Luc 7

Yeesu cáaǹ Room soojakpiliu tɔntɔnliu

(Kpèè Maat 8.5-13)

1Yeesu nín sòon̄ nì samaa míǹ ki dóòyee, ní u búntì Kapeernayum. 2Room soojakpiliu ubɔ nìn bí niin ki cáá utɔntɔnli un u néeń tikpilee, u būǹ ki làá kpú. 3Usoojakpilee nín gbìl̄ bi sòoǹ Yeesu puee, ní u tú Juuda yab tindaŋkpilib biba bí cùú gbàam̀ Yeesu ú dāá cáaǹ u-tɔntɔnliu. 4Bi bāań ki ká Yeesu, ní ki gbāam̀-u mmɔntiimin ki lī yii: «Usoojakpil gbanti pée máaǹ á tūtuǹ-u ní, 5kun puee u néeń timbi Juuda yab. Úǹ di máń ti-kpafidiiku.» 6Bi lī mimmee, ní Yeesu nóó-bi ki búntì. Bi tóob́ mmɔŋkee, ní usoojakpilee túnní u-bɔɔbi bí tùkù Yeesu yii: «Ukpil, taa sàaǹ a-ba, maa máaǹ á kóoń m-dumpu. 7An pu ní m dākafì yii man kaa kpántì kí dāan̄ a-cee. Á pée lì dinyɔɔbumbaantiil, m-tɔntɔnliu làá pɔ̄ɔkì. 8Di sá, man cáá bikpilib bin taapu m bée, ní ki cáá soojab bin mun bí man taapuee. M ŋūǹ kí tùkù ubɔ yii: <Cù doo,> ní ú cù, ki ŋūǹ kí tùkù ubɔ mun yii: <Dāan̄ doo,> ní ú dāan̄, ní kí bí m-tɔntɔnliu una yii: <Ŋá yéè,> ní ú ŋá.» 9Yeesu nín gbìl̄ mimmee, an ŋá-u bitii ní ki mɔ́ɔkiǹ-u, ní u fātì ki bí kunipaau kun nóó-uee yii: «Ibaamɔn ní m sòoǹ, maa láá pée ká ubɔ cáá fookii yéè Isirayeel yab kansikin gba.» 10Ní bin usoojakpilee túnnée fātìi nín gítí ki bàn̄ mmɔŋki, ki ká utɔntɔnlee pɔ́ɔkì.

Yeesu fīkitì ukpiipu ubɔ jipɔɔn

11Boonee ní Yeesu búntì Nayiin tiŋkin, ní u-boonnooliibi nì kunipaau mun nóó-u ki cūtì. 12Bi tóob́ kí bà kitiŋ gbanti punyɔkɔkee#7.12 kitiŋ gbanti punyɔkɔkee: Isirayeel tiŋkinee, bi nìn māā digundi ní kí tū kitiŋ ní kí lēē kipunyɔkɔ kí ŋmā kí mɔ̄tì ki-pu., kpalaayee binib biba cáǹ utaŋkpiil ubɔ kuceeun kí síb́. An nìn sá ukpiipu ubɔ jipɔmbaabil ní, ní kitiŋee nib kupaau nìn cēentí ukpiipu gbanti. 13Ti-Dindaan nín ká-uee, ní u-bɔti cúú-u falaa, ní u bí-u yii: «Taa ti sɔ̄!» 14ní ki sútìń ki dāatì u-ŋal ki gbēē nlundɔ, ní bin tú utaŋkpiilee síl̀. Ní Yeesu bí yii: «Unaacimpɔɔn, m pú-si kinyɔkɔ yii á yīkì!» 15Ní utaŋkpiilee fīkitì ní ki yáatìi kāl̀ ní ki bíi sòoǹ. Ní Yeesu dū-u ki tīī u-na. 16Niinee, tifaandi kɔ́ báà ŋma, ní bi bíi pàkà Unimbɔti ki lì yii: «Unimbɔti bɔnaatikpaaŋwu ubɔ nyáń kitiŋ pu, Unimbɔti dɔ́miń kí jòò u-nibul dee.» 17Ní Yeesu bɔti gbanti gbītì Juudee timmu kɔkɔn, ki kpáaǹ ikpaanceeti mun.

