Genèse 31

1Jaakɔb nìn gbìl̄ Laaban jipɔmbi bí ki lì yii: «Jaakɔb fōō timbi baa wanti kɔkɔ, an wanti pu ní u kpántì ugaaja nee.» 2Jaakɔb nín kpēē Laaban nimbiinee, u dáań ki ká yii u nì u kansikin kaa ti mɔ̄ kii dooooyee an nín nìn bí puee. 3Ní ti-Dindaan bí Jaakɔb yii: «Nín̄ gítí a-naanjab tiŋkin a-dumpu, man làá nīn bí a-cee.»

4Niinee ní Jaakɔb tú bi yíiń u-nimpoobi Raseel nì Leeya bí dāan̄ u-cee kusaaun laakin u-waŋkuti bée. 5Bi bàn̄ Jaakɔb ceeyee ní u bí-bi yii: «M dáań ki ká ni-baa nimbiin yii man nì u kansikin kaa ti mɔ̄ kii dooooyee. Ama m-baa Nimbɔtiu bí m-cee. 6Nimbi ni-ba nyí m nín dū m-pɔŋŋu kɔkɔ ki túń ditundi ki tīī ni-baa puee. 7Ní an yaa bàà sá ú pà-mi puee ní ú cúú kpántí. U kpántì-mi míǹ ní áli ŋfunyɔm saalaa pu, ama Unimbɔti kaa kíí ú ŋá-mi digaŋgam. 8U yaa lī yii: <Tiwaŋkuti tin kɔkɔ cáá atanee di sá a-paatee>, tiwaŋkuti kɔkɔ màal̀ tin cáá atanee ní. U yaa tí lī yii: <Tiwaŋkuti tin kɔkɔ cáá iluntoonee di sá a-paatee>, tiwaŋkuti kɔkɔ tí màal̀ tin cáá iluntoonee ní. 9Unimbɔti di fōō ni-baa waŋkuti ki tīī-mi. 10Ŋyunti ŋun tiwaŋkuti bíi jɔ́ḿ tɔbee ní m ká kudamintiiu poon yii ijaa in bíi jɔ́ḿ isalee sá atan atan nì iluntoon iluntoon nì ŋmàtì ŋmati. 11Kudamintiiuee poon ní Unimbɔti tuuŋŋu yíiń-mi yii: <Jaakɔb!> Ní m kíí yii: <M sèé.> 12Ní ŋu bí-mi yii: <Yáatí kí kpèè, iŋɔjaa in bí ki jɔ́ḿ isalee kɔkɔ sá atan atan nì iluntoon iluntoon nì ŋmàtì ŋmati ní. M ŋá míǹ kun puee m ká Laaban nín ŋá-si puee. 13Man di sá Unimbɔti un nyántì u-ba ki dàkā-si Beeteel, laakin a nìn dū ditaŋkpal ki cóoǹ ki sītì di-pu ŋkpam ní ki pūtì ki pōoǹ-mee. Kɔŋkɔnnee yīkì kí nīn gítí a-tiŋkin, laakin bi màl̄-see.>» 14Ní Raseel nì Leeya kíí-u yii: «Timbi gíti cáá tigaajawan àá difakal diba ti-baa dicaŋkun kí fōōoo? 15U dū-ti ki gíiǹ binicambi ní, kun puee u nyáfì-ti ní ki fōō animbil ki jíń. 16An puee ti-baa gaajati tin Unimbɔti fōō u-ceeyee, timbi nì ti-biyaamu di yì. Min kɔkɔ Unimbɔti yaa bí yii á ŋée, ŋá míǹ.»

17Niinee ní Jaakɔb yōoǹ u-biyaamu nì u-nimpoobi ki kāaǹ igutaamu pu kí yīkì. 18U nìn yōoǹ ki kpáaǹ u-waŋkuti nì u-gaajati tin u nìn kāl̀ Padan-Aram ki kée kɔkɔ ki cáa nín gítí u-baa Isaaki cee Kanaan tiŋkin. 19Laaban nìn búntì kí cā u-piii kuti. Ŋyunti gbanti ní Raseel yùn̄ u-baa waaŋi. 20Ní Jaakɔb bál̀ Laaban uaranja ki yíkì kaa kāaǹ-u. 21U nìn kpáaǹ u-wanti tin u cááyee kɔkɔ ki cūtìi dūtì Eefiraati mɔɔkpaandi ní ki dū u-ba ki túĺ Galaadi jool watil pú.

