Genèse 32

1Kutaa wúntì an dáá bɔ̀ǹee ní Laaban yíkì ki kpàl̄ u-bisalib nì u-naantiibi ki kāaǹ-bi, ki mēē ki bīiǹ bi-pu ní ki fātìi nín kùǹ u-dumpu#32.1 Tigbɔn tiba poonee, 32.1-33 sá 31.55–32.32..

Jaakɔb bɔ́ntì kí tūŋkì Eesayuu

2Ní Jaakɔb mun nín nìkì u-saŋŋu. U cée ní Unimbɔti tuuŋyi cílìń u-pu nsanni. 3U ká-iee ní ki téeń yii: «Unimbɔti janjanaapaal sèé!» An pu ní u pú niin diyindi yii Maanayiim, taapu di sá yii: <Ajanjanaapaa ali>.

4Niinee ní Jaakɔb lēē binib ki tú u-maan Eesayuu cee Eedoom satin, Seeyiir tiŋki poon. 5U nìn kpáafì-bi ki bí yii: «Ni yaa bàn̄ee ní tùkù m-kpiliu Eesayuu yii: <Mama a-tɔntɔnliu Jaakɔb di túnní bí tùkù-si yii, doooo m nín búntì Laaban ceeyee, niin ní m kāl̀ ki dāa sāā díǹ. 6M cáá inaa nì mmamu nì ipii nì iŋoobu nì bitɔntɔnliibi bininjab nì binimpoobi. An pu ní m túnní bí dāá tùkù sii m-kpiliu yii á dàkà-mi a-ŋanti kí fōō-mi.>»

7Ní binib bin u túee fātìi gítìń u-cee ní ki tùkū-u yii: «Ti bàn̄ ki ká a-maan Eesayuu. U mun bí nsanni ki túŋkiń-si u nì binib alaataa anaa.» 8Niinee ní tifaandi kɔ́ Jaakɔb ní u-pɔbil bíil̀. Ní u cúú u-nib nì u-piii nì u-ŋoobui nì u-naai nì u-gutaamui ki yākatì akiti ali. 9Di sá u dākafì yii: «Eesayuu yaa bāań ki kūū dikitil dibee, dikitil din kíǹee ń sāǹ kí ŋmátí.»

10Míǹ boonee ní Jaakɔb mēē Unimbɔti yii: «M-naanja Abraam Nimbɔtiu, m-baa Isaaki Nimbɔtiu, m-Dindaan, sii di bí-mi yii: <Yīkì kí nīn gítí a-tiŋkin laakin bi màl̄-see, m làá ŋá-si tiŋan.> 11M pátì kí fōō tiŋan tin a ŋá-mi nee nì tibulcin tin a dàkā man a-tɔntɔnliu nee, kun puee ŋkpandɔ baba ní m nìn ŋúb́ ki dūtì Jɔɔdan buŋŋu nee. Ama díǹ pu nee, m yākatì m-nib nì m-waŋkuti akiti ali ní nee. 12Míǹ puee m gbāam̀-si, á fīī-mi m-maan Eesayuu ŋaan. M fàŋkí ú taa láa kpɔ̀ man nì m-nimpoobi nì m-biyaamu. 13Di sá yii sii di líì-mi dimákal yii: <M làá bìin̄ a-boon kí yàntī a-naantiibi ń bùtī kii tiŋku gbandi bulee, bí taa ŋmā kí kàaǹ-bi.>»

14Niin ní Jaakɔb gbíntì ki dōoǹ kunyeeu gbanti. Kutaa wúntèe ní u lēē u-waŋkuti tin u cááyee poon tiba kí pɔ̄ u-maan Eesayuu. 15U nìn lēē iŋɔsal alaataa ali nì iŋɔjaa mmuŋku, ki lēē ipisal alaataa ali nì ipijaa mmuŋku, 16ki lēē igutaamu in cáá mbiyaamu ŋáaḿee nì i-biyaamu mmuŋku nì saalaa, ki lēē inasal imuŋku ili nì inajaa saalaa, ki lēē mmansalimu mmuŋku nì mmanjamu saalaa. 17U nìn yākatì tiwaŋkutee akiti akiti ki dūu tīī u-tɔntɔnliibi ní ki bí-bi yii: «Lìntīmaan kí nīn cá kí nīn pá tɔb boon ki dátiǹ tɔb.» 18Ní u kpáafì un līīyee yii: «M-maan Eesayuu yaa tú-si nsanni ní ki yaa bālifì-si yii: <A-kpiliu sá ŋma ní a cá la? Ŋma di yì tiwaŋkuti tin līī a-nyɔkɔpu nee?>, 19á kíí-u yii: <An sá a-tɔntɔnliu Jaakɔb di yì. U túnní-mi ḿ cáań kí tīī u-kpiliu Eesayuu ní. Úǹ u-ba páń boon ki dòoń.>»

