-kansikin biba làá ká Unimbɔti Beel kí wàatī ní kí nín kpú.»

Unimbɔti dàkā yii Yeesu sá u-Jipɔɔn

(Kpèè Maat 17.1-8, Maar 9.2-8)

28Yeesu sòon̄ míǹ, iwiin inii boonee ní ki yōoǹ Peetroo nì Yoowaneesi nì Yakubu ki jɔ́m̀ dijool pu kí mèè ŋwimmeem. 29Ŋyunti ŋun u bíi mèéyee ní u-nimbiin cúu kpántì, ní u-bɔkutil píil̀ káŋkaŋ ní ki jìliŋkī. 30Kpalaayee, binib bili biba bíi sòoǹ nì u. An nìn sá Mooyiisi nì Eelii. 31Unimbɔti nyooti nìn māntìi tú-bi. Bi nìn bíi sòoǹ nì Yeesu u-tundi din sá yii ú kpú Jeerusaleemee pu ní. 32Peetroo nì u-bɔɔbi nìn gèen̄ ki kɔ́ poon, ama bi dāa fīntèe, ní ki ká Yeesu walifiŋu nì binib bilee yú#9.32 Dūú ŋmàntī nì 2 Peet 1.16-18.. 33Ŋyunti ŋun bi làá yīkì Yeesu ceeyee, ní Peetroo bí-u yii: «Ukpil, an ŋān̄ tí gbíntí doo, tí gāā tibìń tita, sii kubɔ, Mooyiisi kubɔ, Eelii mun kubɔ.» - Di sá waa nìn nyí tin u bíi sòoǹee. - 34U bíi sòoǹ mimmee, ní ditagbandi diba dɔ́miń ki bīiǹ bi-pu, ní tifaandi cúú Peetroo nì bin kíǹee. 35Niinee ní bi gbìl̄ Unimbɔti sòon̄ní ditagbandin, yii: «Un bí nee di sá m-Jipɔɔn un m lēēyee! Ní pīlifiǹ-u#9.35 Dūú ŋmàntī nì Yees 42.1, Luuki 3.22..» 36Unimbɔti tin sòoǹ míǹ ki ŋmīlifée an kíǹ Yeesu baba, ní bi kpáafì an bɔti, kaa pée sòon̄ tin bi kée báà ubɔ cee.

Yeesu cáaǹ ubimbidaan ubɔ

(Kpèè Maat 17.14-21, Maar 9.14-29)

37Kutaa wúntì, bi bíi kpákatiń dijoolee, ní dinikitikpaandi diba túŋkìń Yeesu. 38Binib gbanti poon ní uninja ubɔ bíi kūuntí ki lì yii: «Ukpil, m gbàam̄-si, pée fàtī kí kpèè m-jipɔɔn nee. An sá-mi dibibaabil ní. 39Arasinii ubɔ di bí u-pu. An yaa bāań-uee, ní u tátí ní u-wunti jìkì, ní u-nyɔkɔ nyēē kupumpukuu. Arasiniiyee sàantí-u, kaa là kí yàntī-u malaa. 40M mēē a-boonnooliibi yii bí jà-mi-u, ní baa ŋúń.» 41Ní Yeesu bí yii: «Óo binib nee, naa cáá fookii ki gáatì! Kí dāá sāā ŋyunti ŋulɔŋu ní ḿ bàà dūú kàl̄ ni-cee? M làá nīn jīǹ ni-pu kimɔtii kí tin sāā ŋyunti ŋulɔŋu ní? Uninjee, cáań a-bikee doo.» 42Ŋyunti ŋun kibikee dòoń Yeesu ceeyee, ní arasiniiyee fíiǹ-kì ki lúkú ní ki cīŋkì-kì ŋkpitim pu. Ní Yeesu kpātì arasiniiyee pu, ki cáaǹ kibikee, ki dū-kì ki tīī ki-baa. 43Ní báà ŋma bākatì sèeee Unimbɔti pɔŋkpaaŋŋu pu.

Yeesu tí sòon̄ u-kúm nì u-fìkititam pu

(Kpèè Maat 17.22-23, Maar 9.30-32)

Báà ŋma nìn dáá bí ki pàkà Yeesu maamaacib bin kɔkɔ u ŋáańee pu, ní u bí u-boonnooliibi yii: 44«Ní cúú tibɔti tin m làá tùkù-ni kɔŋkɔnneeyee tiŋan. Bi làá dū man Kinibiki kí dūú nyāfiǹ binib.» 45Ama baa nìn gbìl̄ tibɔtee taapu. An nìn dáá bí-bi dibalin, ní baa ŋúń kí béè taapu, ama ní ki fāŋkì, kaa bālifì-u mun.