22Jaakɔb yíkìi sáǹ iwiin ita boon ní bi dāa nín tùkū Laaban. 23Niinee ní Laaban yōoǹ u-nabiyaamu ní bi nín jì Jaakɔb boon. Bi cōom̀ iwiin iluli ní ki tin nín cúú-u Galaadi jool pu. 24Ama kunyeeuee ní Unimbɔti nyántì u-ba ki dàkā Laaban uaranja kudamintiiu poon ní ki bí-u yii: «Á cúú a-ba kí taa lì Jaakɔb tiba nì tiba, kí taa ŋá-u tikpitil báà tiba.»

25Ŋyunti ŋun Laaban dūu bàn̄ Jaakɔb ceeyee, Jaakɔb gāā u-tantiu Galaadi jool pu, ní Laaban nì u-nabiyaamu mun gāā bi-tantib Galaadi jool gbanti pu. 26Ní Laaban bālifì Jaakɔb yii: «Ba ŋá ní a ŋá mimmee? Ba pu ní a kíil̀-mi ki kpáaǹ m-bisalib ki búntì kii kujaau ní a cūtì ki jáń ki cúuń-bee? 27Ba pu ní a kíil̀-mi ki sáǹ dibalin míǹ kaa kāaǹ-mi? M bàà kàantí-si nì ifaal ní kí yàntī bí gāā ilan kí bɔ̀ɔ̀ ŋgaŋgamu nì tibati. 28Aa yāntì m kpàl̄ m-bisalib nì m-naantiibi ki kāaǹ-bi. Min a ŋá nee sá digbaandi ní. 29M bàà cáá nsan kí ŋá-ni tin kaa ŋān̄ee, ama fool kunyeeu ní a-baa Nimbɔtiu fu sòon̄ nì mi ki bí-mi yii: <Á cúú a-ba kí taa lì Jaakɔb tiba nì tiba, kí taa ŋá-u tikpitil báà tiba.> 30Kɔŋkɔnnee a-landɔkɔŋu gítì a-baa cindi pu ní a yíkì ki kùǹ, kin ba pu ní a gíti yù man waaŋi?» 31Ní Jaakɔb kíí Laaban yii: «M fāŋkì ní ki dākafì yii m yaa kāaǹ-si, an yaa yíì a làá fōō a-bisalib. 32Ama un cee ní a yaa ká a-waaŋee, bí kpɔ̀-u. Ti-nabiyaamu kɔkɔ di bí nee. Dāan̄ m-cee kí kpèè a yaa ká a-wanti tiba á yòon̄.» Jaakɔb kaa nìn nyí yii Raseel di yùn̄ awaa.

33Ní Laaban nín kóò Jaakɔb tantiun ki kpēē, ní ki kɔ́ Leeya yɔun ki kpēē, ní ki kɔ́ inimpuyumbu liitil cee ki kpēē kaa ká báà tiba. U nyáń Leeya ceeyee ní ki nín kóò Raseel tantiun. 34Raseel nìn yōoǹ awaayee ki dūu bál̀ ugutaamu gakal taapu ní ki kāl̀ an pu, ní Laaban kɔ́ ki kpēē u-tantiu poon kɔkɔ ní kaa ká tiba. 35Ní Raseel bí u-baa yii: «M nín ká-si kaa yíkèe, án taa wà-si, di sá yii m ká m-ba ní.»