20Míǹ mbaantiim ní u tùkū u-tɔntɔnliu uliliiti nì utataati nì u-tɔntɔnliibi bin kɔkɔ u lēē tiwaŋkuti ki tīī bí lìntī u-nyɔkɔpuee, ní ki bí-bi yii: «Ni yaa tú Eesayuu nsannee, min ní ni làá lèe dee. 21Ní ní kūtì kí lì yii: <A-tɔntɔnliu Jaakɔb u-ba páń boon ki dòoń.>» Di sá u lī u-neen yii: «M làá dū tiwaŋkuti nee kí pɔ̄-u kí sɔ̀ŋkì u-pɔbil, boonee ní kí dāá nín ká-u. An yaa yíì u táá sɔ̄ m-saai kí fōō-mi.» 22Ní bitɔntɔnliibi kpáaǹ tiwan tin u lēē kí pɔ̄ Eesayuuyee ki búntì ní úǹ u-ba gbíntì dinaapaal pu niin ki dōoǹ.

Jaakɔb nì Unimbɔti mɔ̀n̄

23Kunyeeu gbanti ní Jaakɔb yōoǹ u-nimpoobi liitil nì inimpuyumbu liitil ki kpáaǹ u-biyaamu saalaa nì kibee ki dūtì Yaabɔki buŋŋu laakin pú kaa nyóòyee. 24U cáá u-yab kɔkɔ ki dūtì mbun ki kpáaǹ tin kɔkɔ u cááyee. 25Jaakɔb cáá-bi ki dūtì míǹ ki dóò, ki kíǹ u-babee ní unaaciin ubɔ dɔ́miń kunyeeu ki cìb̄-u dimool ní bi mɔ̀n̄ áli ntaafaabɔmbɔm. 26Unaaciinee#32.26 Jaakɔb naaciiŋwu bɔtee, kpèè 29.31, Oosee 12.5. kpēē yii waa làá ŋmā kí líí Jaakɔbee ní u fáá u-nantaŋkpal ní u-kpìiŋŋu yɔ̄tì, ama ní u nì Jaakɔb gbíntìi bíi mɔ̀. 27Boonee ní unaaciinee bí Jaakɔb yii: «Kutaa bíi wúntí, gíiǹ-mi kí líí.» Ní Jaakɔb bí-u yii: «A yaa kaa bīiǹ m-boon, m kpá kí gíiǹ-si kí líí.» 28Ní unaaciinee bālifì-u yii: «Bi yíì-si yii ba ní?» Ní u kíí-u yii: «Bi yíì-mi yii Jaakɔb ní.» 29Ní unaaciinee bí-u yii: «Baa làá ti yíiń-si Jaakɔb, bi làá nīn kíǹ ki yíì-si yii Isirayeel#32.29 Isirayeel taapu di sá yii Un nì Unimbɔti mɔ̀n̄ee: kpèè 35.10. ní. Di sá yii si nì Unimbɔti mɔ̀n̄ ní si nì binib mun mɔ̀n̄, ní a pɔ́ɔkiǹ bi-kɔkɔ.»

30Ní Jaakɔb bí-u yii: «M gbāam̀-si, tùkù-mi a-yindi.» Ní u bí-u yii: «Ba pu ní a là kí béé m-yindi#32.30 Dūú ŋmàntī nì Bibɔ 13.17-18.?» Niin niin ní u bīiǹ Jaakɔb boon. 31Ní Jaakɔb pú niin diyindi yii Peeniyeel, taapu di sá yii: <Unimbɔti nimbiin>, di sá u lī yii: «M ká Unimbɔti yéè kpìrrr ama ní kaa kpíì.» 32Kutaa wúntì ŋwìiń nyáń ní Jaakɔb yíkì Peeniyeel. U-kpìiŋŋu puee, u nìn dúlifí ní. 33An pu ní áli nì díǹ, Isirayeel yab kaa ŋmóò dinantaŋkpal nanti. Di sá bi nìn fáá Jaakɔb nantaŋkpal ní u-kpìiŋŋu yɔ̄tì.

Currently Selected:

Genèse 32: BASSARDC

Highlight

Copy