Yoowaneesi túnní u-boonnooliibi Yeesu cee

(Kpèè Maat 11.2-19)

18Yoowaneesi boonnooliibi cūtì ki máafì-u Yeesu nín ŋáaǹ tiŋyee kɔkɔ, ní Yoowaneesi yíiń bi-kansikin bili 19ní ki dū-bi ki tú ti-Dindaan Yeesu cee, bí bàlifì-u yii: «Sii di sá un ti nyí yii u dòońeeyaaa#7.19 Kpèè Maat 11.3., tí nīn kā ki cí ubɔ ní?» 20Bi bāań Yeesu ceeyee, ní ki bí-u yii: «Yoowaneesi un fùul̀ binib Unimbɔti nyimee di túnní-ti tí bàlifì-si yii sii di sá un ti nyí yii u dòońeeyaaa, tí nīn kā ki cí ubɔ ní?» 21Ŋyunti ŋun bi bāań Yeesu ceeyee, u bíi cāantí bibunliibi tikpil iween kupaau, ki jì arasiniibi binib pu, ki ŋúbití bijɔfub nimbiliŋ. 22Ní u fātìi kíí bin Yoowaneesi túnnée yii: «Nín̄ cámaan kí tùkù Yoowaneesi tin ni kée nì tin ni gbìl̄ee: bijɔfub nimbiliŋ ŋúbití, bideembi còom̄, binyaŋgbantiibi pɔ́ɔkí, bitafakpaafub kíǹ ki gbìl̀, bitaŋkpiibi fìkitī, ní biwɔfib gbìl̀ tibɔmɔntiil#7.22 Dūú ŋmàntī nì Yees 35.5-6, 61.1.. 23Un fōō-mi ki kíí kaa gùgufēe bí mmɔnneeee!»

24Yoowaneesi boonnooliibee nín gítée, ní Yeesu bíi sòoǹ nì kunipaau Yoowaneesi pu yii: «Ni cūtì kuteeun kí kpèè Yoowaneesee, dinicil dilal ní u sá ní? U-bɔti kpántí kii kubuŋu nín fīintí dikaliŋgbaandi pueeee? Aayee. 25Kin ba ní ni cūtìí kpèè ní? Uninja ubɔ un pēē abɔkutimɔnteeee? Aayee. Bin pēē agaajabɔkuti ki bí mmɔntiiminee bí bibɔtiibi dumpui ní. 26Kin ba pu ní ni baasii cūtì ki kpēē Yoowaneesi ní? Ni cūtìí kpèè-u yii u nín sá Unimbɔti bɔnaatiliuee níii? Tiŋman ní m sòoǹ nì ni, un ni ká niinee jítiǹ Unimbɔti bɔnaatiliibi. 27Kun puee Yoowaneesi pu ní Unimbɔti gbɔŋku poon sòon̄ yii: Unimbɔti bí yii:

<M làá tɔ̄ń m-tuuŋŋu ŋú lìntīń a-nyɔkɔpu

kí ŋānkì-si nsan#7.27 Mala 3.1..>»

28Ní Yeesu gíti bí yii: «Ibaamɔn ní m sòoǹ, bin kɔkɔ unimpu màl̄ee kansikinee, ubɔ kaa bí ki sá ukpaan ki bàn̄ Yoowaneesi. Ama un sá kiwaai Unimbɔti Beelinee jítiǹ Yoowaneesi.» 29Dinikitil kɔkɔ, ki kpáaǹ bifɔtiliibi gba, pílifiǹ Yoowaneesi ní ki béè yii Unimbɔti sá deedeedaan ní ki yāntì Yoowaneesi fùl̄-bi Unimbɔti nyim. 30Ama ní Fariisab nì bimaradakaliibi yíì min Unimbɔti bàà là bí ŋée, kaa cāntì Yoowaneesi fùl̄-bi Unimbɔti nyim.

31Ní Yeesu gíti bí yii: «Ba ní m làá dū kí ŋmàntīǹ nimbi waanee nib dee? Ni náań nì ba deeyaaa? 32Ni náań nì mbiyaamu mun kā mmɔŋki ki tátí mu-jutiibi pu yii: <Ti búń-ni awul, naa ŋɔ́ń, ní ti gāā-ni ikpiisilan, naa súń.> 33Di sá Yoowaneesi un fùul̀ binib Unimbɔti nyimee dɔ́miń, kaa jīǹaaa, kaa nyù ndaam, ní naa fōō-u ní ki bí yii arasinii di bí u-pu. 34Ní man Kinibiki dɔ́miń ki jīǹ ki nyù ní ni bí yii: <Kpèèmaan, uninja nee, úǹ sá upoofu nì udanyɔl ní ki bɔ́ɔtí bifɔtiliibi nì binikpitib bin kɔkɔ kíǹee.>» 35Ama bin fōō Unimbɔti ciiŋyi ki kííyee dàkà yii i sá deedee.

