Genèse 41

Faaroo damintiiti

1Abin ali boonee ní Faaroo dámintì kudamintiiu kubɔ, yii u yú dimɔɔl din bi yíì Niilee#41.1 Niil mɔɔl nìn sá dimɔɔkpaandi din yì Eejipiti pɔŋŋu kɔkɔee ní. caŋin. 2U yú mimmee ní ki ká inasal iluli, i bí màlmal ki ŋān̄, ki nyánní dimɔɔlee poon ki yú digbándi ki ŋmóò timool. 3Boonee ní nnagɔŋgɔmu ŋkpiimu mululi mun nyánní dimɔɔl gbantin ki páaǹní in béeyee boon ki dɔ́miń ki yú ki kɔ́ĺ-i dimɔɔgbandi. 4Ní nnagɔŋgɔmu ŋkpiimuee dū inasal in bí màlmal ki ŋān̄ee ki nátì. Niinee ní Faaroo cúu fīntì.

5Boonee ní Faaroo fātìi gèen̄ ní ki gíti tí dámintì yii idifin iluli in nyìm̀ ki ŋān̄ee túuń dikakabaantiil pu. 6U kpēēyee ní ki ká ndifiŋkpiimu mululi mun ugbuŋkoon fáá mu fáaḿee nyáń ki kútì idifin in béeyee pu. 7Ní ndifiŋkpiimu mun fáaḿee dū idifin in nyìm̀ ki ŋān̄ee ki nátì. Niinee ní Faaroo tí cúu fīntì ní ki ká yii an sá kudamintiiu.

8Kutaa wúntèe ubɔti pɔbil bíil̀, ní u tú bi yíiń Eejipiti tiŋki poon bibɔɔbi nì biciŋfitiibi kɔkɔ. Bi bāańee ní ubɔti kàan̄ u nín dámintì puee ki tùkū-bi, ama bi-kansikin báà ubɔ kaa ŋúń ki lēē taapu ki tùkū-u#41.8 Dūú ŋmàntī nì Dani 2.2.. 9Niinee ní bin bàtī ndaam ki tìì Faarooyee kpiliu bí ubɔti yii: «Ti-baa, diyìntil din m yīntèe, m làá bìitī di-pu díǹ. 10Di sá dalbee, a nìn fōō timbi a-tɔntɔnliibi pu diŋuul ki cáá man nì bin pūul̀-si kpɔnɔbee kpiliu ki tɔ́ sarkan ujanjakpil un kpèé a-sarkadambee dumpu. 11Man nì u nìn dámintì kunyabaantiiu poon ní báà ŋma nì u-damintiiku nì ku-taapu. 12Ti nì ueebrunaacimpɔɔn ubɔ nìn bí sarkan niin, u sá ujanjakpil yumbuu. Úǹ ní ti nìn kàan̄ ti-damintiiti ki tùkū ní u lēē báà ŋma damintiiku taapu nín sá puee ki tùkū-u. 13U nín tùkū-ti ti-damintiiti taapu puee, míǹ ní an jítì. A fātìi gíiǹ ditundi din m nìn pée tūǹee ki ŋúbiǹ-mi, ní ki yāntì bi lúntì bin pūul̀ a-kpɔnɔbee kpiliu ndɔ pu.»

Jooseefi lēē Faaroo damintiiti taapu

14Niinee ní Faaroo tú bi yíiń Jooseefi. Ní bi nyántì-u kusarkadiin malaa, ní u kōol̀ ki kpántì u-wampeeŋkaati ní ki nín cá ubɔti nimbiin. 15U bàn̄ Faaroo ceeyee ní Faaroo bí-u yii: «M dámintì kudamintiiu kubɔ ní báà ubɔ kaa ŋúń ki tùkū-mi ku-taapu. Ama m gbìl̄ yii bi yaa kàan̄ kudamintiiu ki tùkū-see, a ŋūǹ kí lēē ku-taapu.» 16Ní Jooseefi kíí Faaroo yii: «An kaa sá man di ŋūǹ kí ŋá tiba, Unimbɔti di làá tùkù-si a-damintiiku taapu ní án sɔ̀ŋkì a-pɔbil.» 17Ní Faaroo bí Jooseefi yii: «M dámintì yii m yú dimɔɔgbandi ní. 18M yúee ní ki ká inasal iluli, i bí màlmal ki ŋān̄, ki nyánní dimɔɔlin ki dɔ́miń ki yú digbándi ki ŋmóò timool. 19Boonee ní nnagɔŋgɔmu ŋkpiimu mululi páaǹní. Doooo nee, maa láá pée ká nnakpiimu míǹ Eejipiti tiŋki kɔkɔ poon ki ká. 20Nnagɔŋgɔmu ŋkpiimuee bāań mimmee ní ki dū inasal in ŋān̄ ki bí màlmalee ki nátì. 21Ní a yaa ká-iee, aa lì yii i náĺ tiba gba. I nín pée bí pu ŋgɔŋgɔmu ŋkpiimu puee, míǹ ní i gbíntìi bí. Ní m cúu fīntì. 22Boonee ní m gíti dámintì yii didikakabaantiil di lòon̄ idifin iluli ní i nyìm̀ ki ŋān̄. 23Ní ndifiŋkpiimu mululi mun ugbuŋkoon fáá mu fáaḿee mun nyáń ki kútì idifin ipeekaayee pu. 24M yúee ní ndifiŋkpiimuee dū idifin in nyìm̀ ki ŋān̄ee ki nátì. M kàan̄ míǹ ki tùkū bibɔɔbi, ama bi-kansikin báà ubɔ kaa ŋúń ki béè taapu ki tùkū-mi!»

