Genèse 40

Faaroo tɔntɔŋkpilib bili damintiiti

1Míǹ boonee ní bin pūul̀ Faaroo kpɔnɔbee kpiliu nì bin bàtī ndaam ki tìì-uee kpiliu yīntiǹ bi-dindaan Eejipiti bɔtiu. 2Ní Faaroo fōō u-tɔntɔŋkpilib bilee pu diŋuul, an dàkà yii bin pūul̀-u kpɔnɔbee kpiliu nì bin bàtī ndaam ki tìì-uee kpiliu. 3Ní u yāntì bi cáá-bi ki pīiǹ sarka ujanjakpil un kpèé u-sarkadambee cee, laakin bi nìn pīiǹ Jooseefee. 4Ní ujanjakpilee lēē Jooseefi ú nīn bí bi-cee ki tútúǹ-bi atuun. Bi nìn yúntì sarka poon ŋwaam.

Jooseefi lēē bisarkadambi bili damintiiti taapu

5Bi bí sarkan niin ní kunyeeu kubɔee, un pūul̀ Eejipiti bɔtiu kpɔnɔbee nì un bàtī ndaam ki tìì-uee liitil dámintì, báà ŋma nì u-damintiiku nì ku-taapu. 6Kutaa wúntèe Jooseefi dɔ́miń bi-cee ní ki ká yii an kaa mɔ̄ǹ-bi. 7Ní u bālifì-bi yii: «Ba ŋá ní ni kā míǹ díǹ an kaa mɔ̄ǹ-ni ní?» 8Ní bi kíí-u yii: «Ti dámintì ní ubɔ kaa bí kí tùkù-ti taapu.» Ní Jooseefi bí-bi yii: «Unimbɔti di kaa tùkù tidamintiil taapuɔɔɔ? Míǹ puee māafìmaan-mi ni nín dámintì puee.»

9Ní bin bàtī ndaam ki tìì ubɔtee kpiliu máafì Jooseefi u-damintiiku yii: «M dámintì yii busubu bun bi yíì fiinyee di yú m-nimbiin, 10ki cáá apan ata. Ní busubuee púkuḿ ki lòon̄ abil ní abil mántì. 11Ní m ŋúb́ Faaroo sambinyɔkaaki m-ŋaan, ki kītì fiinyi biliŋee ki ŋmáaḿ ŋi-nyim ki ŋá Faaroo sambinyɔkaakin ní ki dūu tīī-u.» 12Ní Jooseefi bí-u yii: «A-damintiiku taapu sèé. Asupan atee, taapu sá iwiin ita. 13An kíǹ iwiin ita Faaroo làá nyāntí-si sarkan kí gíiǹ a-tundi kí ŋúbíǹ-si, ní á tīī-u tinyɔkaal kii a nín nìn pée kpààa tìì-u puee. 14Ama m gbāam̀-si, bi yaa fātìi fōō-si ní a-pɔbil sɔ̄ŋkèe, a mun ń téetí kí ŋá-mi tiniti kí sòoǹ m-bɔti kí tùkù Faaroo kí nyāntí-mi sarka nee poon. 15Di sá yii bi cúuń-mi mpɔn ní Eebru yab tiŋkin. Doo nee muee, maa ti ŋá tiba ní bi dū-mi ki tɔ́ sarka.»

16Bin pūul̀ ubɔti kpɔnɔbee kpiliu nín ká yii Jooseefi tùkū u-bɔɔ u-damintiiku taapu an ŋān̄ee, ní u mun bí Jooseefi yii: «Ma mun dámintì yii bikpɔnɔmɔntiibi tikabiti tita ŋɔ́kɔ́ tɔb pu ní m tú. 17Ní kukabiku kun tɔ́kɔ́ yilpuee poonee, bikpɔnɔmɔntiibi bin kɔkɔ ubɔti ŋmóòyee kā, ní inoon dòoń ki jīǹ an kpɔnɔbee m-yil pu.» 18Ní Jooseefi bí-u yii: «Kpèè, a-damintiiku taapu sèé. Tikabiti titee, taapu di sá iwiin ita. 19An kíǹ iwiin ita Faaroo làá nyāntí-si sarkan, kí lēē a-yil, kí cáá a-wunti kí lúntí ndɔ pu, ní inoon ń dāá jī a-nanti.»

20Iwiin ita dalee, an dūu ŋmāntiǹ Faaroo maaliwiiŋŋu jiŋaaliu, ní u yíiń u-tɔntɔnliibi kɔkɔ jiŋaal. U yāntì bi nyántì bin bàtī ndaam ki tìì-uee kpiliu nì bin pūul̀-u kpɔnɔbee kpiliu ki cáań u-tɔntɔnliibi kɔkɔ nimbiin. 21Ní Faaroo gíiǹ bin bàtī ndaam ki tìì-uee kpiliu tundi ki ŋúbiǹ-u, ní úǹ bātì ndaam ki tīī-u. 22Ama ní u yāntì bi dū bin pūul̀-u kpɔnɔbee kpiliu ki lúntì ndɔ pu, kii Jooseefi nín nìn tùkū-bi bi-damintiiti taapu puee. 23Ama ní bin bàtī ndaam ki tìì Faarooyee kpiliu súntì Jooseefi pu, kaa téetì kí sòoǹ u-bɔti kí tùkù ubɔti.

Currently Selected:

Genèse 40: BASSARDC

Highlight

Copy