Yeesu pú unimpu ubɔ u-kpitii

36Dalbee ní Fariisa ubɔ yíiń Yeesu yii ú dāan̄ u-dumpu bí jī, ní Yeesu cūtì ní ki kāl̀ bí jī. 37Kinimpulaakpaai kiba nìn bí kitiŋ gbantin. U nín gbìl̄ yii Yeesu bí Fariisee dumpu ki jīǹee ní u yōoǹní talaalu un kā ditaŋkpal kpalbaunee#7.37 ditaŋkpal kpalbaunee: kpèè Maat 26.7.. 38U bāańee ní ki yúl̀ Yeesu boon u-taaŋi cee ní ki bíi sūǹ ní nnyinnyim sìtī Yeesu taaŋi pu#7.38 taaŋi pu: Isirayeel yab yaa làá nìn jī tijinee, bi nìn kàal̀ tikampati pu ní kí pɔ́ĺ bi-taaŋi kí gíiǹ bi-boon ní ki kpàkā ki jīǹ. An pu ní unimpuee nìn yúl̀ Yeesu boon ní ki sūǹ u-nyinnyim sìtī u-taaŋi pu., ní u cáá u-yikpiti ki pítí nnyinnyim ki móotí Yeesu taaŋi ní ki dū talaaluee ki sītì ŋi-pu. 39Ufariisaja un nìn yíiń Yeesu bí jēe nín ká mimmee ní u bíi dàkafī u-pɔbilin yii: «Kijapaai nee yaa bàà lafun sá Unimbɔti bɔnaatiliu, u bàà béetí unimpu un gbèetī-u nee nín sá dinimpucil diŋyee, kun puee u sá kilaakpaai ní.» 40Ní Yeesu bí-u yii: «Siimɔn, m cáá tiba ki làá tùkù-si.» Ní Siimɔn kíí-u yii: «Ukpil, sòoǹ.» 41Ní Yeesu bí yii: «Kijapaai kiba nìn pīnnì binib bili animbil. Ubɔ nìn cáá-u dipɔndi animbil jitɔmbi alaataa aŋmoo, ní un kíǹee imuŋku ili nì saalaa. 42Bi-liitilee kansikin, báà ubɔ kaa ŋūǹ kí pà-u, ní u ŋá bi-liitil tiŋan ki dū bi-pɔndee ki pú-bi. Bi-kansikinee, ŋma di làá nīn néeń un dū dipɔndi ki pú-bee tikpil?» 43Ní Siimɔn bí yii: «M pàkā yii un pɔndi wīikí bi ŋá-u tiŋanee di làá nīn néeń-u.» Ní Yeesu bí-u yii: «A lī an kāl̀.»

44Ní Yeesu fātì unimpuee watil ní ki bí Siimɔn yii: «Kéè, a ká unimpu neeyaa? M nín kóoń a-dumpuee, aa pú-mi nnyim m fíntì m-taaŋi#7.44 Ŋwìiń nyalaŋki pú yab nín nìn fòol̄ binicambi puee dee. Kpèè Diny 18.4, 19.2.. Ama úǹ dū u-nyinnyim ní ki sītì m-taaŋi pu ní ki dū u-yikpiti ki pítì-ŋi. 45M nín páaǹnée, aa lī-mi yii: <Si nì nsan.> Ama, doooo m nín kɔ́nnée, unimpu nee pée bí ki móotí m-taaŋi ki dàkà u nín néeń-mi puee. 46Aa yāaǹ m-yil pu ŋkpam#7.46 Kpèè Ilan 23.5. mun kpaŋkpam, ama úǹ sītì m-taaŋi pu talaalu. 47An pu ní m lī-si yii unimpu nee dàkā dineendi tikpil m-pu, kun puee m dū u-kpitii kupaau ki pú-u. Un kpitii di yaa bí fiii ní bi dūu pú-uee, úǹ dàkà dineendi fiii ní.» 48Ní Yeesu bí unimpuee yii: «M dū a-kpitii ki pú-si.» 49Bin bin nìn kpáfìi kā ki jīǹee nìn bíi dàkafī bi-pɔbiliŋin yii: «Uninja nee sá ba yɔu ní ki tin pūǹ binib kpitii na?» 50Ama ní Yeesu tùkū unimpuee yii: «A-fookiiu fīī-si, nín̄ cá nì ŋgbansɔŋfi.»

Currently Selected:

Luc 7: BASSARDC

Highlight

Copy