25Ní Jooseefi bí Faaroo yii: «Ti-baa, a-damintiitee liitil pée sá kudamintibaantiiu ní. Unimbɔti di là kí dàkà ubɔti tin u là kí ŋée. 26Inasal iluli in ŋān̄ee, taapu di sá abin aluli, ní idifin in ŋān̄ee mun taapu sá abin aluli. Niin sá kudamintibaantiiu ní. 27Nnagɔŋgɔmu ŋkpiimu mululi mun páaǹní ipeekaayee boonee, taapu di sá abin aluli mun. Ní ndifiŋkpiimu mululi mun ugbuŋkoon fáá mu fáaḿee taapu sá ŋkùm abin aluli. 28Kii m nín bàà tùkū ubɔti puee, Unimbɔti di lēē min u là kí ŋée ki dàkā-u. 29Tijin làá gbí Eejipiti tiŋki kɔkɔ poon abin aluli. 30Boonee ŋkùm làá nyā abin aluli. Binib dāa súntí gba yii tijin nìn gbí Eejipiti tiŋkin, kun puee ŋkùmee làá dāá nàan̄ Eejipiti tiŋki ní. 31Ŋkùm gbanti nín dāa pɔ̄ɔ̄ puee dāa yàntī binib kaa dāa gíti nyí yii digbíl diba nìn kɔ́ Eejipiti tiŋkin. 32Ti-baa, a nín dámintì kudamintibaantiiu mili kɔkɔ nee dàkà yii Unimbɔti làá lafun ŋá min u bɔ́ntì kí ŋée, án kaa làá ti yúntí. 33An puee, ti-baa Faaroo, á kpèè kí nyàab̀ unil un cáá dinyil nì iciinee kí dū-u kí kàan̄ tikpiti Eejipiti tiŋki pu. 34Ti-baa, an ŋān̄ á kàan̄ bikpilib biba Eejipiti timmu poon, binib yaa kùn̄ tikpaajin digbíl biŋŋi alulee poonee, bí cúú yàkatī miŋmoo pu ní bikpilibee ń lēē diba pu kí dūú kpāafì cakalaabi poon. 35Á yóoń mara yii Eejipiti tiŋki kamaa poonee, bí kóoǹ digbíl biŋŋi alulee jinti kɔkɔ kí kpāfì, kí dūú kpāafì ní tikɔkɔ ń nīn bí a-taapu. 36An jintee ń nīn yú míǹ, ŋkùm biŋŋi alulee yaa láa bāańee, bí dāá dūú fīī kitiŋ pu nib ŋkùm ń taa láa kpɔ̀ kí céetí-bi.»

Bi kāaǹ Jooseefi tikpiti

37Tibɔti tin Jooseefi sòon̄ee mɔ́ɔkiǹ Faaroo nì u-naacimbi kɔkɔ. 38Ní Faaroo bí-bi yii: «Ti ŋūǹ ki gíti ká unil ubɔ u cáá Unimbɔti Fam ki bí kii kijapaai neeee?» 39Ní ubɔti bí Jooseefi yii: «Sii ní Unimbɔti dàkā tin bí nee kɔkɔ, ŋma di gíti bí ki cáá iciin ki nyí ki jítiǹ sii! 40Sii di kíǹ ki yì man samaau. A yaa lī puee, míǹ ní m-timbundi kɔkɔ nib làá pīlifiǹ-si kí ŋá#41.40 Dūú ŋmàntī nì Atuun 7.10.. Man nín sá ubɔtee baba ní m jítiǹ-si.» 41Ní Faaroo gíti bí Jooseefi yii: «M dū Eejipiti tiŋki kɔkɔ ki ŋá a-ŋaan.» 42U lī mimmee ní ki fúutì u-bɔmbiki ki dūu fúuń Jooseefi ŋambiki ki pēeǹ-u dibɔkutimɔntiil ní ki léeǹ-u sindaariya léeŋkaati#41.42 Dūú ŋmàntī nì Dani 5.29.. 43Ní Faaroo yāntì Jooseefi kɔ́ u-tɔrɔkuliliitiu poon, ní binib līī ki tátí yii: «Ní gbàam̄maan!» Míǹ ní Faaroo nìn kāaǹ Jooseefi ú nīn kpèé Eejipiti tiŋki kɔkɔ.

