Luc 11

Yeesu dàkā u-boonnooliibi ŋwimmeem

(Kpèè Maat 6.9-15, 7.7-11)

1Dalbee, Yeesu bí laaba ki mèé Unimbɔti. U mēē ki dóòyee, ní u-boonnooliibi kansikin ubɔ bí-u yii: «Ukpil, dàkà-ti bi nín mèé Unimbɔti puee, a lì kii Yoowaneesi nín nìn dàkā u-boonnooliibi puee.» 2Ní u bí-bi yii: «Ni yaa bíi mèéyee, ní lì yii:

<Ti-Baa,

yàntī bí béé yii a sá Unimbɔti circirdaan,

kí yàntī a-Beel ń dāan̄.

3Tīī-ti kutaa sá kamaa kun ti làá jēe.

4Dū ti-kpitii kí pɔ̄-ti,

kun puee ti mun pūǹ bin ŋáań-ti ikpitee bi-kpitii.

Taa pɔ̄ mpaan Sitaan ń kīil̀-ti.>»

5Ní Yeesu gíti bí-bi yii: «Tí dūú ŋmàntī yii ni-kansikin ubɔ di yaa cáá bɔɔ ní ki yaa cūtì u-cee kunyataasiiu, ki bí-u yii. <M-bɔɔ, pìnnì-mi kpɔnɔb bita#11.5 kpɔnɔb bita: Isirayeel yab ceeyee, kpɔnɔ di nìn sá tijin ki līī., 6kun puee m-bɔɔ ubɔ nyánní nsan ki kɔ́-mi ní maa cáá báà tiba kí ŋá-u tijin.> 7U-bɔɔyee yaa kíiń-u kudii poon yii: <Taa páb́-mi, man pīiǹ kudii, man nì m-biyaamu kɔ́ ki dōoǹ, maa ti ŋūǹ kí yīkì kí tīī-si kpɔnɔb.> 8M tùkù-ni ibaamɔn ní, báà u yaa kaa làá yīkì kí tīī-u kpɔnɔb u nín sá u-bɔɔyee puee, see ú yīkì kí tīī-u tin kɔkɔ u nyàab̀ee u nín pée gbíntìi páb́-uee pu. 9Míǹ pu ní man tùkù-ni yii, mèèmaan Unimbɔti, u làá tīī-ni. Nyàab̀maan, u làá yàntī ní ká. Kpāafìmaan, u làá pìitī-ni. 10Kun puee, sii un yaa mēē Unimbɔti tibee, see á fōō kudɔŋu, ní sii un yaa nyàab̀ tibee, see á ká kudɔŋu. Sii un di yaa tí yú ki kpáafée, see bí pìitī-si.

11«Ni-kansikin ŋma di yaa cáá kibiki, ní kì yaa mēē-u ujɔm, ní ú dū ukoobu kí tīī-kì? 12Àá, kì yaa tí mēē-u dijindi, ní ú dū unoom#11.12 unoom : kpèè 10.19. kí tīī-kì? 13Too, nimbi bin sá binikpitibee yaa nyí ki tìì ni-biyaamu tiwammɔntiil, kin ataa aŋa pu ní Ubaati un bí yilpuee kaa nín tìì Circir Fam bin kɔkɔ yaa mèé-u Ŋfam gbantee?»

Yeesu cáaǹ umɔɔmiin ubɔ

(Kpèè Maat 12.22-30, Maar 3.20-27)

14Kijapaai kiba nìn bí, arasinii kā u-pu ki yāntì u kpántì umɔɔmiin. Yeesu jìn̄ arasiniiyee, ní umɔɔmiinee kíǹ ki bíi sòoǹ, ní kunipaauee bākatì sèeee. 15Ama biba bí yii: «An sá arasiniibi bɔtiu Beelseebuul#11.15 Beelseebuul : kpèè Maat 10.25. di tīī-u mpɔn ní u cáa jì arasiniibi.» 16Ní biba mun là kí píĺ-u tibɔti ní ki bí-u yii ú ŋá kudaaŋŋu kubɔ bí béé yii u-pɔŋŋu gbanti baasii nyánní Unimbɔti cee. 17Ama Yeesu nìn nyí bi-landɔkɔi ní ki bí yii: «Dibeel din nib di yaa cúu yākatì ki jáà nì tɔbee, see dí kúntí, ní di-diiŋŋi ń lítí kí yāŋkì tɔb kí wìil̀. 18Ní ni bí yii Beelseebuul di tīī-mi mpɔn ní m jì arasiniibaaa? Mimmee, Sitaan yaa fātìi bíi jáà nì úǹ u-bee, mana ní u-beel ŋūǹ kí nīn bí ki cá! 19Man yaa cáá Beelseebuul pɔŋŋu ní ki jì arasiniibee, mimmee ni làá lì yii arasiniibi bɔtiu Beelseebuul di tīī ni-jipɔmbi mun mpɔn ní bi jì arasiniibi deeyaa! Ni-yab bi-ba dàkà yii ni bí diyìntil poon dee. 20Ama, an yaa sá Unimbɔti pɔŋŋu ní m cáa jì arasiniibee, mimmee, an dàkà yii Unimbɔti Beel pɔŋŋu#11.20 Unimbɔti Beel pɔŋŋu: kpèè Disa 8.15. dɔ́miń ni-cee dee.

