Mark 12

Ha Alig Chi Mantangkon Si Pita

(Mat. 21:33-46; Luk. 20:9-19)

1Ot inyalig Jesus un kalala kan chicha, “Inggew chi osaʼn tagu un lammuɏà grapes. Ot ilaɏedla lampalikwos, ot ummabut si byetu ta asila mangkupisan si bungala. Ot langwa bo si mantaklang un sigey ta inggewan cha man-aachug. Ot impatangkonla ot ummoy si sabyaliʼn ili.#12:1 Isaiah 5:1-2 2Gummatong pu timpun chi man-aapit, imbuunla osaʼn bubùulola ta umoy mangaɏa si buwwala. 3Ngim cha lantangkon, chilokmaancha hachiʼn bubùulola ot bilokbokcha siya ot pileɏyawcha un lappun illidchoncha. 4Kasinla bo imbuun chi osaʼn bubùulola ot pilang-okcha uɏula ya kingwacha kabibìilan kan siya. 5Ot kasinla bo imbuun chi osa, ot pilatoycha siya. Ot katchi bo killingwacha si losan un bubùulola un imbuunla, pin-acha bilokbok cha uchum ya pilatoycha bo cha uchum. 6Hachi ked, lappun uchum un ibuunla, abus chi alaklaʼn leɏakiʼn tagtagopola. Si alungusla, imbuunla siya kan chicha, kalala, ‘Mabiincha ked kan siya.’

7“Ngim gummatong pu alakla, kalan cha lantangkon, ‘Allaya sinlaksun si allaʼn pita. Umali kayu ta patoyon taku siya ta mangkuwa taku laksunla!’ 8Ot chilokmaancha siya ot pilatoycha, ot imbyellucha lechegla si lasin chi pita un lamuɏ-an si grapes.”

9Ot ilimus Jesus, “Simma koon chi singkuwa si pita? Umoyla patoyon cha hachiʼn lantangkon ked impatangkonla pitala kan cha uchum. 10Ha achipunyu kamman bilasa liigili si ugud Apudyus mipanggop si allaya? Kalala,

‘Ha byetu un illissan cha lampaud un kalanchaʼn lappun simbila,

siya lambyalilon Apudyus un kapotogen un mangimpon-ed si misaachen chi byeɏoy.

11Si Apudyus chi langwa si allaya ked lakaskaschaaw chi mangitullongan taku.’ ”#12:11 v. 10-11 Psalm 118:22-23

12Pilachas cha papangat cha Judio un chokmaan siya ti laawatancha un chicha pasagichela si inyaligla. Ngim ummogyatcha kan cha amod un tagu, tilelancha siya ot ummoyoncha.

Ha Mipanggop Si Bugis

(Mat. 22:15-22; Luk. 20:20-26)

13Oli pun, imbuuncha cha uchum un Pariseo ya uchum un tagun Herod ti pionchaʼn lubuton siya si ibyegala. 14Ummoycha kan siya ot kalancha, “Mistulu, ammumi un tuttuwa cha losan un ibyegam. Ammumi boʼn achipunlu laksigon chi tagu ulay silu kilasasaedla. Ngim siyad itudtuchum chi katuttuwaan mipanggop si pion Apudyus un koon cha tagu. Ked ibyegam u kan chikami lu suplingonmi lintog taku un Judio lu mambyayed kami si bugis si Emperador willu achipun?”

15Ngim ammun Jesus un pionchaʼn sikapan siya ot kalala kan chicha, “Payuggey sakon mangin-in-an? Itchelak si pilak ta itullongku.”

16Illidchencha pun, kalan Jesus kan chicha, “Himma sinlupa ya singngachen si alla?”

Ot kalancha, “Si Emperador Caesar.”

17Ot kalan Jesus kan chicha, “Lu katlat, idchonyu kan Emperador chi uwala ya idchonyu bo kan Apudyus chi uwan Apudyus.” Chingngeɏcha pu hachi, laslaschaawcha kan siya.

Mipanggop Si Umuliyan Chi Tagu Un Latoy

(Mat. 22:23-33; Luk. 20:27-40)

18Ot ummoy cha uchum un Saduceo kan Jesus makaim-imus. Cha Saduceo, achipun cha patiyon un umuli matagu kasin cha latoy. 19Kalancha, “Mistulu, inggilin Moses chi allaya para kan chitaku, ‘Lu langasawa osaʼn leɏaki ked latoy un lappun alakcha, masapuɏ un asaw-on chi suludla chi labyaɏu ta umalakcha un mibilang alak chi hachiʼn latoy un suludla.’#12:19 Deuteronomy 25:5 20Inggew cha pituʼn lelleɏakiʼn mansusulud. Langasawa panguɏu ot latoy un lappun alakcha. 21Ot ilasawan chi mikadwa chi labyaɏu ot latoy bo un lappun alakcha. Ked isula bo si mikatlu, 22inggala ilasawala losan cha pitu un mansusulud. Latoy cha losan un lappun alakcha. Ked ha alungusla, latoy bo byebyai. 23Ked lu umuli kasin matagu cha latoy, silu ustu un sin-asawa kan siya? Ti losan chaʼn pitu ilasawa siya.”

24Summongbyat si Jesus un kalala, “Laillachu kayu ti achipunyu maawatan chi liigili si ugud Apudyus ya kilabyelinla.