Ŋma di sá ukpaan?

(Kpèè Maat 18.1-5, Maar 9.33-37)

46Yeesu boonnooliibi nìn bíi kpákà tikpiti pu. 47Ní Yeesu béè bi-landɔkɔi, ní ki cáań kibiyaawaai ki yóoǹ u-cee, 48ní ki bí-bi yii: «Un di yaa fōō kibiyaawaai kii kinee man puee, fōō man m-ba dee, ní un yaa fōō-mee, fōō un túnní-mee mun dee. Di sá yii un yaa sá kiyaawaai ni-kansikinee, úǹ di sá ukpaan.»

Un kaa ná-nee sá ni-yɔu ní

(Kpèè Maar 9.38-40)

49Ní Yoowaneesi bí Yeesu yii: «Ukpil, ti ká uninja ubɔ cáá a-yindi ki jì arasiniibi binib pu, ní timbi bàà nyàab̄ kí pìin̄-u nsan, kun puee waa sá ti-yɔu.» 50Ní Yeesu kíí-u yii: «Taa pìim̄maan-u nsan, kun puee un kaa kpākantí-nee sá ni-yɔu ní.»

Samaarii yab biba kaa fōō Yeesu

51Ŋyunti ŋun u làá yīkì duulinyan kí nīn jɔ́ḿ yilpuee tóobińee, ní u bóob́ yii see ú pée cù Jeerusaleem. 52U nìn tú binib ń lìntī. Binib gbanti nìn cūtì ki kɔ́ Samaarii tiŋki kiban kí bɔ́ntí laakin u làá dāá kɔ́ee, 53ní niin yab yíì, kaa fōō-u, u nín nìn cá Jeerusaleemee pu#9.53 u nín nìn cá Jeerusaleemee pu: Samaarii yab ceeyee, Jeerusaleem nimbɔtijaamii kaa sá imɔnti, see ajoon pu laakin bíǹ cá ki jáaḿee di sá imɔnti.. 54U-boonnooliibi Yakubu nì Yoowaneesi nín gbìl̄ mimmee, ní bi bí yii: «Ti-Dindaan, tí mèè Unimbɔti ŋŋmi ń nyānní yilpu kí dāá wà kí céetí-baaa#9.54 Dūú ŋmàntī nì 2 Bib 1.10-12.?» 55Ní Yeesu fātì ki kpīiǹ-bi#9.55 Tigbɔn tiba kútì yii: «Naa nyí ŋfam min yāntì ni sòoǹ mimmee. Di sá yii Kinibiki kaa dɔ́miń kí kpɔ̀ binib, ama u dɔ́miń kí fīī-bi ní.» Dūú ŋmàntī nì Luuki 19.10.. 56Ní bi nìkī kitiŋgbaŋ kiban.

Bin bàà là kí nóó Yeesuee

(Kpèè Maat 8.19-22)

57Bi bí nsanni ki cée, ní uninja ubɔ bí Yeesu yii: «M làá nīn pée nóó-si, báà laakin ní a yaa cée.» 58Ní Yeesu bí-u yii: «Jiiŋkpaaibi cáá bi-kɔŋkooŋyi ki dɔ̀, ní nnɔmbiyaamu cáá anɔndiin ki dɔ̀, ama man Kinibiki kaa cáá laakin m làá bíĺ m-yil kí ŋùŋfèe.»

59Ní Yeesu bí kijapaai kiba yii: «Nóó-mi.» Ní kijapaayee kíí-u yii: «Ukpil, pɔ̄-mi nsan ḿ síb́ m-baa kí wàatī.» 60Ní Yeesu kíí-u yii: «Yàntī bitaŋkpiibi ń nīn síb̀ bi-taŋkpiibi. Sii dee, cùú sòoǹ Unimbɔti Beel bɔti kí tùkù binib.»

61Ní ubɔ mun gíti dɔ́miń ki bí Yeesu yii: «Ukpil, m làá nīn nóó-si, ama á dá láá pɔ̄-mi nsan ḿ cùú kàan̄ m-dumpu yab kí wàatī.» 62Ní Yeesu bí-u yii: «Sii un yaa cúú dikool kí kpɔ̀ ní ki gíti bíi fàtīi kpèé a-boonee, kaa sá Unimbɔti Beelin yɔu.»

Currently Selected:

Luc 9: BASSARDC

Highlight

Copy