Genèse 39

Jooseefi bí Pootifaar cee Eejipiti

1Isimaayeel yab cáá Jooseefi ki cūnnì Eejipitee ní Faaroo janjakpiliu Pootifaar, ueejipitija dá-u bi-cee. Pootifaar gbanti di nìn sá bin cí Faaroo cindee kpiliu. 2Ti-Dindaan nìn yú Jooseefi boon#39.2 Dūú ŋmàntī nì Atuun 7.9. ní tin kɔkɔ u ŋáańee nìn còom̄-u tiŋan. U nìn kóò u-kpiliu ueejipitijee dumpu ní. 3Jooseefi kpiliu nìn dáań ki ká yii ti-Dindaan yú u-boon, ki yàntī tin kɔkɔ u ŋáańee cá nyɔkɔpu. 4An puee Jooseefi nìn ká diyimɔɔl u-kpiliu cee u dū-u ki kpántì úǹ u-ba tɔntɔnliu, ní ki dū-u ki ŋá ukpil ú nīn kpèé u-cindi poon tuuŋŋi nì tin kɔkɔ u cááyee. 5Kí yòon̄ ŋyunti ŋun Pootifaar dū Jooseefi ki kāaǹ tikpiti ú nīn kpèé u-cindi nì u-wanti kɔkɔee, ní Jooseefi puee, ti-Dindaan bīiǹ ueejipitijee dicaŋku pu, ní ki bīiǹ ki kpáaǹ tin kɔkɔ u nìn cáá u-cindi nì u-satinee pu. 6U ká mimmee ní ki dū tikɔkɔ nì tikɔkɔ ki ŋá Jooseefi ŋaan kaa ti pée kpèé báà tiba, asee tijin tin u làá jēe baba pu ní u dàkafī.

Jooseefi nì u-kpiliu nimpuu bɔti

Jooseefi nìn yáà unil ní ki nìn ŋān̄ unaacimpɔɔn an kaa cáá bí lì. 7An dāa bāań ŋyunti ŋubɔee ní u-kpiliu nimpuu dū u-nimbiliŋ ki mántì u-pu ní ki bí-u yii: «Dāan̄ kí dòon̄ nì mi.» 8Ní u yíì, ní ki bí u-kpiliu nimpuu yii: «Kpèè, man ní m-kpiliu dū dicindi tundi kɔkɔ ki ŋúbiǹ. U cáá m-pu dimákal, an puee waa ti kpèé tiba dicindi poon. 9Ubɔ kaa jítiǹ-mi dicindi nee poon. U pú-mi nsan ḿ ŋá tikɔkɔ, asee sii baba ní maa máaǹ kí gbēē, kun puee a sá u-nimpuu. An puee maa ŋūǹ kí ŋá ikpitikpaan gbanti kí yìntīǹ Unimbɔti.» 10Baabadal unimpuee pée páb̀ Jooseefi ní yii ú dòon̄ nì u, ama ní úǹ kaa pílifíǹ-u.

11Dalbee Jooseefi kɔ́ kudii poon ki bíi tūǹ ditundi báà ubɔ nì ubɔ kpá. 12Niinee ní unimpuee cúú Jooseefi bɔkutil ní ki bí-u yii: «Dòon̄ nì mi!» Ní Jooseefi sáǹ ki nyáń mmɔŋki ki yāntì u-bɔkutil unimpuee ŋaan. 13Unimpuee nín ká yii dibɔkutil gbíntì u-ŋaan Jooseefi sáǹ ki nyáńee, 14ní u yíiń dicindin nib, ní ki bí-bi yii: «Dāá kpèèmaan! Bi cáań-ti ueebruja ú nīn cáá-ti ki gbíilíǹ ní! U dɔ́miń kí bàà dòon̄ nì man dee ní m fáá mbiil. 15U nín gbìl̄ m fáá mbiilee ní u sáǹ ki nín nyēē ki fá u-bɔkutil.»

16Ní u dū Jooseefi bɔkutilee ki bíl̀ ki kɔ́ĺ u-ba u-cal ń bàń. 17U-cal Pootifaar dāa bāańee ní u gíiǹ ki téeǹ míǹ mbaantiim yii: «Ueebruja uyumbu un a cáań-tee dɔ́miń kí dòon̄ nì mi. 18Ŋyunti ŋun m fáá mbiilee ní u sáǹ ki fá u-bɔkutil m-cee.» 19Jooseefi kpiliu nín gbìl̄ u-nimpuu sòon̄ ki lī yii: «Kpèè a-yumbuuee nín ŋá-mi puee!» ní u fōō diŋuul tikpil. 20Ní u yāntì bi cúú Jooseefi ki cáa tɔ́ sarka laakin ubɔti nìn pìintí bin yīntiǹ-uee.

Jooseefi bí sarka

Jooseefi kpántì usarkadaan. 21Ama ti-Dindaan nìn yú Jooseefi boon sarkan, ki dàkā-u u-ŋanti ní ki yāntì u ká diyimɔɔl ujanjakpil un kpèé bisarkadambee cee. 22Ujanjakpilee nìn dū bisarkadambi kɔkɔ ní ki ŋúbiǹ Jooseefi. Úǹ di nìn kpèé atuun ŋin kɔkɔ bi nìn tūǹee. 23Ujanjakpilee kaa nìn gíti kpèé atuun ŋin u nìn dūu ŋúbiǹ Jooseefee, kun puee ti-Dindaan nìn yú Jooseefi boon ní ki yàntī u-tuuŋŋi kɔkɔ còom̄-u tiŋan.

Currently Selected:

Genèse 39: BASSARDC

Highlight

Copy