44Ní Faaroo bí Jooseefi yii: «Man di sá Faaroo, Eejipiti bɔtikpaaŋwu. Ama sii yaa kaa pú kinyɔkɔee, báà unil kpá kí ŋá tiba nì tiba Eejipiti tiŋki kɔkɔ poon.» 45Ní Faaroo páaǹ Jooseefi diyindi yii Safnati-Paneeya, ní ki dū Pootifeera un sá utandaan Ooni tiŋkinee bisal Asinaati ki tīī-u u cáá. Boonee, Jooseefi yìin̄ ki māntì Eejipiti tiŋki kɔkɔ poon. 46Ŋyunti ŋun bi nìn nyántì Jooseefi sarkan ki cáá-u ki cūnnì Eejipiti bɔtiu Faaroo ceeyee, u nìn cáá abin mmuŋku nì saalaa ní.

U nyáń Faaroo ceeyee ní ki yìin̄ ki māntì Eejipiti tiŋki kɔkɔ. 47Digbíl biŋŋi alulee poonee, tijin nìn lòon̄ tikpil. 48Ní Jooseefi kūliŋkì digbíl biŋŋi alulee poon tijin tin kɔkɔ bí Eejipitee nì ti-nyɔkɔm ki yóoǹ Eejipiti timmun. Kitiŋ kamaa poonee, u nìn kóoǹ tijin tin bi cáń tisatinee ki kpáafì. 49Jooseefi nìn kūliŋkì tijin tikpil tikpil ki kpáafì an wīikí kii tiŋku gbandi bul nín dɔ̄ puee. Baa nìn gíti bíi ŋmàntī-tì gba, kun puee an kaa nìn bí ŋkaan.

50Kí wàatī ŋkùm biŋŋi alulee ń bàńee, Pootifeera un nìn sá utandaan Ooni tiŋkinee bisal Asinaati nìn màl̄ Jooseefi mbininjabiyaamu muli. 51Ní Jooseefi pú kikpilii diyindi yii Manasee#41.51 Manasee taapu di sá yii u yāntì m súntì., di sá u nìn lī yii: «Unimbɔti yāntì m súntì m-gìńdi nì m-baa cindi kɔkɔ pu.» 52Ní u pú kililiitii diyindi yii Eefiraayiim#41.52 Eefiraayiim taapu di sá yii u pú-mi mmaal., di sá u nìn lī yii: «Unimbɔti pú-mi mmaal kitiŋ kin poon m jíń falaayee.»

53Abin aluli ŋin poon digbíl kɔ́ Eejipiti tiŋkinee yuntiŋu sāā. 54Ŋkùm biŋŋi aluli ŋin bɔti Jooseefi nìn sòon̄ee kíĺ ki bíi dòoń. Ŋkùm nìn jéetì ntimu kɔkɔn#41.54 Dūú ŋmàntī nì Atuun 7.11., ama tijin nìn bí Eejipiti tiŋki kɔkɔ poon. 55Ŋyunti ŋun ní Eejipiti yab jinti dāa dóò ŋkùm nyáń kitiŋ puee ní bi kíǹ ki sūǹ Faaroo cee ki nyàab̀ tijin. Ní Faaroo bí-bi yii: «Ní cùú ká Jooseefi, u yaa lī puee ní ŋá míǹ.» 56Ŋkùm nìn nyáń Eejipiti tiŋki kɔkɔ poon. Jooseefi nìn pīitì cakalaabi kɔkɔ ní ki nyáfiǹ Eejipiti yab tijin, di sá ŋkùm nìn mɔ̄tìi bíi pɔ́ɔkí ki cá Eejipiti tiŋki poon. 57Ntimu kɔkɔ nib nìn dòoń Eejipiti ní ki dāā tijin Jooseefi cee, kun puee ŋkùm nìn pɔ̄ɔ̄ kitiŋ kɔkɔ pu.

Currently Selected:

Genèse 41: BASSARDC

Highlight

Copy