21«Upɔɔl yaa kā nì u-janjawanti ki cí u-diikuee, tiba kaa gbèetī u-wanti. 22Ama ubɔ mun yaa gíti bí ní ki pɔ̄ɔǹ-uee, u dòoń kí já nì u kí fōō u-janjawanti tin pu u mákée, ní kí kóoǹ u-wanti kí yàkatī u-yab.

23«Un yaa kaa bí man jandi púee jáà nì man dee, ní un yaa kaa bíi tútúǹ-mi m kōontí ki kpáfée, bíi yàantí dee.»

Arasiniibi nín fàtī ki gítiń puee

(Kpèè Maat 12.43-45)

24«Arasinii yaa nyáń unilinee, u búntí kuteeu pu ní ki yìiǹ ki nyàab̀ ŋkɔŋkoon. U yaa nyàab̄ ki gīī, kaa kée, ní ú bí yii: <M làá fàtīí gítí laakin m nìn nyánnée.> 25U yaa gítìń ki ká bi ŋātì kudii ki bɔ́ntì-kuee, 26ní ú cùú nyàabìń arasiniibi biluli bin cáá ntoom ki jítiǹ úŋ̀wuee, ní bí dāan̄ kí kpāfì kí kàl̄ udaan pu, ní ú mɔ̀tīí bīil̀ kí jītíǹ mpeepeekaam.»

Bin baasii bí mmɔnnee

27Yeesu bíi sòoǹ mimmee, ní unimpu ubɔ téeń kunipaaun yii: «Unimpu un cáá a-pool ki màl̄-si a ŋáam̀ u-biilee bí mmɔnneeee!» 28Ní Yeesu kíí-u yii: «Bin baasii bí mmɔnnee di sá bin pílifí Unimbɔti bɔti ki ŋáań tì nín lī puee!»

Bi bālifì Yeesu yii ú ŋá maamaaci ubɔ

(Maat 12.38-42, Maar 8.12)

29Kunipaau dɔ́miń ki wíiǹ Yeesu ceeyee, ní u bí yii: «Nimbi waanee nib sá bikpitib, ki bàlifī ḿ ŋá kudaaŋŋu kubɔ. Ama naa làá ká kudaaŋŋu kubɔ, asee kun náań nì Unimbɔti bɔnaatiliu Yoona yɔkɔee. 30Kii Yoona nín nìn sá kudaaŋŋu ki tīī Niiniifi yab puee#11.30 Yoona (B. 29 nì 30) : kpèè Yoona 3.3-5. - Niiniifi : kpèè Maat 12.41., míǹ ní man Kinibiki làá nīn sá kudaaŋŋu ki tīī nimbi waanee nib. 31Ibɔsoon dalee, unimpubɔti un nìn nyánní Seeba tiŋkinee làá dāá yīkì kí kpɔ̀ nimbi waanee nib bɔti, kun puee u nìn nyánní kitiŋkuntinyɔkɔ ki dɔ́miń ki pílifì Saloomɔn ciiŋyi#11.31 Kpèè 1 Bib 10.1-10.. Ama ubɔ bí doo ki jítiǹ Saloomɔn. 32Ibɔsoon dalee, kitiŋ kin bi yíì Niiniifee yab làá dāá yīkì nimbi waanee nib pu kí kpɔ̀ ni-bɔti, kun puee Yoona nín nìn sòon̄ nì bi Unimbɔti bɔtee, bi nìn kpántì bi-bimbim#11.32 Kpèè Yoona 3.5,8,10.. Ama ubɔ bí doo ki jítiǹ Yoona ní ki sòon̄ ní nimbi kaa kpántì ni-bimbim.»

Fitila bɔŋmantikaati

(Kpèè Maat 5.15, 6.22-23)

33«Ubɔ kaa tùutī fitila kí dūú báĺ, kaa tí dù dibool kí cíkiń u-pu. Bi dùú tɔ́kɔń kifaŋkɔlii pu ní bin kóòńee ń nīn wāĺ. 34A-nimbiliŋ sá a-wunti fitilau ní. A-nimbiliŋ yaa ŋān̄ee, a-wunti kɔkɔ wāĺ ní, ama ŋi yaa kaa ŋān̄ee, a-wunti kɔkɔ kɔ́ dibɔmbɔndin dee. 35Míǹ puee, á kpèè tiŋan ŋwalifi ŋun bí a-nee ń taa kpántí dibɔmbɔndi. 36A-wunti kɔkɔ yaa wāĺ ní dijandi diba yaa kaa bí dibɔmbɔndinee, mimmee a-wunti kɔkɔ bí ŋwalifin dee, kii bi yaa tūū fitila ŋwalifi nín ŋmíntí-si pu a wāĺ puee.»