Ní Laaban kpēē kaa ká awaa. 36Niinee Jaakɔb fōō Laaban pu diŋuul ní ki yíkìi nyáń u-pu, ní ki bí-u yii: «Tilati ní m yīntiǹ-si? Ikpiti ilai ní m ŋá-si ní a jìǹní m-boon nì dibaatandi míǹ? 37A nín kpēē m-wanti kɔkɔee, a ká a-wanti tiba bí poonaaa? A yaa ká, á nyāntiń-tì man nib nì si mun nib nimbiin bí sòoǹ kí tīī-ti. 38M kāl̀ a-cee abin mmuŋku ní. Dalba dalba a-piiu àá a-ŋoobuu ubɔ kaa lātì. Maa tí dáká a-piii poon upìja ubɔ nanti mun ki ká. 39Tiba di yaa cúú a-waŋkuluuku kubɔee, maa cāabìń-si diwaŋkpil, see ḿ nyàab̀ kí téeǹ kun an cúúyee yil. A-waŋkuti tin bi yù ŋwiimpuee nì tin bi yù kunyeeuee#31.39 Dūú ŋmàntī nì Disa 22.12, Amoo 3.12., a bàlifī-mi ní ḿ téeǹ-si. 40Ŋwiimpuee, ŋwìiń ŋmóò-mi ní kí kpɔ̀, ní kunyeeuee, tiwool ń kɔ́ kí dóó-mi ní ŋgeem ń wāŋkì m-nimbiliŋin. 41Abin ŋin m ŋá a-ceeyee kpáfì mmuŋku dee. M túń a-bisalib liitil pu ditundi dibindi diba kpá saalku ní ki tīī-si, ní ki dū abin aluu ki kpāā a-waŋkuti. Ŋfunyɔm saalaa pu ní a mūul̀-mi ki kpántì m-paati. 42An yaa kaa sá m-baa Isaaki nì m-naanja Abraam Nimbɔtiu, Unimbɔti un m-baa Isaaki jáaḿ ki fàŋkée pu, a bàà làá yàntī ḿ nīn fàtīi gítí nì iŋaŋkulim ní. Ama Unimbɔti ká m-falaau nì m-tundi din m túńee. An pu ní fool nyeekuee, u fu sòon̄ ki kpáafì-si.» 43Ní Laaban kíí Jaakɔb yii: «Binimpoobi nee sá man bisalib ní, ní bi-biyaamu sá man biyaamu. Ipii nee sá man piii ní, tin kɔkɔ a pée wāĺ nee sá man wanti ní. Díǹ pu nee, ba ní m làá ŋá kí tīī m-bisalib nì bi-biyaamu mun bi màl̄ee? 44An ŋmāntì man nì si tí sòoǹ kí bóob́ kí pòon̄ tɔb, án nīn sá kudaaŋŋu man nì si kansikin.»

45Niinee ní Jaakɔb píí ditaŋkpal ki cóoǹ án nīn sá-bi kudaaŋŋu. 46Ní ki bí u-nabiyaamu yii bí tòò ataŋkpee kí bíĺ dikpúkul. Bi tōō ki bíl̀ee ní bi-kɔkɔ kāl̀ di-pu ki jíń tijin. 47Ní Laaban pú ditaŋkpakpukulee diyindi u-sooŋyi poon yii Yeegar-Saaduta, ní Jaakɔb mun yíiń-dì u-sooŋyi poon yii Galeedi. 48Ní Laaban bí yii: «Ditaŋkpakpukul nee di sá dipoondi din dōoǹ man nì si kansikinee daaŋku.» An pu ní bi pú mpaan gbanti diyindi yii Galeedi, taapu di sá yii: <Kudaaŋŋu taŋkpakpukul>. 49Bi gíti pú niin diyindi yii Miisipa, taapu di sá yii: <Unimbɔti ń nīn bí ki wāĺ-ti.> Di sá Laaban nìn bí yii: «Unimbɔti ń nīn bí ki wāĺ man nì si kansikin ti yaa kaa dāa gíti bí ki wāĺ tɔbee. 50A yaa láa cáá binimpoobi ki kútì ní ki ŋúb́ man bisalib ki sàantée, báà ubɔ yaa kaa dāa bí ki wāĺ tin a bí ki ŋáańeeyaaa, á nīn nyí yii Unimbɔti bí ki wāĺ tin bí ki jītí man nì sii kansikinee.»

51Ní Laaban gíti bí Jaakɔb yii: «Kpèè ditaŋkpakpukul nee, kí kpèè ditaŋkpal din m cóoǹ án nīn sá man nì si kansikin kudaaŋŋu nee. 52Ditaŋkpakpukul nee nì ditaŋkpal din cɔ́ nee di sá-ti kudaaŋŋu yii man kaa làá lákatí ditaŋkpakpukul nee pu kí póotí a-pu, si mun ń taa lákatí ditaŋkpakpukul nee nì ditaŋkpacooŋkaal nee pu kí póotí man pu kí ŋá tikpitil. 53Abraam nì Naakɔɔr Nimbɔtiu un sá bi-baa Nimbɔtiuee ń dāá sòoǹ man nì sii kansikin bɔti#31.53 Naakɔɔr nìn sá Abraam nabiki ní (Diny 11.26) ní ki sá Laaban naanja (24.24, 29)..»

Ní Jaakɔb pūtì Unimbɔti un u-baa Isaaki nìn jáaḿ ki fàŋkée. 54Boonee ní Jaakɔb ŋá saraa ubɔ dijool pu niin ní ki yíiń u-nabiyaamu bi kpáfìi jíń tijin ní ki gbíntì dijool pu niin ki dōoǹ.

Currently Selected:

Genèse 31: BASSARDC

Highlight

Copy