Luc 10

Yeesu tú binib imuŋku ita nì saalaa nì bili

1Boonee ní ti-Dindaan gíti lēē binib imuŋku ita nì saalaa nì bili#10.1 imuŋku ita nì saalaa nì bili: tigbɔn tiba poonee, an kā imuŋku ita nì saalaaní. biba, ki tú-bi bili bili bí lìntī u-nyɔkɔpu kí cù ntimu mun kɔkɔn úǹ u-ba bàà là kí cùee. 2U nìn bí-bi yii: «Kudiceeu wīikí, ama bidicaliibi kaa náaǹ. Mèèmaan bukpaadaan ú tɔ̄ń bitɔntɔnliibi kí kūtì bí dāá cā u-jikaati. 3Nín̄ cámaan. M tú-ni, ni làá nīn bí kii apibil ŋin bí isaakpan kansikinee ní. 4Ní taa yòon̄ animbil, nì kuloou nì anaataka, kí taa yūĺ nsanni kí jāam̀ ubɔ. 5Ni yaa kɔ́ kudicaŋu kunnee, ní péé péé kí jāam̀-bi yii: <Ŋgbansɔŋfi ń nīn bí kudicaŋu nee pu.> 6Un yaa là ŋgbansɔŋfee yaa bí niinee, ní ú fōō ni-gbansɔŋfiŋuee. Un là ŋgbansɔŋfee yaa kpá niinee, ní kpáaǹ ni-gbansɔŋfiŋuee kí búntí. 7Ni yaa kɔ́ laakin ní bi yaa fōō-nee, nín̄ kāmaan kudicaŋu gbantin. Tin kamaa ní bi yaa pée cáań-nee, ní jī kí nyɔ̀, kun puee utɔntɔnli máaǹ tipaal#10.7 Dūú ŋmàntī nì Maat 10.10, 1 Kɔra 9.14, 1 Tiim 5.18.. Ní taa nín̄ kóò ki póotí adiin. 8Ni yaa kɔ́ kitiŋ kin poon ní bi yaa fōō-nee, jīmaan tin kɔkɔ bi yaa pée cáań-nee, 9ní kí cáam̀maan kitiŋ gbanti poon bunliibi, kí tùkù ki-nib yii: <Unimbɔti Beel sútì ki pìlīń-ni.> 10Ama ni yaa kɔ́ kitiŋ kin poon ní baa fōō-nee, nyāmaan adan pu kí lì yii: 11<Ti gbáfì ni-tiŋki kpɔŋkpɔm min táká ti-taaŋee gba ki gíiǹ ki tīī-ni#10.11 Kpèè 9.5, Maar 6.11.. Ama nì míǹ kɔkɔee ní béé yii Unimbɔti beel sútì ki pìl̄-ni.> 12Ibaamɔn ní m tùkù-ni, ibɔsoon dalee, Soodoom#10.12 Kpèè Diny 19.24-28. tiŋki tafadaaldi dāa sɔ́ǹ kitiŋ gbanti yal.»

Mbusu dɔ̄ ki cí ntimu mun kaa fōō Yeesu ki kííyee

(Kpèè Maat 11.20-24)

13«Nimbi Kɔrasin tiŋki yab, mbusu dɔ̄ ki cí-ni, nimbi Beetisayida tiŋki nib. Mbusu dɔ̄ ki cí-ni, kun puee maamaaci tuuŋŋi ŋin m ŋáaǹ nimbi cee nee di yaa bàà nìn ŋá Tiir nì Siidɔn timmunee, kɔnampu nee ntimu gbanti nib bàà nìn pēeǹ ikpalcati ki dū ŋfantam ki pùkū bi-ba ki dàkā yii bi kpántì bi-bimbim#10.13 Kpèè Maat 11.21.. 14Míǹ puee, ibɔsoon dalee, nimbi tafadaaldi dāa jítiǹ Tiir nì Siidɔn nib tafadaaldi. 15Nimbi Kapeernayum tiŋki yab, ni nyí yii ni làá yīkì kí tin sāā kutagbɔŋu níii? Ni làá sìntī kí bà taapu taŋkpiibi ní#10.15 Yees 14.13-15..» 16Ní u gíti lī u-boonnooliibi yii: «Un yaa pílifiǹ-nee, pílifiǹ man dee. Un yaa yíì-nee, yíì man dee, ní un yaa yíì mamee yíì un túnní-mee dee.»