Yeesu wòon̄ Fariisab nì bimaradakaliibi

(Kpèè Maat 23.1-36, Maar 12.38-40, Luuki 20.45-47)

37Yeesu sòon̄ míǹ ki dóòyee, ní Fariisa ubɔ yíiń-u yii ú dāan̄ bí jī tijin, ní Yeesu kɔ́ u-cee ki kāl̀ kí jī. 38Fariisee ká yii Yeesu kaa fíntì u-ŋalii, kii bi-marau nín sá bí ŋá pu kí wàatī kí nín jī tijinee, ní an ŋá-u bitii. 39Ní ti-Dindaan bí-u yii: «Nimbi Fariisab, ni fíntí tiyuti nì asambil boon kaa fíntí poon. Diwaŋfikil nì ntoom gbí ni-pɔbiliŋ poon. 40Bigbaambi, Unimbɔti un ŋá boonee, úǹ di kaa tí ŋá poonaaa? 41An bàà sá ní ŋá biwɔfib tiŋan, ní tikɔkɔ ń ŋāŋkì kí tīī-ni.

42«Mbusu bí ki tīī nimbi Fariisab, kun puee ni lèekī saalaa kamaa pu kubɔ kubɔ goosi faati nì ditunnuul nì tikuŋfaal tin kɔkɔ kíǹee#11.42 Kpèè Akoo 27.30, Ditee 14.22. pu ki tìì Unimbɔti, ama ní kaa là kí nīn bí deedee kí nīn néeń Unimbɔti. Kin, min ni bàà máaǹ kí péé kí ŋá kí wàatī kí nín ŋá tin kíǹee dee.

43«Mbusu bí ki tīī nimbi Fariisab, kun puee ni néeń ki kàal̀ nyɔkɔpu jaliŋ akpafidiinni, ki néeń bí nīn jáaḿ-ni sampaambi pu ki tìì-ni jilma. 44Mbusu bí ki tīī-ni, kun puee ni bí kii akaakul ŋin jīlifì ki nákáǹ kitiŋ, á dāá còom̀ kí jītí ŋi-pu, kaa kpāantíí béé yii tiwan tin kaa ŋān̄ee pu ní a jítèe ní.»

45Ní umaradakal ubɔ bí yii: «Ukpil, a nín sòoǹ pu nee, a sìí ki kpāantí timbi deeyaa!» 46Ní Yeesu kíí-u yii: «Mbusu bí ki tīī nimbi bimaradakaliibi mun, kun puee ni cáá awaŋgul ŋin nyìm̀ee ki tūntí binib ní nimbi ni-ba kaa là kí dū ni-ŋambiki kí dáb́ kí tūtuǹ-bi. 47Mbusu bí ki tīī-ni, kun puee ni māā Unimbɔti bɔnaatiliibi bin ni-naanjab nìn kūūyee akaakumɔnti. 48Ni ŋáań míǹ kí dàkà yii ni-naanjab nín nìn túń atuun ŋiŋyee ŋān̄ ni-cee, kun puee bíǹ kūū Unimbɔti bɔnaatiliibi, ní nimbi māā bi-kaakuliŋ. 49An pu ní Unimbɔti iciindaan nìn lī yii: <M làá tɔ̄ń m-bɔnaatiliibi nì m-kpambaliŋ bi-cee: bi làá kpɔ̀ biba ní kí sàaǹ bin kíǹee.> 50An puee, nimbi waanee nib làá ká ditafadaaldi Unimbɔti bɔnaatiliibi bin kɔkɔ ni kūūyee pu, kí yòon̄ doooo Unimbɔti nín náań duulinya, 51kí yòon̄ní Abeel kí dāá sāā Sakari un bi nìn kūū nsaraafan nì kunimbɔtidii kansikinee#11.51 Kpèè Diny 4.8, 2 Kroo 24.20-22.. Tiŋman ní m tùkù-ni, nimbi waanee nib làá ká ditafadaaldi nnikpaakoon gbanti pu.

52«Mbusu bí ki tīī nimbi bimaradakaliibi, kun puee ni pīiǹ dinyil punyɔkɔ ki lēē saafii. Naa làá kɔ́ ni-ba ní ki jì bin bàà là kí kɔ́ee.»

53Yeesu nyáń Fariisee dumpuee, ní bimaradakaliibi nì Fariisab fōō aŋuu ŋkpitim pu ní ki kíǹ ki bíi bàlifī-u tibɔti tikpil. 54Bi bíi pīil̀-u tibɔti ki là ú sòoǹ kí yìntī bí ká nsan kí cúú-u.

Currently Selected:

Luc 11: BASSARDC

Highlight

Copy