Genèse 33

Jaakɔb nì Eesayuu kansikin mɔ́ɔkì

1Jaakɔb bí yii ú kpèèyee, Eesayuu nì u-nikitil alaataa anaa di páaǹní ki dòońee. Niinee ní u cúú mbiyaamu ki yākatì ki tīī Leeya nì Raseel nì inimpuyumbu liitil. 2U dū inimpuyumbuee liitil nì bi-biyaamu ki līntì nyɔkɔpu, ní ki dū Leeya nì u-biyaamu ki páaǹ, ní ki dū Raseel nì u-jipɔɔn Jooseefi ki lúŋkì. 3Ní úǹ u-ba līntì nyɔkɔpu. U nìn gbāaǹ ŋfunyɔm miluli ní ki nín bàn̄ u-maan. 4Niinee Eesayuu sáǹ ki túŋkì-u, ki ŋàan̄ ki cìb̄-u ní bi-kɔkɔ bíi sūǹ. 5Eesayuu ká binimpoobi nì mbiyaamuee ní u bālifì Jaakɔb yii: «Binib bilab di pá a-boon nan ní?» Ní u kíí-u yii: «An sá mbiyaamu mun Unimbɔti ŋá man a-tɔntɔnliu tiŋan ki pú-mee.»

6Ní inimpuyumbuee nì bi-biyaamu sútì ki pìl̄ Eesayuu ní ki gbāaǹ u-nimbiin. 7Ní Leeya nì u-biyaamu mun sútì ki pìl̄-u ní ki gbāaǹ u-nimbiin, ní Jooseefi nì u-na Raseel mun sútì ki pìl̄-u ní ki mun gbāaǹ u-nimbiin. 8Ní Eesayuu bālifì-u yii: «A làá ŋá ba tiwaŋkuti tin m tú nsanni an fù bìti bitee ní?» Ní Jaakɔb kíí-u yii: «M nín là kí ká disaasɔl a-ceeyee pu ní m tīiń-si tiwan gbanti.» 9Ní Eesayuu kíí-u yii: «M-nabiki, m cáá tigaajati tikpil, dū a-wanti kí kpāafì.» 10Ní Jaakɔb kíí-u yii: «Aayee, m gbāam̀-si, a yaa nyí yii a súń m-saai, á fōō tiwan tin m tīī-si nee. Di sá yii a nín fōō-mi tiŋan m wál̀ a-nimbiinee, an bí kii Unimbɔti nimbiin ní m wál̀ee. 11Míǹ puee m gbāam̀-si, fōō tiwan tin m tīī-si nee, kun puee Unimbɔti bīiǹ m-boon ní báà tiba kaa lóò-mi.»

U páb́ Eesayuu mimmee ní u dāa fōō. 12Ní Eesayuu bí-u yii: «Tí yīkì kí nīn cá, m làá céeǹ-si.» 13Ní Jaakɔb kíí-u yii: «M-kpiliu, a nyí yii mbiyaamu pɔ̀fì ní m cáá ipii nì iŋoobu nì inaa in dáá màl̄ mpɔmee. Ti yaa làá kpáaǹ-i kí còom̀ malaa malaa, ŋwimbambaanti ní i-kɔkɔ làá kpú. 14Míǹ puee sii lìntī kí nīn cá, man a-tɔntɔnliu nì tiwaŋkuti nì mbiyaamu ń nīn còomìń soooo soooo ki dòoń, kí dāá bàń a-cee Seeyiir tiŋkin.» 15Ní Eesayuu bí-u yii: «M làá yàntī binib bin nóoń-mee dijandi ń gbíntí a-cee sii nì bi ń táá kí nīn dòoń.» Ní Jaakɔb kíí-u yii: «Ba pu ní a làá gíti ŋá míǹ? Ḿ pée ká sii m-kpiliu cee diyimɔɔl di sá.»

16Ŋwiin gbanti ní Eesayuu fātìi kíĺ nsan ki nín gítí Seeyiir tiŋkin.

17Ní Jaakɔb úǹ búntì Sukooti#33.17 Sukooti tiŋki kaa dátiǹ Yaabɔki buŋŋu. tiŋkin, ki bàn̄ ki máń u-diiŋŋi ní ki gāā u-waŋkuti tibìń. An pu ní bi yíì niin yii Sukooti, taapu di sá yii <Tibìń.>

Jaakɔb bàn̄ Kanaan tiŋkin

18Jaakɔb nyánní Padan-Aram ki bàn̄ Siikeem, Kanaan tiŋkin nì ŋgbampɔn ní ki gāā u-tantib kitiŋ caŋin ki kāl̀. 19U nìn dá ntampaan ŋun pu u gāā u-tantibee Amɔɔr biyaamu cee. Amɔɔr gbanti di nìn sá Siikeem baa. U nìn dá ntampaan gbanti animbil jitɔmbi dilaataal ní. 20U nìn máń nsaraafan niin, ní ki pú ntampaan gbanti diyindi yii <Eel, Isirayeel Nimbɔtiu>.

Currently Selected:

Genèse 33: BASSARDC

Highlight

Copy