Binib imuŋku ita nì saalaa nì bilee fātìi bāań

17Binib imuŋku ita nì saalaa nì bili#10.17 imuŋku ita nì saalaa nì bili: Tigbɔn tiba poonee, an kā imuŋku ita nì saalaaní, (kpèè B. 1). bin Yeesu túee fātìi bāań nì dipɔɔpindi, ní ki bí yii: «Ukpil, áli gba arasiniibi sīntiǹ bi-ba ki tīī-ti a-yindi pu!» 18Ní Yeesu bí yii: «M ká Sitaan nín nyánní kutagbɔŋu ki bí kii ntaaŋmɔŋmɔee ki lítì. 19M tùkù-ni yii m tīī-ni mpɔn ní tāā ikoobu nì inoom pu kí còom̀ kí nàan̄ Sitaan pɔŋŋu kɔkɔ, tiba kpá kí ŋá-ni tikpitil. 20Ní taa nín fàal̀ yii arasiniibi nín sīntiǹ bi-ba ki tīī-nee ŋmaniŋma pu, ama ní nīn fàal̀ yii ni-yiŋŋi nín ŋmàn̄ yilpuee pu.»

Yeesu bíi fàal̀

(Kpèè Maat 11.25-27, 13.16-17)

21Niinee ní Unimbɔti Fam yāntì Yeesu kíǹ ki bíi fàal̀, ní ki lī yii: «Óooo m-Baa, yilpu nì taapu Dindaan, m nyɔ́ŋkí-si a nín dū tibɔti nee ki bál̀ bin yíì bi-ba biciŋfitiibi nì binyiliibi bí taa béé-tì, ní ki dū-tì ki dàkā bin sá ŋwaamuee. M-Baa, tiŋman an sá míǹ, kun puee míǹ di ŋān̄ a-cee ki fáatì-si.

22«M-Baa Unimbɔti dū tikɔkɔ ki tīī-mi. Báà ubɔ kaa nyí man un sá Unimbɔti Jipɔɔnee asee m-Baa, míǹ ní báà ubɔ kaa nyí un di sá Ubaatee, asee man u-Jipɔɔn nì bin man u-Jipɔɔn yaa là kí dū-u kí dàkèe.»

23Ní u fātì u-boonnooliibi pu ní ki bí bíǹ ŋmaniŋma yii: «An sá diyimɔɔl ki tīī bin wāĺ tin ni wāĺ nee. 24Ibaamɔn ní m sòoǹ nì ni, Unimbɔti bɔnaatiliibi nì bibɔtiibi tikpil bàà nìn pée nyàab̀ kí ká tin ni wāĺ nee ní kaa ká, ki bàà nìn nyàab̀ kí gbìl̄ tin nimbi gbìl̄ nee ní kaa gbìl̄#10.24 Dūú ŋmàntī nì 1 Peet 1.10-12..»