25“Ti lu umuli matagu cha latoy, achipun cha man-as-asawa ti miyisucha kan cha angheles ud langit.

26“Ked ha mipanggop si umuliyan cha latoy mataguwan kasin, achipunyu kamman bilasa inggilin Moses mipanggop si umapu-apuy un kayu? Ti kalan Apudyus kan siya, ‘Sakon si Apudyus un chaychayawon cha Abraham, Isaac ya Jacob.’#12:26 Exodus 3:6

27“Ha piolaʼn uguchon ked matagu kasin cha latoy, ti si Apudyus ked chakampun un Apudyus cha latoy, ngim Apudyus cha matattagu. Patunged kayu laillachu!”

Ha Kapopotgen Un Bilin

(Mat. 22:34-40; Luk. 10:25-27)

28Ot inggew chi osaʼn mistulun chi lintog un langngeɏ kan cha Saduceo un lakasongsongbyat kan Jesus. Ot chingngeɏla un ustu insongbyat Jesus kan chicha, ilimusla kan siya, “Kan cha losan un bilin Apudyus, simma kapotogen?”

29Summongbyat si Jesus, “Ha kapotogen un bilin Apudyus ked. ‘Chikayun galak Israel, ammanyu chongɏon. Ossaan chi Apu taku un si Apudyus, lappun uchum. 30Ked masapuɏʼn ayatom si Apudyus si losan un somsomoklu, si losan un kalichodwam, si losan un kilalainglu ya si losan un koscheɏm.’#12:30 v. 29-30 Deuteronomy 6:4-5

31“Ked allaya mikadwa, ‘Masapuɏʼn ayatom cha asintatagum un isun chi man-aayatlu si long-eglu.’#12:31 Leviticus 19:18 Lappun uchum si kapotogen un bilin lu cha allaʼn chuwa.”

32Ot kalan chi mistulun chi lintog kan siya, “Ustu insongbyatlu. Tuttuwa imbyegam un ossaan si Apudyus un Apu taku, ya lappun uchum ngim siya abus.#12:32 Deuteronomy 4:35 33Ked tuttuwa un masapuɏʼn ayaton taku siya si losan un somsomok taku, si losan un kilalaing taku ya si losan un koscheɏ taku ya ayaton taku cha asintatagu taku un isun chi man-aayat taku si long-eg taku. Lapotpotog un tuttuwaon taku cha allaʼn chuwaʼn bilin lu manchatun si losan un michatun kan Apudyus.”#12:33 Hosea 6:6

34Chingngeɏn pun Jesus chi kilalaing chi songbyatla, kalala kan siya, “Allà akit un mipatika si Mampangatan Apudyus.” Ked inggala si hachi, lappun uchum un lateɏod un makaim-imus kan siya.

Silu Singgalak Kan Kristu?

(Mat. 22:41-46; Luk. 20:41-44)

35Si lantudtuchuwan Jesus si templo, kalala, “Puggey cha mimistulun chi lintog ibyega un ha Kristu ked galak David? 36Ti impaibyegan chi Ispiritun Apudyus kan David un kalala,

‘Si Apudyus un Apu, kalala kan Apuk: Umamuyka si machuwalanku,

inggala ipaabyakku cha losan un kabusuɏm.’#12:36 Psalm 110:1

37“Lu ilawagen David si Kristu un Apula, himma in-ilolaʼn galak David si Kristu?” Ked lagalasan cha achun tagu un lanchochongngeɏ kan Jesus.

Ha Imbyegan Jesus Kan Cha Mimistulun Chi Lintog

(Mat. 23:1-36; Luk. 20:45-47)

38Si lantudtuchuwan Jesus, kalala kan chicha, “Allechenyu cha mimistulun chi lintog, ti pipionchaʼn iliklikwos chi anchu-anchu un silupcha ya memeɏyedchaʼn chaychayawon cha tagu chicha si mekit. 39Ya piliyancha boʼn umamuy si kapopotgen un tugew si sinagoga ya pionchaʼn chicha machaychayaw lu awed piyasta. 40Sikapancha bo cha labyaɏu ta eɏancha cha kukkuwacha, ya anchu-anchuwoncha luwalucha si sangwalan cha achuʼn tagu. Ked gapu si hachi, manchegson chi kachusaancha.”

Ha Illidchon Chi Labyaɏu Kan Apudyus

(Luk. 21:1-4)

41Ot ummamuy si Jesus si chomang chi iiggaan si pilak si templo, ot intutullongla cha achuʼn taguʼn pin-acha mangitup-ung si pilak. Ked sin-adchu itup-ung cha byabyaklang. 42Ot lilumlok chi osaʼn kapus un labyaɏu ot intup-ungla chuwaʼn siping. 43Ot ilayagen Jesus cha disipulusla ot kalala kan chicha, “Tuttuwa ibyegak kan chikayu. Ad-achu intup-ung chi kapus un labyaɏu si iiggaan si pilak lu cha losan un pin-a langigga si pilakcha. 44Ti cha uchum, siyad illidchoncha saweɏn chi pilakcha. Ngim ha allaʼn labyaɏu, ulay kapus, illidchola losan un awed kan siya un useɏola si mataguwala.”

Currently Selected:

Mark 12: HUA

Highlight

Copy