Usamaariija ubɔ niti

25Niinee ní umaradakal ubɔ là kí píĺ Yeesu tibɔti kí kpèè u-nyɔkɔn, ní ki yíkì ki bí-u yii: «Ukpil, mana ní an sá ḿ ŋá ní kí ká dimaŋfal din kaa cáá dikúntilee?» 26Ní Yeesu bí-u yii: «An ŋmàn̄ yii ba ní ti-marau poon? Tin tin a kàaǹee sòoǹ yii ba ní?» 27Ní uninjee kíí-u yii: «An lī yii: <Á nīn néeń a-Dindaan a-Nimbɔtiu nì a-pɔbil kɔkɔ nì a-naŋki kɔkɔ nì a-pɔŋŋu kɔkɔ nì a-landɔkɔŋu kɔkɔ, ní kí nīn néeń a-juti kii sisi a-bee#10.27 Ditee 6.5, Akoo 19.18..>» 28Ní Yeesu bí-u yii: «A kíí an ŋān̄, ŋá míǹ kí dāá ká dimaŋfal gbanti#10.28 Dūú ŋmàntī nì Akoo 18.5..»

29Umaradakalee là kí pɔ̀ u-bee ní ki bālifì Yeesu yii: «Ŋma di sá m-juti ní?» 30Ní Yeesu bí-u yii: «Uninja ubɔ di nyánní Jeerusaleem ki sìntī Jeeriikoo, ní digaŋgandambi biba kíntì-u nsanni ki tāfì-u tiŋan pu u fìkī. Bi fúkúl̀ u-wanti pílpil, ki búntì ki yāntì-u, u kíǹ ki dɔ̄ ki fìkī. 31Ní usaraaŋal ubɔ mun yíkì ki dīń nsan gbanti. U bāań ki ká kijapaayee dɔ̄ee ní u páaǹ mpampa. 32Ní Leefii yab ubɔ mun bāań ki ká kijapaayee dɔ̄, ní u mun páaǹ mpampa. 33Ama usamaariija ubɔ cá nsan ki bāań ki yīkiǹ uninjee, ní ki súń u-saai, 34ní ki sútì ki pìl̄-u, ní ki ŋá u-buuŋyi ŋkpam ní ki dū ndamam mun ki ŋá, ní ki póob́-u, ki yōoǹ-u ki kāaǹ u-maŋki pu, ní ki cáá-u ki cūnnì anicandiinni, ki kpēē-u tiŋan. 35Kutaa wúntèe, ní u nyántì animbil ki tīī ukpil un kpèé anicandiinee, ní ki bí-u yii: <Á kpèè-mi kijapaai nee tiŋan. A yaa gíti jíń animbil min nyɔkɔm u-puee, m yaa láa fātìńee, ḿ téeǹ-si.>» 36Ní Yeesu bālifì umaradakalee yii: «Binib bitee kansikinee, ŋma ní a ká yii u sá un digaŋgandambi kíntì ki gbáńee juti ní?» 37Ní u kíí Yeesu yii: «Un ŋá-u tiŋanee di sá u-juti.» Ní Yeesu bí-u yii: «Too, a mun cùú ŋá míǹ mbaantiim.»

Yeesu māntì Maarta nì Maarii pu

38Yeesu nì u-boonnooliibi nìn kíĺ nsan kí nīn cá ní ki dūu bàn̄ kitimbilii kiban. Unimpu ubɔ nìn fōō-u u-dumpu, bi yíì-u Maarta. 39U nìn cáá naal ubɔ, bi yíì-u Maarii. Maarii úǹ nìn kā ti-Dindaan taaŋi taapu ki pílifí u-bɔti#10.39 Maarta nì Maarii : kpèè Yoow 11.1, 12.1-3.. 40Maarta kaa nìn cáá mpaan, di sá yii atuun kupaau nìn ŋúb́-u, ní u dɔ́miń ki bí yii: «Ukpil, a-tafal kpá nì m-naal nín yāntì man baba pée bíi tūǹ atuun kɔkɔeeee? Tùkù-u ú dāá tūtuǹ-mi.» 41Ní ti-Dindaan kíí-u yii: «Maarta, Maarta, a nìiǹ ki jìkì tiwan tikpil pu, 42ama kuwambambaantiiu di páb́. Kúǹ ní Maarii lēē nee, ní ubɔ kaa ŋūǹ kí fōō-ku u-cee.»

Currently Selected:

Luc 10: BASSARDC

Highlight

Copy